Jas Ri U Banic Petinak Canok Ri Wuj Re Ri Mormon

Ri José Smith, xel chi sak jun lokʼalaj wuj ri tzʼibatal can ojer canok. Xuban jeriʼ rumal ri u sipanic y ri u chukʼab ri Dios. Ri u biʼ ri jun tzʼib, are ri Wuj re ri Mormon. Kas esatajinak che sak y kʼaxatajinak pa ri jun tzijobal inglés. Ri José Smith xutzʼibaj ri jas xcʼulmataj che, are sibalaj rajwaxic. Xukʼalajisaj chi chakʼab chic pa ri kʼij 21, re ri icʼ septiembre, pa ri junab 1823, areʼ xutzucuj ri Ajawaxel xsacʼajanic chubanic chʼawem rucʼ, rumal retaʼm chic chi majok xril jun lokʼalaj cʼutunic ri sibalaj rajwaxic. Ri xcʼulmataj che are waʼ:

“Are cätajin xinchʼawic rucʼ ri Dios xinwilo chi xpe jun sakalaj chäj pa ri wachoch, y xnimaric cʼä xusakarisaj u pam ri ja y tza xocʼow na che jas ri cuban ri sakil pa nicʼaj kʼij. Cʼäte cʼu riʼ, xinwil jun achi chuxcut ri nu chʼat, tacʼal pa ri cakʼikʼ xane ri rakän man xekaj tä cho ri ulew.

“Ri ratzʼiak ri u cojom, are ri cäbix túnica che, je ri u banic xak u kʼum ri ratzʼiak y kas sibalaj sak. Kastzij chi sibalaj sak y tza cʼo wi na cho apasäch ri wilom cho ri ulew. In quinchomaj chi man cʼo tä jun jasäch cho ri uwächulew je ri u sakil waʼ. E chʼanalic ri u kʼab rajsic jubikʼ ri u kul u kʼab, y xukujeʼ ri rakän cʼä rajsic ri u kul rakän. Man cʼo taj jas u cojom pa u jolom, y kʼalaj ri rij u kul xukujeʼ, y xuyaʼ xinwilo chi xak xu waʼ túnica u cojom, rumal torom jubikʼ ri ratzʼiak che u cʼux.

“Man xak tä xuwi ri ratzʼiak sibalaj sak, xane ronojel ri areʼ tza cäjulquenic chi man cuyaʼ taj cätzʼibaxic, y ri u caʼybal jerxa tä ne je jas jun cayapa. Ri nu warabal tza pa kʼij xuban rumal, xane kas cächupquen ri rij. Are cʼu ri kas xinwil u wäch che nabe mul, xinxej wib, cʼäte cʼu riʼ aninak xel bic ri nu xibinakil.

“Xusiqʼuij ri nu biʼ, y xubij chi areʼ jun ángel rech ri Dios, y xubij chi ri u biʼ are Moroni. Xubij chi cʼo jun chac re ri Dios ri cujach na pa nu kʼab, y chi ri nu biʼ cäbix na utz che, o cʼäx ri cächʼaw na che. Cʼo cäcʼam ri nu biʼ pa ri utzil y cʼo ri cäcʼam rucʼ itzel chquixol ri nimak tak tinimit, y conojel alaxic, y chquixol conojel chʼawem.

“Xubij baʼ chi cʼo xmuk can jun wuj banom rucʼ xax u xak tak kʼän puak, y chuwäch riʼ, cʼo tzʼibatal ri xquiban ri ojer tak wi-nak, y ja ri xepe wi qui cʼolic waral cho ri ulew riʼ. Xukujeʼ xubij baʼ chi cʼo chupam waʼ tzʼib ri kas tzʼakatalaj u tzijobal ri Colonel ri xuyaʼo canok chque ri ojer tak katiʼt ka mam.

“Kas xubij canok chi chuxcut ri xax tak u xak kʼän puak, e cʼo canok quieb ilbal abäj, e nacʼal cho jun chʼichʼ re sak puak je ri u banic rax. E xmuk can riʼ rucʼ ri wuj, y are tak waʼ ri cäbix Urim y Tumim che. Y jachin ri e cʼo waʼ rucʼ y cucojo ri abäj, te cʼu riʼ areʼ jun llonel, je ri cäbix che pa ri ojer tak junab, y ri Dios u yaʼom canok che u kʼaxaxic ri wuj.

· · · · · · ·

“Xukujeʼ xubij chwe chi are cäyaʼ pa nu kʼab ri xax u xak tak kʼän puak ri u bim canok chwe (are majaʼ copan ri kʼij chi quekʼaxex can chwe), man yatal tä na chwe chi quincʼutu riʼ che majun winak, mawi ri rax chʼichʼ, mawi ri Urim y Tumin, xak xu ri cäbix chwe chi cuyaʼ quincʼut chquiwäch. Y we quinbano, we ne cäsach na nu wäch. Are cʼu ri tajin cubij chwe chrij ri xax u xak kʼän puak, xcʼut jun ilonem chnuwäch, y kʼalaj xcanaj pa nu jolom ri cʼolbal ja ri e cʼo wi. Cʼu are xinbec che u tzucuxic kas man cʼäx taj xinchʼobo jawichi, xane kas xinwil riʼ u banic pa nu jolom.

“Cʼäte uj tzijoninak chic, xinwil ri sakil ri cʼo pa nu warabal ja xuchap u mulixic rib chrij areʼ, ri jun achi ri xtzijon wucʼ. Y nojimal xumulij rib ronojel ri sakil chrij cʼä xcanaj chic jumul ri nu warabal pa kʼekum, xane man je taj ri kas chrij. Cʼäte cʼu riʼ, chanim xinwilo chi xujak rib ri uwo caj, y xpakiʼ bic chicaj cʼä man xinwil tä chic ri areʼ. Are cʼu ri nu warabal xcanaj canok je jas ri majaʼ cäkaj u lok ri jun ajchicaj sakalaj winak riʼ.

“Xinkʼoyiʼc canok che u chomaxic jas ri u sucʼ waʼ xinwil riʼ. Sibalaj xinmayinic rumal ri xubij chwe je jun takom ri man cʼo tä chic jun ri cäjunumax rucʼ. Tajin quinchomaj pa wanimaʼ chrij waʼ jun jasäch riʼ are xinwilo chi nu warabal xuchap u julquenic chic, jerxa tä ne rucʼ jutzʼit, ri junam ri ángel xpe chic jumul chuxcut ri nu chʼat.

“Xuchaplej jumul chic u bixic ri jastak, kas je jas ri xubij nabe jumul, man cʼo tä xuqʼuex che. Cäte cʼu riʼ, xutzijoj chwe jas ri nimak tak kʼatbal tzij ri quepe na paquiwiʼ ri winak e lawalo, ri cʼäx ri cäpe na rumal ri numical, ri chʼoʼj y ri yabil ri quepe na paquiwiʼ ri winak pa waʼ ijaʼlil. Xubij chic canok jumul we jastak riʼ. Cʼäte riʼ, xtzelej bic chicaj je ri xuban can nabe.

“Xel cʼu bic ri nu waram rumal rech ri jastak riʼ, kas xeboc pa nu jolom y kas xeboc pa ri wanimaʼ. Are cʼu ri in xintukaric, y xinmayinic rumal ri xinnaʼo y xinwilo. Tzare sibalaj xinmayinic aretak xinwil chi we ángel riʼ kas xtzelej chic ulok jumul chic, cʼo chuxcut ri nu chʼat. Y xintatabej chi xutzelej u bixic, o xutzijoj kas jas ri jastak u bim canok, xane xukʼalajisaj canok xukujeʼ chi ri itzel cucoj na u chukʼab rech quinutakchij che mac (rumal rech ri qui mebil ri ralcʼual ri in tat) rech quinchap ri xax tak u xak kʼän puak pa nu kʼab, y quinkʼinomar rucʼ. Xubij areʼ chi man cuyaʼ tä waʼ, xukʼatij canok, y xtakan chwe chi are quincʼam ri xax tak u xak kʼän puak chi xak xu quinkʼijilaj ri Dios, y xak xuwi u patan waʼ rech quinnimarisaj ri rajawibal ri Dios waral. We man are jewaʼ, man quejach tä na ri xax tak u xak kʼän puak pa nu kʼab.

“Cʼäte petinak chic churox mul che wilic, xpakiʼ chic chicaj je jas ri u banom. Jumul chic baʼ xinchomaj chrij ri qui banic we jastak riʼ. Kas cʼäte xpakiʼ bic ri ángel churox mul, xokʼ ri amaʼ äcʼ, y xinwilo chi tajin cäsakarik, je baʼ waʼ chi xujtzijon pa ronojel ri jun akʼab.

“Cʼäte riʼ, xinwalajic, y kas je xinbano jas ri quinban ronojel kʼij, xinbec pa chac. Are cʼu ri xinwaj xinchacunic, xinnaʼ chi sibalaj in cosinak, chi xuqʼuis ri nu chukʼab, y tza xinnaʼ chi man xincuin taj chubanic chac. Ri in tat xchacun kajok pa nu xcut, xrilo jas ri cʼo chwe, y xinutak bic cho ja. Xinel bic chilaʼ, xinwaj quinbe cho ja, tzare Aretak tajin Xinxalkʼatij ri u chiʼ ri cʼulbat ri cusutij rij ri ja, man xinchʼij tä chic, xintzak cho ri ulew, y jeriʼ xsach nu jolom.

“Aretak xul chwe nabe chi cʼo jun chʼabal xinuchʼabej, xubij ri nu biʼ. Xincaʼyic, y xinwil ri jun ángel chi cʼo panuwiʼ, tza cäjulquen ri rij je jas ri nabe. Cʼäte riʼ, xuchaplej chic u bixic jas ri u bim canok che ri jun akʼab chic, y xinutak bic chi quinbec che u tzijoxic che ri in tat jas ri xinwilo, y ri u takbal ri Dios ri xuyaʼ can chwe.

“Xinnimanic, xintzelejic ja ri cʼo wi ri in tat pa ri ulew, y xintzijoj che jas u sucʼ ri jastak. Xubii chi ri Dios u takom areʼ chwe, y xubij chwe chi quinniman che ri ángel. Xinel bic pa ri ka ulew che u tzucuxic ja ri e yaʼom wi canok ri xax tak u xak kʼän puak ri xubij ri ángel rech ri Dios chwe. Rumal cʼut ri u kʼalaj ri ilonem ri xcʼut chnuwäch, kas xinchʼobo ri cʼolbal are xinopan chilaʼ.

“Chuxcut ri Aldea re Manchester, pa ri tinimit re Ontario, rech ri Estado re Nueva York, cʼo jun juyub chilaʼ y are waʼ kas nim pec. Cho u kajbal kʼij re ri juyub, xak jubikʼ cäraj man puwiʼ taj, chuxeʼ jun abäj chilaʼ e cʼo wiʼ, e yaʼom can chupam jun caxon banom re abäj. Pa u nicʼajil y puwiʼ ri abäj pim y bolobic, are cʼu ri chuitak u chiʼ are xax jubikʼ. Kʼalaj lok ri u pa u nicʼajil puwiʼ ri ulew, are cʼu ri chuitak u chiʼ mukutajinak rucʼ ulew.

“Xinwesaj ri ulew, xintzucuj jun cheʼ y xinnim bic chuxeʼ. Cʼäte riʼ, xinwalajisaj ri u chiʼ, rucʼ jubikʼ nu chukʼab xwalajic. Xincaʼy kajok chupam ri caxon y kastzij chi e cʼo chilaʼ ri xax tak u xak kʼän puak, ri tak abäj qui biʼ Urim y Tumim, y jun chʼichʼ je ri u banic rax, waʼ je jas xubij canok ri ángel. Ri caxon banom rucʼ abäj, y nicʼom rucʼ abäj rucʼ chun. E kʼoyoliʼc quieb abäj cʼä chuxeʼ ri caxon, y paquiwiʼ riʼ e cʼo wi canok ri xax tak u xak kʼän puak, y ri nicʼaj jastak chic ri cäcachilaj.

“Xinwaj xebinwesaj lok, xane xpe ri ángel y xubij chi man cuyaʼ taj. Y jumul chic xbix chwe chi majaʼ opaninak ri kʼij che quesaxic lok, y man copan tä baʼ ri kʼij cʼä pa cajib junab xchaptäj bic pa ri kʼij riʼ. Areʼ cʼut xubij chi rajwaxic chi quinopan chilaʼ kas pa jun junab chic, y xubij chi areʼ quinreyej chilaʼ, y quinterenej u banic waʼ cʼä cäpe na ri kʼij che quesaxic lok.

“Je jas ri xbix chwe chi quinbanoʼ, xinopan chilaʼ pa ri u qʼuisbal chquijujun junab, y chilaʼ ri ángel in reyem apanok, jumul chic xkarik kib chilaʼ, y xincʼam ulok u takanic y qʼui etamabal. Areʼ xinupixbaj che ri cuban na ri Ajawaxel, kas jas u sucʼ ri u be ri rajawibal ri Kajaw pa ri qʼuisbal tak kʼij.

· · · · · · ·

“Xopan ri kʼij rech cäriktajic ri xax tak u xak kʼän puak, y ri Urim y Tumim, y ri jun chʼichʼ chachal. Pa ri kʼij veintidós rech ri ri qʼuisbal re ri junab, je tak nu banom, pa ri cʼolbal ja ri e mukul wi ri xaxalaj tak u xak kʼän puak. Are cʼut ri ángel ajchicaj xjachow chwe rucʼ we jun pixab riʼ: In cʼo na we chque. We quesachic rumal man natal tä chwe, cäsach na nu wäch. Are cʼu we quebinchajij, cʼä cätzelej na u lok ri ángel che qui cʼamic, cʼäte cʼu riʼ, quebucʼolo.

“Chanim xinwetamaj jasche u bim chwe chi sibalaj quebincʼolo, y xinwil jasche u bim chwe ri ángel chi are qʼuisinak wi ri quinban na chque, chi cätzelej chi jumul che qui cʼamic. Aretak xetamax chi e cʼo wucʼ ri xax tak u xak kʼän puak, xcaj ri winak cäquelakʼaj. Y kas xquichomaj jas cäquiban che relakʼaxic. Qʼui winak xincokotaj rech cäquesaj can ri xax tak u xak kʼän puak chwe. Xane rumal ri nimalaj retamabal ri Dios, maj xquiban chque y xecanaj can pa nu kʼab cʼä xinnimaj jas ri u takom chwe chi quinban cucʼ. Are ri ángel rech ri Dios xopan wucʼ che qui cʼam bic ri xax tak u xak kʼän puak, xebinyaʼ bic pa u kʼab y wacamic e cʼo rucʼ pa waʼ kʼij camic, pa ri ucab kʼij re ri icʼ mayo, pa ri junab mil ochocientos treinta y ocho.”

Ronojel u tzʼakat ri kʼalajisabal re ri José Smith chrij ri u cʼulmam cäriktaj chupam ri lokʼalaj wuj, ri Perla de Gran Precio, pa ri tak u xak wuj 44–56.

Ri ojer tzʼibatal chejujun junab esatajinak chupam ri ulew je jas jun chʼabal ri cujutzijoj tzpa ri poklaj, y xkʼaxaj riʼ cʼä pa ka chʼabal uj rumal ri u sipanic, y ri u cuinem ri Dios, je ri u kʼalajisanem ri lokʼalaj Ruxlabal. Banom ri tzʼibatal riʼ che wuj nabe cho ri uwächulew pa ri junab mil ochocientos treinta, y xcoj ri u biʼ, ri Wuj re ri Mormón.