Ti Libro ni Mormon

1 Ket ita siak, ni ^aMormon, aramidek ti ^bkasuratan dagiti banag a nakita ken nangngegak, ket awagak iti Libro ni Mormon.

2 Ket kadagidi panawen nga indulin ni ^aAmmaron dagiti kasuratan ti Apo, immay kaniak, (dandaniak agtawen iti sangapulo, ket nangrugiak a ^bnasursuruan iti kas ti pannakaisuro dagiti kailiak) ket kinuna ni Ammaron kaniak: Maimatangak a nasimbengka nga ubing, ket napardaska nga agpaliiw;

3 Ngarud, inton dandanika agtawen iti duapulo-ket-uppat kayatko a lagipem dagiti banag a naimatangam maipapan kadagitoy a tao; ket inton addaka iti dayta a tawen mapanka iti ili ti Antum, iti turod a maawagan iti ^aShim; ket idiay indulinko iti Apo, amin dagiti sagrado a kinitikitan a maipapan kadagitoy a tao.

4 Ket adtoy, alaemto ti ^apinanid ni Nephi, ket ibatimto ti dadduma iti lugar a nagyananda; ket ikitikitmonto iti pinanid ni Nephi amin dagiti banag a napaliiwmo maipapan kadagitoy a tao.

5 Ket siak, ni Mormon a naggapu iti kaputotan ni ^aNephi, (ket Mormon ti nagan ti amak) malagipko dagiti banag nga imbilin ni Ammaron kaniak.

6 Ket napasamak a siak, nga agtawen iti sangapulo-ket-maysa, intundanak ti amak iti ili nga agpaabagatan, nga agturong iti ili a Zarahemla.

7 Napidipid ti sangabukel a daga iti pasdek, ket dandani kasla kaadu ti anay ti baybay dagiti tao.

8 Ket napasamak iti daytoy a tawen a nangrugi ti gubat kadagiti Nephite, a binukel dagiti Nephite, Jacobite ken dagiti Josephite ken dagiti Zoramite; ket gubat daytoy dagiti Nephite, ken Lamanite ken Lemuelite ken dagiti Ishmaelite.

9 Ita naawagan dagiti Lamanite ken dagiti Lemuelite ken dagiti Ishmaelite iti Lamanite, ket dua a buyot dagiti Nephite ken Lamanite.

10 Ket napasamak a nangrugi ti gubat iti nagbeddengan ti Zarahemla, nga asideg ti dandanum ti Sidon.

11 Ket napasamak a nangummong dagiti Nephite iti dakkel a bilang ti tao, nga ad-adu pay ngem iti tallopulo a ribu. Ket napasamak iti daytoy met laeng a tawen a namin-aduda a naggugubat, a nangabakan dagiti Nephite kadagiti Lamanite ket adu kadakuada ti napasag.

12 Ket napasamak nga insardeng dagiti Lamanite ti gandatda, ket adda kappia a nagnaed iti pagilian; ket nagtultuloy ti kappia iti baet ti dandani uppat a tawen, ket awan ti nagayus a dara.

13 Ngem nagari ti kinadangkes iti amin a pagilian, iti kasta innala ti Apo dagiti ^aay-ayatenna a disipulo. Ket nagsardeng ti aramid a milagro ken panangagas gapu iti makarimon nga aramid dagiti umili.

14 Ket awan ti ^asagut manipud iti Apo, ket saan nga immay ti ^bEspiritu Santo iti uray asino, gapu iti kinadangkes ken ^ckaawan ti pammatida.

15 Ket siak, nga agtawen iti sangapulo-ket-lima ken mabalin met nga addaan iti nasimbeng a kapanunotan, ngarud sinarungkarannak ti Apo, ket naramanan ken naammuak ti kinaimbag ni Jesus.

16 Ket pinadasko ti nangasaba kadagitoy a tao, ngem narikpan ti ngiwatko, ket naparitanak a mangasaba kadakuada. Ta adtoy siaayatda a ^asumuppiat iti Diosda; ket ^bnayadayo dagiti napateg a disipulo manipud iti pagilian, gapu iti kinadakesda.

17 Ngem nagbatiak kadakuada, ngem naparitanak a mangasaba, gapu iti kinatangken ti puspusoda; ket gapu iti kinatangken ti puspusoda ^anailunod ti pagilian.

18 Ket dagitoy tulisan ni Gadianton, a naggapu kadagiti Lamanite, nagsaknapda iti pagilian, iti kasta inrugi dagiti tao ti mangilemmeng kadagiti ^asanikuada iti uneg ti daga; ket nagpukaw dagitoy gapu ta inlunod ti Apo ti daga, tapno saanda a maiggaman, wenno matagikua manen.

19 Ket napasamak nga adda dagiti manggagamud, ken managan-anito, ken salsalamangka; ket adda iti isu amin a daga ti pannakabalin ti sairo, a kas pannakatungpal dagiti amin a balikas ni Abinadi, ken ni pay Samuel a Lamanite.