1 Ti surat ti ^aamak a ni Mormon, a naisurat kaniak, ni Moroni; ket naisurat kaniak iti saan a nabayag kalpasan ti pannakaawagko nga agserbi. Ket kastoy a wagas ti panagsuratna kaniak, a kinunana:

2 Ay-ayatek nga anakko, Moroni, maragsakanak unay a dinaka nalipatan ni Apom a Jesucristo, ket inawagannaka nga agserbi kenkuana, ken iti nasantuan nga aramidna.

3 Pampanunotenka a kanayon iti kararagko, kanayon a panagkararag iti Dios Ama iti nagan ti Nasantuan nga Anakna, ni Jesus, nga isu, babaen ti awan patinggana a ^akinaimbag ken ^bparaburna, tarabayennaka nga agibtur iti pammati iti naganna agingga iti panungpalan.

4 Ket ita, anakko, ibagak kenka ti maipapan iti pakaladingitak unay; ta maladingitanak no addanto ^apanagsisinnuppiat a rumsua kadakayo.

5 Ta, no pudno ti naammuak, adda napasamak a panagsisinnuppiatyo maipapan iti panangbuniag kadagiti babassit nga ubbingyo.

6 Ket ita, anakko, kalikagumak nga agtrabahoka a sireregta, tapno maikkat daytoy dakkel a biddut kadakayo; agsipud ta daytoy ti gapu ti nangisuratak iti daytoy.

7 Ta apaman a naammuak dagitoy a banag maipapan kenka nagsaludsodak iti Apo maipanggep iti dayta a banag. Ket simnek kaniak ti ^abalikas ti Apo babaen ti pannakabalin ti Espiritu Santo, a kinunana:

8 Denggenyo dagiti balikas ni Cristo, ti Mannubbotyo, ti Apo ken Diosyo. Adtoy, immayak ditoy lubong, saan nga umawag kadagiti nalinteg ngem kadagiti managbasol nga agbabawi; saan a kasapulan dagiti ^anaan-anay ti mangngagas, ngem dagiti masakit; gapuna, ^bnaan-anay dagiti babassit nga ^cubbing, agsipud ta saanda a kabaelan ti ^dagbasol; gapuna naikkat ti lunod ni ^eAdan manipud kadakuada gapu kaniak, ket awan ti bilegna kadakuada; ket natungpal kaniak ti linteg ti ^fpannakakugit.

9 Ket kastoy ti wagas ti panangiparangarang ti Espiritu Santo iti balikas ti Dios kaniak; gapuna, ay-ayatek nga anakko, ammok a nakaro a pananglais iti Dios, ti panangbuniagyo kadagiti ubbing.

10 Adtoy kunak kadakayo a daytoy a banag ti isuroyonto—panagbabawi ken panangbuniag kadakuada nga ^aagsungbat ken makabael nga agaramid iti basol; wen, isuroyo iti nagannak a masapul nga agbabawi ken mabuniaganda, ken agpakumbabada a kasla kadagiti ^bubbingda, ket maisalakandanto amin agraman dagiti ubbingda.

11 Ket saanen a nasken nga agbabawi, wenno mabuniagan dagiti ^aubbingda. Adtoy, agpaay ti pannakabuniag kadagiti nagbabawi iti pannakatungpal ti bilin iti ^bpannakaugas ti basol.

12 Ngem sibibiag dagiti ^aubbing ken ni Cristo, uray manipud idi punganay ti lubong; no saan a kasta, manangidumduma a Dios ti Dios, ken managbaliw met a Dios, ken ^bmanagpili iti tao; agsipud ta adu ti ubbing a natay a saan a nabuniagan!

13 Gapuna, no saan a maisalakan dagiti ubbing no saanda a mabuniagan, mabalin nga addan dagitoy iti mangliwengliweng nga impierno.

14 Adtoy kunak kadakayo, a siasino man a mangipapan a kasapulan dagiti ubbing ti mabuniagan adda iti apro ti kinapait ken iti ikut ti panangidumduma; ta awan kenkuana ti ^apammati, namnama, wenno panangngaasi; gapuna, rumbeng a maikkat bayat ti kaaddana iti panunot, rumbeng a mapan idiay impierno.

15 Agsipud ta nakaam-amak a kinadangkes ti mangipapan nga isalakan laeng ti Dios ti maysa nga ubing no mabuniagan, ket masapul a mapukaw dagiti dadduma gapu ta saanda a nabuniagan.

16 Asi pay dagiti mangsuppiat iti dalan ti Apo maipapan iti daytoy a wagas, ta mapukawda malaksid no agbabawida. Adtoy, ibagak a sibabatad, nga addaan iti ^aturay ti Dios; ket saanak a mabuteng no ania man ti aramiden ti tao; ta ^bpukawen ti naan-anay nga ^cayat ti amin a panagbuteng.

17 Ket napnuanak iti ^aasi, nga agnanayon nga ayat; gapuna, padapada kaniak amin nga ubbing; gapuna, ayatek dagiti ^bubbing iti naan-anay nga ayat; ket padapadada amin ket mairanudda iti pannakaisalakan.

18 Ta ammok a saan a manangidumduma a Dios ti Dios, wenno managbaliw a nabiag; ngem saan a ^anagbalbaliw iti ^bkaano man agingga iti agnanayon.

19 Saan a makapagbabawi dagiti ^ababassit nga ubbing; gapuna, nakaal-alingget a kinadangkes ti mangtallikud iti natarnaw a kaasi ti Dios kadakuada, ta sibibiagda amin kenkuana gapu iti ^basina.

20 Ket isu nga agkuna a nasken a mabuniagan dagiti babassit nga ubbing tallikudanna ti asi ni Cristo, ket pilawenna ti ^apannakasubbot ken ti pannakabalin ti pannubbotna.

21 Asi pay dagita, ta agpeggadda iti patay, ^aimpierno, ken ^bawan patinggana a panagtuok. Ibagak a sibabatad; imbilin kaniak ti Dios. Denggenyo ida ken agannadkayo, wenno busorendakayonto iti ^cpangukoman ni Cristo.

22 Ta adtoy ^asibibiag ken ni Cristo dagiti amin nga ubbing ken kasta met dagiti amin nga awanan iti ^bpaglintegan. Ta dumteng ti pannakabalin ti ^cpannakasubbot kadagiti amin nga awanan iti paglintegan; gapuna, isu a saan a makedngan, wenno isu a saan a nakedngan, saan a makapagbabawi; ket iti kasta saan a nasken ti pannakabuniag—

23 Ngem pananglais daytoy iti Dios, panangtallikud iti asi ni Cristo, ken ti pannakabalin ti Nasantuan nga Espirituna, ken panagtalek iti ^anatay nga aramid.

24 Adtoy, anakko, saan a mabalin ti kastoy a banag; ta agpaay ti ^apanagbabawi kadagiti nakedngan ken nailunod iti panaglabsingda iti paglintegan.

25 Ket ti ^apannakabuniag ti umuna a bunga ti ^bpanagbabawi; ket dumteng ti pannakabuniag babaen ti pammati iti panagtungpal kadagiti bilin; ket yeg ti panagtungpal kadagiti bilin ti ^cpannakaugas ti basol;

26 Ket yeg ti pannakaugas dagiti basol ti ^akinadayaw, ken kinapakumbaba ti puso; ket gapu iti kinadayaw ken kinapakumbaba ti puso umasideg ti ^bEspiritu Santo, a penken ti ^cMangliwliwa iti ^dnamnama ken naan-anay nga ^eayat, ti ayat a makaibtur babaen iti ^fkinaregta ken ^gpanagkararag, agingga a dumteng ti panungpalan, inton makipagnaed ti amin a ^hsanto iti Dios.

27 Adtoy, anakko, agsuratakto manen kenka no saanak a masapa a mapan bumusor kadagiti Lamanite. Adtoy, ti ^akinapasindayag daytoy a pagilian, wenno dagiti tao dagiti Nephite, impaneknekda ti pannakadadaelda malaksid no agbabawida.

28 Ikararagam ida, anakko, a dumteng koma ti panagbabawi kadakuada. Ngem adtoy, maamakak amangan ta nagsardengen ti ^apanangtartarabay ti Espiritu kadakuada; ken balbalabalaenda iti daytoy a paset ti daga a dadaelen ti amin a pannakabalin ken turay nga aggapu iti Dios; ket ^btaltallikudanda ti Espiritu Santo.

29 Ket kalpasan ti panangtallikudda iti naindaklan a pannakaammo, anakko, nasken a mapukawdanton kas iti pannakatungpal ti padto a naibaga dagiti mammadto, ken kas met kadagiti balikas mismo ti Mannubbottayo.

30 Agpakadaakon, anakko, agingga nga agsuratakto kenka, wenno inton agkitata manen. Amen.