Ny bokin’i Môrmôna

1 Ary ankehitriny, izaho ^aMôrmôna dia manao ny ^brakitsoratra ny amin’ny zavatra izay sady efa reko no hitako, ary antsoiko hoe ny Bokin’i Môrmôna izany.

2 Ary tamin’ny fotoana izay nanafenan’i ^aAmarôna ny rakitsoratra ho an’ny Tompo, dia tonga tao amiko izy (tokony ho folo taona aho ary nanomboka ^bnianatra misimisy ihany araka ny fomba fianaran’ny oloko) ary hoy i Amarôna tamiko: Takatro fa ankizy matotra ianao ary faingam-pandinika;

3 Noho izany, rehefa tokony ho efatra amby roapolo taona ianao, dia mba tiako ny hahatsiarovanao ny zavatra izay efa nodinihinao momba ity vahoaka ity; ary rehefa mby amin’izay taona izay ianao, dia mandehana any an-tanin’i Antoma, mankamin’ny vohitra iray izay hantsoina hoe i ^aSima; ary ao no efa nametrahako ho an’ny Tompo ny soratra masina voasokitra rehetra momba ity vahoaka ity.

4 Ary indro, halainao ho anao ny ^atakelak’i Nefia, ary ny sisa dia havelanao eo amin’ny toerana izay misy azy; ary hosokirinao eo amin’ny takelak’i Nefia ny zava-drehetra izay efa nodinihinao momba ity vahoaka ity.

5 Ary izaho Môrmôna, izay tamingan’i ^aNefia (ary ny anaran-draiko dia i Môrmôna), dia nahatsiaro ny zavatra izay nandidian’i Amarôna ahy.

6 Ary ny zava-nitranga, rehefa feno iraika ambin’ny folo taona aho, dia nentin’ny raiko nankamin’ny tany andafiatsimo, dia tany an-tanin’i Zarahemlà.

7 Efa rakotra fanorenana ny lafiny manontolo tamin’ny tany, ary ny vahoaka dia maro saika toy ireny fasiky ny ranomasina ireny.

8 Ary ny zava-nitranga, tamin’io taona io, dia nanomboka nisy ady teo amin’ny Nefita izay nahitana ny Nefita sy ny Jakôbita, ary ny Jôsefita sy ny Zôramita; ary izany ady izany dia teo amin’ny Nefita sy ny Lamanita, ary ny Lemoelita sy ny Ismaelita.

9 Ankehitriny ny Lamanita sy ny Lemoelita ary ny Ismaelita dia nantsoina hoe Lamanita, ary ny andaniny roa dia ny Nefita sy ny Lamanita.

10 Ary ny zava-nitranga dia nanomboka nisy ady teo anivony tao amin’ny sisin-tanin’i Zarahemlà, tao akaikin’ny ranon’i Sidôna.

11 Ary ny zava-nitranga dia efa nahatafavory miaraka vatan-dehilahy marobe ny Nefita, ka nihoatra ny telo alina ny isany. Ary ny zava-nitranga tamin’io taona io ihany dia efa nanana ady maro izy ireo, izay nandresen’ny Nefita ny Lamanita sy namonoany ny maro taminy.

12 Ary ny zava-nitranga dia notsoahan’ny Lamanita ny fikasany, ka dia nisy fandriampahalemana niorina teo amin’ny tany; ary naharitra efa-taona teo ho eo ny fandriampahalemana, ka dia tsy nisy fandatsahan-dra.

13 Nefa nanjaka ny faharatsiana teo amin’ny lafin’ny tany manontolo, hany ka ny Tompo dia nanaisotra ny ^ampianany malala, ary ny asan’ny fahagagana sy ny fanasitranana dia nitsahatra noho ny heloky ny vahoaka.

14 Ary tsy nisy intsony ^afanomezam-pahasoavana avy tany amin’ny Tompo, ary ny ^bFanahy Masina dia tsy nidina intsony na tamin’iza na tamin’iza, noho ny helony sy ny ^dtsy finoany.

15 Ary izaho dia feno dimy ambin’ny folo taona sy efa somary mato-tsaina ihany, noho izany aho dia novangian’ny Tompo sy nanandrana ary nahafantatra ny amin’ny hatsaram-pon’i Jesoa.

16 Ary niezaka aho ny hitory amin’ity vahoaka ity, saingy nakombona ny vavako ary norarana aho tsy hitory aminy; satria indro efa ^anikomy an-tsitrapo tamin’ Andriamaniny izy; ary ny mpianatra malala dia ^bnesorina hiala ny tany noho ny helony.

17 Fa nijanona teo anivony aho, saingy norarana aho tsy hitory aminy, noho ny hamafin’ny fony; ary noho ny hamafin’ny fony dia ^anozonina ny tany noho ny aminy.

18 Ary ireo jirik’i Gadiantôna ireo, izay teo anivon’ny Lamanita, dia nanenika ny tany, hany ka ny mponina teo aminy dia nanomboka nanafina ny ^ahareny tao anaty tany; ary nanjary nalama ireny, satria efa nanozona ny tany ny Tompo, ka dia tsy azony nohazonina na notanana ireny.

19 Ary ny zava-nitranga dia nisy ny famosaviana sy ny famorehana ary ny fanova-maso; ary ny herin’ilay ratsy dia niasa eran’ny lafiny rehetra tamin’ny tany, ho fanatanterahana ny tenin’i Abinadia rehetra, ary koa ny an’i Samoela ilay Lamanita.