Ma Suhmuhslah
Mosiah 11


Sapta 11

Tohkohsrah Noah el kol ke koluk—El ahkkahlwemye moul in lokoalok nuh sin muhtwacn kiyacl ac muhtwacn kuhlwacnsap lal—Abinadi el palye lah mwet ah ac fah utucklac srohoh—Moul lal sukok in kuhnausyucklac sel Tohkohsrah Noah. Sahp ke 160–150 Met Liki Kraist

1 Ac na tukun ma inge tuh Zeniff el sang tohkohsrahi nuh sel Noah, sie sin wen nahtuhl; ohinge Noah el muhtwacwacack in kol aholuhl; ac el tiac fahsr ke inkacnek luhn pahpah tuhmwacl.

2 Tuh liye, el tiac karihngihn masap luhn God, tuh el fahsr tukun kena luhn insiacl sifacna. Ac puhkantwen muhtwacn kiyacl ac muhtwacn kuhlwacnsap lal. Ac el oruh mwet lal in orekma koluk, ac oruh ma suc koluk nuh ye muhtuhn Leum. Ahok, ac elos orek kosro ac kain in ma koluk nuhkwewa.

3 Ac el oraclah sie molo ke sie tahfuh limekohsr ke ip nuhkwewa ke ma lalos, ip limekohsr ke kol lalos ac ke selfuh lalos, ac ip limekohsr ke ziff lalos, ac ke copper lalos, ac ke prahs lalos, ac ke osra, ac ip limekohsr ke kosro nahtuhlos; ac oacyacpac ip limekohsr ke grain nuhkwewa lalos.

4 Ac ma inge nuhkwewa el eis in sang kahsrel sifacna, ac muhtwacn kiyacl ac muhtwacn kuhlwacnsap lal; ac oacyacpac mwet tol lal, ac muhtwacn kiyaclos ac muhtwacn kuhlwacnsap lalos; ohinge el ahollah mukwikwi ke tohkohsrahi.

5 Tuh el eislah nohfohn mwet tol ma akmuhsralah sin pahpah tuhmwacl, ac akmuhsraelah mwet sasuc in aholuhltahl, elos puhsruhkuhltahlack in insefuhlwact ke insiaclos sifacna.

6 Ahok, ac ohinge elos kahsreyuck ke alsruhngwesr lalos, ac ke alyalu lalos, ac ke inkacnek in kosro lalos, ke molo suc tohkohsrah Noah el likiyac nuh fin mwet lal; ohinge mwet ah orekma fahfahlac in ahkkweye ma koluk.

7 Ahok, ac elos oacyacpac eklac in alyalu, ke srihpen elos kiyacpweyucklac ke kahs wacngihn srihpac ac ahkluhng luhn tohkohsrah ac mwet tol; tuh elos sramsram ke ma sramlacp nuh selos.

8 Ac tukun ma inge tuh tohkohsrah Noah el muhsahelah lohm kahto pucspucs ac oasr suhnuhn acn in muhta kac; ac el nahwelah ke orekma wo ke sahk, ac ke kain in ma yohk molo pucspucs, ke kol, ac ke selfuh, ac ke osra, ac ke prahs, ac ke ziff, ac ke copper;

9 Ac el oacyacpac muhsahelah sie pacluhs na yohk mwesahs, ac sie tron oan infulwac ah, ma inge nuhkwewa oreklac ke sahk na wo ac nahweyucklac ke kol ac selfuh ac ke ma sacohk.

10 Ac el oacyacpac oruh tuh mwet orekma lal in orekma ke kain in orekma wo nuhkwewa nuh ke pihsinkacn tempuhl, ke sahk wowo, ac ke copper, ac ke prahs.

11 Ac mwe muhta ma srisrilac luhn mwet tol fuhlwact, ma wo liki mwe muhta nuhkwewa, el yucnwelah ke kol na pwacye; ac el oruh tuh poun mwe muhta inge in muhsahlah met paho ah, tuh elos in kuh in eis monglac luhn mahnolos ac paholos sifacna kac ke elos kikiacp in sramsram ac kahs insefuhlwact nuh sin mwet lal.

12 Ac tukun ma inge tuh el muhsahelah sie taor siskacn tempuhl; ahok, sie taor na fuhlwact, fuhlwactlac oruh el kuh in tu fac ah ohinge ngwetlah liye acn Shilom, ac oacyacpac acn Shemlon, suc ma luhn mwet Laman; ac el kuh in liye acn nuhkwewa raunyak.

13 Ac tukun ma inge tuh el oruh in muhsahlah lohm pucspucs fin acn Shilom; ac el oruh sie taor fuhlwact in muhsahlah fin inging soko ma oan nuh acir fin acn Shilom, suc tuh sie acn in muhta luhn tuhlihk Nephi ke pacl se elos som liki acn ah; ac ohinge el oracni mwe kahsruhp suc el eis ke molo sin mwet lal.

14 Ac tukun ma inge tuh el likiyac insiacl ke mwe kahsruhp lal, ac el sislah pacl lal in muhta ke moul in lokoalok wi muhtwacn kiyacl ac muhtwacn kuhlwacnsap lal; ac oacyacpac mwet tol lal sislah pacl lalos wi muhtwacn kosro.

15 Ac tukun ma inge tuh el ukwiyac imac raunweack acn ah; ac el muhsahelah mwe isacs wine, ac orek wine in puhs; ac ohinge el eklac in sie mwet luhngse wine ac oacyacpac mwet lal.

16 Ac tukun ma inge tuh mwet Laman muhtwacwacack in tuhkuh nuh sin mwet lal, ke pihsac srihk, ac in onweltahl uh ke imac lalos, ac ke elos liyacacng un sip nahtuhlos.

17 Ac tohkohsrah Noah el suhpwaclah mwet topang in raunweack acn ah in luhsuhltahlwack; tuhsruhk el tiac suhpwaclah pihsac fal se, ac mwet Laman elos tuhkuh nuh yohrohlos ac onweltahl uh, ac luhswack un sip nahtuhlos liki acn ah; ohinge mwet Laman muhtwacwacack in kuhnaosuhloslac, ac oruh sruhnga lalos nuh selos.

18 Ac tukun ma inge tuh tohkohsrah Noah el suhpwaclah solse lal in lainuhlos, ac elos fohlohkihnyucklac, kuh elos fohlohkohnohloslac ke lusen pacl se; ohinge, elos fohlohk engan ke ahkkoluk lalos.

19 Ac inge, ke srihpen kuhtanglah yohk se inge elos puhsrkwacltahlwack in insefuhlwact ke insiaclos; elos tuhngahk ke kuhiyaclos sifacna, fahk lah luhmngaul selos kuh in tu lain tausin sin mwet Laman; ac ohinge elos tuhngahk, ac luhngse srah, ac ahksohrohryelah srah luhn mwet wiyaclos, ac ohinge ke srihpen ma koluk luhn tohkohsrah lalos ac mwet tol lalos.

20 Ac tukun ma inge tuh oasr sie mukul inmahsrlolos suc inel pa Abinadi; ac el som in inmahsrlolos, ac muhtwacwacack in pahluh, fahk: Liye, ohinge Leum El fahk, ac ohinge El sapkihn nuh sihk, fahk, Fahsrot, fahk nuh sin mwet inge, ohinge Leum El fahk—We nuh sin mwet inge, tuh Nga liye mwe muhnahs lalos, ac ke koluk lalos, ac inkacnek in kosro lalos; ac sahyacn elos fin tiac auliyak Nga fah muhtwacta nuh yohrohlos ke kasrkuhsrak luhk.

21 Ac sahyacn elos fin tiac auliyak ac for nuh sin Leum God lalos, liye, nga fah kohlohloslac nuh in poun mwet lokoalok lalos, ahok, ac elos fah utuckuh nuh ke srohoh, ac elos fah ahkkolukyeyuck ke poun mwet lokoalok lalos.

22 Ac ma inge fah sikyak tuh elos fah etuh lah Nga pa Leum God lalos, ac Nga sie God lwemta, fahsri nuh ke ma koluk luhn mwet luhk.

23 Ac ma inge fah sikyak tuh sahyacn mwet inge tiac auliyak ac fohlohk nuh yurun Leum God lalos, elos fah utuckuh nuh ke srohoh; ac wacngihn mwet fah kohlohloslac, sahyacn fin te Leum God Kuhlacna.

24 Ahok, ac ma inge fah sikyak tuh ke elos fah pruhe nuh sihk Nga fah tiac sa in lohng pruhe lalos; ahok, ac Nga fah lwelah nuh selos tuh elos ac acnwucki sin mwet lokoalok lalos.

25 Ac sahyacn elos fin tiac auliyak in nukum mah in nuknuk ac orekmakihn apact, ac pruhe yohk nuh sin Leum God lalos, Nga fah tiac lohng pruhe lalos, kuh Nga fah kohlohloslac liki mwe muhnahs lalos; ac ohinge Leum El fahk, ac ohinge El sapkihn nuh sihk.

26 Na tukun ma inge tuh ke Abinadi el sruhmuhn kahs inge nuh selos elos kasrkuhsrak sel, ac suk in eislah moul lal; tuhsruhk Leum El kohlohllah liki paholos.

27 Inge ke tohkohsrah Noah el lohng ke kahs ma Abinadi el sruhmuhn nuh sin mwet ah, el oacyacpac kasrkuhsrak; ac el fahk: Suc Abinadi, tuh nga ac mwet luhk in nuhnuhnkweyuck sel, kuh suc Leum, ma fah sang nuh sin mwet luhk kain in ma koluk yohk?

28 Nga sapkihn nuh suwos in usacluh Abinadi, tuh nga in unilyac, tuh el fahk ma inge tuh elan puhkrakwack mwet luhk in kasrkuhsrak nuh sin sie sin sie, ac in sramtweack fohs inmahsrlon mwet luhk; ohinge nga fah unilyac.

29 Inge muhtuhn mwet ah lohsrlah; ohinge insiaclos kwekwe in lain kahs lal Abinadi, ac elos suk ke pacl sac fahlac in eislah moul lal. Ac tohkohsrah Noah kwekwe insiacl in lain kahs luhn Leum, ac el tiac na auliyak ke ma koluk lal.