Acuchi Elenek vi pe ri Vuj richin ri Mormon

Ri ojer lokʼolej tzʼibanic rubiniʼan ri Vuj richin ri Mormon cʼamatajinek cʼa pe roma ri José Smith. Que cʼa chukaʼ reʼ, rijaʼ rukʼaxan re vuj reʼ chupan ri chʼabel rubiniʼan inglés. Jariʼ xbanatej riqʼuin ri rusipanic y ri ruchukʼaʼ ri Dios. Ri José Smith xuben jun rutzijonic ri nusol rij re cʼulvachitajic reʼ. Xujiquibaʼ cʼa chi chakʼaʼ chupan ri 21 rajlabal ri icʼ septiembre richin ri junaʼ 1823, rijaʼ can xchʼo vi akʼanij riqʼuin ri Ajaf. Nabiyajinek chuvech ri akʼaʼ riʼ, rijaʼ xucʼul yan jun aj chicajel kʼalajirisanic ri janíla cʼatzinel chike. Jareʼ cʼa ri rutzijonic:

“Yitajin cʼa che chʼoven riqʼuin ri Dios, tok xintzʼet chi jun sakil xbecʼulun pe chiriʼ pa vachoch. Re sakil reʼ xnimer, xnimer, cʼa tok ri vachoch xicʼo ruviʼ sek xuben chuvech tok pa nicʼaj kʼij. Ja cʼariʼ, tok chek cʼateʼ xbecʼutmej pe jun vinek pa ruxiquin ri nuchʼat. Rijaʼ paʼel cʼa pa cakʼikʼ, y ri raken man xapon ta pan ulef.

“Ri vinek riʼ rucusan jun tziek man ximon ta y can janíla vi ruloʼxil. Ri ruloʼxil xa nicʼo ruviʼ loʼx chuvech xabachique chic ri nutzʼeton chuvachʼulef. Man ninnimaj ta cʼa chi cʼo jun chuvachʼulef ri nitiquir ta nitzuʼun y janíla ta ruchʼichʼanic y ruloʼxil achiʼel riʼ. Ri rukʼaʼ ri vinek riʼ e chʼanel cʼa pa ruviʼ akʼanij jubaʼ ri rukul rukʼaʼ. Can que chukaʼ riʼ rubanon ri caken cʼa pa ruviʼ akʼanij jubaʼ ri rukul raken. Xa manjun rucusan chukaʼ pa rujolon o pa rukul. Xitiquir cʼa xintzʼet chi manjun chic tziek rucusan, can xaxe vi ri jun ri man ximon ta. Ri tziek riʼ jakel y riqʼuin riʼ, nikʼalajin pe ruva rucʼuʼx ri vinek.

“Man xaxe ta ri rutziak janíla ruloʼxil, xa chukaʼ chijun ri rubanic ri vinek riʼ man tiquirel ta cʼa rutzijoxic. Ri ruchʼacul niyucʼuman achiʼel ri cʼaslic coyopaʼ. Ri ti vachoch janíla sakirinek chukaʼ. Man riqʼuin vi riʼ, man cʼa xukʼiʼ ta ri sakil ri xusutij rij ri vinek riʼ. Tok cʼa nabey xintzuʼ apon ri vinek riʼ, janíla xinxibij viʼ. Man riqʼuin vi riʼ, ri nuxibinriʼil xa xkʼax el chaʼnin.

“Rijaʼ xiroyoj riqʼuin ri nubiʼ. Xubij cʼa chi rijaʼ jun takonaxel takon pe viqʼuin, cʼa acuchi cʼo vi ri Dios. Xubij chi Moroni rubiʼrijaʼ. Xubij chukaʼ chi ri Dios cʼo jun nimalej rusamaj ruyaʼon pe chuve. Chukaʼ xubij chi ri nubiʼ yin xtinatex chi utzil y chukaʼ xtiyokʼotej chiquicojol conojel tinamit, ijaʼtzul y chʼabel. Pa jun chic rubixic, chiquicojol checonojel vinakul, chʼakaʼ xquechʼoʼ utz y chʼakaʼ xquechʼo itzel chirij ri nubiʼ yin.

“Xubij cʼa chi yacon can jun vuj tzʼibatajinek can chuvech xaxilej tak kʼana chʼichʼ. Ri vuj riʼ nutzijoj ri xquibanalaʼ ri ojer tak vinakiʼ ri xecʼojeʼ chupan re ruvachʼulef reʼ. Chukaʼ nutzijoj cʼa acuchi e petenek vi rijeʼ. Ri vinek xubij chi ri vuj riʼ rucʼuan chukaʼ ri rutzʼakatisanic ri junelic utzilej rutzijol ri xutzijoj can ri Colonel chique ri ojer tak vinakiʼ vaveʼ.

“Xubij chukaʼ chi caʼiʼ chay tak abej e yacon can quiqʼuin ri xaxilej tak chʼichʼ. Re chay tak abej reʼ e sutin roma saka chʼichʼ. Ri chʼichʼ riʼ tzʼamon chuvech jun toʼbel ruvacʼuʼxal. Jareʼ yebanon ri nibix chire ri Urim y Tumim. Xubij chi pa ri ojer tak kʼij, ri e cʼo re chay tak abej reʼ quiqʼuin, jecʼa rijeʼ ri xbitej chique Tzʼetonelaʼ. Xubij cʼa chi ri Dios e runucʼun can richin yeʼoc jun samajibel richin nikʼaxex ri vuj pa chʼakaʼ chic chʼabel …

“Que cʼa chukaʼ reʼ, xubij chuve chi xa manjani tokaʼ ri kʼij richin nincʼul ri xaxilej tak chʼichʼ riʼ, achojchiquij xtzijon vi yan. Man riqʼuin vi cʼariʼ, xubij chuve chi tok xtinbecʼuluʼ ri xaxilej tak chiʼichʼ riʼ, can man tincʼut cʼa chuvech manjun. Nicʼatzin cʼa chukaʼ chi man nincʼut ta ri ruvacʼuʼxal riqʼuin ri Urim y Tumim chuvech manjun. Vi xtincʼut cʼa, xa xquiqʼuis chiriʼ. Niyaʼox cʼa kʼij richin nincʼut chiquivech xaxe ri vinek ri yerubij ri Dios chuve. Rijaʼ najin che chʼoven viqʼuin chiquij ri xaxilej tak chʼichʼ tok xincʼulvachij jun tzʼetonic. Xintzʼet cʼa pa nunojibal acuchi yacon vi can ri xaxilej tak chʼichʼ. Ri tzʼetonic can xukʼalajirisaj chi utzil chinuvech y roma cʼariʼ tok vetaman chic ruvech ri cojlibel riʼ tok xinbecanoj.

“Tok qʼuisinek chic re tzijonic reʼ, xintzʼet chi ri sakil chupan ri ti vachoch xumol riʼ chirij y chuvech ri takonaxel ri xchʼo pe viqʼuin. Que cʼariʼ xuben, xa cʼa tok ri vachoch xcanej chic can jun bey pa kʼekuʼm. Xaxe oc chunakaj rijaʼ cʼa nisakirisan na. Ja cʼariʼ tok check cʼateʼ xintzʼet, xa achiʼel vi ta jun nimalej boraj sakil ruchojmin el riʼ cʼa chicaj. Chupan cʼariʼ xjoteʼ vi el ri vinek, cʼa tok jumul man xintzʼet ta chic. Cʼa cʼariʼ, ri vachoch xcanej can jun bey chic achiʼel ri rubanon can tok cʼa manjani titzʼucutej chiriʼ ri aj chicajel sakil.

“In cotzʼol cʼa tok xinchʼob rij ri nimalej cʼulvachitajic riʼ. Janila xinmey ri xubij chuve ri aj chicajel takonaxel riʼ. Yitajin cʼa chuchʼobic rij, tok chek cʼateʼ xintzʼet chi xbecʼulun pe ri sakil riʼ jun bey chic chupan ri vachoch. Ja cʼariʼ tok xa achiʼel vi ta pa jun anin, ri aj chicajel takonaxel riʼ xucʼut pe chic riʼ pa ruxiquin ri nuchʼat.

“Xuchop chic chʼoven y xucamuluj chic ronojel ri xutzijoj yan chupan ri nabey rupetebal viqʼuin, y can manjun vi xujel ta rubixic. Tok rucamulun chic ronojel riʼ, xutzijoj chuve ri cʼayevilej tak cʼajisabel ri cʼo chi xquerukʼaxaj re ruvachʼulef. Riʼ e rachibilan pe ri vululen ri xquecʼulvachitej roma ri vayijal, ri nimalej oyoval, y ri cʼayevilej tak yabil. Xubij chi re cʼayevilej tak cʼajisabel xquepe chuvachʼulef can chupan vi re kʼij reʼ. Tok rutzijon chic ronojel reʼ, rijaʼ xjoteʼ chic el chicaj, achiʼel ri xuben el ri nabey mul.

“Cʼa cʼariʼ, ronojel ri xincʼulvachij oquinek chic cʼa pa rucʼuʼx ri nunojibal. Roma cʼariʼ tok xa animajinek chic el ri nuvaran. In cotzʼol cʼa chiriʼ, janíla xinmey y xinchʼob rij ri xintzʼet y ri xinvacʼaxaj. Jariʼ tok xicʼo chic ruviʼ ri xinmey tok xintzʼet jun bey chic ri takonaxel, paʼel chic pa ruxiquin ri nuchʼat. Chiriʼ cʼa xinvacʼaxaj tok rijaʼ xutzijoj chic chuve pa rox mul ronojel ri xubij yan can. Cʼa cʼariʼ, xirupixabaj jubaʼ chic. Xubij chi ri Satanás xtutij rukʼij chinuyukʼic richin queriʼ ninrayij ta ninchop el ri xaxilej tak chʼichʼ richin yibeyomer. Y riʼ xa roma cʼa ri ruchinamit ri nataʼ xa jubaʼ oc kapuak. Xirupixabaj cʼa chi man tinben queriʼ. Xubij cʼa chi manjun chic tinrayij tok yicʼojeʼ can quiqʼuin ri xaxilej tak chʼichʼ, can xaxe vi richin ninyaʼ rukʼij ri Dios. Chukaʼ xubij chi man ta cʼa yitzak chupan manjun chic rayibel, xaxe ta cʼa ri rayibel pa ruviʼ ri rupabaxic ri rajavaren ri Dios. Vi ta xa cʼo jun chic nurayibal, xa man ta yeyaʼox pe chuve.

“Chirij cʼa re rox petebal reʼ, rijaʼ xjoteʼ chic el, achiʼel ri rubanon yan. Yin xicanej can chic jun bey richin ninchʼob rij ri nimalej cʼulvachitajic ri cʼa oc riʼ xincʼovisaj. Ja cʼariʼ, tok xa cʼa jubaʼ oc tijoteʼ el ri aj chicajel takonaxel pa rox mul, jariʼ tok xsiqʼuin cʼa pe ri mamaʼ. Ja cʼariʼ tok xinnabej chi xa nisaker yan pe. Chiriʼ cʼa, xinnabej chi ri tzijonic xekaben, xeyaloj laʼek chijun akʼaʼ.

“Xa jubaʼ chic oc chirij riʼ, jariʼ tok xiyacatej el pa nuchʼat y xinbebanaʼ ri samaj ri cʼo chi ninben, xa achiʼel ronojel kʼij. Man riqʼuin vi riʼ, tok xinvajoʼ ta xisamej achiʼel ri rucʼulun chic chuve, jariʼ tok xinnabej chi xa manjun chic vuchukʼaʼ. Roma cʼariʼ, xinnaʼ chi xa man yitiquir ta yisamej. Ri nataʼ xa nakaj oc nisamej vi viqʼuin chiriʼ. Rijaʼ xutzʼet cʼa chi xa achique na noc chuve. Cʼa cʼariʼ, xirutek el chikachoch. Xinel cʼa el chiriʼ richin yibe chikachoch. Man riqʼuin vi riʼ, tok xinvajoʼ ta xinkʼaxaj ri kejoj richin yinel ta pe chupan ri ulef acuchi yojsamej vi, ja cʼariʼ tok yin xinnaʼ chi xqʼuis jumul ri vuchukʼaʼ. Cʼariʼ, xitzak pan ulef. Man yitiquir ta cʼa chic yisilon. Xiyaloj cʼa xicʼojeʼ chiriʼ y xa manjun chic xinnaʼ.

“Chiriʼ cʼa, achique ri nabey xinnaʼ xa ja jun chʼabel ri xchʼo pe viqʼuin y xiroyoj riqʼuin ri nubiʼ. Xintzuʼ cʼa akʼanij y xintzʼet ri takonaxel paʼel pa cakʼikʼ pa nuviʼ. Rijaʼ sutivinek rij roma sakil, achiʼel ri rubanon can. Cʼa cʼariʼ, xutzijoj pe chic chuve ronojel ri xutzijoj yan chupan ri akʼ aʼ ri cʼa oc riʼ kʼaxinek can. Xubij cʼa chuve chi quitzolin riqʼuin ri nataʼ y tintzijoj cʼa chire rijaʼ ri tzʼetonic xincʼulvachij y ri pixaʼ xeyatej pe chuve.

“Xinnimaj cʼa rutzij. Xitzolin cʼa acuchi nisamej vi ri nataʼ pa juyuʼ. Chiriʼ xintzijoj chire rijaʼ ronojel ri xincʼulvachij. Xubij chuve chi ronojel riʼ xa richin ri Dios. Xubij chukaʼ chi tinbebanaʼ cʼa ronojel ri xubij can ri takonaxel chuve. Xinel cʼa pe chupan ri ulef riʼ y xibe pa ri cʼojilibel ri xubij ri takonaxel chuve, acuchi e yacon vi can ri xaxilej tak chʼichʼ. Tok xa cʼa jubaʼ oc quinapon chiriʼ, xinvetamaj cʼa ruvech ri cʼojlibel. Riʼ xa roma can kʼalaj kʼalaj vi xuben ri tzʼetonic ri xcʼutun ri cʼojlibel riʼ chinuvech.

“Jun ti juyuʼ check ti loman oc cʼo chunakaj ri chʼutiʼ tinamit rubiniʼan Manchester, chupan ri etanulef Ontario, pa ri nimaʼ tinamit rubiniʼan New York. Ri ti loman juyuʼ riʼ tzuputzic jubaʼ chiquivech checonojel ri e cʼo chiriʼ. Pa ruxiquin ri juyuʼ riʼ, pa ruchojmil acuchi nikaka vi ri kʼij, jubaʼ oc ruyaʼon can ri ruviʼ, chiriʼ cʼa, cʼo jun abej nim jubaʼ. Pa runicʼajal y pa ruviʼ ri abej riʼ can pim vi y setesic, ja cʼariʼ, ruchiʼ xa e xax oc. Roma cʼa ri queriʼ rubanic ri abej riʼ, can kʼalaj vi pe ruviʼ chupan ri ulef, jacʼa ri ruchiʼ man e kʼalaj ta pe pan ulef. Ri xaxilej tak chʼichʼe yacon can chuxeʼ ri abej riʼ chupan jun yaconbel, jaʼ, can abej chijun ri yaconbel riʼ.

“Tok velesan chic el ri ulef chuchiʼ ri abej riʼ, xinvil jun cheʼ. Cʼa cʼariʼ, xinjuʼ ri cheʼ chuxeʼ ri ruchiʼ ri abej y jubaʼ vuchukʼaʼ xinyaʼ, xintzekej akʼanij. Xitzuʼun cʼa ka chupan ri yaconbel y can kitzij vi xentzʼet ri xaxilej tak chʼichʼ, y ri Urim y Tumim, y ri toʼbel ruvacʼuʼxal, can achiʼel vi xubij can ri takonaxel. Ri yaconbel acuchi e cʼo vi can, che abej banon vi, e kʼolin riqʼuin jocʼon abej. Chupan ka ri yaconbel riʼ e cʼo caʼiʼ abej e kʼeban can. Chirij re caʼiʼ abej reʼ e liʼan vi can ri xaxilej tak chʼichʼ y ri chʼakaʼ chic ri e cachibilan chiriʼ.

“Xintejtobej cʼa xinvelesaj el. Jariʼ tok ri takonaxel xubij chi xa chʼaʼoj rij ninvelesaj el. Xubij chuve jun bey chic chi manjani tokaʼ ri kʼij richin ninvelesaj el. Xa man cʼa jubaʼ ta oc ninvoyobej, xa cʼa tok xtitzʼaket cajiʼ junaʼ chupan ri kʼij riʼ. Xubij cʼa chuve chi quitzolin chic chiriʼ tok xtitzʼaket jun junaʼ y chi xtikacʼul chic kiʼ chiriʼ riqʼuin rijaʼ. Que cʼariʼ, xubij chi nicʼatzin yinapon chiriʼ tok nitzʼaket jujun junaʼ, cʼa tok xtokaʼ ri kʼij richin niyatej pe chuve ri xaxilej tak chʼichʼ.

“Queriʼ cʼa xinben. Xibe chiriʼ tok xetzʼaket chiquijujunal ri junaʼ, achiʼel ri rubin can rijaʼ chuve. Ronojel mul tok xibe chiriʼ, xinvil ri takonaxel riʼ. Ronojel mul xojtzijon riqʼuin chiriʼ rijaʼ xirupixabaj y xirutijoj chiquij ri xquerubanalaʼ na ri Ajaf, y achique ri rubaniquil ri rajavaren rijaʼ chupan ri ruqʼuisibel tak kʼij, y achique xtiban chire ri ruyukexic …

“Cʼarunaj cʼa xokaʼ ri kʼij richin yenbecʼamaʼ ri xaxilej tak chʼichʼ, ri Urim y Tumim, y ri toʼbel ruvacʼuʼxal. Chupan ri 22 richin ri septiembre richin ri 1827, xtzʼaket jun chic junaʼ y xibe acuchi e yacon vi can conojel riʼ. Chiriʼ cʼa ri aj chicajel takonaxel xerujech pe pa nukʼaʼ y xirupixabaj pe. Xubij cʼa chi ja yin yinejkalen quichin. Xubij chukaʼ chi vi ninyaʼ kʼij richin xquesach chek queriʼ o richin xquesach xa roma man yenchajij ta, can jic jariʼ xquiqʼuis chiriʼ. Chukaʼ xubij chi can manjun xtiquicʼulvachij vi nintij nukʼij riqʼuin ronojel ri vuchukʼaʼ chiquichajixic, cʼa tok ri takonaxel riʼ xtipe chic chiquicʼamic.

“Chaʼnin cʼa xinnabej achique roma tok can xipixabex vi richin quenchajij chi utzil. Chukaʼ xinnabej achique roma tok ri takonaxel xubij chi nicʼatzin chi rijaʼ xqueʼorucʼamaʼ chic el ri xaxilej tak chʼichʼ tok xticʼachoj ronojel ri cʼo chi ninben. Roma xa cʼa manjani tetamex chi utzil chi viqʼuin yin e cʼo vi, tok ri vinakiʼ xquitij yan quikʼij riqʼuin ronojel ri cuchukʼaʼ richin xequimej ta el chinuvech. Can janíla vi nojibel xequicusaj richin ta xcʼachoj ri quirayibal. Ja cʼariʼ tok can xicʼo chic ruviʼ okotanic xequibanalaʼ chuve, chuvech ri nabey. Nimalej tak molaj vinakiʼ xquikʼijulaʼ jutakel richin yequimej ta cʼa el chinuvech. Man riqʼuin vi cʼariʼ, xa roma ri nimalej runojibal ri Dios tok manjun xquicʼulvachij pa nukʼaʼ. Queriʼ cʼa, xecʼojeʼ viqʼuin cʼa tok xinben quiqʼuin ri xchilabex chuve. Tok ri takonaxel xeʼorucʼamaʼ chic el, jariʼ tok xenjech chic pa rukʼaʼ rijaʼ, achiʼel ri kakʼijun can. Jacʼa rijaʼ ri ejkaleyon quichin chupan re kʼij vacami. Jareʼ caʼiʼ rajlabal ri icʼ mayo chupan ri junaʼ 1838.”

“Vi navajoʼ natzʼet ri tzʼaket rutzijonic ri José Smith, tacanoj cʼa chupan ri vuj ribiniʼan Ri Jebelilej Abej ri Nim Rajel. Chiriʼ cʼo vi chupan ri vuj rubiniʼan José Smith 2. Cʼo cʼa chukaʼ banel richin nacanoj re tzijonic reʼ chupan ri vuj rubiniʼan La Historia de la Iglesia de Jesucristo de los Santos de los Ultimos Días, nabey vuj. Nitiquir el riqʼuin ri tanaj 1, cʼa pa ri tanaj 6.

Queriʼ cʼa ri ojer retal banobel xcʼamatej pe chupan ri ulef. Jariʼ achiʼel xa yechʼo ta pe jun vinakul cʼa chupan ri pokolaj. Xkʼaxex pan inglés riqʼuin ri rusipanic y ri ruchukʼaʼ ri Dios, achiʼel cʼa nujiquibaʼ ri aj chicajel jiquibanic. Ri retal banobel riʼ xel pa vuj nabey mul chiquivech ri vinakiʼ ri e cʼo chuvachʼulef chupan ri junaʼ 1830 y rubiniʼan Ri Vuj Richin Ri Mormon.