Chedaol llechukl
Moroni 10


10 Bliongel

A klaumerang el kirel a Babier er a Mormon a mei loeak a klisiichel Edaol Reng – A sengk er a Reng a mo er a remesisiich loumerang – A sengk er a Reng a blechoel lobengkel a klaumerang – A tikingel a Moroni a melekoi el nga er a chebechab – Mei er a Kristo me bom cherrungel er ngii, e mongikiid a delbengiu.

1 Chelechang e ngak el Moroni a mo meluches el ko er a mo er sel kumes er ngii eng mo ungil; me ak meluches el mo er a rodam er ngak, er a rechedal a Laman; meng soak a bo lodengei el kmo, ngbetok er a euang el dart me a lluich el rak a mla mo merek er a olangech el mloerngii el kirel a le mlei er ngii a Kristo.

2 Me ak mo somosm a ikang el rekord ruriul er a bo kdung a sesei el tekoi el kirel mengususeu er kemiu.

3 Kamorrenges, ak mengemedaol er kau me sel bo monguiu a ikang el tekoi, alsekum eng mo ungil er a Dios me kau a mo menguiu, ebo mdebedebekii el kmo ng uangera chubechub er a Rubak el mla mo er a rengelekel a chad, er a lobeob a Edam el mo lmuut er a taem el bo mngai a ikang el tekoi e bo momdasu el kirel er a chelsel a rengum.

4 Me sei el bomngai a ikang el tekoi, e bo kungemedaol er kau me bo moker er a Dios, el Diak a Ulebngelel Edam, lobang ngklel a Kristo, alsekum a ikang el tekoi a diak le klemerang; ea lsekum e kau a mo oker lobang a blak el reng, el ngarengii er a rengum, lobang a klaumerang er a Kristo, e Ngii a mochotii el klemerang leko er kau loeak a klisiichel Edaol Reng.

5 Le ngoeak a klisiichel Edaol Reng e kau a mo medengelii a klemerang er a rokui el tekoi.

6 Me a ngii diel tekoi lungil a melemalt e klemerang; me a le uaisei eng diak a ngera el ungil el mo oltngakl er a Kristo, ng bai kongei el kmo ngii a ngar.

7 Me ko mo medengei el kmo Ngii a ngarngii loeak a klisiichel Edaol Reng; me a le uaisei a kulengit er kau me lak moltngakl er a klisiichel a Dios; le Ngii oureor loba klisiich lultuil er a klaumerang er a rengelekel a chad, el di uai chelechang el sils, me a klukuk, el mo cherechar.

8 Me ngak a lmuut lolengit er kemiu e rodam er ngak, me lak komdung dikea sengk er a Dios, leng ngarngii a betok; el ngar er a diosisiu el Dios el mei. Meng ngarngii a kekerous el teletelel a urerel a ikang el sengk; endi Ngii a diosisiu el Dios el meruul er rokui lousbech a rokui, meng mo er a leboerngii lolechotel a Reng er a Dios el mo er a rechad, el mo klungiolir.

9 Me kamosang, a tang a nguu el nga er a Reng er a Dios meng mo sebechel lolsisechakl a tekoi er a klemerang;

10 Me a kuk tang a mo sebechel lolsisechakl a tekoi er a klemedengei loeak osisiu el Reng;

11 Me a mo lmuut el tang, a mesisiich el klaumerang; me a kuk tang, a sengk el omekungil loeak osisiu el reng;

12 Me a lmuut el mo er a tang meng mo sebechel meruul a meklou longasireng;

13 Me a lmuut el kuk mo er a tang, meng mo sebechel lomlaoch el kirel a rokui el tekoi;

14 Me a lmuut el mo er a tang a omes er a reanghel me a rolisechakl el reng;

15 Me a lmuut el mo er a tang a bek el bedengel a tekoi;

16 Me a lmuut el mo er a tang a oidel a tekoi me a bek el bedengel a ngor.

17 Ea ikang el rokui el sengk a mei loeak a Reng er a Kristo; meng blechoel el mei er a rokui el chad loltirakl er a uldesuel.

18 Me a kulengit er kemiu e betik er a renguk lodam er Ngak, me bo mletkii a kmo, a rokui lungil sengk a mei loeak a Kristo.

19 Me a kulengit er kemiu e betik er a renguk elodam er ngak, me bo mletkii ak kmo, Ngii a diosisiu er chelii, me chelechang, me a diak a ulebngelel, me aikang el rokui el sengk el ngak a mla melekoi, el ngii a tekoi er a reng, a diak lebo le ngemed, alsekum a bluulechad a di dechor, ngdi merekkmo a rengelekel a chad a mo diak loumerang.

20 Me a leuaisei eng kirel ngarngii a klaumerang; ea le kirel ngarngii a klaumerang, eng kirel ngarngii ongiil; ea le ngarngii a ongiil eng kirel ngarngii a beltikelreng.

21 Ea lsekum eng diak a beltikelreng eng diak a rolel e bomsobel er a rengedel a Dios; me a kalsebechem el mo suobel er a rengedel a Dios a lak er kau a klaumerang; me a kalesebechem a lak er kau ongiil.

22 Me a lsekum eng diak er kau ongiil, e kau a merang el ngar er a chelsel a obraod el klengit el reng; ea chobraod el klengit el reng a mei leng klengit a uchul.

23 Me a Kristo merang el millekoi el mo er a redemad: Alsekum e kemiu ngarngii a klaumerang er kemiu eng sebechiu el meruul a ngii diel tekoi a lungil besul er Ngak.

24 E chelechang ak melekoi el mo er a rokui lulebongel er a bluulechad, alsekum sel sils a mei me a klisiich me a sengk er a Dios a mo diak er a delongeliu, eng mo uaisei leng mo diak moumerang.

25 Meng alii er a rengelekel a chad a lsekum eng mo uaisei; leng mo dikea meruul a ungil tekoi er a delongeliu, el diak a di tang. Le lsekum eng di mo ngarngii a tang er a delongeliu el meruul a ungil, eng mo meruul loeak a klisiich me a sengk er a Dios.

26 Me alii er tirkei el dirke meruul a ikang el tekoi e medei, lete mad el nga er a kenterir, meng diak el sebechir el mo suobel er a rengedel a Dios, me akmelekoi ikang loltirakl a tikingel a Kristo; meng diak kumulak.

27 Me ngak olengit er kemiu me bo molatk a ikang el tekoi; le belsechel a merekung el bo modengei el kmo ngak a diak kumulak, le kemiu a mo mesekak er a medal a kingellel a Dios; me a Rubak el Dios a mo dmung er kau: Ng dimlak kulekoi a tikingek lekong er kau, el liluches ngikang el chad, el uaia lengelel a mla mad, oi, el di uaia mengedecheduch el nga er a chebechab.

28 Ngak ouchais a ikang el tekoi me boel taut a ulaoch. Me mrenges, ngmo tuobed er a ngerel a diak a ulebngelel Dios; me a tekingel a bo lomelchesiu er a telcheroll er mo er a telcheroll.

29 Me a Dios a mochotii er kau el kmo; a ikel kliluches a klemerang.

30 Me ngak a lmuut lolengit er kau, me mei kau er a Kristo, e moreked a rokui lungil sengk, e lak morutech a mekngit el sengk, me a lechub eng mekngit el klalo.

31 Me bekiis e bom cheroid er a chebechab e Jerusalem; oi, e moubail a klebokel biliu e rengalk el dil er a Zion; e msisiich chotil a blai, e mekilou a ulebongel er a beluu el mo cherechar, me lak komluut el mo rrau a rengmiu, le tilbilel a diak a ulebengelel Edam el le kildmeklii lekoer kau, E blai er a Israel, a dimo tmaut.

32 Oi, mei er a Kristo, me bo mecherrungel er ngii, e motngakl er kau er a rokui el mekngit er a Dios, Me a lsekum kotngakl er kau a rokui el mekngit er a Dios, ebo le betik a rengmiu er a Dios loba rengum er rokir, me a uldesuem er rokir me a klisiichem er rokir, e solang a chubechub er Ngii a mo ungilbesul kirem, me ngoeak a chubechub er Ngii e kau a mo cherrungel er a Kristo; me a lsekum e ngoeak a chubechub er a Dios e kau a cherrungel er a Kristo, e kau a mo diak el sebechem el otngakl a klisiichel a Dios.

33 E lmuut, me a lsekum eng ngoeak a chubechub er a Dios e kau a cherrungel er a Kristo, e diak bo motngakl a klisiichel, e kau a mechedaol er a Kristo loeak a chubechub er a Dios, loeak a mlechubel resechel a Kristo el ngii a nga er a telbilel a Edam el kirel a ngebetel a kentim, me ke mo chedaol el diak a dimech er kau.

34 Me chelechang e ngak a melmesumech er a rokui, di mechikung. Ngak a di kmeed kung eak mo er a ulengull er a baradis er a Dios, el di merekmo reng er ngak me a bedengek a lmuut el mo dmak, me a kmo mekiis e mo mesisiich el mo e chengelakl er a mlidiul el mo olsiuekl er kemiu er medal a ungil tebelel a ngarbab el Jehovah, el diak a ulebngelel el Oukerrekeriil er a rengar me a remla mad. Boluaisei.

Ulebengelel