1 Mo nao, i bin hapen se afta we Abinadae i bin talemaot ol toktok ia hem i bin stretem han blong hem mo bin talem se: “Taem bae i kam we evriwan bae i luk ^afasin blong sevem man blong Lod; taem we evri kantri, famli, lanwis, mo pipol bae oli luk wetem ae blong olgeta, mo bae oli ^bkonfes long fes blong God se ol jajmen blong hem oli stret.

2 Mo afta, bae oli ^asakemaot ol nogud man, mo bae oli gat stamba tingting blong singaot strong, mo ^bkrae, mo krae laod, mo kakae tut blong olgeta; mo samting ia i from we oli no bin wantem mekem folem voes blong Lod; from hemia, Lod i no pemaot olgeta.

3 From olgeta oli gat ^afasin blong wol mo blong devel, mo ^bdevel i gat paoa ova long olgeta; yes, hem i olfala snek ia we i bin ^dtrikim fas mama mo papa blong yumi, we i bin mekem olgeta oli ^efoldaon; we i bin mekem evri man i kasem fasin blong wol, oli lukaotem ol wei blong harem gud, mo oli mekem olsem devel, oli ^fsave nogud samting aot long gudfala samting, oli letem devel i kontrolem olgeta.

4 Olsem ia nao evri man i bin ^alus; mo luk, bae oli save lus blong oltaem, sapos God i no bin pemaot ol pipol blong hem from ples blong lus mo foldaon blong olgeta.

5 Be tingbaot se man we i gohed long ^afasin blong wol blong hem, mo i gohed long ol rod blong sin, mo i tanem baksaed blong hem agensem God, hem i stap long ples blong foldaon blong hem mo devel i gat evri paoa ova long hem. From hemia, hem i olsem se i no bin gat wan ^bfasin blong pemaot man we i bin hapen, hem i wan enemi blong God; mo tu, devel i wan enemi blong God.

6 Mo nao sapos Kraes i no bin kam long wol, blong talemaot ol samting we bae oli kam ^aolsem se oli bin kam finis, bae i no save gat wan fasin blong pemaot man.

7 Mo sapos Kraes i no bin girap long ded, o i no bin brekem ol rop blong ded, blong mekem se gref i no save win, mo blong mekem se ^aharem nogud blong ded bae i no gat, bae i no save gat wan laef bakegen long ded.

8 Be i gat wan ^alaef bakegen long ded, from hemia nao gref i no win, mo harem nogud blong ^bded i lus long Kraes.

9 Hem i ^alaet mo laef blong wol; yes, wan laet we i no gat en, we i no save kam tudak; yes, mo tu, wan laef we i no gat en, mekem se i nomo save gat ded.

10 Mo tu, ded bodi blong wol ia bae i kam wan bodi we ^ai nomo save ded, mo roten bodi ia bae i nomo save roten, mo bae oli karem olgeta blong ^bstanap long kot blong God, blong kasem ^djajmen folem ol wok blong olgeta, sapos oli gud, o sapos oli nogud—

11 Sapos oli gud, oli laef bakegen long ded, mo kasem laef mo glad ^awe i no gat en; mo sapos oli nogud, oli laef bakegen long ded mo oli no save kam antap ^bwe i no gat en, from Lod i givim olgeta long devel we i kontrolem olgeta, we hemia nao, i fasin blong no save kam antap samtaem—

12 Oli bin go folem ol fasin blong wol blong olgeta nomo, mo ol tingting blong olgeta; oli neva bin singaotem Lod taem we hem i stap stretem ol han blong sore i go long olgeta; from Lod i bin stretem ol han blong ^asore i go long olgeta mo oli no bin wantem; Lod i bin wonem olgeta long saed blong ol rabis fasin blong olgeta, mo stil, oli no bin aot long olgeta fasin ia; mo Lod i bin givim oda long olgeta blong sakem sin, mo oli no bin wantem sakem sin.

13 Mo nao, ?yufala i no ting se yufala i nid blong seksek mo sakem sin blong yufala, mo tingbaot se tru long Kraes mo long Kraes nomo, bae hem i sevem yufala?

14 From hemia, sapos yufala i tijim ^aloa blong Moses, tijim tu se, i wan pikja blong ol samting ia we bambae oli kam—

15 Tijim olgeta se fasin blong pemaot man i kam tru long Kraes, Lod, we i stret ^aPapa ia we I No Save Finis. Amen.”