1 Kisin likou ehu sang ei pahpa Mormon, ntingdohng ie, Moronai; oh e ntingdohng ie mwurite ei malipilipdahng nan pwukoa sarawio. Oh ni mwohmw wet e ntingdohng ie, ndinda:

2 Moronai, nei pwutak kempoake, I peren mehlel pwehki ahmw Kaun Sises Krais ketin medemedeweiuk, oh ketin malipehienguhk nan sapwallime pwukoa sarawi, oh sapwellime doadoahk sarawio.

3 I kin medemedeweiuk nan ei kapakap ahnsou koaros, oh I kin wie kapakapikihong Koht Sahm ni mwaren sapwellime Seri Sarawio, Sises, pwe en kak, sang ni sapwellime kupwur sapan oh kalahngan poatoapoat, en ketin kolokoluhk sang ni dadaur pwoson ni mwarehu lao lel imwi.

4 Oh met, nei pwutak, I pahn ndaiong uhk duwen dahme kansensuwedihe mehlel; pwe e kansensuwed ong ie ma mie pingiping pwarada nanpwungamwail.

5 Pwe, ma I esehla me mehlelo, mie pingiping wiawi rehmwail me pid duwen papidaislahn noumwail kisin seri kan.

6 Oh met, nei pwutak, I inangih me kumwail pahn loaloapwoatieng doadoahk, pwe sapwung mehlel wet en kohsang rehmwail; pwehki kahrepe wet me I inangihki ntingihda kisin likou wet.

7 Pwe ahnsouohte mwurin ei esehda mepwukat sang kowe, I ahpw kalelapak rehn Kauno duwen irair wet. Oh mahsen en Kauno ahpw kohdohng ie sang ni manaman en Ngehn Sarawio, ketihtihki:

8 Rong mahsen kan en Krais, ahmw Soundoar, ahmw Kaun oh ahmw Koht. Kilang, I sohte patohdo nan sampah pwe I en eker me mwahu kan ahpw me dipan akan en koluhla; me unsek sohte anahne sounwini, ahpw irail akan me soumwahu; eri, kisin seri kan irail unsek, pwe irail sohte kak pein wiahda dihp; eri dipen Adamo kohsang irailehr pwehki ngehi, kahrehda e sohte ahneki manaman pohrail; oh kosonned en serkumsais imwiseklahr pwehki ngehi.

9 Oh ni mwohmw wet me Ngehn Sarawi kasalehiong ie mahsen en Koht; eri, nei pwutak kempoake, I ese me e wia dihp laud mwohn Koht, ma kumwail pahn papidaisla kisin seri kan.

10 Kilang I ndaiong uhk me kumwail pahn padahngki met—irail kan me ese wiahda dihp oh pwukoaki me pahn koluhla oh papidaisla; ei, padahkihong pahpa oh nohno kan me irail anahne koluhla oh papidaisla, oh karakarahkala duwehte neirail kisin seri kan, oh irail koaros ahpw pahn iang neirail kisin seri kan komourla.

11 Oh neirail kisin seri kan sohte anahne koluhla, de pil papidaisla. Kilang, papidais kin wiawi sang ni koluhla pwe en kak kapwaiada kosonned kan me kin kahrehda mwakelekelsang dihp.

12 Ahpw kisin seri kan ieiaski Krais, sangete ni poahsondahn sampah; ma soh, a Koht iei Koht sapahrek, oh pil Koht kohweikohdo, oh lipilipilki aramas kan; pwe kisin seri depeh kei mehla ahpw sohte papidaisla?

13 Eri, ma kisin seri kan sohte kak komourla ni ar sohte papidais, irail udahn mwein kohlahr nan ehl poatoapoat.

14 Kilang I ndaiong uhk, me mehmen me medewe me kisin seri kan anahne papidaisla, iei aramaso mihmi nan kalokolok en pahtou mehlel oh selidi en dihp; pwe e sohte ahneki pwoson, koapworopwor, de limpoak unsek; eri, ma e pahn mehla ni eh ahneki madamadau wet, e udahn pahn kohdihla nan ehl.

15 Pwe suwed wet me keper, en medewe me Koht pahn kamaurala emen seri pwe e papidaisla, oh mehteio pahn mehla pwehki e sohte papidaisla.

16 Meid suwediong irail akan me pahn wekidala sapwellime Kauno koasondi kan ong ni wiepe wet, pwe irail pahn mehla ma irail sohte pahn koluhla. Kilang, I eimahki ei koasoi, pwehki I ahneki mweimwei sang rehn Koht; oh I sohte masak dahme aramas kak wia; pwe limpoak me unsek kin kesehieisang masak koaros.

17 Oh I direkihlahr limpoak unsek, me iei limpoak poatoapoat; eri, ong ie seri kan koaros duwepenehte; eri, I poakehng kisin seri kan sang ni limpoak me unseko; oh irail koaros duwepenehte oh pahn komourla.

18 Pwe I ese me Koht sohte wia Koht sapahrek, de pil kin wekiwekidek; ahpw e sohte kin ketin wekiwekidek sangete wasa sohte imwi lel wasa sohte imwi.

19 Kisin seri kan sohte kak koluhla; eri, e wia suwed keper, en kahmahmki kalahngan mwakelekel en Koht ong irail, pwe irail koaros ieiasiki ih pwehki sapwellime kalahngan.

20 Oh mehmen me pahn nda kisin seri kan anahne papidaisla kahmahmkilahr kalahngan en Kraiso, oh sohte wiahki mehkot sapwellime tomwo oh manaman en sapwellime komouro.

21 Meid suwediong soahngen aramaso, pwe irail mihmi nan mehla keper, iei ehl, oh lokolok sohte imwi. I koasoia ni eimah; Koht me ketin mahsaniong ie. Rong mahsen pwukat oh kapwaiada, ma soh e pah kadeikuhkada ni mwoalen kopwung en Kraiso.

22 Pwe kilang kisin seri kan koaros ieiasiki Krais, oh pil irail koaros me sohte wehwehki kosonnedo. Pwe manaman en komouro pahn kohieng irail koaros me sohte wehwehki kosonnedo; eri, mehmen me sohte dipada, de e sohte mih pahn manaman en dihp, e sohte kak koluhla; oh papidais sohte pahn mie katepehieng—

23 Ahpw e wia dihp laud mwohn Koht, kahmahmki kalahngan en Krais, oh manaman en sapwellime Ngehn Sarawi, oh koapwkoapworopworki doadoahk mehla kan.

24 Kilang, nei pwutak, soahng wet sohte konehng en wiawi; pwe koluhla ongete irail me mih pahn manaman en dihp oh pahn manaman en riahlahn kawehla kosonned.

25 Oh tepin wahn koluhla iei papidais; oh papidais kin wiawi sang ni pwoson en kapwaiada kosonned akan; oh kapwaiadahn kosonned akan me kin wahdo kamwakelpen dihp akan;

26 Oh kamwakelpen dihp akan me kin elehda impai, oh mohngiong karakarahk; oh pwehki mpai oh mohngiong karakarahk kahrehda pwaredohn Ngehn Sarawi, Sounkaloalamwahu me kin audehkihla koapworopwor oh limpoak me unsek, limpoak me kin poatoapoat sang ni kapakap loaloapwoat, lao lel imwi, ahnsou me souleng kan koaros pahn kousoanla rehn Koht.

27 Kilang, nei pwutak, I pahn pwurehng ntingwei rehmw ma I sohte pahn mwadang kohlahng Mehn Leimen kan. Kilang, pohnmwahsohn wehi wet, de aramas en Mehn Nihpai kan, kasaledahr arail pahn kamwomwala ma irail sohte pahn koluhla.

28 Kapakapkin irail, nei pwutak, pwe irail en kak koluhla. Ahpw kilang, I salohki me Ngehno solahr ieiang irail; oh nan pali en sahpwet irail pil raparapahki irail en kauhdi manaman oh mweimwei koaros me kohsang rehn Koht; oh irail kahkahmahmkihla Ngehn Sarawi.

29 Oh mwurin arail kasohwehier marain lap wet, nei pwutak, irail udahn pahn kereniong mehla, me pahn kahrehda pweidahn kokohp akan me soukohp kan kohpadahr, iangahi pein mahsen kan en atail Sounkomouro.

30 Kaselel, nei pwutak, lao I pahn pwurehng nting wei rehmw, de pwurehng tuhweng uhk. Ahmen.