1 Mo nao Abinadae i bin talem long olgeta se: “Mi wantem blong yufala i andastanem se ^aGod hemwan bae i kamdaon long medel blong ol pikinini blong ol man, mo bae hem i ^bpemaot ol pipol blong hem.

2 Mo from hem i ^astap laef long bodi blong mit mo bun, bae oli singaotem hem Pikinini blong God, mo from hem i bin putum bodi blong mit mo bun long wanem ^bPapa i wantem, hem i Papa mo Pikinini—

3 Hem i Papa, ^afrom oli bin ^bmekem hem wetem paoa blong God; mo hem i Pikinini from bodi blong mit mo bun; olsem ia nao hem i kam Papa mo Pikinini—

4 Mo tufala i ^awan God, yes, ^bPapa ia we ^dI No Save Finis blong heven mo blong wol.

5 Mo olsem ia nao bodi blong mit mo bun i stap anda long Spirit, o Pikinini anda long Papa, we oli wan God, i ^afesem ol temtesen, mo i no foldaon long ol temtesen, be i letem hem blong oli jikim hem, mo ^bwipim hem, mo sakemaot hem, mo ol pipol blong hem oli ^dno wantem hem.

6 Mo afta evri samting ia, afta we hem i bin mekem plante bigfala merikel long medel blong ol pikinini blong ol man, bae oli lidim hem, yes, ^aolsem we Aesea i bin talem, olsem wan sipsip long fored blong man blong katemaot hea blong sipsip, hem i no toktok, semmak olsem, hem i no ^bopenem maot blong hem.

7 Yes, long sem fasin bae oli lidim hem, ^akrusifaem hem, mo kilim hem i ded, bodi blong mit mo bun bae i stap anda long ded tu, wanem we Pikinini i ^bwantem bae i draon insaed long wanem we Papa i wantem.

8 Mo olsem ia nao God i brekem ol ^arop blong ded, from hem i ^bwin ova long ded; hem i givim paoa long Pikinini blong ^dstanap long bihaf blong ol pikinini blong ol man—

9 Hem i bin go antap long heven, hem i gat filing blong sore; hem i fulap wetem lav mo sore long ol pikinini blong ol man; hem i stanap bitwin olgeta mo jastis; hem i brekem ol rop blong ded, hem i tekem long ^ahemwan ol rabis fasin mo ol fasin blong brekem loa blong olgeta, hem i pemaot olgeta, mo i ^bstretem wanem we jastis i askem.

10 Mo nao mi talem long yufala, ?huia bae i talemaot huia ol jeneresen blong hem? Luk, mi talem long yufala, se taem we bae oli mekem sol blong hem i wan ofring blong sin, bae hem i luk ol ^apikinini blong hem. ?Mo nao wanem yufala i talem? ?Mo huia bae i pikinini blong hem?

11 Luk mi talem long yufala, se eni man we i bin harem ol toktok blong ol ^aprofet, yes, evri tabu profet we i bin talemaot profesi long saed blong taem we Lod bae i kam—mi talem long yufala, se evriwan we i bin lisin gud long ol toktok blong olgeta, mo i bin biliv se Lod bae i pemaot ol pipol blong hem, mo oli bin lukluk i go fored from dei ia we bae oli kam klin aot long ol sin blong olgeta—mi talem long yufala, se olgeta ia oli ol pikinini blong hem, o oli olgeta we bae oli kasem ^bkingdom blong God.

12 From olgeta ia, oli olgeta we ^ahem i bin karem ol sin blong olgeta; olgeta ia oli olgeta we hem i bin ded from, blong pemaot olgeta long ol loa we oli bin brekem. Mo nao, ?olgeta ia oli no ol pikinini blong hem?

13 Yes, ?mo ol profet oli no ol pikinini blong hem, evriwan we i bin openem maot blong hem blong talemaot profesi, we i no bin foldaon long fasin blong brekem loa, mi minim se evri tabu profet stat long taem we wol i bin stat? Mi talem long yufala se oli ol pikinini blong hem.

14 Mo olgeta ia, oli olgeta we oli ^atalemaot pis, we oli karem gudfala nius blong gud, we i talemaot fasin blong sevem man, mo talem long Saeon: !God blong yu i rul!

15 Mo !O hamas nao, leg blong olgeta i naes antap long ol bigfala hil!

16 Mo bakegen, !hamas nao, leg blong olgeta we oli stil stap talemaot pis, oli naes antap long ol bigfala hil!

17 Mo bakegen, !hamas nao, long ol bigfala hil, ol leg blong olgeta oli naes, olgeta ia we bae oli talemaot pis long fiuja, yes, stat long taem ia i go kasem blong oltaem!

18 Mo luk, mi talem long yufala se, i no hemia nomo. From hamas nao, long ol bigfala hil, ol leg oli naes, ol ^aleg blong hem we i karem ol gudfala nius i kam, we i stamba man blong ^bpis, yes, we hem i Lod, we i bin pemaot ol pipol blong hem; yes, hem we i bin givim fasin blong sevem man long ol pipol blong hem;

19 From sapos i no bin gat fasin blong pemaot man we hem i bin mekem blong ol pipol blong hem, we oli bin mekem rere long ^astat blong wol, mi talem long yufala, sapos i no bin gat samting ia, evri man bae oli mas ^bded.

20 Be luk, ol rop blong ded, bae oli brekem olgeta, mo Pikinini i stap rul, mo i gat paoa ova long ded; from hemia, hem i mekem i hapen laef bakegen long ded blong olgeta we oli ded.

21 Mo i gat wan laef bakegen long ded we i stap kam, yes, we i wan ^afasfala laef bakegen long ded; yes, we i wan laef bakegen long ded, blong olgeta we oli bin stap, mo we oli stap, mo we bambae oli stap, i go kasem laef bakegen long ded blong Kraes—from olsem ia nao bae oli singaotem hem.

22 Mo nao, laef bakegen long ded blong evri profet, mo evriwan we oli bin biliv long ol toktok blong olgeta, o evriwan we oli bin obei ol komanmen blong God, bae oli kamkamaot long fasfala laef bakegen long ded; from hemia, oli fasfala laef bakegen long ded.

23 God i leftemap olgeta blong ^astastap wetem hem, we i bin pemaot olgeta; olsem ia nao oli kasem laef we i no save finis tru long Kraes, we i bin ^bbrekem ol rop blong ded.

24 Mo hemia olgeta we oli gat pat long fasfala laef bakegen long ded; mo hemia olgeta we oli bin ded bifo Kraes i bin kam, we oli no bin save wan samting, we oli no bin talemaot ^afasin blong sevem man long olgeta. Mo olsem ia nao Lod i putumbak olgeta ia; mo oli gat wan pat long fasfala laef bakegen long ded, o kasem laef we i no save finis, from Lod i bin pemaot olgeta.

25 Mo ol smol ^apikinini tu oli kasem laef we i no save finis.

26 Be luk, mo ^afraet, mo seksek long fes blong God, from yufala i nid blong seksek; from Lod i no pemaot eni man we i ^btanem baksaed i go agensem hem, mo oli ^dded wetem ol sin blong olgeta; yes, evriwan tu we i bin ded wetem ol sin blong olgeta, stat long taem we wol i bin stat, we oli minim blong go agensem God, we oli bin save ol komanmen blong God, mo oli no obei olgeta; hemia ^eolgeta ia we oli ^fno gat pat long fasfala laef bakegen long ded.

27 From hemia, ?yufala i no ting se yufala i nid blong seksek from fraet? From fasin blong sevem man i no kam long eni man olsem; from Lod i no bin pemaot eni man olsem; yes, mo tu, Lod i no save pemaot eni man olsem ia; from hem i no save tanem baksaed long hemwan; from hem i no save tanem baksaed long ^ajastis taem we hem i gat raet blong hem.

28 Mo nao mi talem long yufala se taem bae i kam we bae oli ^atalemaot fasin blong sevem man blong Lod i go long evri kantri, famli, lanwis, mo pipol.

29 Yes, Lod, ol ^agadman blong yu bae oli singaot laod; wetem ol voes tugeta bae oli singsing; from bae oli luk wetem ae blong olgeta, taem we Lod bae i karembak Saeon.

30 Singaot wetem glad, singsing tugeta, yufala ol emti ples blong Jerusalem; from Lod i bin leftemap tingting blong ol pipol blong hem; hem i bin pemaot Jerusalem.

31 Lod i bin soemaot tabu han blong hem long ol ae blong evri kantri; mo evri en blong wol bae i luk fasin blong sevem man blong God blong yumi.”