1 Ket ita kinuna ni Abinadi kadakuada: Kayatko a maawatanyo a mismo a ti ^aDios ti bumabanto kadagiti annak ti tattao, ken ^bsubbotenna dagiti taona.

2 Ket gapu ta ^aagtaengto a nainlasagan maawaganto iti Anak ti Dios, ken gapu ta impasakupna ti lasag iti pagayatan ti ^bAma, ta isu ti Ama ken ti Anak—

3 Ti Ama, ^aagsipud ta ^bnainaw babaen iti bileg ti Dios; ken ti Anak, gapu iti lasag; isu a nagbalin nga Ama ken Anak—

4 Ket ^amaymaysada a Dios, wen, ti pudno nga ^bAgnanayon nga ^cAma iti langit ken iti daga.

5 Ket kasta nga agpasakup ti Espiritu ti lasag, wenno ti Anak iti Ama, a maymaysa a Dios, ^aagsagaba iti pannulisog, ket saan a simmuko iti pannulisog, ngem impalubosna ti bagina a mauyaw, ken ^bmasaplitan, ken mapapanaw, ken ^cmailaksid dagiti taona.

6 Ket kalpasan amin daytoy, kalpasan ti panagaramidna iti adu a naindaklan a milagro kadagiti annak ti tattao, maabogto, wen, a ^akas iti kinuna ni Isaias, a kas iti umel a karnero iti sango ti mammukis, saanna ngarud ^binnganga ti ngiwatna.

7 Wen, uray kasta maabogto, ^amailansa iti krus, ken mapapatay, agpasakup ti lasag uray inggana patay, maipamaysanto ti ^bpagayatan ti Ama ti pagayatan ti Anak.

8 Ket isu a pugsatento ti Dios dagiti ^abedbed ti ipapatay, ta nagun-odna ti ^bballigi ken patay; inikkanna ti Anak iti bileg a mangaramid iti ^cpanangibabaet kadagiti annak ti tattao—

9 Gapu ta nagpangaton iti langit, gapu ta addaan kadagiti lalaem ti panangngaasi; napnuan ti pannakipagrikna kadagiti annak ti tattao; sitatakder iti nagbaetanda ken iti hustisia; napekkanan ti bedbed ti ipapatay, inako ti ^abagina ti kinadangkes ken dagiti panaglabsingda, nasubbotnan ida, ken ^bnasungbatanna dagiti kalikagum ti hustisia.

10 Ket ita kunak kadakayo, asinonto ti mangipakdaar iti sangkaputotanna? Kitaen, kunak kadakayo, nga inton maidaton ti karuruana para iti basol makitananto ti ^akaputotanna. Ket ita ania ti makunayo? Ken asinonto ti kaputotanna?

11 Kitaen kunak kadakayo, nga asino man ti dimngeg kadagiti balikas dagiti ^apropeta, wen, iti amin a nasantuan a propeta a nangipadton maipanggep iti yaay ti Apo—kunak kadakayo, nga amin kadagiti nangipangag kadagiti balikasda, ken namati a subboten ti Apo dagiti taona, ken nangnamnama iti dayta nga aldaw para iti pannakaugas kadagiti basolda, kunak kadakayo, a dagitoy dagiti kaputotanna, wenno isuda dagiti agtawid iti ^bpagarian ti Dios.

12 Ta dagitoy dagiti nakaipuonan nga ^aisuna ti nangibaklay ti basbasolda; dagitoy dagiti nakaipuonan ti ipapatayna, tapno subbotenna ida manipud kadagiti panaglabsingda. Ket ita, saan kadi a kaputotanna ida?

13 Wen, ken saan kadi a dagiti propeta, tunggal maysa a nangungap iti ngiwatna tapno mangipadto, a saan a natnag iti panaglabsing, kayatko a sawen dagiti amin a nasantuan a propeta manipud pay idi punganay ti lubong? Kunak kadakayo a kaputotanna ida.

14 Ket isuda dagitoy ^anangipakaammo iti kappia, a nangyeg iti naimbag a damag ti naimbag, a nangipakaammo ti pannakaisalakan; ken nagkuna iti Zion: Agturay ti Diosyo!

15 Ket O anian ti kinapintas kadagiti bambantay dagiti sakada!

16 Ket manen, anian ti kinapintas kadagiti bambantay dagiti saka dagidiay mangipakpakaammo pay laeng iti kappia!

17 Ket manen, anian ti kinapintas kadagiti bambantay dagiti saka dagidiay mangipakaammonto iti kapia manipud ita, wen, manipud itoy a kanito ken iti agnanayon!

18 Ket kitaen, kunak kadakayo, saan laeng a dagitoy. Ta O anian ti kinapintas kadagiti bambantay dagiti ^asaka ti mangyeg iti naimnag a damag, nga isu ti namunganay iti ^bkappia, wen, nga isu ti Apo, a nangsubbot kadagiti taona; wen, isu a nangipaay iti pannakaisalakan kadagiti taona;

19 Agsipud ta no saan a gapu iti pannubbot nga inaramidna para kadagiti taona, a naisagana manipud iti ^apundasion ti lubong, kunak kadakayo, no saan a gapu kadaytoy, nasken nga amin a sangatauan ket ^bnaungawen.

20 Ngem kitaen, mapekkanto ti bedbed ti ipapatay, ket agturayto ti Anak, ket adda bilegna kadagiti natay; ngarud, ipatungpalna ti panagungar dagiti natay.

21 Ket dumteng ti panagungar, uray ti ^aumuna a panagungar; wen, uray iti panagungar dagidiay immunan, ken dagiti agdama, ken dagiti sumarsaruno, uray pay agingga iti panagungar ni Cristo—ta isu ti awagto kenkuana.

22 Ket ita, ti panagungar dagiti amin a propeta, ken amin dagidiay namati kadagiti balikasda, wenno amin dagiti nangtungpal kadagiti bilin ti Dios, bumangonto iti umuna a panagungar; ngarud, isuda ti umuna a panagungar.

23 Napagungarda tapno ^amakipagnaed iti Dios a nangsubbot kadakuada; isu nga addaanda iti agnanayon a biag babaen ni Cristo, a ^bnangpekka iti bedbed ti ipapatay.

24 Ket dagitoy dagidiay adda lugarna iti umuna a panagungar; ket isuda dagiti natay sakbay a dimteng ni Cristo, iti kinakunengda, saan a naipakaammo ti ^apannakaisalakan kadakuada. Ket isu nga ipatungpal ti Apo ti pannakaisubli dagitoy; ket adda lugarda iti umuna a panagungar, wenno addaan iti agnanayon a biag, kas sinubbot ti Apo.

25 Ket addaan met dagiti ^aubbing iti agnanayon a biag.

26 Ngem kitaen, ken ^aagbutengkayo, ken agpigergerkayo iti sanguanan ti Dios, ta nasken nga agpigergerkayo; ta awan ti subboten ti Apo nga ^bsumupring kenkuana ken ^cmatay kadagiti basolda; wen, uray pay amin dagiti naungaw kadagiti basolda manipud pay idi punganay ti lubong, a nangiranta a nagsupring maibusor iti Dios, a makaammon kadagiti bilin ti Dios, ken saanda a tungpalen; ^ddagitoy dagiti ^eawanan iti lugar iti umuna a panagungar.

27 Ngarud saankayo kadi agpigerger? Agsipud ta awan ti pannubot a dumteng iti kakasta; agsipud ta awan ti kasta a sinubbot ti Apo; wen, ken saan a masubbot ti Apo ti kasta; agsipud ta saanna mailibak ti bagina; agsipud ta no tuntonen ti ^ahustisia saanna mailibak daytoy.

28 Ket ita kunak kadakayo a dumtengto ti kanito a ^amaiwaragawagto ti panangisalakan ti Apo iti tunggal pagilian, puli, pagsasao, ken tattao.

29 Wen, Apo, dagiti ^abantaymo ket agpukkawto; sangsangkamaysadanto nga agkanta; agsipud ta agkikitadanto, inton iyeg manen ti Apo ti Zion.

30 Agrag-okayo, agkantayo a sangsangkamaysa, dakayo a nabaybay-an a luglugar ti Jerusalem; agsipud ta liniwliwa ti Apo dagiti taona, sinubbotna ti Jerusalem.

31 Impakita ti Apo ti nasantuan a takiagna iti amin a pagilian; ket makitanto ti amin nga ungto ti daga ti panangisalakan ti Diostayo.