Pukfel
Moronai 8


Sopun 8

Ewe papataisen kukkun semirit ew ngaw mi anieput—Kukkun semirit ra manau non Kraist pokiten ewe achasefan—Nuku, aier, mosonoson me tipetekison non netip, angei ewe Ngun mi Fel, me nikitu ngeni nesoponon ra emmwen ngeni amanau. Arap ngeni Ierin ewe Samon 401–421.

1 Echo toropwe noun semei we Mormon, a mak ngeniei, Moronai; iwe a mak ngeniei mwirin chok ai we kokko ngeni ewe angangen afanafan. Iwe non ei napanap a mak ngeniei, a apasa:

2 Nei achengicheng, Moronai, ua fokkun pwapwa pwe om Samon Jises Kraist a fen ekiekuk, me a fen kokkoruk ngeni an ei angangen afanafan, me ngeni an angang mi fel.

3 Ngang mi ekiekuk fansoun meinisin non ai iotek, soposopono ne iotek ngeni Kot ewe Sam non iten Noun we mi Fel, Jises, pwe i, non an kirekiroch me chen esemuch, epwe annomuk non enginon nuku non itan we tori nesoponon.

4 Iwe iei, nei, ua kapas ngonuk usun met minne a fokkun enetipengawaei; pun a enetipengawaei pwe epwe wor anini fengen epwe fis neimi.

5 Pun, ika ua fen sinei ewe ennet, a fen wor anini fengen neimi usun papataisen nöumi kewe kukkun semirit.

6 Iwe iei, nei, ua mochen pwe oupwe achocho ne angang, pwe ei muan mi ngaw epwe morono seni neimi; pun, pokiten ei popun ua fen makkei ei toropwe.

7 Pun mwitir chok mwirin ua fen sinei usun ekkei mettoch usumi ua tingorei ewe Samon usun ewe mettoch. Iwe ewe kapas an ewe Samon a feito ngeniei me ren ewe manamanen ewe Ngun mi Fel, a apasa:

8 Ausening ngeni ekkewe kapas an Kraist, om Chon Angasano, om Samon me om Kot. Nengeni, ua feito ngeni ewe fonufan pwe usap kokkori ekkewe mi tupwon nge ekkewe chon tipis ngeni aier; ekkewe mi pochokun ese auchea ngeni ir sou safei, nge ir ekkewe mi semwen; ina minne, kukkun semirit ir mi unusoch, pun rese tufichin ar repwe fori tipis; ina minne ewe anumamau an Adam a morono seni ir pokitei, pwe ese wor pochokunan wor; iwe ewe annukun sirkumsais a fen wesino pokitei.

9 Iwe anongonong won ei napanap ewe Ngun mi Fel a pwarano ewe kapas an Kot ngeniei; ina minne, nei achengicheng, ngang mi sinei pwe a ew ennetin turunufas me mwen Kot, ami oupwe papataisei kukkun semirit.

10 Nengeni ua apasa ngonuk pwe ei mettoch kopwe afanafana—aier me papatais ngeni ir ekkewe mi miriti me tufichin fori tipis; ewer, afanafana sam me in pwe mi auchea repwe aier me papatais, me etipetekisona inisir usun kukkun semirit, iwe repwe manau meinisin fiti nour kewe kukkun semirit.

11 Iwe nour kewe kukkun semirit ese auchea ar repwe aier, pwan papatais. Nengeni, papatais a fis pokiten aier ngeni apwonuetan ekkewe annuk ngeni ewe omusomusen tipis

12 Nge kukkun semirit ra manau non Kraist, pwan mwo seni nepoputan ewe fonufan; ika esap iei usun, Kot emon Kot mi nifinifin, me pwan emon Kot mi ekkesiwin, me emon mi apangaw ngeni aramas; pun fitemon kukkun semirit ra fen mano rese papatais!

13 Ina minne, ika kukkun semirit rese tongeni manau ar rese papatais, repwe fokkun no ngeni ew hell esemuch.

14 Nengeni ua apasa ngonuk, pwe i ewe a ekieki pwe mi auchea an kukkun semirit repwe papatais a nom non ewe kipwinin riaffou me non ekkewe fofon angangangaw; pun ese wor an nuku, apinukunuk, are tong ennet; ina minne, pwe i epwe pokupokuno non an ekieki, i epwe fokkun feitiw ngeni hell.

15 Pun anoninen ewe fofforungaw an ekieki pwe Kot a amanaua emon semirit pokiten papatais, me ewe emon epwe mano pokiten ese wor an papatais.

16 Riaffou ngeni ir ekkewe repwe angawano ekkewe kokkotun ewe Samon anongonong won ei napanap, pun repwe mano tiwenon chok ika repwe aier. Nengeni, ua kapas ren pwaracho, pokiten a wor ai mumuta me ren Kot; me use nuokusiti met aramas ra tongeni fori; pun unusochun tong a asueno nuokus meinisin.

17 Iwe ua uren tong ennet, minne tong esemuch; ina minne, semirit meinisin ra chok nonno fengen ngeniei; ina minne, ua tongei kukkun semirit ren ew unusochun tong; iwe ir meinisin ra chok nonno fengen me ir chon angei amanau.

18 Pun ngang mi sinei pwe Kot esap emon Kot mi nifinifin, esap pwan emon mi ekkesiwin; nge i ese ekkesiwin seni unusen esemuch ngeni unusen esemuch.

19 Kukkun semirit rese tongeni aier; ina minne, mi anoninen angangangaw an emon epwe amam ekkewe nimenimochun umoumoch an Kot ngeni ir, pun ir meinisin mi manau non i pokiten an umoumoch.

20 Iwe i ewe a apasa pwe mi auchea an kukkun semirit repwe papatais a amam ekkewe umoumochun Kraist, me ese aucheani an we achasefan me ewe manamanen an angasano.

21 Riaffou ngeni ena sokkun, pun ra nom non feiengawen mano, hell, me ew riaffou esemuch. Ua apasa non pwaracho; Kot a fen annuku ngeniei. Ausening ngeni ir me aneasochis, are repwe ungonuk me ren ewe nenien mwottun kapung an Kraist.

22 Pun nengeni pwe kukkun semirit meinisin ra manau non Kraist, me pwan meinisin ir ekkewe ese wor rer ewe annuk. Pun ewe manamanen ngaseno a fis ngeni ir meinisin ekkewe ese wor rer annuk; ina minne, i ewe ese kapung, are i ewe ese nom fan kapung, ese tongeni aier, iwe ena sokkun papatais ese auchea ngeni—

23 Nge a ew turunufas me mwen Kot, ne amam ekkewe umoumochun Kraist, me ewe manamanen ewe Ngun mi Fel, me wanong apinukunuk non angang mi mano.

24 Nengeni, nei anuon, ei mettoch ita esap fis; pun aier a fis ngeni ir ekkewe ra nom fan kapung me fan anumamauen ew annuk mi ta.

25 Iwe aewin uwan aier pwe papatais; me papatais a fis pokiten nuku ngeni apwonuetan ekkewe annuk; me pwonuetan ekkewe annuk a efisi omusomusen tipis.

26 Iwe ewe omusomusen tipis a efisi mosonoson, me tipetekison non netip; iwe pokiten mosonoson me tipetekison non netip a fis feiton ewe Ngun mi Fel, minne Chon Ekinamwe a uren apinukunuk me unusochun tong, minne tong a nikitu ren achocho ngeni iotek, tori nesoponon epwe feito, nupwen ekkewe souneng meinisin repwe nonnom ren Kot.

27 Nengeni, nei anuon, upwe pwan mak ngonuk sefan ika use mwitir no maun ngeni ekkewe chon Leiman. Nengeni, ewe namanam tekian ei muu, are ekkewe aramasen ekkewe chon Nifai, a pwarano ar kiteterino tiwenon chok ika repwe aier.

28 Iotek fan iter, nei anuon, pwe aier epwe feito rer. Nge nengeni, ua nuokus ika ewe Ngun a fen kouno ne nonnom rer; me non ei kinikinin ewe fonu ra pwan kutta ar repwe akkufu meinisin manaman me mumuta minne ra feito seni Kot; me ra amam ewe Ngun mi Fel.

29 Iwe mwirin ar poutano fokkun watten ew mirit, nei anuon, repwe fokkun mwitir mano, tori apwonuetan ekkewe osini minne ra fen affateno me ren ekkewe soufos, me pwan ekkewe kapas an ach we Chon Amanau pwisin.

30 Kone nom, nei anuon, tori ai upwe pwan mak ngonuk, are churuk sefan. Amen.