Pāpa’ira’a mo’a
Moroni 8


Pene 8

’Ua riro te bāpetizora’a i te mau tamari’i ri’i ’ei ’ohipa ’ino roa—’Ua ora te mau tamari’i ri’i i te Mesia nā roto i te tāra’ehara—Nā roto i te fa’aro’o, te tātarahapa, te ha’eha’a, te ’ā’au marū, te fāri’ira’a i te Vārua Maita’i, ’e te fa’aitoitora’a ē tae noa atu i te hope’a, e tae mai ai te fa’aorara’a. Fātata 401–421 M.M.

1 Te hō’ē ’episetole tei pāpa’ihia e tō’u metua tāne ra ’o Moromona iā’u nei, ’ia Moroni ; ’e ’ua pāpa’ihia te reira iā’u nei i muri noa iho i tō’u pi’ira’ahia nō te ’ohipa tāvinira’a. ’E ’ua nā ’ō mai ra ’oia i te pāpa’ira’a mai iā’u :

2 E tā’u tamaiti here, e Moroni, e ’oa’oa rahi tō’u i te mea ’ua ha’amana’o te Fatu ra ’o Iesu Mesia ia ’oe, ’e ’ua pi’i ho’i ia ’oe nō te tāvini iāna, ’e nō tāna ra ’ohipa mo’a.

3 Tē ha’amana’o noa nei au ia ’oe i roto i tā’u ra mau pure, ma te pure tu’utu’u ’ore i te Atua te Metua nā roto i te i’oa o tāna ra Tamaiti Mo’a, ’o Iesu, ’ia ti’a iāna i roto i tōna maita’i fāito ’ore ’e tōna aroha fāito ’ore, ’ia tīa’i ia ’oe nā roto i te fa’aro’o tāmau māite i tōna ra i’oa ē tae noa atu i te hope’a.

4 ’E i teienei, e tā’u tamaiti, tē parau atu nei au ia ’oe nō ni’a i te hō’ē mea i ’oto roa ai au ra ; tē ’oto nei ho’i au nō te mau mārōra’a e tupu i rotopū ia ’outou na.

5 ’E mai te mea e parau mau tei fa’a’itehia mai iā’u ra, ’ua tupu a’enei ho’i te mau mārōra’a i rotopū ia ’outou nō ni’a i te bāpetizora’a i tā ’outou mau tamari’i ri’i.

6 ’E i teienei, e tā’u tamaiti, tē hina’aro nei au ’ia fa’aitoito noa ’outou, ’e ’ia ’īriti-’ē-hia teie hape rahi mai rotopū atu ia ’outou ; ’e ’o teie ho’i te tumu vau i pāpa’i atu ai i teie nei ’episetole.

7 I muri noa iho ho’i i tō’u ’itera’a i teie nei mau mea nō ’ō mai ia ’oe na, ’ua ui atu ra vau i te Fatu nō ni’a i taua mea ra. ’E ’ua tae mai te parau a te Fatu iā’u nā roto i te mana o te Vārua Maita’i, i te nā-’ō-ra’a mai ē :

8 ’A fa’aro’o mai i te mau parau a te Mesia, tō ’oe Tāra’ehara, tō ’oe Fatu ’e tō ’oe Atua. Inaha, ’ua haere mai au i te ao nei, ’eiaha nō te pi’i atu i te feiā parauti’a ’ia tātarahapa, i te feiā hara rā ; e ’ere ho’i te feiā tino maita’i tei hina’aro i te taote, ’o te feiā ma’i rā ; nō reira, e mea hara ’ore te mau tamari’i, ’e ’aita ho’i e ti’a ia rātou ’ia rave i te hara ; nō reira ’ua rave-’ē-hia atu te ’anatemara’a a Adamu mai ni’a atu ia rātou nā roto iā’u nei, ’e ’aita roa tō te reira e mana i ni’a ia rātou ; ’e te ture nō te peritome ra ’ua fa’a’orehia ïa nā roto iā’u nei.

9 ’E i nā reira mai te Vārua Maita’i i te fa’a’ite mai i te parau a te Atua iā’u ; nō reira, e tā’u tamaiti here, tē ’ite nei au ē, ’ua riro tā ’outou bāpetizora’a i te mau tamari’i ri’i ’ei vahavahara’a rahi i mua i te Atua.

10 Inaha, tē parau atu nei au ia ’oe, ’o teie ïa te mea tā ’outou e ha’api’i—te tātarahapara’a ’e te bāpetizora’a i te feiā ’o tei ’ite i te ha’apa’ora’a ’e ’o tē ti’a ’ia rave i te hara ; ’oia ïa, ’a ha’api’i i te mau metua ’ia tātarahapa ’e ’ia bāpetizohia, ’e ’ia fa’aha’eha’a ia rātou iho mai tā rātou mau tamari’i ri’i e ti’a ai, ’ei reira e fa’aorahia rātou pā’āto’a ’e tā rātou mau tamari’i ri’i.

11 ’E ’aita ho’i e au te tātarahapara’a i tā rātou mau tamari’i ri’i, ’aita ato’a te bāpetizora’a. Inaha, ’ua ha’apa’ohia te bāpetizora’a nō te tātarahapara’a nō te fa’atupura’a i te mau fa’auera’a nō te ha’amatarara’a hara.

12 ’Āre’a rā ’ua ora te mau tamari’i ri’i i te Mesia, mai te ha’amatara’a mai ā o te ao nei ; ’āhiri ’aita ra, ’ua riro ïa te Atua ’ei Atua fa’ati’a pae tahi, ’e ’ei Atua tauiui, ’e i te ha’apa’o i te huru o te mau ta’ata ; ’e e hia ho’i rahira’a tamari’i ri’i i pohe ’aore i bāpetizohia !

13 Nō reira, ’āhiri ’aita te mau tamari’i ri’i bāpetizo-’ore-hia e fa’aorahia, ’ua haere ’ē nā ïa rātou i te hade hope ’ore ra.

14 Inaha, tē parau atu nei au ia ’oe, ’o ’oia ’o tē mana’o e mea ti’a i te mau tamari’i ri’i ’ia bāpetizohia, tei roto ïa ’oia i te au ’ava’ava ’e i te mau ru’uru’ura’a ho’i nō te mau ’ohipa ’ī’ino ra ; ’e ’aita ho’i te fa’aro’o, te ti’aturi, ’e te aroha mau i roto iāna ; nō reira ’ia tāpū-’ē-hia atu ’oia ’a vai ai taua mana’o ra i roto iāna, ’ia tae ïa ’oia i raro i hade e ti’a ai.

15 E mea ’ino roa ho’i ’ia mana’o ē, e fa’aora te Atua i te hō’ē tamari’i ri’i nō tōna bāpetizora’ahia, ’e e ha’apohe i te tahi iho nō tōna bāpetizo-ore-ra’a-hia.

16 ’Auē ho’i rātou ’o tē ha’api’o i te mau ’ē’a o te Fatu mai teie te huru, ’e e pohe ho’i rātou ’ia ’ore rātou ’ia tātarahapa. Inaha, tē parau atu nei au ma te mata’u ’ore, ’e ma te ha’amanara’a ho’i nō ’ō mai i te Atua ra ; ’e ’aore roa ho’i au e mata’u i tā te ta’ata e rave mai iā’u nei ; inaha ho’i e ’īriti ’ē atu te here ti’a mau i te mata’u.

17 ’E ’ua ’ī roa vau i te aroha mau, ’o te here mure ’ore ho’i ; nō reira ’ua ’aifāito te mau tamari’i ato’a iā’u nei ; nō reira, ’ua here au i te mau tamari’i ri’i ma te here ti’a mau ; ’e ’ua ’aifāito rātou pā’āto’a ’e e roa’a ia rātou pā’āto’a te fa’aorara’a.

18 Tē ’ite nei ho’i au ē, e ’ere te Atua i te Atua ha’apa’o pae tahi, e ’ere ho’i i te ta’ata tauiui ; e mea tauiui ’ore rā, mai te tau mure ’ore ato’a i te tau mure ’ore ato’a.

19 ’Aita roa e ti’a i te mau tamari’i ri’i ’ia tātarahapa ; nō reira, e mea ’ino roa ’ia huna i te mau aroha ti’a mau o te Atua ia rātou, ’ua ora ho’i rātou tā’āto’a iāna nō tōna aroha.

20 ’E ’o ’oia ’o tē parau mai ē, e mea ti’a i te mau tamari’i ri’i ’ia bāpetizohia, tē huna ra ïa ’oia i te mau aroha o te Mesia, ’e tē ha’afaufa’a ’ore ho’i ïa i tāna tāra’ehara ’e te mana nō tāna ra fa’aorara’a.

21 ’Auē ho’i te ta’ata mai te reira te huru, ’ua fātata ho’i rātou i roto i te ’ati nō te pohe, nō hade, ’e nō te māuiui hope ’ore. Tē parau nei au ma te mata’u ’ore ; nā te Atua ho’i i fa’aue mai iā’u. ’A fa’aro’o mai i te reira ’e ’a ha’apa’o, ’e ’ia ’ore rā, e fa’ahapahia ïa ’outou i te reira ’ia tae i te vāhi ha’avāra’a a te Mesia ra.

22 Inaha ho’i, ’ua ora te mau tamari’i ri’i ato’a i te Mesia, ’e rātou ato’a tei ’ore i ’ite i te ture. E tae mai ho’i te mana nō te fa’aorara’a i ni’a ia rātou pā’āto’a ’o tei ’ore i fāri’i i te ture ; nō reira, ’o ’oia ’o tei ’ore i fa’ahapahia ’e ’aore rā ’o ’oia tei ’ore i raro a’e i te fa’ahapara’a, ’aita ïa e ti’a iāna ’ia tātarahapa ; ’e ’aita ho’i te bāpetizora’a i te mea faufa’a nōna—

23 ’Ua riro rā ’ei vahavahara’a i mua i te Atua, ’e ’ei hunara’a ho’i i te mau aroha o te Mesia, ’e i te mana nō tōna Vārua Mo’a, ’e ’ua riro ’ei ti’aturira’a ïa i te mau ’ohipa pohe.

24 Inaha, e ta’u tamaiti, ’aita roa teie nei mea i tano ; inaha te tātarahapara’a nō te feiā ïa i raro a’e i te fa’ahapara’a ’e i raro a’e i te ’anatemara’a nō te ture i ’ōfatihia.

25 ’E te mau hotu mātāmua nō te tātarahapara’a ’o te bāpetizora’a ïa ; e tae mai ho’i te bāpetizora’a nā roto i te fa’aro’o e tae atu ai i te ha’apa’ora’a i te mau fa’auera’a ; ’e nā roto i te ha’apa’ora’a i te mau fa’auera’a e tae mai ai te ha’amatarara’a hara.

26 ’E nā te ha’amatarara’a hara e fa’atupu i te marū ’e te ’ā’au ha’eha’a, ’e nō te marū ’e te ’ā’au ha’eha’a e tae mai ai te Vārua Maita’i, ’o te Fa’aa’o ho’i e fa’a’ī mai i te ti’aturi ’e te here ti’a mau ra, ’o te here ho’i e vai noa nā roto i te ha’apa’o maita’i i te pure, ē tae noa atu i te hope’a, ’a pārahi ai te feiā mo’a ato’a i pīha’i iho i te Atua ra.

27 Inaha, e ta’u tamaiti, e pāpa’i fa’ahou atu ā vau ia ’oe na ’ia ’ore au e haere vave atu e ’aro i te mau ’āti Lamana. Inaha, te te’ote’o nō teie nei nūna’a, ’oia ho’i te mau ’āti Nephi, ’ua fa’atupu ïa i tō rātou pohe, maori rā ’ua tātarahapa rātou.

28 ’A pure nō rātou, e tā’u tamaiti, ’ia tae mai te ’ā’au tātarahapa ia rātou. Inaha rā, tē huru mata’u nei au ’o te fa’aea te Vārua i te tūtava ’e ’o rātou ; ’e i roto i teie tufa’a nō te fenua tē tītau ato’a ra rātou ’ia tu’u i raro i te mana ato’a ’e te ha’amanara’a nō ’ō mai i te Atua ra ; ’e tē huna ra rātou i te Vārua Maita’i.

29 ’E i muri iho i tō rātou pāto’ira’a i te ’ite rahi, e tā’u tamaiti, ’ia pohe vave rātou e ti’a ai, ’ia tupu te mau tohu i parauhia mai e te mau peropheta, ’e te mau parau ato’a ho’i a tō tātou Fa’aora iho.

30 ’A pārahi, e tā’u tamaiti, ē tae noa atu i te taime e pāpa’i atu ai au ia ’oe na, ’e ’aore rā e fārerei fa’ahou ai ia ’oe. ’Āmene.