1 Ket ita napasamak a kalpasan a naibaga ni Abinadi dagitoy a balikas, nga imbilin ti ari kadagiti ^asaserdote a nasken a tiliwen ken papatayenda.

2 Ngem adda maysa kadakuada nga agnagan iti ^aAlma, a nagtaud met iti kaputotan ni Nephi. Maysa nga agtutubo, ket ^bnamati kadagiti balikas nga insao ni Abinadi, agsipud ta ammona ti maipapan iti kinadangkes a pinaneknekan ni Abinadi a maibusor kadakuada; ngarud rinugianna nga impakaasi iti ari a saanna kapungtot ni Abinadi, ngem palubosanna a pumamaw a sitatalna.

3 Ngem ad-adda a nagpungtot ti ari, ket imbilinna a pagtalawenda ni Alma kadakuada, ket imbaonna dagiti katulonganna a kamaten isuna tapno mapapatayda.

4 Ngem intarayanna ida ket naglemmeng tapno saanda mabirokan. Ket gapu ta nakalemmeng iti adu nga aldaw ^ainsuratna dagiti amin a naisao ni Abinadi.

5 Ket napasamak nga imbilin ti ari kadagiti guardiana a palawlawan ken tiliwenda ni Abinadi; ket pinungo ken imbaludda.

6 Ket kalpasan ti tallo nga aldaw, kalpasan iti panangbalakad kadagiti saserdotena, imbilinna nga iyegda isuna iti sanguananna manen.

7 Ket kinunana kenkuana: Abinadi, nakasarakkamin iti pammabasol a maibusor kenka, ket rumbeng a matayka.

8 Agsipud ta kinunam a mismo a ti ^aDios ti bumabanto kadagiti annak ti tattao; ket ita, gapu iti daytoy mapapatayka malaksid no ibabawim amin dagiti dakes a balikas nga insaom maipapan kaniak ken dagiti tattaok.

9 Ita kinuna ni Abinadi kenkuana: Ibagak kenka, a saanko ibabawi dagiti balikas nga insaok kadakayo maipapan kadagitoy a tao, agsipud ta pudnoda; ket tapno maammuanyo ti kinapudnoda impalubosko a matnag ti bagik kadagiti imayo.

10 Wen, ket agsagabaak uray agingga iti patay, ket saanko nga ibabawi dagiti balikasko, ket agtalinaedda a pammaneknek maibusor kadakayo. Ket imbukbokyo ti ^aawanan basol a dara no papatayendak, ket agbalinto met a pammaneknek maibusor kadakayo iti maudi nga aldaw.

11 Ket ita, dandani pinaruk-atan ni ari Noe, gapu ta kinabutengna ti naibalikas; agsipud ta kabutengna a maipataw dagiti panangukom ti Dios kenkuana.

12 Ngem nagririaw dagiti saserdote ti maibusor kenkuana, ket rinugianda ti pammabasol, a kunkunada: Linaisna ti ari. Ngarud narubroban ti pungtot ti ari maibusor kenkuana, ket inyawatna kadakuada tapno mapapatayda.

13 Ket napasamak a tiniliw ken pinungoda, ken sinaplitanda iti nareppet a pagtungo, wen, uray pay agingga iti ipapatayna.

14 Ket itan idi mangrugi a masinit iti gil-ayab, nagpukkaw kadakuada, a kinunana:

15 Kitaen, uray a kas iti inaramidyo kaniak, mapasamakto a dagitinto kaputotanyo ti makaigapu iti panagsagabanto ti adu a saem a sagsagabaek, uray pay ti saem iti ^aipapatay iti apuy; ket gapu daytoy iti panamatida iti panangisalakan ti Apo a Diosda.

16 Ket mapasamakto a kaptennakayo ti amin a klase ti saksakit gapu iti kinadangkesyo.

17 Wen, ket ^amadangrankayonto sadinoman ti ayanyo, ket mayabog-abog ken mawaraswaraskayonto, uray pay a kas iti atap nga arban a paksiaten dagiti atap ken narungsot nga ayup.

18 Ket maanopkayonto iti dayta nga aldaw, ket matiliwkayonto dagiti kabusoryo, ket agsagabakayonto a kas iti panagsagabak, kadagiti saem ti ^aipapatay babaen ti apuy.

19 Isu nga ipakat ti Dios ti ^apanagibales kadagiti mangdadael kadagiti taona. O Dios, awatem daytoy kararuak.

20 Ket ita, idi maibaga ni Abinadi dagitoy a balikas, natay, gapu iti pannakauramna; wen, napapatay agsipud ta saanna nga inlibak dagiti bilin ti Dios, pinatalgedanna ti kinapudno dagiti balikasna babaen ti ipapatayna.