Pi Chep nib Thothup
Mosiah 16


Guruy Ni 16

Got e ra bayuliy e gidiiʼ ko rangi dodow ni yaedra malog mar mul gaed ngay—Piʼin ni yaed ma folwok ko fayleng e yaedra paer ni da riy angin e bayul ngoraed—Kristus e yognag e foskoyamʼ ko yafos ni manechubog ara gafgow ni manechubog. Napʼan 148 M.K.

1 Ere chiney, e yibi buch u tomuren ni ke weliy Abinadi e pi thin ney me kʼiyeg paʼ nga mʼon me gaʼar: Fare ngiyalʼ innʼem e bayi taw ngay ni arame gubin e gidiiʼ ma bayi guy fare woʼen e thap rokʼ Somoel; ni arame gubin e nam, mfen, thin, nge gidiiʼ e bay ra guyed nga oewchraed ni taʼab rogon ma bay roeged u mit Got ni pi pufthin rokʼ e ba matʼaw.

2 Ma arame piʼin nib kireb e bay ni chuwegraed, ma arame bay tapgin ni ngar yoer gaed nib gaaʼ lamraed, ma yaed be gelʼgelʼ, ma yaed be gawol, mar waʼachriyed nguwelraed nga taʼabang; ni fan e biney e dabra motoyil gaed ko thin rokʼ fare Somoel; ere fare Somoel e dabi bayuliyraed.

3 Ya yaed e piʼin ni yaed ma folwok ko fayleng ma yaed ma rinʼ e ngongol rokʼ moʼoniyanʼ, ma fare moʼoniyanʼ e poloʼ gelingin nga dakeanraed; arragon, ni ir fare porchoyog ni kari kakrom niʼir e luguy nag e gal ni mʼon e labthir rodaed, niʼir e tapgin e mul ni ratayew; niʼir e tapgin me gubin e gidiiʼ mar folwok gaed ko fayleng, nge aʼraʼr u gubin e thamthaem roraed, nge ngongol rokʼ moʼoniyanʼ, mar nanged e thil ko felʼ nge kireb, ma gubin e gidiiʼ make gabliyraed fare moʼoniyanʼ.

4 Ere aray rogon ni malog gubin e gidiiʼ; ere musap gaed, manga boech ma kar malog gaed ni dariy nʼumngin i napʼan, ni faʼan gomanga de bayuliy Got e gidiiʼ rokʼ ko rengi dodow ni kar awgaed ngay nib malog.

5 Machane mu tayed u wunʼmed ni enra i paer ni be folwok u rarogon e denen rokʼ, ma be ululiy e paer ko pi woʼen e denen ma be togopluw ngakʼ Got, e ra magaey ko rangi dodow ni ke mul keʼaw ngay ma fare moʼoniyanʼ e ke poloʼ nag gelingin u dakean. Ere ire ra yaeni aw ni boed rogon ni dariy e bayul ni kan falʼeg ni fan ngakʼ, ni bachan e ke mang toʼogor rokʼ Got; ma ku aram rogon ko fare moʼoniyanʼ niʼir e toʼogor rokʼ Got.

6 Ere chiney e faʼan gomanga deyib Kristus nga fayleng, nge weliy morngaʼagen bogi banʼen nra yib, nri gowa ke taw ngay, ma ra yaeni aw ni dariy woʼen e bayul.

7 Ma faʼan gomanga defos Kristus ko yamʼ, ara thʼaeb wolan e yamʼ me yaeni aw ni dab kiyog ni nge gel fen e yamʼ, me yaeni aw ni yamʼ e dakuriy gelingin, ma arame dariy e foskoyamʼ.

8 Machane bay e foskoyamʼ, ere yamʼ e dakuriy gelingin, ma fare gafgow ni yamʼ e ke mʼay ni bachan Kristus.

9 I ir fare tamilang nge fare yafos ko fayleng; arragon, ba tamilang ni dariy nʼumngin i napʼan, ni dabiyog ni nge lumor; arragon, ma kub yafos ni dariy nʼumngin i napʼan, ma dakuriy e yamʼ riy.

10 Ni biney e dowef nra yimʼ e ra chuw nga rebe dowef ni dabi yimʼ, nge biney e gafgow ni ma tay e dowef e ra chuw, ma bay ni fek nge sakʼiy nga tagilʼ e pufthin rokʼ Got, nge pufthin nagraed u rogon e pi muruwel roraed ko ba mangil fa ba kireb—

11 Ma faʼanra ba mangil e muruwel roraed, ma yaedra foskoyamʼ me yog ngoraed e yafos ni dariy nʼumngin i napʼan nge falfalaenʼ; ma faʼanra ba kireb e muruwel roraed, ma yaedra foskoyamʼ ma ranoed nga fithikʼ e gafgow ni tinoewey ni dariy nʼumngin i napʼan, ma kan piiʼraed nga paʼ fare moʼoniyanʼ, niʼir e ke gabliyraed, ni ireram e gafgow—

12 Ma kar pired u fayleng u rogon ni yaed baʼadag ma yaed be aʼraʼr nag ni ngar folwok gaed ko tinu fayleng banʼen; ma darur meybil gaed ngakʼ fare Somoel ko ngiyalʼ ni be kʼiyeg paʼ nib sug ko murnguy ngoraed; ya fare paʼayif ko murnguy e un kʼiyeg ngoraed, ma da ur meybil gaed; ma un ginang raed ko pi denen roraed machane dar palog gaed riy; ma ni chiyliy ngoraed ni ngar kalgaed ngaenʼraed ko denen roraed ma dar kalgaed ngaenʼraed.

13 Ere chiney, gathi ngam tʼon gaed ni murus mi gimed kalngaenʼ ko denen romed, ma ngam tayed u wunʼmed ni kemus nu fithikʼ ngo dakean Kristus e gimed rathap riy?

14 Ere, faʼanra gimed be fil iyaen fare motochiyel rokʼ Moses, meʼere kum filed iyaen e gagyeg ko pinʼen ni bay yib—

15 Mmachib niged ngoraed ni bayul e rayog u dakean Kristus ni fare Somoel, ni riʼir fare Chitamangiy ni Gubinfen. Amen.