Tusitusiga Paia
Mosaea 11


Mataupu 11

Ua pule le Tupu o Noa i le amioleaga—Ua fiafia o ia i le olaga faasoesā ma ana avā ma ana palake—Ua vavalo Apinati o le a ave le nuu e fai ma pologa—Ua sailia lona ola e le Tupu o Noa. E tusa o le 160–150 T.L.M.

1 Ma o lenei sa oo ina faaee e Senifa le malo i luga o Noa, o se tasi o ona atalii; o lea na amata ai ona nofotupu o Noa i lona tulaga; ma sa lē savali o ia i ala o lona tamā.

2 Aua faauta, sa lē tausia e ia poloaiga a le Atua, ae sa savali o ia e tusa ma manaoga o lona lava loto. Ma sa i ai ia te ia ni avā e toatele ma apalake. Ma sa efaia e ia ia fai e lona nuu le agasala, ma fai mea ua inosia i le silafaga a le Alii. Ioe, ma sa latou faia le ifaitaaga ma ituaiga o amioleaga eseese uma.

3 Ma sa faatulaga e ia se lafoga o le tasi vaelima o mea uma ua latou maua, o le tasi vaelima o a latou auro ma a latou ario, ma le tasi vaelima o a latou asifa, ma a latou kopa, ma a latou apamemea, ma a latou u’amea; ma le tasi vaelima o a latou manu pepeti; ma le tasi vaelima foi o a latou saito uma.

4 Ma sa ave e ia nei mea uma e tausi ai o ia lava, ma ana avā ma ana palake; ma ana faitaulaga foi, ma a latou avā ma a latou palake; ma sa faapea ona sui e ia mataupu o le malo.

5 Ona sa ia aveese faitaulaga uma na faapaia e lona tamā, ma sa ia faapaia ni faitaulaga fou e suitulaga ia i latou, e i ai i latou sa faafefeteina i le faamaualuluga o o latou loto.

6 Ioe, ma sa faapea ona lagolagoina i latou i lo latou paie, ma lo latou ifo i tupua, ma lo latou faitaaga, i lafoga na tuu e le tupu o Noa i luga o lona nuu; sa faapea ona galulue malolosi ai o le nuu e lagolago le amioletonu.

7 Ioe, ma sa oo foi ina avea i latou ma tagata ifo i tupua, ona ua faasesēina i latou i upu lē aogā ma taufaasee a le tupu ma ana faitaulaga; ona sa latou tautatala atu mea taufaasee ia te i latou.

8 Ma sa oo ina fausia e le tupu o Noa ni fale mata’ina ma laolao e tele; ma sa ia teuteuina i galuega taulima matagofie o laau, ma ituaiga uma o mea taugata, o le auro, ma le ario, ma le u’amea, ma le apamemea, ma le sifa, ma le kopa.

9 Ma sa ia fausia foi se maota laolao mo ia lava, ma se nofoalii i lona totonugalemu, o nei mea uma sa fai mai i laau lelei ma sa teuteu i le auro ma le ario ma mea taugata.

10 Ma sa faia foi e ia ia faia e ana tagata faigaluega ituaiga uma o galuega lelei eseese i totonu o pa o le malumalu, i laau lelei, ma i le kopa, ma i le apamemea.

11 Ma o nofoa sa faaagaaga mo faitaulaga sili, lea sa maualuga a’e i lo o isi nofoa uma, sa teuteu e ia i le auro mao’i; ma sa faia se si’ofatafata i o latou luma, ina ia mafai ona faalagolago i ai i luga o latou tino ma o latou lima a’o latou tautatala atu i upu pepelo ma lē aogā i lona nuu.

12 Ma sa oo ina fausia e ia se a’olo latalata i le malumalu; ioe, o se ’olo maualuga lava, sa matuā maualuga tele lava sa mafai ona tu ai o ia i luga ma vaai atu i le laueleele o Seloma, ma le laueleele foi o Semulona, ia sa fai mo sa Lamanā; ma sa mafai foi ona vaai atu ai o ia i le laueleele atoa o faataamilo ai.

13 Ma sa oo ina faia e ia ia fausia ni fale e tele i le laueleele o Seloma; ma sa faia e ia ia fausia se ’olo tele i luga o le maupu’epu’e i matu o le laueleele o Seloma, lea sa fai ma mapusaga mo le fanau a Nifae i le taimi na latou sosola ese ai mai le laueleele; ma sa faapea ona faia e ia i ’oa na ia maua mai i lafoga a lona nuu.

14 Ma sa oo ina tuu atu e ia lona loto i ana ’oa, ma ia faaalu lona taimi i le olaga faasoesā faatasi ma ana avā ma ana palake; ma sa faapea foi ona faaalu e ana faitaulaga o latou taimi ma fafine talitane.

15 Ma sa oo ina totō e ia tovine faataamilo i le laueleele; ma sa fausia e ia soli-uaina, ma faia le uaina tele; ma o lea na avea ai o ia ma se atagata inu uaina tele, ma sa faapea foi lona nuu.

16 Ma sa oo ina amata ona o mai o sa Lamanā i luga o lona nuu, i luga o vaega toaitiiti o tagata, ma fasioti i latou i o latou fanua, a’o latou leoleo a latou lafu.

17 Ma sa auina atu e le tupu o Noa leoleo faataamilo i le laueleele e tutuli ese i latou; peitai sa lē lava le toatele o e na auina atu e ia, ma sa o mai sa Lamanā ia te i latou ma fasiotia i latou, ma tutuli le tele o a latou lafu mai le laueleele; sa faapea ona amata e sa Lamanā ona faaumatia o i latou, ma faatino lo latou ita ia te i latou.

18 Ma sa oo ina auina atu e le tupu o Noa ana autau e faasagatau ia te i latou, ma sa latou solomuli, ma sa latou tutuli i latou i tua mo se taimi; o lea, na latou foi mai ai ma le olioli i mea ua latou maua.

19 Ma o lenei, ona o lenei manumalo tele, sa faafefeteina ai i latou i le faamaualuluga o o latou loto; sa latou amitamitavale i lo latou lava malosi, fai mai e mafai e la latou toalimagafulu ona tutū faasagatau atu i le afe ma afe o sa Lamanā; ma sa faapena ona latou mitamitavale, ma fiafia i le toto, ma le faamasaaina o le toto o o latou uso, ma o lenei ona o le amioleaga o lo latou tupu ma o latou faitaulaga.

20 Ma sa oo ina sa i ai faatasi ma i latou se tagata o lona igoa o aApinati; ma sa alu atu o ia i totonu o i latou, ma amata ona vavalo, fai mai: Faauta, ua faapea ona fetalai mai o le Alii, ma ua faapea ona ia poloaiina o a’u, e faapea, Alu atu ia, ma fai atu i lenei nuu, ua faapea ona fetalai mai o le Alii—Oi talofa i lenei nuu, ona ua Ou vaai ia latou mea inosia, ma a latou amioleaga, ma a latou faitaaga; ma o le a Ou asiasi atu ia te i latou i lo’u toasa, vaganā ai ua latou salamo.

21 Ma e vaganā ai ua latou salamo ma liliu mai i le Alii lo latou Atua, faauta, o le a ou tuuina atu i latou i lima o o latou fili; ioe, ma o le a aumai i latou i le apologa; ma o le a faapuapuagatiaina i latou i lima o o latou fili.

22 Ma o le a oo mai, o le a latou iloa o A’u o le Alii lo latou Atua, ma o A’u o se Atua afuā, e asiasi atu i lo’u nuu i a latou amioletonu.

23 Ma o le a oo mai, se’i vagana ua salamo lenei nuu ma liliu mai i le Alii lo latou Atua, o le a aumai i latou e nofo pologa; ma o le a leai se tasi e lavea’i ia i latou, vaganā ai lava le Alii le Atua Silisiliese.

24 Ioe, ma o le a oo pe a latou tagi mai ia te a’u o le a afaagesegese ona Ou faalogo atu ia latou tagi; ioe, ma o le a Ou tuu i latou ina ia taia i latou e o latou fili.

25 Ma vagana ai ua latou salamo i le ofu o le ie talatala ma le lefulefu, ma tagi faatauanau mai i le Alii lo latou Atua, o le a Ou lē alagona a latou tatalo, pe Ou te lavea’i i latou mai o latou puapuaga; ma ua faapea ona fetalai mai o le Alii, ma ua faapea ona ia poloaiina o a’u.

26 O lenei sa oo ina ua uma ona tautala atu Apinati i nei upu ia te i latou, sa latou feitai ia te ia, ma saili e aveese lona ola; peitai sa laveaiina o ia e le Alii mai o latou lima.

27 O lenei ina ua faalogo le tupu o Noa i upu na tautala atu e Apinati i le nuu, sa ita foi o ia, ma sa ia fai mai: O ai Apinati, ua ia faamasinoina ai a’u ma lo’u nuu, po ao ai foi le Alii, o le a aumaia i luga o lo’u nuu le puapuaga tele faapea?

28 Ou te poloai atu ia te outou ia aumai Apinati iinei, ina ia mafai ona ou fasioti ia te ia, ona ua fai mai e ia nei mea ia mafai ona faaoso ai e ia lo’u nuu ia ita le tasi i le isi, ma faatutupu ai finauga i totonu o lo’u nuu; o lea o le a ou fasiotia ai o ia.

29 O lenei sa afaatauasoina mata o le nuu; o lea sa latou efaamaaa ai o latou loto e faasaga i upu a Apinati, ma sa latou saili mai lena taimi e pu’e o ia. Ma sa faamaaa e le tupu o Noa lona loto e faasaga i le afioga a le Alii, ma sa lē salamo o ia i ana mea leaga.