Ma Suhmuhslah
Moroni 10


Sapta 10

Sie kahs in luhlahlfongi ke Puk luhn Mormon tuhkuh ke kuh luhn Nguhn Muhtahl—Mwe sang luhn Nguhn uh ituckyang nuh sin mwet oaru—Mwe sang luhn Nguhn uh kwacna wi luhlahlfongi—Kahs lal Moroni sramsram tuhkuh infohk uh me—Tuhkuh nuh yurun Kraist, ahksuwohsyeyucklac in El, ac ahkmuhtahlyelah nguhnuwos. Sahp ke yac 421 Tukun Kraist.

1 Inge nga, Moroni, suhmuhslah kuhtuh ma nga motko muh wo; ac nga sihm nuh sin mwet wiyuck, mwet Laman; ac nga kena tuh elos in etuh lah puhs liki yac ahngfoko ac longoul somlah ke akucl se tuh utuckuh ke tuhkuh luhn Kraist.

2 Ac nga siliyac ma sihmlac inge, tukun nga sruhmuhn kuhtuh kahs puh ke ohiyacn kwacfe nuh suwos.

3 Liye, nga kwacfe nuh suwos tuh ke kowos ac fah riti ma inge, fin ac ma lahlmwetmwet se sin God tuh kowos in riti ma inge, tuh kowos in esam luhpan pahkotwen luhn Leum nuh sin tuhlihk nuhtin mwet, e ke oreklac lal Adam finne nuh ke pacl se ma kowos fah eis ma inge, ac motko ma inge ke insiowos.

4 Ac ke kowos fah eis ma inge, nga kena kwacfe nuh suwos tuh kowos in siyuck sin God, Pahpah Ma Pahtpaht, ke inen Kraist, fin ma inge tiac pwacye; ac fin kowos siyuck ke inse pwacye, kena in etuh na pwacye, luhlahlfongi Kraist, El fah ahkkahlwemye pwacyeiyacn ma inge nuh suwos, ke kuh luhn Nguhn Muhtahl.

5 Ac ke kuh luhn Nguhn Muhtahl kowos kuh in etuh ma pwacye ke ma nuhkwewa.

6 Ac kuhtwena ma wo uh ma suwohs ac pwacye; ohinge, wacngihn ma wo ma lahfwekihn Kraist, tuhsruhk akihlen lah El moul.

7 Ac kowos in kuh in etuh lah El moul, ke kuh luhn Nguhn Muhtahl; ohinge nga kena kwacfe nuh suwos in tiac lahfwekihn kuh luhn God; tuh El orekma ke kuh, in fal nuh ke luhlahlfongi luhn tuhlihk nuhtin mwet, oacna sie mihsenge ac litu, ac ne tok ma pahtpaht.

8 Ac sifilpac, nga kwacfe suwos, mwet wiyuck, tuh kowos in tiac lahfwekihn mwe sang luhn God, tuh ma inge puhslacna; ac ma inge tuhkuh sin God sepacna inge. Ac oasr ohiyac pucspucs ma mwe sang inge utuckuh; tuhsruhk God sepacna inge pa suc oruh ma inge nuhkwewa; ac ma inge utuckuh ke ahkkahlwemyeyuck luhn Nguhn luhn God nuh sin mwet, in ahkinsewowoyaclos.

9 Tuh liye, nuh sin sie ituckyang ke Nguhn luhn God, tuh elan kuh in luti kahs luhn lahlmwetmwet;

10 Ac nuh sin siepac, tuh elan kuh in luti kahs luhn etwacack ke Nguhn se ingacn pacna.

11 Ac nuh sin siepac, luhlahlfongi yohk na pwacye; ac nuh sin siepac, mwe sang luhn unwelah ke Nguhn se ingacn pacna.

12 Ac sifilpac, nuh sin siepac, tuh elan kuh in oruh ma usrnguck wolacna.

13 Ac sifilpac, nuh sin siepac, tuh elan kuh in palye ma nuhkwewa inge;

14 Ac sifilpac, nuh sin siepac, in liye lipufacn ac nguhn ma orekma;

15 Ac sifilpac, nuh sin siepac, kain in kahs nuhkwewa;

16 Ac sifilpac, nuh sin siepac, luhngasyucklac luhn kahs ac kain in kahs pucspucs.

17 Ac mwe sang inge nuhkwewa tuhkuh ke Nguhn luhn Kraist; ac ma inge tuhkuh nuh sin kais sie mwet nuhkwewa, fal nuh ke luhngse lal.

18 Ac nga kena kwacfe kowos, mwet sacohk wiyuck, tuh kowos in esam lah mwe sang wo nuhkwewa tuhkuh sin Kraist.

19 Ac nga kena kwacfe kowos, mwet sacohk wiyuck, tuh kowos in esam lah El oacna sie ekweah, mihsenge, ac ne tok ma pahtpaht, ac lah mwe sang nuhkwewa inge ma nga sramsramkihn, suc nguhnnguhn, ac fah tiac wacngihnlac, wi na ke facluh ac fah tu na, a oacna nuh ke suhlahlahlfongi luhn tuhlihk nuhtin mwet.

20 Ohinge, enenuh in oasr luhlahlfongi; ac fin oasr luhlahlfongi enenuh pac in oasr finsrak; ac fin oasr finsrak na enenuh pac in oasr luhngse muhtahl.

21 Ac fin wacngihn luhngse muhtahl yuruwos kowos tiac kuh in moliyucklac ke tohkohsrahi luhn God; kowos tiac pac kuh in moliyucklac ke tohkohsrahi luhn God fin wacngihn luhlahlfongi lowos; kowos tiac pac kuh fin wacngihn finsrak lowos.

22 Ac fin wacngihn finsrak lowos kowos enenuh in fuhlweack finsrak; ac fuhlweack finsrak uh tuhkuh ke srihpen ma koluk.

23 Ac pwacyena Kraist El fahk nuh sin pahpah tuhmwacsr: Kowos fin luhlahlfongi kowos kuh in oruh ma nuhkwewa ma fal wo nuh Sihk.

24 Ac inge nga sramsram nuh suwos mwet nuhkwewa fin facluh—tuh fin pacl se tuhkuh tuh kuh ac mwe sang luhn God ac fah wacngihnlac liki inmahsrlowos, ma ke srihpen suhlahlahlfongi.

25 Ac we nuh sin tuhlihk nuhtin mwet fin ac ohinge; tuh ac fah wacngihn kuhtwena mwet suc ac oruh ma wo inmahsrlowos, tiac siefanna. Tuh fin oasr siefanna inmahsrlowos ma oruh ma wo, el fah orekma ke kuh ac mwe sang luhn God.

26 Ac we nuh selos suc fah tulokihnyac ma inge ac misac, tuh elos misac ke ma koluk lalos, ac elos tiac kuh in moliyucklac ke tohkohsrahi luhn God; ac nga sramsramkihn ma inge fal nuh ke kahs luhn Kraist; ac nga tiac kikiacp.

27 Ac nga kwacfe kowos in esam ma inge; tuh pacl uh sa na tuhkuh ke kowos fah etuh lah nga tiac kikiacp, tuh kowos fah liyeyuc ke nien nuhnuhnkuh luhn God; ac Leum God El fah fahk nuh suwos: Yac Nga tiac fahkwack kahs Luhk nuh suwos, ma tuh sihmihsyucklac sin mukul se inge, oacna sie suc wowoyak liki misac, ahok, finne in oacna sie mwet ma sramsram tuhkuh liki infohk uh.

28 Nga fahkwack ma inge nuh ke ahkpwacyeiyacn kahs in pahluh. Ac liye, ma inge fah fahlac liki oalin God ma pahtpaht; ac kahs Lal fah sulkackihnyuck sin fihl nuh ke fihl.

29 Ac God El fah ahkkahlwemye nuh suwos, lah ma nga suhmuhslah uh pwacye.

30 Ac nga sifilpac kwacfe kowos tuh kowos in tuhkuh nuh yurun Kraist, ac sruokyac mwe sang wo nuhkwewa, ac nikmet kahl kuhtwena ma koluk, kuh ma fohkfohk.

31 Ac nguhtwaclihk, ac tuyak liki infohk uh, O Jerusalem; ahok, ac nokomwacng nuknuk oaskuh lowos an, O acn nuhtin Zion; ac ahkfokokoye stek lowos ac ahkyohkye inmahsrol lowos an ne tok ma pahtpaht, tuh kowos in kuh in tiac sifilpac kaiyuck, tuh wuhlweacng luhn Pahpah Ma Pahtpaht ma El tuh oraclah nuh suwos, O mwet Israel, in ahkpwacyeiyucklac.

32 Ahok, tuhkuh nuh yurun Kraist, ac ahksuwohsyeyucklac Kacl, ac lahfwekihn kowos sifacna ke ma koluk nuhkwewa; ac kowos fin lahfwekihn kowos sifacna ke ma koluk nuhkwewa, ac luhngse God ke insiowos, nuhnak lowos ac kuhiyowos nohfohn, na luhng kuhlwacng Lal ac fal wo nuh suwos, tuh ke luhng kuhlwacng Lal kowos kuh in ahksuwohsyeyucklac ke Kraist; ac fin ke luhng kuhlwacng luhn God kowos ahksuwohsyeyucklac ke Kraist, kowos tiac kuh in lahfwekihn kuh luhn God.

33 Ac sifilpac, fin ke luhng kuhlwacng luhn God kowos ahksuwohsyeyucklac ke Kraist, ac tiac lahfwekihn kuh Lal, na kowos ahkmuhtahlyeyucklac in Kraist ke luhng kuhlwacng luhn God, ke kahklah luhn srah luhn Kraist, ma oasr ke wuhlweacng luhn Pahpah nuh ke iyucklac luhn ma koluk lowos, tuh kowos in eklac muhtahl, tiac fohkfohk.

34 Ac inge nga wihlkacs nuh sin mwet nuhkwewa, fahsr in wo. Ke pacl na sa nga ac som monglac ke pacruhtais luhn God, ne ke na nguhnihk ac monuk ac fah sifilpac fahsrweni nuh sie, ac nga utuckuh kuhtanglah yen engyeng uh, in ohsun nuh suwos ye muhtuhn nien nuhnuhnkuh luhn Jehovah kuhlacna, Mwet Nuhnuhnkuh Ma Pahtpaht luhn kwewana mwet moul ac mwet misac. Amen.

Sahflah