1 Betik er a renguk el ngelekek, ak luutang el meluches el mei er kau, me bo modengei el kmo ak dirke ngar; endi kmeluches el ko er a kirel a mekngit el chais.

2 Me kamorrenges, ak mla er a meringel mekemad lomtok er a rechedal a Laman, el dimlak kibo mesisiich; me a Archeantus a mlo moiit er a saider, me a direk el Luram me a Emron; Oi, me a betok er a ngellitel chedemam a mla mad.

3 Me chelecha kamosang e rungalk, ak bekikl er a kmo a rechedal a Laman a mo olengemed er tirkang el chad; leng diak bo louuchel a rengrir er a kenterir, me a Satan omdui er tir me te blechoel el di ngaerngii a klaiuengasechereng er a ta me a ta er tir.

4 Chelecha ngak a blechoel loureor lobenterir; e sel kulekoi a tikingel a Dios el mo mesisiich, e tir a mo omritel e kesib a rengrir er ngak; e sel lakusbech a mesisiich el tekoi e tir a mo melcherecher a rengrir lomtok; me ak mla mo bekikl el kmo, a Reng er a Rubak kele bla le nguu a rengul er tir.

5 Leng kmal eisong a ngasechreng er tir, me a kumtab eng dikea le medakt a kodall; e mla remiid er tir a beltik el reng el mo er a tang me a tang; meng meched a rengrir el kirel merserasech me a omlaitechei el di blechoel.

6 Me chelechang e betik er a renguk el ngelekek, bo bechirei a delcherecherel a rengrir, e bo le blak a rengud loureor; le bo lak doureor e ke demo nguu a dellebeakl, le kid a ngarngii a urered el doruul er ngii er chelechang el de nga er tiael bedenged el chutem, me bo de mesisiich er a cheraro er a rokui el melemalt, e bo lo lengull a delbenged er a rengedel a Dios.

7 E chelechang ak meluches el koera kirel a ringel el ngar tirkael chad. Le kultirakl a klemedengei er ngak er a tekingel a Amoron, kamosang, a rechedal a Laman a obeterir a betok el nga er a kelebus, el le ngilititerir er a metongakl el blai er a Sherrizah; el mlaerngii a resechal me a redil me a rengalk.

8 Ea rebecherir me a redemerir tirkel redil me a rengalk a blalomekeuad er tir; e omekang er a redil er a techel a bedengir a rebecherir, me a rengalk er a techel a bedengir a redemerir; e diak a ralm, meng di sesei a lomesterir.

9 Me a domes er cho uaitiaikid el klou el delngerngerir a rechedal a Laman, ng diak le boruchei er a rechedad el nga er a Moriantum. Le kamosang, te mla ngoititerir a rebetok el ngalk el redil er a rechedal a Laman el mo kelebus; e mla choba klisiich el nguu er tir sel kot el meringelchad lokedeldaol e er a rokui el tekoi, el ngii a klikiid er a ildekelel deleboes el delngerenger–

10 Ea uriul er a blarrellii cho uaitiang el tekoi, e tomekeuad er tir er a kmal rasechbeab el teletael, lomekcharm er tir el mo er a kodall; ea uriul er a blarrellii cho uaitiang, ete mo mengang a techel a bedengir el di uai a tebelik el charm, leng mla mo medecherecher a rengrir; me te mo uaisei el lekong ngolchotel a tekoi er a blekeu.

11 Ea betik er a renguk el ngelekek, te mekerang a rechad e uaisei, el mla modiak a teletelel a klechad er tir–

12 (E dirke mle mekesai el rak a mla mo merek, el tir a mle ultebechel e bekekeuii el chad.)

13 Endi rungalk, te mekerang e mo uaisei a rechad el nga er a rengrir a di betok el mekngit.

14 Kede mekerang e mo ousbech el kmo, a Dios a mo orkedii a chimal er a kerrekeriil meng diak lebo lomtok er kid.

15 Mosang, a renguk a lmangel: Alii er tirkael chad. Mei memtobed e loukerrekeriil e kau el Dios, me bart a kenterir me a delngerngerir, me a klikingelir me le boer cheroid er medam!

16 Me a lmuut e rungalk, te betok el melakl el dil me a rengelekir redil el di kiliei er a Sherrizah; me a ikei el kall el rechedal a Laman a dimlak el ngai el merael, aikei a le ngilai a resoldau er a Zenephi el merael, e mechititerir me te di merorael el moer ker me ker al sebechir losiik a kall; me te betok er a remechuodel mechas a dimo diak lodengei bedengir er a rael el medei.

17 Me a resoldau lobengkek a mechitechetong; ea resoldau er a rechedal a Laman a nga er a delongelel a Sherrizah me ngak; e tirkei el mla chemiis el leko te mo er a resoldau er a Aaron a mla nguemed el mlo ulekodellir er a raschbeab el blekengir.

18 Eang, a delngerngerir a rechedak! Te diak el delodau, e dikea er tir a chubechub. Kamosang, ngak a di chad, meng di klisiichel a chad a nga er ngak, meng dikeang el sebechek el melelolem loldubech a tikingek.

19 Te mla moimong el mengelengalk; el diosisiu el merserasechreng, el diak a bo le becherei, ka le chuodel me a lechub e le ngeasek; meng sorir a ngii di le ngerang ngidi lak lungil; me a ringel el nga er a redil er kid me a rengeleked el ngarngii er tiael beluu a mla chengelakl a rokui el tekoi; choi, ngdiak el sebechel mechedereder er a ngor, me a lechub ele meluches.

20 E chelechang e rungalk, eng dikea kluut el mesaod er tiang el kengaol ues. Ng uaisei kau a medengei a delngerngerir tir kang el chad; kau a medengei el kmo tir a dikea okedeldaol el tekoi er a klechad er tir, el dikea lomelchesiu; me a delngerngerir a mla chengelakl er a rechedal a Laman.

21 Kamosang e rungalk, ngdikea el sebechek lolterekokl er tir el mo er a Dios leng mo el oietii a chimal mer ngak.

22 Endi kamrenges e rungalk, ngak olterekokl er kau er a Dios, me a kumerang er a Kristo el kmo kau a mo suobel; me a kmeluluuch el mo er a Dios me le kemengetii a klengar er kau, me bo mosang a luut er a rechedal moer Ngii, me a lechub a ngemedir rokui; le ngak a medengei el kmo ngkirir el di mo nguemed alsekum eng diak bo le mekngit a rengrir er a kenterir e lluut el moer Ngii.

23 Me a lsekum etir a mo nguemed, eng di mo uaia rechedal a Jared, le rengrir el di sorir a merserasech me a omelaitechei.

24 Me a lsekum tir a mo nguemed, kid a medengei el kmo te betok er a rodam er kid a mla chemiis er mo er a rechedal a Laman, e dirke betok er tir a direk el mo chemiis el moer tir; me a le uaisei e mluches ako er a bebir er a tekoi, alsekum eng diako mad, e ngak a mad e diak kusekau; endi ngak oumerang el kmo, ak mo mesekau el di mereched; leng ngarngii chedaol rekord el ngak a mo ngmai el meskau.

25 Rungalk, bomesisiich loumerang er a Kristo; e lak le metemall a rengum er a kulluches el tekoi, me bo lomekberaod er kau el mo er a kodall; ebo le kidrau a Kristo, me a ringelel me a kodellel, me a ochotel a bedengel mo er a redemad, me a klechubechub er Ngii, me a kemanget el ongarm, me a ongiil er a klebkellel me a diak a ulebengelel klengar bole medechel er a uldesuem el mo cherechar.

26 E bo le sebechel a chubechub er a Dios el Edam el kingellel a ngarbab er a babeluades, me a Rubak er kid el Jesus Kristo, el dengchokl er a kadekmel a klisiichel el di merekmo rokui el tekoi bo le chederdall er Ngii, bo lobengkem el nga er bita er kau el mo cherechar. Boluaisei.