An Patotoo Kan Propeta na si Joseph Smith
An sadiring manga tataramon kan Propeta na si Joseph Smith manunungod kan pagluwas kan Libro ni Mormon iyo an manga ini:
“Kan banggi kan…ika-beinte y uno kan Septiembre [1823]…idinusay ko an sakuyang sadiri sa pagpamibi asin pagngayo-ngayo sa Makakamhan na Dios. …
“Mantang ako nasa pag-apod sa Dios, nariparo ko an liwanag na nagsinag sa sakuyang kuwarto, na nagpadagos magdakol sagkod na an kuwarto nagliwanag na orog pa sa udto nin kaaldawon, kan an sarong tawo tulos na nagpahiling sa harani kan sakuyang higdaan, nagtitindog sa paros, dahilan ta an manga bitis niya dai nakaduta sa salog.
“Nakasulot siya nin mahiwas na bata na maputi na gayo. Idto sarong kaputian na orog pa sa ano man na bagay na nahiling ko digdi sa kinaban; ni ako nagtutubod na an ano man na bagay sa daga magibo na mapution asin maliwanagon. An manga kamot niya daing nakakatakop, siring man an saiyang manga braso, sa oroitaas kan saiyang pulsohan; siring man an saiyang manga bitis dai nin nakakatakop, siring man an saiyang manga tabay, sa oroitaas kan buko-buko. An saiyang payo asin liog dai man nin nakakatakop. Sakuyang nariparo na dai siya nin ibang gubing na sulot kundi an batang ini, ta ini bukas, kaya nahiling ko sagkod an saiyang daghan.
“Bako sana na an saiyang bata maputi na gayo, kundi an saiyang bilog na pagkatao mamurawayon nanggad na dai maipaliwanag, asin an saiyang lalawgon garo nanggad kikilat. An kuwarto maliwanag na gayo, alagad bako maliwanag na siring sa nakapalibot sa saiyang pagkatao. Kan enot kong nahiling siya, natakot ako; alagad nahali man tulos an takot ko.
“Inapod niya ako sa pangaran, asin nagsabi sa sakuya na siya sarong mensahero hali sa atubangan kan Dios na sinugo sa sakuya, asin ta an pangaran niya si Moroni; na an Dios igwa nin ipapagibo sa sakuya; asin ta an pangaran ko igagalang asin raraoton sa gabos na manga nasion, manga rasa, asin manga tataramon, o na ini paghuhuroronan sa karahayan asin karaotan sa gabos na tawo.
“Sinabi niya na igwa nin libro na nakatago, na nakasurat sa manga plakeng bulawan, nagtatao kan kasaysayan kan manga naenot na manga nag-eerok sa kadagaan na ini, asin an poon kan saindang ginikanan. Sinabi man niya na an kabilogan kan daing-kasagkuran na Ebanghelio napapalaman duman, siring kan itinao kan Paraligtas duman sa manga naenot na manga tawo;
“Igwa man nin duwang gapo na nasa manga platang arko—asin an manga gapong ini, nakatakod sa tahob sa daghan, ini iyo an pig-aapod na Urim asin Thummim—itinago kaibahan kan manga plake; asin an nagkakaigwa asin nakakagamit kan manga gapo na ini iyo an Nakakakita kan manga suanoy o enot na manga panahon; asin ta an Dios hinanda an manga ini para sa katuyohan na pagsalin kan libro.
“Liwat, sinabi niya sakuya, na pag nakua ko na an manga plakeng sinabi niya—huli ta an panahon sa pagkua kan manga ini dai pa nauutob—dai ko an manga ini ipagpahiling maski kiisay man; maski an tahob sa daghan na igwa kan Urim asin Thummim; duman sana sa ipinagboot sakuya na pahilingan kan manga ini; kun gigibohon ko ini ako magagadan. Mantang nakikipaghuron siya sakuya manunungod sa manga plake, an bision nabuksan sa sakuyang isip na nahiling ko an lugar kun sain an manga plake natatago, asin ini maliwanag asin malinaw na gayo ta namidbidan ko an lugar giraray kan ini dumanan ko.
“Pagkatapos kan paghuron na ini, nahiling ko an liwanag sa kuwarto na nagpoon magtipon tulos-tulos sa palibot kan tawo na nakipaghuron sa sakuya; asin ini nagpadagos sagkod na an kuwarto naging madiklom giraray, bako an palibot saiya; kan, bigla na nahiling ko siring sa enot, garo agihan na nagbukas pasiring sa langit, asin siya nag-itaas sagkod na siya bilog nang nawara, asin an kuwarto naging siring giraray kan bago an langitnon na liwanag nagpahiling.
“Nakahigda akong naghorop-horop kan daing-kabaing na pangyayari, asin nagngalas nin gayo sa manga itinaram sa sakuya kan napapalaen na mensahero; kan, sa katahawan kan sakuyang paghorop-horop, bigla kong nariparo na an sakuyang kuwarto sa giraray na nagliliwanag, asin tulos-tulos siring sa enot, an dating langitnon na mensahero yaon na naman sa harani kan sakuyang higdaan.
“Siya nagpoon, asin giraray isinaysay an dating manga bagay siring sa saiyang ginibo kan enot niyang pagdalaw, na dai nin pagkakaiba; kun haen pagkatapos, ipinaaram niya sakuya an dakulang manga paghukom na maabot sa ibabaw kan kinaban, na igwang kairibahan na manga makuring kamundoan sa paagi nin gutom, espada, asin manga kahilangan; asin ta ining manga makangiring manga paghukom maabot sa kinaban sa kapagarakian na ini. Pagkatapos na isaysay an manga bagay na ini, siya giraray nag-itaas siring kan enot niyang ginibo.
“Sa oras na ini, orog na hararom an manga nakatala sa sakuyang isip, kaya dai na ako nangiturog, asin ako nakahigda na pano nin pagngalas kan sakuyang manga nahiling asin nadangog. Alagad anong pagkabigla ko kan giraray nahiling ko an dating mensahero sa harani kan sakuyang higdaan, asin nadangog ko siya nagtataram giraray o sinabi liwat sakuya an manga bagay siring kan enot; asin nagdagdag siya nin patanid sakuya, sinabi niya sakuya na si Satanas babaloon na sugotan ako (dahilan sa pagkadukha kan pamilia kan sakuyang ama), na kuahon an manga plake sa katuyohan na maging mayaman. Ini ipinangalad niya sakuya, sa pagsabi na kaipuhan dai ako magkaigwa nin ano man na ibang katuyohan sa pagkua kan manga plake kundi an mapamuraway an Dios, asin dai magpadara sa ano pa man na kaisipan kundi an pagpatindog kan Saiyang kahadean; ta kun dai, dai ko makukua an manga ini.
“Pagkatapos kaining ika-tulong pagdalaw, siya giraray nag-itaas sa langit siring kan nakaagi, asin nabayaan giraray akong naghohorop-horop kan ngangalasan na sakuyang naagihan pa sana; tulos kan an langitnon na mensahero puminaitaas hali sakuya sa ika-tulong ulit, an manok nagturaok, asin nariparo ko na nagdangadang na an maagahon, kaya an samuyang paghuron-huron nagamit gayod an bilog na bangging idto.
“Pagkatapos dai nahaloy nagbangon na ako sa sakuyang higdaan, asin, siring sa dati, nagpoon na ako maggibo kan manga gibohon sa aroaldaw, alagad sa pagpoon kan paggibo ko siring kan ibang manga aldaw nariparo ko na dai akong kusog kaya dai ako makahiro. An sakuyang ama, na kaibahan ko sa paggibo, nalaenan sako, asin sinabi sakuya na magpuli ako. Nagpoon na akong maglakaw papuli sa harong alagad sa paghinguha ko na bumalyo sa kudal sa luwas kan samuyang namugtakan, linuya ako nin labi-labi, asin ako natumba sa daga, asin ta taod-taod dai na akong pakaisi kan ano man na bagay.
“An enot na bagay na sakong narumdoman iyo an sarong tingog na nagtaram sakuya, inaapod ako sa pangaran. Naghiling ako sa itaas, asin nahiling ko an dating mensahero na nagtitindog sa tangod kan sakuyang payo, napapalibotan nin liwanag siring kan enot. Isinaysay niya giraray sa sakuya an gabos na itinaram niya sa sakuya kan nakaaging banggi, asin pinagbotan ako na magduman sa sakuyang ama asin sabihon saiya an bision asin an manga katugonan na itinao sakuya.
“Nagsunod ako; nagbalik ako sa sakuyang ama sa lati, asin isinaysay ko an bilog na pangyayari saiya. Sinimbag niya ako na idto sa Dios, asin sinabi niya sakuya na maghali na asin sunodon an manga ipinagboot kan mensahero. Naghali ako sa lati, asin nagduman sa kun sain sinabi kan mensahero na yaon an manga plake nakatago; asin dahilan sa kalinawan na gayo kan bision mapadapit kaini, namidbidan ko tulos an lugar kan ako mag-abot duman.
“Harani sa banwaan kan Manchester, Ontario county, New York, igwa nin bulod na igwang kadakulaan asin iyo ini an pinakahalangkaw sa kapalibotan. Sa sulnopan na lado kan bulod na ini, bako harayo sa tuktok, sa irarom nin sarong gapo, na igwang kadakulaan nakabugtak an manga plake, nasa laog nin sarong gapo na kahon. An gapong ini mahibog asin pabilog sa tahaw sa itaas, asin panipis pasiring sa manga gilid, kaya an tahaw kaini nahihiling sa ibabaw kan daga, alagad an gilid natatahoban nin daga sa palibot.
“Pagkahalia kan daga, nagkua ako nin panggiwat, na inirarom ko sa gilid kan gapo, sa paggamit nin diit na kusog itinaas ko ini. Naghiling ako sa laog, asin duman nanggad nahiling ko an manga plake, an Urim asin Thummim, asin an tahob sa daghan siring sa sinabi kan mensahero. An kahon na nabubugtakan kan manga ini ginibo sa manga gapo na sinuruon-suon na garo nakasemento. Sa irarom kan kahon nakabugtak an duwang gapo na nakabalagbag sa kahon, asin sa ibabaw kan manga gapong ini nakabugtak an manga plake asin an ibang manga bagay na kairibahan kaini.
“Binalo ko na iluwas an manga ini, alagad sinaway ako kan mensahero, asin ta giraray tinaraman ako na an panahon na iluwas ini, dai pa nag-abot, ni ini maabot sagkod an apat na taon poon kan oras na idto; alagad sinabi niya sakuya na dumanan an lugar sa laog nanggad nin sarong taon poon kan oras na idto, asin ta siya duman, makipagtuparan sako asin ta ako magpadagos na maggibo kaini sagkod an oras mag-abot sa pagkua kan manga plake.
“Siring sa ipinagboot sakuya, nagduman ako sa katapusan kan lambang taon, asin ta sa lambang oras pagduman ko natutuparan ko an dating mensahero duman, asin nakakakua ako nin pasunod asin pakasabot hali saiya sa lambang paghuron niamo, mapadapit sa kun ano an gigibohon kan Kagurangnan, asin kun paano asin kun sa anong paagi an Saiyang Kahadean palalakawon sa manga huring aldaw.
“Sa kahaluyan uminabot na an oras para sa pagkua kan manga plake, an Urim asin an Thummim, asin an tahob sa daghan. Sa ika-beinte y dos na aldaw kan Septiembre, mil otso sientos beinte y siete, pagkatapos na magduman ako siring sa piggigibo ko sa lambang katapusan nin sarong taon sa lugar na namumugtakan kan manga idto, an dating langitnon na mensahero itinao an manga ini sakuya na igwang siring na tugon: Na ako an bahala kan manga ini; na kun ini mawara ko sa kakulangan nin pag-ingat, o sa ano man na kapabayaan, ako isisikwal; alagad kun gibohon ko an gabos na pag-ingat kan manga ini, sagkod na siya, an mensahero, hagadon an manga ini; an manga ini maiingatan.
“Dai naghaloy naaraman ko an dahilan kun ngata tinawan ako kan maigot na tugon na ingatan an manga ini, asin ngata ta an mensahero nagsabi na pag natapos ko na an ipinapagibo sakuya, babawion niya an manga ini. Huli ta dai pa nahaloy na maaraman na igwa ako kan manga ini, na an gabos na paghinguha ginibo tanganing makua nanggad ini sakuya. Lambang paagi na maisip ginibo para sa katuyohan na idto. An pag-usig naging orog na mapait asin makuri ki sa enot asin kadakol na manga tawo an danay na nagmawot na kuahon nanggad an manga ini sakuya kun magigibo. Alagad sa paagi kan kadunungan kan Dios, nagdanay na naingatan an manga ini sa sakuyang manga kamot, sagkod na matapos ko sa paagi kan manga ini an ipinapagibo sa sakuyang manga kamot. Kan, siring sa pinaghuronan, an mensahero hinagad an manga ini, itinao ko an manga ini saiya; asin yaon an manga ini sa saiyang pag-ingat sagkod sa aldaw na ini, na iyo an ika-duwang aldaw kan Mayo, mil otso sientos treinta y otso.”
An suanoy na manga kasuratan na kinua hali sa daga, siring sa tingog nin tawo na nagsasabi hali sa kabokabo, asin isinalin sa bagong tataramon sa paagi kan balaog asin kapangyarihan kan Dios, siring sa inuyonan kan Banal na pagpatunay, enot na ibinalangibog sa mundo sa Ingles sa taon na 1830 na iyo an The Book of Mormon.