ໜັງສືໂມໂຣໄນ
ບົດທີ 1
ໂມໂຣໄນຂຽນເພື່ອຜົນປະໂຫຍດຂອງຊາວເລມັນ—ຊາວນີໄຟຜູ້ທີ່ບໍ່ປະຕິເສດພຣະຄຣິດຖືກຂ້າຕາຍ. ປະມານ ຄ.ສ. 401–421.
1 ບັດນີ້ຂ້າພະເຈົ້າ ກໂມໂຣໄນ ຫລັງຈາກຫຍໍ້ເລື່ອງລາວຂອງຜູ້ຄົນຢາເຣັດຈົບແລ້ວ, ຂ້າພະເຈົ້າບໍ່ຄິດວ່າຈະໄດ້ຂຽນອີກ, ແຕ່ວ່າຂ້າພະເຈົ້າຍັງບໍ່ຕາຍເທື່ອ; ແລະ ຂ້າພະເຈົ້າບໍ່ໄດ້ໃຫ້ຊາວເລມັນເຫັນຂ້າພະເຈົ້າ ເພາະພວກເຂົາຈະທຳລາຍຂ້າພະເຈົ້າ.
2 ເພາະຈົ່ງເບິ່ງ, ກສົງຄາມລະຫວ່າງພວກເຂົາເອງກໍໂຫດຮ້າຍທີ່ສຸດ; ແລະ ເປັນຍ້ອນຄວາມຄຽດແຄ້ນຂອງພວກເຂົາ, ພວກເຂົາຈຶ່ງໄດ້ ຂຂ້າຊາວນີໄຟທຸກຄົນທີ່ບໍ່ປະຕິເສດພຣະຄຣິດ.
3 ແລະ ຂ້າພະເຈົ້າໂມໂຣໄນຈະບໍ່ ກປະຕິເສດພຣະຄຣິດ; ດັ່ງນັ້ນ, ຂ້າພະເຈົ້າຈຶ່ງຊັດເຊພະເນຈອນໄປຫາບ່ອນໃດກໍຕາມທີ່ຂ້າພະເຈົ້າຈະໄປໄດ້ ເພື່ອຄວາມປອດໄພຂອງຊີວິດຂອງຂ້າພະເຈົ້າເອງ.
4 ດັ່ງນັ້ນ, ຂ້າພະເຈົ້າຈຶ່ງຂຽນອີກເລັກໜ້ອຍ, ກົງກັນຂ້າມກັບຂ້າພະເຈົ້າຄິດໄວ້; ເພາະວ່າຂ້າພະເຈົ້າບໍ່ຄິດວ່າ ຈະໄດ້ຂຽນຕື່ມອີກ; ແຕ່ຂ້າພະເຈົ້າກໍຂຽນຕື່ມອີກເລັກໜ້ອຍ, ເພື່ອບາງທີມັນອາດຈະມີຄຸນຄ່າແກ່ຊາວເລມັນ, ພີ່ນ້ອງຂອງຂ້າພະເຈົ້າ, ໃນມື້ໜຶ່ງຂ້າງໜ້າຕາມພຣະປະສົງຂອງພຣະຜູ້ເປັນເຈົ້າ.