1 Oh met, kedekedeo Alma, me tangasang sapwellimen nanmwarki Noha sounpapah ko, koluhkilahr dipe kan oh wiewia suwed kan, oh ahpw kohseli rehn aramas akan ni rir, oh tepida padahkihong irail mahsen kan en Apinadai—

2 Ei, duwen dahme pahn kohdo, oh pil duwen iasadahn me mehlahr, oh komourlahn aramas akan, me pahn pwilisang ni manaman, oh lokolok kan, oh pwoulahn Krais, oh sapwellime iasada oh sapwellime ketdahla nanleng.

3 Oh e padahkihong aramas koaros me men rong eh padahk. Oh e padahkih irail ni rir, pwe nanmwarkio de esehda. Oh aramas tohto me kamehlele eh padahk kan.

4 Kedekedeo irail koaros me kamehlele ih, kohla wasa ieu me kahdaniki Mormon, me iei nanmwarkio ketikihong eden wasao, me mi ni keilen sahpw me kin direkihla mahn lawalo, ni ahnsawi.

5 Met, mie utuhnpihl mwakelekel ehu mi wasa me adaniki Mormon, oh Alma kin kohla wasao, oh mie kahn tuhke tikitik kei limwahn wasao me e kin rukula ie nirahn ni ahnsou me nanmwarki kin rapahkiseli.

6 Kedekedeo koaros me kamehlele ih kin pokonpene wasao oh rong eh padahk kan.

7 Kedekedeo mwurin rahn kei pokon laud ehu kohpene wasa me adaniki Mormon, pwe re en rong en Alma eh padahk kan. Ei, irail koaros me kamehlele eh padahk kohpene pwehn rong ih. Oh e ahpw kin padahk ong irail, oh kalohkihong irail duwen koluhla, oh komourla, oh pwoson Kauno.

8 Kedekedeo e ahpw ndaiong irail: Kilang, iet pihl en Mormon (pwe iei me re kin kahdaniki) oh met, nin duwen amwail inangih iangala sapwellimen Koht pwihn, oh kahdanikihla sapwellime aramas, oh inangih sawaskipene amwail wisik toutou kan, pwe en kak marahrahda;

9 Ei, oh kumwail pahn men iang mwahiei rehn me kin mwahiei kan; ei, oh koaloalamwahwih irail akan me anahne koaloalamwahu, oh wia sounkadehdehn Koht ahnsou koaros oh nan soahng koaros, oh wasa koaros me kumwail pahn mi ie, lao lel mehla, pwe kumwail en kak komourla rehn Koht, oh iang wadawadedi rehn irail akan me pahn iang keieu en iasadao, pwe kumwail en kak alehdi mour soutuk—

10 Met I ndaiong kumwail, ma iei met ineng en mohngiongimwail kan, dah, kumwail pahn uhwong papidaisla ni mwaren Kauno, me pahn wia mehn kadehde mwohn silangi me kumwail inoukihongehr ih me kumwail pahn papah ih oh kapwaiada sapwellime kosonned akan, pwe en ketin kapwilodohng pohmwail reken sapwellime Ngehno?

11 Oh met ahnsou me aramas akan rongehr mahsen pwukat, re lopwolopwki ar peren, oh werkihla: Iei met ineng en at mohngiong kan.

12 Kedekedeo Alma ahpw ale Ihlam, me iang sang ni tapi, oh kohla oh kesihnenda nan pihlo, oh nda ni ngihl laud: Maing Kaun, komw ketikihdo sapwellimahr Ngehno pohn sapwellimomwi sounpapah, pwe en kak wia doadoahk wet sang ni mohngiong mwakelekel.

13 Oh ni ahnsou me e ndahier mepwukat, Ngehn en Kauno tiada powe, ih eri nda: Ihlem, I papidaisihuk, sang ni mweimwei en Koht Wasa Lapalap, pwehn wia kadehde me ke pahn wiahda inou en papah ih lao lel mehla; oh Ngehn en Kauno en ketiket rehmw; oh en ketikihonguhk mour soutuk, sang ni komour en Krais, me e ketin kaunopadahr sang ni tepin sampah eh wiawihda.

14 Oh mwurin Alma e ndahier mepwukat, Alma oh Ihlem koaros koduhdihla nan pihl; oh ira pwurada oh kohda sang nan pihlo wie pereperen, pwehki ara direkihla Ngehno.

15 Oh Alma ale emen oh pwuredihla keriapak nan pihlo, oh papidaisihla ih duwehte me keieuo, ihte e sohte pwurehng koduhdi nan pihlo.

16 Oh ni mwohmw wet me e papidaisikihla emen emen me kohdo nan sahpw en Mormon; oh uwen irail me wadawadedi ele aramas meh riepwiki pahmen; ei, oh irail papidaisla ni pihl en Mormon, oh direkihla kalahngan en Koht.

17 Oh irail kahdanekihla mwomwohdiso en Koht, de mwomwohdiso en Krais, sang ni anhsouo kohla. Kedekedeo koaros me papidaisla sang ni mweimwei oh manaman en Koht wiahla tohn sapwellime mwomwohdiso.

18 Kedekedeo Alma, sang ni mweimwei en Koht me e tungoalenki, ahpw kasarawihla samworo kei; iei emen samworo kasarawihong en kalohkihong aramas meh limehk, oh en padahkihong irail soahng kan me pid duwen wein Koht.

19 Oh e kihong irail kosonned me irail sohte pahn padahngki padahk tohrohr likin soahng kan me e padahngkier, oh me soukohp sarawi kan mahsaniher.

20 Iei, e kihong irail kosonned me irail sohte pahn kalohki mehkot, ihte koluhla oh pwoson Kauno, me komourala sapwellime aramas akan.

21 Oh e kihong irail kosonned me irail sohte pahn akamaipene, ahpw irail en ehukipene arail koapworopwor, ahneki pwosonteieu oh papidaisteieu, katengepene ar mohngiong kan oh limpoakpene.

22 Oh ih me e koasoanehdi irail pahn kalohki. Oh irail wiahla seri en Koht.

23 Oh e kihong irail kosonned me irail pahn wauneki rahn en sapad, oh wiahki rahn sarawi, oh pil rahn koaros irail pahn kapingkalahngan ong Kauno, arail Koht.

24 Oh e pil padahkiong irail me samworo kan me e kasarawilahr pahn pein koadoahkihada epwelparail.

25 Oh mie rahn ehu nan wihk koaros me koasoandier me irail pahn kin kohpene oh padahki aramas akan, oh pwongih Kauno, arail Koht, oh pil nindokon eh mie arail ahnsou, re kin pokonpene.

26 Oh samworo kan sohte pahn kin momouriki sawas en aramas akan; ahpw sang nan arail doadoahk irail pahn kin alehdi kalahngan en Koht, pwe irail en kak kehlailla ni pali Ngehn, ni arail marainki kupwurokong en Koht, pwe irail en kak padahk sang ni manaman oh mweimwei en Koht.

27 Oh Alma pil kihong irail kosonned me aramas en nan mwomwohdiso pahn kin sawaski arail dipwisou kan, emen emen irail nin duwen dahme e ahneki; mehmen me ahneki reken dipwisou pahn sawaskihda laud; oh mehmen me ahneki ekis, eri ekis me pahn anahnepe; oh mehmen me sohte ah ih me pahn alehdi.

28 Oh re pahn kin kisekisehki arail dipwisou kan sang ni pein nsenarail oh ar lamalam mwahu ong Koht, oh ong samworo kan me kin anahne, ei, oh ong aramas koaros me semwehmwe oh sohte ar likou.

29 Oh met e ndaiong irail, sang ni kosonned me Koht ketikihong; oh irail ahpw weweidkimour pwung mwohn Koht, kisekisehki mehtei kan nin duwen arail anahn oh ineng kan en paliwar oh palingehn.

30 Kedekedeo soahng pwukat koaros wiawiher nan Mormon, ei, limwahn pihl en Mormon, nanwel me karanihte pihl en Mormon; ei, nan sahpw en Mormon, pihl en Mormon, nanwel en Mormon, ia uwen lingan en wasao mwohn masarail kan me wehwehkida arail Soundoaro; ei, oh meid pai irail, pwe irail pahn koulki koul en kaping ong ih kohkohlahte.

31 Oh mepwukat koaros wiawi ni irepen sahpwo, pwe nanmwarkio de mwahngihada dahme irail wiewia.

32 Ahpw kilang, kedekedeo nanmwarkio, mwahngihada mwekid en aramas oko, ih eri kadarala sapwellime sounpapah ko en mwasahn irail. Eri rahno me irail kohkohpene pwe irail en rong mahsen en Kauno, nanmwarikio ahpw ketin diarirailda.

33 Oh met nanmwarkio mahsanih me Alma kamwoarongehda aramas oko irail en uhwong ih: ih eri kadaralahng sapwellime sounpei ko pwe re en kemeirailla.

34 Kedekedeo Alma oh sapwellimen Kauno aramas akan esehda me sapwellimen nanmwarkio sounpei ko kohkohdo; eri irail ale imwarail impwal akan oh arail peneinei kan oh kohkohla nan sapwtehno.

35 Oh uwen tohtohn irail aramas, meh pahpwiki limehk.