1 Ay-ayatek nga anakko, agsuratak manen kenka tapno ammuem a sibibiagak pay laeng; ngem kasla nadagem ti suratko.

2 Ta adtoy, napinget ti pannakirangetko kadagiti Lamanite, a saanmi a nagballigian; ket natay ni Archeantus babaen ti espada, ket kasta met ni Luram ken ni Emron; wen, ket adu a bilang ti napukawmi kadagiti pinilimi a tao.

3 Ket ita adtoy, anakko, amkek amangan ta dadaelento dagiti Lamanite dagitoy a tao; gapu ta saanda nga agbabawi, ket agtultuloy ti panangkibur kadakuada ni Satanas a mamagpungtot iti tunggal maysa.

4 Adtoy, agtultuloy a kaduadak nga agtrabaho; ket idi ibagak ti balikas ti Dios a ^asibabatad nagpigergerda ken kinapungtotdak; ket no diak inaramat ti kinabatad patangkenenda ti puspusoda a maibusor iti dayta; gapuna, amkek amangan ta saanen nga ituloy ti Espiritu ti Apo ti ^bmangtarabay kadakuada.

5 Gapu ta nalabes ti panagpungtotda ket nariknak nga awan ti butengda iti patay; ken napukawda ti ayatda, iti tunggal maysa; ket kanayon a ^amawawda iti dara ken iti panagibales.

6 Ket ita, ay-ayatek nga anakko, nupay nasukirda, agtrabahotayo a ^asireregta; ta no agsardengtayo nga ^bagtrabaho, makedngantayo; agsipud ta adda trabaho nga iwakastayo bayat ti kaaddatayo ditoy pitak a tabernakulo, tapno maparmektayo ti kabusor ti amin a kinalinteg, tapno aginana ti kararuatayo iti pagarian ti Dios.

7 Ket ita isuratko ti maipapan iti kasla panagsagaba dagitoy a tao. Ta maibatay iti pannakaammo a naawatko ken ni Amoron, adtoy, addaan dagiti Lamanite iti adu a balud, nga innalada manipud iti torre ti Sherrizah; ket adda lallaki, babbai ken ubbing.

8 Ket napapatay ti assawa ken amma dagiti babbai ken ubbing; ket pinakanda dagiti babbai iti lasag dagiti asawada, ket dagiti ubbing iti lasag dagiti ammada; ken awan ti danum, malaksid iti bassit laeng, nga itedda kadakuada.

9 Ket iti baet daytoy nakaro a kinadakes dagiti Lamanite, saan a naidumduma dagiti taomi iti Moriantum. Ta adtoy, adu kadagiti babbai nga annak dagiti Lamanite ti imbaludda; ket kalpasan ti panangdadaelda iti dayta kapatgan ken kangrunaan iti amin a banag, nga isu ti ^akinadalus ti dayaw ken ^bsaguday—

10 Ken kalpasan a naaramidda daytoy a banag, pinapatayda ida iti kadaksan unay a wagas, a pinarparigatda ida agingga iti natayda; ket kalpasan ti panangaramidda iti kastoy, sindada ti lasagda a kas kadagiti atap a narungsot nga ayup, gapu iti kinatangken ti puspusoda; ket inaramidda a kas tanda ti kinatured.

11 O ay-ayatek nga anakko, kasano dagiti tao a kastoy, nga awan sursurona—

12 (Ket sumagmamano laeng a tawen ti naglabas, nadayaw ken nakaay-ayoda idi a tao)

13 Ngem O anakko, kasano a maaramid dagiti tao ti kastoy, a pagay-ayatda ti nalabes a kinadakes—

14 Kasano a manamnamami a saan nga ^aisaad ti Dios ti imana iti panangukom a maibusor kadakami?

15 Adtoy, agsangit ti pusok; Asi pay dagitoy a tao. Umay ti pannakaukom, O Dios, ket ilemmengda ti basbasolda, ken ti kinadangkesda, ken kinarimonda iti rupam!

16 Ket manen, anakko, adu dagiti ^abalo ken dagiti annakda a nabati idiay Sherrizah; ken ti natda a taraon a saan nga innala dagiti Lamanite, adtoy, impanaw ida ti buyot ni Zenephi, ket nabatida nga agsursursor iti sadino man a pakabirokanda iti taraonda; ket adu ti naglusdoy a babbaket iti dalan ket natayda.

17 Ket nakapsut ti buyot nga adda kaniak; ket nagtengngaanmi ken ni Sherrizah ti buyot dagiti Lamanite; ket kas ti kaadu ti napan nagkamang iti buyot ni ^aAaron ti nagsagaba iti nakaam-amak a kinarungsotda.

18 O, ti kinadakes dagiti taok! Awananda iti urnos ken awananda iti asi. Adtoy, maysaak laeng a tao, ket pigsa la ti tao ti adda kaniak, ket saankon a maipapilit ti bilinko.

19 Ket limmanlan ti panagbasolda; ket agpapadada a narungsot, nga awan idumdumada, nataengan man wenno agtutubo; ket naayatda iti amin a banag malaksid iti nasayaat; ket awan umartap iti panagsagaba dagiti babbai ken annakmi iti amin a rabaw daytoy a daga; wen, di maibalikas ti dila, ket saan met a mabalin a maisurat.

20 Ket ita, anakko, saankon nga iladawan pay daytoy nakaam-amak a buya. Adtoy, ammom ti kinadangkes dagitoy a tao; ammom nga awananda iti pagbatayan, ken awananda iti rikna; ket ^analablabes pay ti kinadangkesda ngem dagiti Lamanite.

21 Adtoy, anakko, saanko ida a maikalikagum iti Dios amangan ta dusaennak.

22 Ngem adtoy, anakko, ikalikagumka iti Dios, ken agtalekak ken ni Cristo a maisalakanka; ket ikararagko iti Dios nga ^aispalenna ti biagmo, a mangsaksi iti panagsubli dagiti taona kenkuana, wenno ti mamimpinsan a pannakadadaelda; agsipud ta ammok a masapul a matayda malaksid no ^bagbabawi ken agsublida kenkuana.

23 Ket no mapukawda mayarigdanto kadagiti Jaredite, gapu iti kinasukir dagiti pusoda, a mangsapsapul iti ^adara ken ^bpanagibales.

24 Ket no kasta met laeng a mapukawda, ammomi nga adu kadagiti kakabsatmi ti ^anagtalaw kadagiti Lamanite, ket adunto pay kadakuada ti agtalaw, iti kasta, agsuratka iti sumagmamano a banag, no sika ti maispal ket siak ti mapukaw ket dikanto makita; ngem agtalekak a sapay koma ta makitaka iti saan a mabayag; ta adda kaniak ti nasagraduan a sinurat a kayatko a ^byawat kenka.

25 Anakko, agtalinaedka a napudno ken ni Cristo; ket saanka koma a maladingitan kadagiti banag nga insuratko, a mangdagdag kenka nga agturong ken patay; ngem bitibitennaka koma ni Cristo, ket ti koma ^apanagsagaba ken ipapatayna, ken ti panangiparangna iti bagina kadagiti ammatayo, ken ti asina ken ti atiddog a panagsagabana, ken ti namnama ti dayagna ken iti biag nga ^bagnanayon, agtalinaed koma iti ^ckapanunotam iti agnanayon.

26 Ken sapay koma ta ti asi ti Dios Ama, nga adda ti tronona iti nangato a langit, ken ti Apotayo a ni Jesucristo, a situtugaw iti nabileg a ^amakanawan nga imana, agingga iti agrukbabto amin a banag kenkuana, sapay koma, ket agtalinaed kenka iti agnanayon. Amen.