Ewe Kapasen Pwarata an ewe Soufos Joseph Smith

An ewe Soufos Joseph Smith pwisin kapas usun feiton ewe Puken Mormon:

“Non ewe pwinin ewe … rue me ewin September [1823] … Ua ounusano inisi ngeni iotek me sio ngeni Kot Napanap. …

“Nupwen ngang mi chok nom non ewe pomwen kokkori Kot, ua kuna ew saram a pwato non rumwei we, minne a soposopono ne napeno tori an ewe rum a saramano nap seni saramen neanowas, iwe mwitir chok emon aramas a pwato nepekin ai we pet, a uta non asepwan, pun apachapachen kewe rese ku ewe simen.

“Mi ufouf echo uf mi nikapwesepwes mi fokkun nap amwararen pwechan. A fokkun pwechepwech nap seni mettochun fonufan ua fen kuna; nge use nuku pwe mettochun fonufan a tongeni for pwe epwe fokkun pwech me saramaram. Kumuchun poun kewe mi chok pwano, usun pwan chok seengen poun kewe, ekisitan kumuchun; iwe, pwan, apachapachen kewe mi pwano, usun pwan seengen pechen kewe, ekisitan chok apachapachen kewe. Mokuran me uwan ir mi pwan pwano. Ua tongeni kuna pwe i ese pwan ufouf ekkoch uf me nukun ei uf mi, usun a fen sukuno, pwe upwe tongeni nenengeni fanmwarin.

“Esap chok ufan we mi nikapwesepwes a fokkun nap pwechan, nge pwan unusan inisin a fokkun saramaram ese wor och mettoch sipwe awewe ngeni, iwe napanapen mesan a wesewesen usun merekukun fifi. Ewe rum a fokkun saram, nge ese fokkun saram usun ikewe a rokopwani inisin. Nupwen ua akkaewin neneta won i, ua fokkun nuokus; nge ewe nuokus a muttir su seniei.

“A koriei ren itei, me apasa ngeniei pwe i emon chon kuno a feito me ren Kot ngeniei, me a apasa pwe itan Moronai; pwe Kot a awora ew angang pwe upwe fori; me itei epwe itefouno me itengaw me nein muu meinisin, einang, sokopaten kapas, ika aramas meinisin repwe kapas mi öch me ngaw fan itei nein aramas meinisin.

“A apasa pwe mi wor ew puk mi isoiseno, a mak won ekkoch seleich gold, a masoweni ew uruon ekkewe aramas ra fen nonnom won ei fonu, me ewe neni ian ra feito me ia. A pwan apasa pwe unusen ewe Kapas Allim esemuch a pwan makketiw non, usun ewe Chon Amanau a fen afanafan ngeni ekkewe chon nom ra nonnom won ewe fonu;

“Pwe mi pwan wor ruofou fau non nenian usun pachen mesekinas mi silver—me ekkei fau, ra fofongeni ew chechen neup, ra forata met a eita ngeni ewe Urim me Thummim—ra isois me ren ekkewe seleich; me ewe nonnomun me nounoun ekkei fau ra wewen pwe emon ‘chon osini’ me nom ika non ekkewe fansoun me mwen; pwe Kot a fen amonnareta fan iten ewe angangen awewei kapasen ewe puk. …

“Iwe, a pwan apasa sefan ngeniei, pwe nupwen ai upwe angei ekkewe seleich minne a fen kapas usun—pun ewe fansoun upwe angeir esamo pwonueta—Ngang usap pwar ngeni emon aramas; pwan ewe chechen neup me ewe Urim me Thummim; ngeni chok ekkewe ion upwe annuku pwe upwe pwar ngenir; ika ua pwarir iwe upwe ninnino. Nupwen i mi kakapas ngeniei usun ekkewe seleich, ewe nemasepwi a suk ngeni ai ekiek pwe upwe tongeni kuna ewe neni ia ekkewe seleich ra isois ie, me a fokkun fatoch me pwaoch pwe upwe sinei sefani ewe neni nupwen ua feino ie.

“Mwirin am aporous, ua kuna ewe saram non ewe rum pwe a poputa ne ioifengen tori a pweni inisin ewe a kakapas ngeniei, iwe a soposopono ne ioifengen tori ewe rum a pwan kiroch sefan, chinon chok pwennin inisin; iwe mwitir chok ua kuna, usun chok akkom, ew an a sukuta ngeni nang, me a feita tori an unusen morono, me ewe rum a pwan winiti chok akkom mwen an ei saramen nang a pwato.

“Ua kokon non ai ekieki usun sokonon ewe mettoch ua kuna, iwe ua fokkun mwar ren met a fen ereniei seni ei amwararen chon kuno; nupwen, nukanapen ai ekiek, ua mwitir kuna pwe rumei ewe a pwan mwitir poputa ne sarameno, usun chok me akkom, ewe pwan chok chon kuno seni nang a pwan nom sefan nepekin ai we pet.

“A pwan poputa, iwe a apasa sefani ekkewe mettoch minne a fen fori nupwen an aewin toriei, ese wor ekis sokonon seni met a fori me akom; nupwen a fori ei, a ereni ei usun ekkewe kapung mi napanap minne repwe feito won fonufan, fiti watte tatakis seni nengita, ketinas, me samau; me ekkei ariaffoun kapung repwe feito won ewe fonufan non ei fansoun. Mwirin an apasa ekkei, a pwan feita usun chok met a fori akkom.

“Non ei fansoun, ra fokkun pochokun ekkewe amemef ra aingano ai ekiek, iwe use chiwen mochen mour, iwe ua kokkon ren ai ingeno ren met ua kuna me rongorong. Nge met ai mairu nupwen ua pwan kuna sefani ewe pwan chok chon kuno nepekin ai we pet, me rongorong ngeni an a pwan awewei ika eniwini sefanni ngeniei ekkewe pwan chok mettoch a fen ereniei me mwan; iwe a sopwengeni ew kapasen anukunuk ngeniei, a ereniei pwe Setan epwe achocho ne sotuniei (pokiten ewe wou ngawen nonnomun an semei we famini), ai upwe angei ekkewe seleich ren ewe popun ai upwe pisekisekino. Ei a fonou ngeniei, a apasa pwe esap pwan wor ew popun upwe ekiekin angei ekkewe seleich nge epwe chok mwareiti Kot, nge usap tup ren pwan ew ekiek me nukun ai upwe aueta an muu; nge ika esap ina iwe usap tongeni angeir.

“Mwirin ei aunungatin an churiei, a pwan niwinsefanita nang usun chok me mwan, iwe ua pwan nom me uren ekiek won napanapen met ua keran chok kuna; iwe ese pwan tam fansoun mwirin an ewe chon kuno seni nang a fen feita seni ei non ewe aunungatin fansoun, a kokko chuko, me ua kuna pwe a fetan ngeni an epwene ran, iwe am ewe aporous a fis non unusen ewe pwin.

“Ua mwitir pwata seni ai we pet, me, usun fansoun meinisin, ua feino fori ekkewe angangen ewe ran mi auchea; nge, nupwen ai sotuni ne angang usun chok ekkewe ekkoch fansoun, ua kuna pwe ai pochokun a fokkun apwangapwangeno usun a fori unusen inisi an esap tufichin fori och mettoch. Semei we, ewe a akkangang unukui, a kuna pwe mi wor mettoch a osukosukaei iwe a ereniei pwe upwe ne feino neimw. Ua poputa ren ewe ekiekin feino ngeni ewe imw; nge, non ai sotuni ai upwe tota won ewe tit seni ewe nenien atake ikewe am aua nonnom ie, ai pochokun a wesewesen kouno, me ua turuno won ewe puun non ai apwangapwang, me non ew mwochomwochen fansoun use chiwen sinei usun mettoch.

“Ewe aewin mettoch ua chemeni a ew mongungu a fos ngeniei, a kori ei ren itei. Ua neneta, me kuna ewe pwan chok chon kuno a ukkutiw me won mokurei, saram a pwenieno usun chok me mwan. I a pwan ereni ngeniei meinisin ekkewe mettoch a fen ereni ngeniei non ewe pwin akkom, me a annuku ei pwe upwe feino ngeni semei we me ereni i usun ewe nemasepwi me ekkewe kapas annuk minne ua fen angei.

“Ua aneasochisi, ua niwin no ngeni semei we non ewe atake, me ua ereni usun unusen ewe mettoch a fis ngeni. A ponueni ngeniei pwe ewe mettoch a seni Kot, me ereni ei pwe upwe feino me fori usun a annuk ngeniei me ren ewe chon kuno. Ua feino seni ewe atake, me feino ngeni ewe neni ikewe ewe chon kuno a fen ereni ei ia ekkewe seleich ra isois; pokiten ewe fatafatochun ewe nemasepwi minne ua fen angei usun ewe neni, ua sinei ewe neni non ewe chok fansoun ua tori ikewe.

“Akkarap ngeni ewe sopwun Manchester, Ontario county, New York, a wor ew chuk mi watte nënnën, me ewe a tekia me nein meinisin ekkewe ir mi nonnom non ewe neni. Won notoun ei chuk, ese pwan towaw seni won ungen, fan efou fouwatten fau, a nonnom ekkewe seleich, ra isois non ew porun fau. Ei fau a men manun me a kukkumos non nukanapan won asan we, me a chechak nepekin kewe, pwe nukanapan we a pwá me won ewe puun, nge unusen nepekin a ireno ren puun.

“Mwrin ai chupetano ewe puun, ua angei efoch wok, minne ua atikatiw fan me nepekin ewe fau, me fiti ekis pochokun ua tipweata. Ua nenenong non, me ikewe ua ennetin kuna ekkewe seleich, ewe Urim me Thummim, me ewe chechen neup, usun ewe chon kuno a apasa. Ewe por minne ra nonnom non a for seni ion fengenin ekkoch fau non ekkoch napanapen simen. Non epichikin ewe por ra nonnom ruofou fau mi penges ngeni ewe por, me won ekkei fau ra nonnom ekkewe seleich me ekkewe ekkoch mettoch rer.

“Ua ita sotuni ai upwe uweireu, nge ua annuk ai upwe uweireu me ren ewe chon kuno, me a pwan apasa sefani ngeniei pwe ewe fansoun upwe uwau ekkewe seleich esamo tori atun, me esap feito, me mwen ruanu ier seni ei fansoun; nge a ereni ei pwe upwe feito ngeni ewe neni non wesewesen ew ier seni ei fansoun, me i epwe churi ei ikewe, me upwe soposopweno ne fori ei tori ewe fansoun epwe feito ren ai upwe angei ekkewe seleich.

“Ina minne, usun met a fen annuk ngeniei, ua feino iteiten soponon ew me ew ier, me iteiten fansoun ua kuna ewe pwan chok chon kuno ikewe, me angei aurour me amirit seni i atun ew me ew am kei fansoun aporous, usun met ewe Samon epwene fori, me ifa usun me non met napanap an muu we epwe emmwen non ewe fansoun soponon. …

“Mwrin ekkoch ier ewe fansoun a feito ai upwene angei ekkewe seleich, ewe Urim me Thummim, me ewe chechen neup. Non ewe rue me aruwen ranin September, engorow wanupuku rue me fisu ier, mwirin ai ua feino usun ua foffori nesoponon pwan ew ier ngeni ewe neni ikewe ra isois ie, ewe pwan chok chon kunon nang a uweireta ngeniei fiti ei aurour: pwe upwene chon tumunur; pwe ika ua nikitireno non ai tumunu ngaw, ika mwo seni ai use tumunuoch, ngang upwe pokupokuno; nge are ika ua aea unusen ai tongeni ne tumunur, tori i, ewe chon kuno, epwe feito angei ir, repwene tumunuoch.

“Ua muttir sinei ewe popun pwata ngang ua angei ekkewe aurour mi fokkun tichik ren ai upwe tumunuochur, me pwata ewe chon kuno a apasa pwe nupwen ngang ua awesano met a fen annuk ngeniei, i epwe feito angei ir. Ese pwan mang an pwano pwe ngang ua annomur, ekkewe aramas ra achocho ren ar pochokunen ar repwe angei ir seni ei. Aramas ra aea meinisin sokkun kokkot ra ekiekieta ar repwe angeiano ekkei mettoch. Ewe eriaffou a winiti koput mi napanap me weires seni nom, me ekkewe chochon aramas ra soposopweno ne mammasa ar repwe angei ir seni ei ika mi tawe. Nge seni ewe miritin Kot, ra soposop ne tumunoch me ne pei, tori ewe fansoun ngang ua wesino senir met a fen annuk ngeniei. Nupwen, usun ekkewe kokkot, ewe chon kuno a feito angeir, ngang ua uweireno ngeni i; me i a annomur non an tumun tori ei ran, minne a aruwen ranin May, engorow wanupuku inik me wanu ier.”

Ren ew unusochun uruo, nengeni Joseph Smith—Uruo non ewe Foun Pwei mi Watte Niwinin.

Ewe uruon nom usun a fen tou seni ewe puun usun ewe mongungun ew aramas mi mongunguta seni ewe puun, me a ekkesiwin kapasen ngeni kapasen ikenai me ren we niffang me manamanen Kot usun a pwano me ren Pwaratan Kot, a makkeno ngeni ewe fonufan non kapasen Merika non ewe ier 1830 an epwene The Book of Mormon.