1 Im ālikin men kein kōm ar bar jino n̄an kajutak aelōn̄ in kiin̄ eo im kōm ar bar jino n̄an bōk āneo ilo aenōm̧m̧an. Im Iaar kōm̧m̧an bwe en wōr kein tariņae ko otemjeļo̧k kōm̧m̧ani, bwe kōn menin en maron̄ wōr ippa kein tariņae n̄an armej ro aō ņae iien eo riLeman renaaj bar itok n̄an tariņae ņae armej ro aō.

2 Im iaar likūt ribaar ro ipeļaakin āneo, bwe riLeman ro ren jab maron̄ itok ioom̧ bar ilo ankōmājur im ko̧kkure kōm; im āindein iaar baare armej ro aō im bwijin in mennin mour ko aō, im kōjparok er jān wōtlo̧k ilo pein rikōjdat ro am.

3 Im ālikin men kein kōm ar jolōte āneo āneen ro jemām ium̧win elōn̄ iiō ko, aaet, n̄an kōtaan in ron̄oul im ruo iiō ko.

4 Im iaar kōm̧m̧an bwe em̧m̧aan ro ren kōpooj bwidej eo n̄an kallib, im kaddōk aolep ^agrain otemjeļo̧k im aolep leen wōjke otemjeļo̧k.

5 Im iaar kōm̧m̧an bwe kōrā ro ren irap, im en̄taan, im jerbal, im jerbali aolep ^anuknuk aidik iden otemjeļo̧k, bwe kōmin maron̄ kanuknuk keelwaan eo am; im āindein kōm ar jeraam̧m̧an ilo āneo—Āindein eaar wōr am aenōm̧m̧an ilo āneo ilo kōtaan eo ron̄oul im ruo iiō ko.

6 Im ālikin men kein kiin̄ ^aLeman eaar mej, im ļeo nejin eaar jino n̄an irooj ilo jikin. Im eaar jino kalim̧otak armej ro an ilo kōpata ņae armej ro aō; kōn menin raar jino n̄an m̧aanjāppopo n̄an tariņae, im n̄an wanlōn̄tak n̄an tariņae ņae armej ro aō.

7 A iaar jilkinļo̧k riiaron̄ron̄ ro aō ipeļaakin ijo ilo āneen ^aSemlon, bwe in maron̄ jeļā m̧aanjāppopo ko aer, bwe in maron̄ baar ņae er, bwe ren maron̄ jab wanlōn̄tak ņae armej ro aō im ko̧kkure er.

8 Im ālikin men kein raar wanlōn̄tak ioon tuiōn̄ in āneen Silom, ippān jarin tariņae ko aer reļļap, em̧m̧aan ro ^arepojak kōn ^blippo̧ņ ko, im kōn m̧ade ko, im kōn jāje ko, im kōn jāje ko reddik, im kōn dekā ko, im kōn buwat ko; im raar āl e bōraer bwe raar keelwaan; im raar kan̄ōrn̄ōr kōn juon kilin kidu ipeļaakin ipier.

9 Im ālikin men kein iaar kōm̧m̧an bwe kōrā ro im ajri ro ilo armej ro aō ren tilekek ilo āne jem̧aden; im iaar barāinwōt kōm̧m̧an bwe aolep ļōļļap ro remaron̄ kotak kein tariņae ko, im barāinwōt aolep em̧m̧aan ro reddik raar barāinwōt kotak kein tariņae ko, ren kuktok ippān doon n̄an ilo̧k n̄an tariņae ņae riLeman ro; im iaar likūt er ilo ijoko jikier, aolep em̧m̧aan ekkar n̄an dettan eo an.

10 Im ālikin men kein kōm ar wanlōn̄ļo̧k n̄an tariņae ņae riLeman ro; im n̄a, em̧ool n̄a, ilo dettan eo aō erūtto, iaar wanlōn̄ļo̧k n̄an tariņae ņae riLeman ro. Im ālikin men kein kōm ar wanlōn̄ļo̧k ilo ^akajoor in Irooj n̄an tariņae.

11 Kiiō, riLeman ro raar jeļā ejjeļo̧k jabdewōt kōn Irooj, im jab kōn kajoor eo an Irooj, kōn menin, raar pedped ioon wōt aer kajoor make. Mekarta raar juon armej ekajoor, āinwōt n̄an kajoor an armej.

12 Raar ^aawiia, im rōkaammijak, im juon armej remaro bōtōktōk, tōmak ilo ^bm̧anit an ro jemāer, eo ej in—Raar tōmak bwe kar lukwarkwareļo̧k er jān āneen Jerusalem kōnke nana ko an ro jemāer, im bwe kar bōd n̄an er ilo āne jem̧aden jān ro jeir im jatier, im kar barāinwōt bōd n̄an er ke raar kijoone lo̧jet eo;

13 Im bar, kar bōd n̄an er ke raar pād ilo āneen jolōt eo aer ^am̧oktata, ālikin aer kar kijoone lo̧jet eo, im aolep men in kōnke Nipai eaar ļapļo̧k an tiljek ilo kōjparok kien ko an Irooj—kōn menin eaar ^butiej ippān Irooj, bwe Irooj eaar ron̄ jar ko an im uwaak i, im eaar bōk tōl eo n̄an ito-itak eo aer ilo āne jem̧aden.

14 Im ro jein im jatin raar ļōkatip ippān kōnke raar jab ^ameļeļe kōn m̧akūtkūt ko an Irooj; raar barāinwōt ^bļōkatip ippān ioon dān ko kōnke raar kapene burueer ņae Irooj.

15 Im bar, raar ļōkatip ippān ke raar ļawōdeļo̧k āneen kallim̧ur, kōnke raar ba bwe eaar bōk ^airooj ioon armej ro jān peier; im raar kappukot n̄an m̧an e.

16 Im bar juon alen, raar ļōkatip ippān kōnke eaar ilo̧k ilo āne jem̧aden āinwōt Irooj eaar jiron̄ e, im kar bōk ^aļo̧o̧k ko kar m̧wijiti ioon pileij brass ko, bwe raar ba bwe eaar ^brakimi er.

17 Im āindein raar katakin ro nejier bwe ren dike er, im bwe rej aikuj m̧an er, im rej aikuj ko̧o̧te im rakimi er, im kōm̧m̧an aolep remaron̄ n̄an ko̧kkure er; kōn menin ewōr aer matōrtōr ejjeļo̧k jem̧ļo̧kin n̄an ro nejin Nipai.

18 Bwe kōn un in kiin̄ Leman, jān etao, im m̧oņ ittino, im kallim̧ur ņojak ko an, eaar m̧oņe eō, bwe in kar bōktok armej ro aō lōn̄tak n̄an āniin, bwe ren maron̄ ko̧kkure er; aaet, im kōm ar en̄taan elōn̄ iiō ko ilo āneo.

19 Im kiiō n̄a, Zeniff, ālikin kar aō ba aolep men kein n̄an armej ro aō kōn riLeman ro, iaar kōketak er n̄an ilo̧k n̄an tariņae kōn aer kajoor, likūt aer lōke ilo Irooj; kōn menin, kōm ar pata ippāer, ilo jelm̧ae doon.

20 Im ālikin men kein kōm ar bar lukwarkwareļo̧k er jān āneo āneem; im kōm ar m̧an er kōn juon im eļap, em̧ool jon̄an an lōn̄ kōm ar jab maron̄ bwine er.

21 Im ālikin men kein kōm ar bar ro̧o̧l n̄an āneo āneem make, im armej ro aō raar bar jino lale bwijin in mennin mour ko aer, im n̄an kalbwin bwidej eo.

22 Im kiiō n̄a, kōnke iaar rūtto, iaar leļo̧k aelōn̄ in kiin̄ eo ioon juon iaan ļōm̧aro nejū; kōn menin, ij jab bar ba eļapļo̧k. Im Irooj en kōjeraam̧m̧an armej ro aō. Amen.