1 Adtoy siak, ni ^aMoroni, nalpaskon ti ^bkasuratan ti amak, a ni Mormon. Adtoy, adda sumagmamano a banag nga isuratko, dagiti banag nga imbilin kaniak ti amak.

2 Ket ita napasamak a kalpasan ti ^anakaal-alingget a gubat iti Cumorah, adtoy, sinapul dagiti ^bLamanite dagiti Nephite, a naglibas iti akin-abagatan a bangir ti daga, agingga a pinapatayda amin ida.

3 Ket pinapatayda met ti amak, ket natdaak a ^amaymaysa a mangisurat iti nakalkaldaang a pakasaritaan ti pannakadadael dagiti taok. Ngem adtoy, awandan, ket tungpalek ti bilin ti amak. Ket no patayendakto, diak ammo.

4 Ngarud isuratko ket idulinko ti kasuratan iti daga; ket no sadino ti papanak awan aniamanna.

5 Adtoy, inaramid ti amak ^adaytoy a kasuratan, ket insuratna ti panggep iti dayta. Ket adtoy, kayatko met nga isurat no adda lugar kadagiti ^bpinanid, ngem awan met; ket awan ti gambang kaniak, ta maymaysaak. Napapatay ti amak iti paggugubatan, ken amin dagiti kakabagiak, ket awan gagayyemko wenno asino man a papanak; ket no kasano ti kaatiddog ti ipalubos ti Apo a panagbiagko diak ammo.

6 Adtoy, uppat a ^agasut a tawen ti napalabas manipud iti yaay ti Apo ken Mangisalakantayo.

7 Ket adtoy, binirok dagiti Lamanite dagiti taok, dagiti Nephite, manipud kadagiti amin a siudad ken kadagiti amin a lugar, agingga iti awanen ti natda kadakuada; ket napalalo ti ^asinagabada; wen, napalalo ken nakaskasdaaw ti pannakadadael dagiti taok, dagiti Nephite.

8 Ket adtoy, ti ima ti Apo ti nangaramid. Ket adtoy met, ^aaggugubat dagiti Lamanite iti tunggal maysa; ken iti amin a rabaw daytoy a daga agtultuloy ti pammapatay ken panagayus ti dara; ket awan ti siasino man a makaammo iti panaggibus ti gubat.

9 Ket ita, adtoy, saanakon nga agsarita maipapan kadakuada, agsipud ta awan malaksid dagiti Lamanite ken ^atulisan ti nabati iti rabaw ti daga.

10 Ket awan ti makaammo iti napaypayso a Dios malaksid dagiti ^adisipulo ni Jesus, a nagnaed iti daga agingga a kimmaro ti kinadangkes dagiti tao ta saan nga ipalubos kadakuada ti Dios a ^bmakipagtaengda kadagiti tao; ket no addada man iti rabaw ti daga awan tao a makaammo.

11 Ngem adtoy, ti ^aamak ken siak ti nakakita kadakuada, ket nagpaayda kadakami.

12 Ket siasino man nga umawat iti daytoy a kasuratan, ket saanna a babalawen gapu kadagiti pagkuranganna, maammuannanto ti ^aad-adu a banag ngem dagitoy. Adtoy, siak ni Moroni; ket no mabalin koma, kayatko nga ipakaammo amin a banag kadakayo.

13 Adtoy, isardengkon ti agsarita maipapan kadagitoy a tao. Siak ti anak ni Mormon, ket naggapu ti amak iti ^aan-annabo ni Nephi.

14 Ket siak met laeng ti ^anangilemmeng iti daytoy a kasuratan iti Apo; awan mamaay ti pinanid, gapu iti bilin ti Apo. Ta pudno a kinunana nga awan ti makaala kadakuada ^btapno agrang-ay; ngem adda dakkel a kaipapanan ti kasuratan; ket siasino man a mangusar tapno makitana ti silaw, paraburan ti Apo.

15 Ta awan ti makabael a mangidatag iti lawag malaksid no ipalugod ti Dios; gapu ta kayat ti Dios a maaramid babaen ti panagiturong laeng ti ^aimatang iti pakaidayawanna, wenno iti pagsayaatan dagiti nagkauna ken nabayagen a nasayyasayya a natulagan a tao ti Apo.

16 Ken maparaburanto ^ati manglawlawag iti daytoy; agsipud ta ^bmairuarto manipud iti sipnget nga agturong iti lawag, babaen iti balikas ti Dios; wen, mairuarto ditoy lubong, ket agraniagto manipud iti kasipngetan, ket maammuanto dagiti tao; ket mapasamakto gapu iti pannakabalin ti Dios.

17 Ket no adda ^abiddut, biddut dagitoy ti tao. Ngem adtoy, awan ti ammomi a biddut; gapu ta ammo ti Dios amin a banag; ngarud, siasino man a ^bmangbabalaw, rumbeng nga ammuenna amangan ta agpeggad iti apuy ti impierno.

18 Ket siasino man nga agkuna: Iparangmo kaniak, wenno saplitenka—rumbeng a pagannaden amangan ta ibilinna ti iparit ti Apo.

19 Gapu ta adtoy, siasino man a ^amangeddeng iti dinadaras makednganto manen iti dinadaras; ta maibatayto iti aramidna ti awatenna a tangdan; ngarud siasino man a mangsaplit masaplitto met, iti Apo.

20 Adtoy ti kuna ti nasantuan a kasuratan—saanto a sumaplit ti tao, wenno mangeddeng; ta kukuak ti panangukom, kinuna ti Apo, ket kukuak met ti panagibales, ket siakto ti agbayad.

21 Ket siasino man nga agpungtot ken mangsupring iti aramid ti Apo, ken maibusor kadagiti natulagan a tao ti Apo a balay ti Israel, ket kunaennanto: Dadaelentayo ti aramid ti Apo, ket lipatento ti Apo ti katulagan nga inaramidna iti balay ti Israel—agpeggadto a mapukan ket maisungrod;

22 Gapu ta agtultuloyto ti agnanayon a ^apanggep ti Apo, agingga iti pannakatungpal ti amin a karina.

23 Amirisem dagiti padto ni ^aIsaias. Adtoy, saanko ida a maisurat. Wen, adtoy kunak kadakayo, a dagiti santo a pimmusay nga immun-una ngem siak, a nangtagikua iti daytoy a daga, ^bagsangitdanto, wen, uray manipud iti tapok agsangitda iti Apo; ket gapu ta sibibiag ti Dios, laglagipenna ti tulag a naaramidna kadakuada.

24 Ket ammona dagiti ^akararagda, nga ikarkararagda dagiti kakabsatda. Ket ammona ti pammatida, ta babaen ti naganna mabalinda ti manggidday iti ^bbantay; ket babaen ti naganna mapaggingginedda ti daga; ket babaen ti pannakabalin ti balikasna mabalinda a rippuogen ti ^cpagbaludan; wen, uray ti umap-apuy nga urno saanna a madangran ida, wenno dagiti naatap nga ayup wenno nagita nga uleg, gapu iti pannakabalin ti balikasna.

25 Ket adtoy, agpaay dagiti ^akararagda kenkuana a palugodan ti Apo a mangisaknap kadagitoy a banag.

26 Ket saan a nasken a sawen ti asino man a saandanto a dumteng, agsipud ta pudno a dumtengdanto, gapu ta naisao ti Apo; gapu ta umaydanto ^amanipud iti daga, babaen ti ima ti Apo, ket awan ti makalapped kenkuana; ket umayto iti maysa nga aldaw a maibaganto a mapukaw dagiti ^bmilagro; ket umayto a kasla iti maysa nga agsasao ^cmanipud iti natay.

27 Ket dumtengto iti maysa nga aldaw inton agsangit ti ^adara dagiti santo iti Apo, gapu iti ^bnalimed a kinnunsabo ken iti aramid ti kasipngetan.

28 Wen, dumtengto iti maysa nga aldaw a matallikudanto ti pannakabalin ti Dios, ken agbalin dagiti ^asimbaan a narugit ken rumimbaw ti kinapasindayag ti puspusoda; wen, kasta met ti aldaw a rumimbawto ti kinapasindayag iti puso dagiti pangulo ti simbaan ken mannursuro, kasta met ti innapal kadagiti kaduada a kameng ti simbaanda.

29 Wen, ^aumayto iti maysa nga aldaw a pagdidinnamagan ti maipapan iti uram, allawig, ken ^basimbuyok ti asuk iti ganggannaet a daga;

30 Ket addanto met mangngeg a maipapan iti ^agubat, ken sayangguseng ti gubgubat, ken ginggined iti nadumaduma a lugar.

31 Wen, dumtengto iti maysa nga aldaw inton nakaron ti kinarugit iti daga; addanto pammapatay, panagtakaw, ken panagulbod, ken panangallilaw, ken kinamanagabig, ken amin a kita ti makarimon; ket adunto ti agkuna, Aramidem daytoy, wenno aramidem dayta, ket ^aawan aniamanna, gapu ta ^bayonanto ti Apo dagita iti maudi nga aldaw. Ngem ay-ay pay dagita, ta addada iti ^capro ti kinapait ken iti pannakaadipen ti kinadakes.

32 Wen, dumtengto ti aldaw nga addanto maipatakder a simbaan nga agkuna: Umaykayo kaniak, ket gapu iti kuartayo mapakawan ti basbasolyo.

33 O dakayo a nadangkes ken baribar ken natangig a tao, apay a nagpatakderkayo iti simbaan a ^apamastrekanyo? Apay a ^bbinaliwanyo ti nasantuan a balikas ti Dios, tapno ^cmadusa dagiti kararuayo? Adtoy, kitaenyo dagiti paltiing ti Dios; ta adtoy, dumtengto ti kanito iti dayta nga aldaw a masapul a matungpal amin dagitoy a banag.

34 Adtoy, impakita kaniak ti Apo dagiti naindaklan ken nakaskasdaaw a banag maipapan kadagiti masapul nga umay iti saan a mabayag, iti dayta nga aldaw inton umay kadakayo dagitoy a banag.

35 Adtoy, agsaritaak kadakayo a kasla addakayo, ngem awankayo met. Ngem adtoy, impakitanakayo ni Jesucristo kaniak, ket ammok ti aramidyo.

36 Ket ammok a ^amagmagnakayo a napasindayag ti puspusoyo; ket manmano laeng ti saan a ^bmangipasindayag iti bagbagida iti tangig ti puspusoda, iti panagkawes ti ^cnapipintas a pagan-anay, iti panagapal ken panagpungpungtot, ken panagsaksakit ti nakem, ken panangidadanes, ken amin a kita ti kinadakes; ken dagiti simbaanyo, wen, kasta met ti amin, nagbalin a narugit gapu iti kinapasindayag dagiti pusoyo.

37 Ta adtoy, patpatgenyo ti ^akuartayo, ken ti taraonyo, ken ti napintas a kawesyo, ken dagiti arkos ti simbaanyo, a napatpateg ngem ti panagayatyo iti napanglaw ken ti makasapul, dagiti masakit ken dagiti marigatan.

38 O dakayo a narugit, wen dakayo a managinsisingpet, dakayo a mannursuro, a mangilako iti bagbagina iti dayta nalungsot, apay a rinugitanyo ti nasantuan a simbaan ti Dios? Apay a ^amabainkayo a mangaklon iti nagan ni Cristo? Apay a saanyo a panunoten nga ad-adu ti kaipapanan ti agnanayon a kinaragsak ngem ti ^bladingit a saan a pulos nga aggibus—gapu iti ^cdayaw ti lubong?

39 Apay nga arkosanyo ti bagbagiyo iti awan biagna, ngem saanyo nga ikaskaso dagiti mabisin, ken dagiti makasapul, ken ti lamulamo, ken ti masakit ken ti maparparigat nga aglabas kadakayo?

40 Wen, apay nga aramidenyo dagiti ^analimed a kinnunsaboyo tapno makaalakayo iti gunggona, ket ipalubosyo ti panagladingit dagiti balo iti sango ti Apo, ken dagiti ulila nga agladingit iti sango ti Apo, ken kasta met ti dara dagiti ammada ken assawada nga agsangit iti Apo manipud iti daga, gapu ta adda panagibales kadagiti uloyo?

41 Adtoy, nakabitin ti espada ti panagibales iti ngatuenyo; ket dumtengton ti kanito tapno ^aibalesna kadakayo ti dara dagiti santo, gapu ta saannan nga ipalubos ti panagsangsangitda.