Chedaol llechukl
Moroni 8


8 Bliongel

A techolb er a retolochoi a mengelengalek el klengit – A remekekerei el ngalk a ngar er a Kristo le tngakireng a uchul – A klaumerang, me a uuchelreng, me a delmedemek, me a ngariou el reng, me a ngiul Edaol Reng, me a telekangel el mo er a ulebongel omekrael mo suobel.

1 A babier er a demak el Mormon el melluches el merngak el Moroni; ak kmal dirke mlokedong el mo olisechakl, e ngii a melluches el mer ngak. Meng uai tiaikid a teletelel er a loluches el mer ngak el kmo:

2 Betik er a renguk el ngelekek el Moroni, ak kmal loldeu er a renguk le Rubak er kau el Jesus Kristo a mlo lotkau e mlokodongau el moer osisecheklel, me a chedaol lurelel.

3 Ngak a blechoel lomdasu er kau er a nglunguchek, el melemolem el meluluuch el mo er a Dios el Edam loba ngklel a Chedaol Ngelekel Jesus, me loeak a diak bo lengemed el klungiolel me a chubechub er ngii lomtebechel er kau el lomelemii a duchelreng er a klaumerang er a ngklel el mo er a ulebongel.

4 Me chelechang e rungalk, ak melekoi er kau el kirel a klou el kentil a renguk; ng mekngit a renguk er a klautitekangel el mla duubech er a delongeliu.

5 Le alsekum a blo kudengei a klemerang, eng mla moerngii a klauteketok er a delongeliu el kirel a techolb chelid er a remekekerei el ngelekiu.

6 Me chelechang e rungalk, ng soak a bo le blak a rengum loureor, me tiaikid el klou el cheluid bo le cheroid er a delongeliu; meng tiaikid a uchul ak mla luchesii tiang el babier.

7 Mi sei er a kot el bo kudengei a ikang el tekoi el kiriu, eak mlo oker er a Rubak el kirel ngii el tekoi. Me a tekingel a Rubak a mlei er ngak loeak a klisiichel Edaol Reng el kmo:

8 Mrenges a tikingel a Kristo losobeliu, e Rubak er kemiu, e Dios er kemiu. Kamosang, Ngak a mlei er a bluulechad el dimlak kumekedong er a remekedung, te bai dengerenger el mo mekngit a rengrir er a kenterir; a cherrungel a diak lousbech er a toktang, ngbai tirkei el smecher; me a le uaisei ea remekekerei el ngalk a cherrungel, leng diak el sebechir el meruul a klengit; me a le uaisei ea dellebeklel a Adam a mla mengubet er tir le Ngak, meng diak a klisiichel er tir; me a llach er a omelekosk meng merekong le Ngak.

9 Meng tiaikid a mle teletelel a Edaol Reng er a lolecholt a tikingel a Dios el mer ngak; me a le uaisei e betik er a renguk el ngelekek, ak medengei el kmo, ng klou el teletoechmad er medal a Dios sei el mole cholbchelid er a remekekerei el ngalk.

10 Morrenges, ak melekoi er kau el kmo tiaikid el tekoi chobo molisechakl erngii – ouuchelelreng me a techolbchelid el moer tirkei el mla mo medengei a rengrir e sebechir el meruul a klengit; oi, molisechakl er a roungalk, me bo louuchel a rengrir er a kenterir e bole metecholb, ele ngai a rengrir el moeriou el mo uaia remekekerei el ngelekir, etir a mo suobel er rokui tir me a remekekerei el ngelekir.

11 Ea remekekerei el ngelekir a diak lousbech er a uuchelreng me a techolbchelid. Kamosang, a techolbchelid a nga er a uuchelreng el mo churrengelii a llach el kirel a ngebetel a klengit.

12 Endi a remekekerei el ngalk a ngar er a Kristo, el dimla uaisei er a uchelel a bluulechad; le lak el uaisei, a Dios olab el mo er a tang me a tang el Dios, e direk el mo ngodech el Dios, el mengull er a rechad; le te telang el mekekerei el ngalk a mla mad el dirkak el metecholb!

13 Me a le uaisei, alsekum a remekekerei el ngalk a diak boel sobel a lak lenguu a techolb, e tirkang a locha rokui el di mlo er a diak a ulebngelel beluu er a ringel.

14 Kamorrenges e kulekoi er kemiu el kmo, ngikei lomdasu el kmo a remekekerei el ngalk ousbech er a techolbchelid a ngar er a osul a mechuuached, me a rengedel a klengit; lengii a diak er ngii a klaumerang, me a ongiil, me a kale beltik el reng; me a leuaisei, alsekum eng dirk omdasu el uaisei e medort, e ngulterekokl el moeriou er a bluu er a ringel.

15 Leng mengelengalk el mekngit a uldasu el kmo, a Dios osobelii a ta er a ngalk leng miltecholb, ea tang a kirel mo remiid leng dimlak bo lenguu a techolb.

16 Alii er tirkei el mo mengeuid a teletelel a Rubak el mo uaitiang, le tir a mo remiid alsekum eng diak bo louuchel a rengrir er a kenterir. Kamosang, ak mesisiich el melekoi, lobang a ngerachel er a Dios; e diak medakt er a chad el kmo ng mo mekerang; le cherrungel beltik el reng oriid a rokui el dakt.

17 E ngak a mui er a beltik el reng el ngii a diak a ulebngelel beltik el reng; me a leuaisei a rokui el ngalk a diosisiu er a renguk; Me a uchul eng betik a renguk er a remekekerei el ngalk lobang a cherrungel beltik el reng; le tir a rokui el diosisiu loudiukes er a mo suobel.

18 Le ngak a medengei el kmo, a Dios a diak a soal me a chetil Dios, me a lechub ngii bolengodech; ng bai ngii a diak bole ngodech, el ngar er a rokui lulebongel mo er a rokui lulebongel.

19 A remekekerei el ngalk a diak el sebechir el mo mekngit a rengrir er a kenterir; me a leuaisei eng mengelengalk el mekngit el dolkebai er a bliochel chubechub er a Dios el moer tir, le tir a rokui el dingar er Ngii le chubechub er Ngii.

20 Me ngikei el kmo, a remekekerei el ngalk ousbech er a techolb a oltngakl er a chubechub er a Kristo, e nguu el mo diak a belkul a tngakireng er ngii me a klisiichel lolsobel.

21 Alii er tir el nga er a metacherbesul kmeed er a kodall, me a ngau, me a diak a ulebngelel ringel. Ngak a bekeu el melekoi le; A Dios a mla dmung er ngak. Mrenges ebo moltirakl, le lak eng mo dechor lomtok er kau er a kingall er a kerrekeriil er a Kristo.

22 Le kamomes, a rokui el mekekerei el ngalk a dingar er a Kristo, me tirkei el rokui el dimlak lodengei a llach. Le klisiichel olsobel a mei er tirkei el rokui el tir a dimlak lodengei a llach; me a leuaisei e ngikei el diak le medebeakl, me a lechub e ngikei el diak el delbeakl, a diak el sebechel mo ouuchel er a rengul er a kentil; a techolb a diak a ngera el rellii er tir–

23 Ng bai teletoechmad er medal a Dios, oltngakl er a klechubechub er a Kristo, me a klisiichel Edaol Reng er Ngii, ebai oumerang a ulekeuad el ureor.

24 Kamosang e rungalk, tiang el tekoi a diak el kirel ngarngii; le uuchelreng el kirel a klengit a moer tirkei el nga er a eungel a delbeakl me a cheungel a dellebeklel a mla metemall el llach.

25 Me a kot el redechel a uuchelreng el kirel a klengit a techolbchelid; ea techolbchelid a mei loeak a klaumerang el moer a otireklel a llach; ea otireklel a llach meskid a ngebetel a klengit;

26 Ea ngebetel a klengit a mouchul a delmedemek, me a ngariou el reng; ea delmedemek me a ngariou el reng a mouchul eng me oldingel a Edaol Reng, el Ngii el Ongelaod omekeek loba ongiil me a cherrungel beltik el reng, el ngii el beltik el reng a mo outekangel ngarngii loeak a blakelreng er a nglunguuch, el di merekmo le mei a ulebongel, el rokui el santo mo kiei lobengkel a Dios.

27 Ka morrenges e rungalk, ak lmuut el mo meluches el lekoer kau, alsekum eng diako mereched el mo oldechelakl er a rechedal a Laman. Kamosang, a kldidiul a rengul tiang el beluu, me a lechub a rechedal a Nephi, a mla mo uchul a telemellir el di merekmo bo louuchel a rengrir er a kenterir.

28 Moluluuch el kirir e rungalk, me bo le mekngit a rengrir er a kenterir. Endi, kamosang, ak bekikl el kmo Edaol Reng kele lekea longoir er tir, me a chelsel tiaikid el beluu etir a direk losiik lomedobed a rokui el klisiich me a ngerachel el ngar er a Dios el mei; e oltngakl er a Edaol Reng.

29 Me a uriul er a lotengeklii a klou el klemedengei e rungalk, eng kirel di mereched a ngemedir, el di mo tmaut a ulaoch el meldung er a reprofet, me a direk el tikingel ngii el Osobeled.

30 Me a lusech lekoer kau e rungalk, me sel kluut el meluches el merkau, me a lechub ekluut el mo mesekau. Boluaisei.