Japta 8

Baptaes blong ol smol pikinini i wan nogud rabis sin—Ol smol pikinini i stap laef long Kraes from atonmen—Fet, fasin blong sakem sin, fasin blong no stap flas mo tingting blong hat i stap daon, kasem Tabu Spirit, mo stap strong kasem en, i lidim i go long fasin blong sevem man. Raonabaot 401–421 yia afta Kraes i bon.

 Wan leta blong papa blong mi, Momon, we i bin raetem long mi, Moronae; mo hem i bin raetem hemia long mi i no long taem afta long koling blong mi long ministri. Mo long fasin ia hem i bin raet long mi, i talem:

 Boe blong mi we mi lavem tumas, Moronae, mi glad tumas se Lod blong yu Jisas Kraes i bin stap tingbaot yu, mo i bin singaotem yu long ministri blong hem, mo long tabu wok blong hem.

 Mi mi stap tingbaot yu oltaem long ol prea blong mi, mi stap prea oltaem long God Papa, long nem blong Tabu Pikinini blong hem, Jisas, blong hem, tru long gudfala fasin blong hem we i no save finis mo gladhat, i holem yu tru long fasin blong stap strong blong fet long nem blong hem kasem en.

 Mo nao, boe blong mi, mi toktok long yu long saed blong samting we i mekem mi harem nogud tumas; from i mekem mi harem nogud se bae i gat ol rao i girap long medel blong yufala.

 From, sapos mi bin lanem trutok, i bin gat ol rao long medel blong yufala long saed blong baptaes blong ol smol pikinini blong yufala.

 Mo nao, boe blong mi, mi wantem se yu mas wok strong oltaem, blong bigfala rong ia i mas aot long medel blong yufala; long ol narafala toktok, from plan ia mi bin raetem leta ia.

 From kwiktaem afta we mi bin lanem ol samting ia long saed blong yufala, mi bin askem long Lod long saed blong samting ia. Mo toktok blong Lod i bin kam long mi tru long paoa blong Tabu Spirit, i talem:

 Lisin long ol toktok blong Kraes, Ridima blong yu, Lod blong yu mo God blong yu. Luk, mi bin kam long wol i no blong singaotem olgeta we i stret be olgeta we i sin blong sakem sin; olgeta we i no sik i no nidim dokta, be olgeta we i sik; from samting ia, ol smol pikinini i klin, from oli no save mekem sin; from samting ia, panis blong Adam i kamaot long olgeta tru long mi, mekem se i no gat eni paoa ova long olgeta; mo loa blong sakomsaes i finis tru long mi.

 Mo long fasin ia Tabu Spirit i bin soemaot toktok blong God long mi; from samting ia, boe blong mi we mi lavem tumas, mi save se i wan tru fasin blong jik long fored blong God, blong yufala i mas baptaesem ol smol pikinini.

 10 Luk mi talem long yu se samting ia yu mas tijim—fasin blong sakem sin mo baptaes long olgeta we oli save gud wanem oli stap mekem mo i save mekem sin; yes, tijim ol papa mo mama se oli mas sakem sin mo kasem baptaes, mo mekem tingting blong olgeta i stap daon olsem ol smol pikinini blong olgeta, mo olgeta evriwan bae i sev wetem ol smol pikinini blong olgeta.

 11 Mo ol smol pikinini blong olgeta i no nidim blong sakem sin, o baptaes. Luk, baptaes i blong sakem sin blong mekem i hapen ol komanmen blong kam klin aot long ol sin.

 12 Be ol smol pikinini i stap laef long Kraes, we i stat long stat blong wol; sapos i no olsem, God i wan God we i no stret, mo tu wan God we i stap jenis, mo wan God we i no mekem semak long evri man; from hamas smol pikinini i bin ded be oli no bin kasem baptaes!

 13 From samting ia, sapos ol smol pikinini i no save sev sapos oli no kasem baptaes, olgeta ia i mas bin go long wan hel we i no gat en.

 14 Luk mi talem long yu, se hem we i ting se ol smol pikinini i nidim baptaes, i stap long prapa rabis ples blong harem nogud mo long ol rop blong rabis fasin; from hem i no gat fet, hop, o bigfala lav; from samting ia, sapos oli katemaot hem taem we i stap long tingting ia, hem i mas go daon long hel.

 15 From nogud fasin ia i rabis tumas blong ting se God i sevem wan pikinini from baptaes, mo narafala wan i mas lus from hem i no gat wan baptaes.

 16 Sore tumas long olgeta we bae i smasem gud ol wei blong Lod long fasin ia, from bae oli ded sapos oli no sakem sin. Luk, mi stap toktok wetem no fraet, from mi bin kasem raet long God; mo mi no gat fraet long wanem we man i save mekem; from lav we i stret gud i sakemaot evri fraet.

 17 Mo mi mi fulap wetem bigfala lav we i lav we i no gat en; from samting ia, evri pikinini i semak long mi; from samting ia, mi lavem ol smol pikinini wetem wan lav we i stret gud; mo olgeta evriwan i semak mo oli tekem pat long fasin blong sevem man.

 18 From mi save se God i no wan God we i no stret, mo tu i no wan man we i stap jenis; be hem i no save jenis stat long evri taem we i no save finis kasem evri taem we i no save finis.

 19 Ol smol pikinini i no save sakem sin; from samting ia, hem i nogud fasin tumas blong tanem baksaed long ol stret sore blong God long olgeta, from olgeta evriwan i stap laef long hem from sore blong hem.

 20 Mo hem we i talem se ol smol pikinini i nidim baptaes i tanem baksaed long ol sore blong Kraes, mo i putum olsem nating atonmen blong hem mo paoa blong fasin blong hem blong pemaot man.

 21 Sore tumas long olgeta olsem, from oli stap long denja blong ded, hel, mo wan harem nogud we i no gat en. Mi stap talemaot samting ia wetem no gat fraet; God i bin givim oda long mi. Lisin long ol samting ia mo obei, o oli stanap agensem yu long jea blong jajmen blong Kraes.

 22 From luk we evri smol pikinini i stap laef long Kraes, mo tu olgeta evriwan we i no gat loa. From paoa blong fasin blong pemaot man i kam long evriwan long olgeta we i no gat loa; from samting ia, hem we i no bin kasem panis, o hem we i no stap andanit long wan panis, i no save sakem sin; mo long olgeta olsem baptaes i no help nating—

 23 Be hem i wan fasin blong jik long fored blong God, i tanem baksaed long ol sore blong Kraes, mo paoa blong Tabu Spirit blong hem, mo i putum tras long ol wok we i ded.

 24 Luk, boe blong mi, samting ia i no sud hapen; from fasin blong sakem sin i blong olgeta we i andanit long panis mo andanit long panis blong wan loa we i brok.

 25 Mo ol fasfala frut blong fasin blong sakem sin i baptaes; mo baptaes i kam tru long fet we i mekem i hapen ol komanmen; mo taem we ol komanmen i hapen, i karem i kam fasin blong kam klin aot long ol sin;

 26 Mo fasin blong kam klin aot long ol sin i karem i kam fasin blong no stap flas, mo tingting blong hat we i stap daon; mo from fasin blong no stap flas mo tingting blong hat we i stap daon, i mekem i kam, visit blong Tabu Spirit, we Man blong Leftemap Tingting i fulumap long hop mo lav we i stret gud, we lav ia i stap strong tru long had wok oltaem long saed blong prea, go kasem taem we en bae i kam, taem we evri sent bae i stap wetem God.

 27 Luk, boe blong mi, bae mi raet long yu bakegen sapos mi no go aot kwiktaem agensem ol man blong Leman. Luk, hae tingting blong kantri ia, o ol pipol blong ol man blong Nifae, i bin pruvum smasgud blong olgeta sapos oli no sakem sin.

 28 Prea from olgeta, boe blong mi, blong fasin blong sakem sin i save kam long olgeta. Be luk, mi fraet se Spirit i bin stop blong wok wetem olgeta; mo long pat blong graon ia, oli stap lukaotem tu blong putum daon evri paoa mo raet we i kam long God; mo oli stap tanem baksaed long Tabu Spirit.

 29 Mo afta we oli bin sakemaot wan bigfala save olsem, boe blong mi, oli mas ded kwiktaem, blong mekem se ol profesi i hapen we ol profet i bin talemaot, mo tu wetem ol toktok blong Sevya blong yumi, hemwan.

 30 Gudbae, boe blong mi, kasem taem we bae mi raet long yu, o bae mi mitim yu bakegen. Amen.