1 Ma o lenei, sa oo i le tausaga e tolu selau onosefulu ma le tolu, na o ae ai sa Nifaē ma a latou autau e faasaga tau ia sa Lamanā, i fafo mai le laueleele o Tuufua.

2 Ma sa oo ina toe solomuli autau a sa Nifaē i le laueleele o Tuufua. Ma a’o latou vaivai, sa o mai se autau fou a sa Lamanā i luga o i latou; ma sa latou faia se taua tugā, sa oo ina maua e sa Lamanā le aai o Tuufua, ma sa fasiotia le toatele o sa Nifaē, ma ave faapagota le toatele.

3 Ma o e na totoe na sosola ma ua aufaatasi ma tagata o le aai o Teanekuma. O lenei o le aai o Teanekuma sa faalava i tuaoi i tafatafa o le matafaga, ma sa latalata foi i le aai o Tuufua.

4 Ma sa amata ona taiaina o i latou, ^aona ua o a’e fua o autau a sa Nifaē ia sa Lamanā; aua a na leai lena mea, semanu e leai se mana o sa Lamana i luga o i latou.

5 Ae, faauta, e maua e faamasinoga a le Atua e e amioleaga; ma o e amioleaga e ^afaasalaina e e amioleaga; ona o e e amioleaga latou te faaosoina loto o le fanauga a tagata i le faamasaa toto.

6 Ma sa oo ina faia e sa Lamanā sauniuniga e osofai le aai o Teanekuma.

7 Ma sa oo i le tausaga e tolu selau onosefulu ma le fa na o mai ai sa Lamanā e osofai le aai o Teanekuma, ina ia mafai foi ona fai mo i latou le aai o Teanekuma.

8 Ma sa oo ina teena ma toe tulia i tua i latou e sa Nifaē. Ma ina ua vaai sa Nifaē ua latou tutulia sa Lamanā, sa latou toe mitamita i lo latou lava malosi; ma sa latou o atu i lo latou lava malosi, ma toe ave le aai o Tuufua.

9 Ma o lenei o nei mea uma sa faia, ma sa tele afe na fasiotia ai i itu uma e lua, o sa Nifaē ma sa Lamanā.

10 Ma sa oo ina mavae atu le tausaga e tolu selau onosefulu ma le ono, ma sa toe o mai foi sa Lamanā i luga o sa Nifaē e tau; ma sa le salamo lava sa Nifaē i le leaga na latou faia, ae faaauau pea i lo latou amioleaga e le aunoa.

11 Ma e le mafai e le laulaufaiva ona faamatalaina, pe mafai foi e le tagata ona tusi se faamatalaga atoatoa o le vaaiga matautia o le toto ma tagata fasiotia sa i ai i totonu o tagata, o sa Nifaē ma sa Lamanā; ma sa faamaaa loto uma, sa oo ina latou fiafia i le faamasaaina o le toto e le aunoa.

12 Ma sa leai se ^aamioleaga tele faapea sa i ai i totonu o le fanau uma a Liae, po o totonu o le aiga uma o Isaraelu, e tusa ai ma fetalaiga a le Alii, e pei ona i ai i totonu o lenei nuu.

13 Ma sa oo ina maua e sa Lamanā le aai o Tuufua, ma o le pogai ona sa sili atu le tele o lo latou ^aaofai nai lo le aofai o sa Nifaē.

14 Ma sa latou savavali atu foi i luma e faasaga i le aai o Teanekuma, ma latou tutuli ese tagata mai ia te ia, ma latou ave faapagota le toatele, o fafine ma tamaiti, ma latou tuu atu i latou o ni taulaga i o latou atua ^atupua.

15 Ma sa oo i le tausaga e tolu selau onosefulu ma le fitu, ua feita sa Nifaē ona ua osi e sa Lamanā taulaga i o latou fafine ma o latou tamaiti, sa oo ina latou o atu e faasaga ia sa Lamanā ma le ita tele, sa oo ina latou toe faatoilaloina sa Lamanā, ma ua tuli esea i latou mai i o latou laueleele.

16 Ma sa le toe o mai sa Lamanā e faasaga mai ia sa Nifaē seia oo i le tausaga e tolu selau fitusefulu ma le lima.

17 Ma i le tausaga lenei, sa latou o mai i lalo e faasaga mai ia sa Nifaē ma lo latou malosi uma; ma sa le faitaulia i latou ona o le toatele naua o lo latou aofai.

18 Ma sa ^aamata mai i lenei taimi e agai i luma ona le toe maua e sa Nifaē se mana i luga o sa Lamanā, ae sa amata ona tafi ese o i latou e i latou e pei o le sau i luma o le la.

19 Ma sa oo ina o ifo sa Lamanā e faasagatau i le aai o Tuufua; ma sa i ai se taua tugā tele na tauina i le laueleele o Tuufua, lea na latou faatoilalo ai sa Nifaē.

20 Ma sa latou toe sosola mai i o latou luma, ma latou o mai ai i le aai o Poasa; ma o iina na latou tu tetee atu ai ia sa Lamanā ma le totoa tele, sa oo ina le faatoilaloina i latou e sa Lamanā seia oo ina latou toe o mai i le taimi lona lua.

21 Ma ina ua latou toe o mai i le taimi lona lua, sa tutulia ma fasia sa Nifaē i se fasiga tele lava; sa toe ositaulagaina o latou fafine ma o latou tamaiti i tupua.

22 Ma sa oo ina toe sosola ese sa Nifaē mai i o latou luma, ma ave faatasi ma i latou tagata uma, sa i faoa aai ma nuu.

23 Ma o lenei, o a’u, o Mamona, ina ua ou vaai o le a faatoilalo e sa Lamanā le laueleele, o lea na ou alu atu ai i le mauga o ^aSemi, ma ou ave talafaamaumau uma ia na natia e Amorona mo le Alii.