1 Ao e koro bukina bwa ngke e a tia Motiaea ni karaoa are e tuangaki iroun tamana, ao n tia ni katanoata ni kabuta te aba, bwa a na botaki aomata ni kabane man te aba ae bwanin, bwa a na nakon te tembora n ongora taeka ake e na taekin te uea ae Beniamina nakoia.

2 Ao moan te mwaiti ake a roko, n te mwaiti are a bon aki kona ni warekaki; bwa a mwaiti aia kariki ao a rikirake mwaitia iaon te aba.

3 Ao a uoti naba ^amoan bunin aia tiibu, bwa a na anga aia ^bkarea ma ^cangabwai n ^daron ana tua Mote.

4 Bwa aonga naba n anga aia kaaitau nakon te Uea ae Atuaia, are e a tia ni kairiia man aban Ierutarem, are e a tia ni kamaiuia mai nanon baia aia kairiribai, ma ni ^akarikiia aomata aika a tau bwa aia ^btia reirei, ao te aomata naba ae tau bwa aia uea, are e a tia ni kateimatoa te rau iaon ^caban Taraemera, ao e a tia naba n reireiniia ^dkaawakinan ana tua ni kabane te Atua, bwa aonga ni kimwareirei ma n kaonaki n ^etangiran te Atua ma aomata ni kabane.

5 Ao e koro bukina bwa ngke a roko i rarikin te tembora, ao a katei umwaia ni katobibia, mwaane nakon aia ^akaainga nako, ma kaain abana, ma natina mwaane, ma natina aine, ma natiia natina aika mwaane, ma natiia natina aika aine, mai iroun te karimoa nakon te bina, ao a bane ni kaokoro te utu teuana ma teuana.

6 Ao a katei umwaia ni katobibia te tembora, ao a bane mwaane ni kabane ni kaitaraa mataroan ^aumwaia ma te tembora, bwa aonga ni kona n tiku i nanon umwaia ao n ongora ni baike e na taekin te uea ae Beniamina nakoia.

7 E bon rang ni korakora mwaitin te botanaomata ma ni kaangaanga iroun te uea ae Beniamina bwa e na reireiniia i nanon oon te tembora, mangaia ae e tuatua bwa e na kateaki te taua, bwa a aonga ni kona ana botanaomata n ongo taeka ake e na taekin nakoia.

8 Ao e koro bukina bwa e taetae nakoia ana botanaomata mai aon te taua; ao a aki bane n ongo ana taeka ibukin korakoran mwaitiia; mangaia ae e tuatua bwa a na koreaki taeka ake e taekinna ao a na kanakoaki nakoia ake a aki kona n ongo bwanaana, bwa aonga ni kona ni butimwaea ana taeka.

9 Ao aikai taeka ake e ^ataekin ao n tuatua bwa a na koreaki, ni kangai: Tariu, ngkami ni kabane aika kam a tia ni botaki, ngkami aika kam kona n ongo au taeka aika N nang taekin nakoimi n te bong aio; bwa tiaki n ae I kaoingkami n nako mai, bwa kam na aki ^bmwannanoi taeka ake I taekin, ma kam na ^ckakauongo raoi nakoiu, ao kam na kauki taningami bwa kam aonga n ongo, ao ^dnanomi bwa kam aonga n ataia, ao ami ^ekaantaninga bwa aonga ni kaotaki nanon ana mwakuri te Atua ^faika a raba nakoimi.

10 I aki tuatua bwa kam na nakomai bwa kam aonga ni ^amaakai, ke n taku inanomi bwa I korakora riki nakon te aomata ae e maamate.

11 Ma bon ti te arona arou ma ngkami, ae N na kabaeaki ni mamaaran te rabwata ma te kaantaninga; bwa I a tia n rineaki irouia te botanaomata aio, ma ni katabuaki iroun tamau, ao ni kariaiakaki mai iroun te Uea bwa N na riki bwa te tia tautaeka ao te uea irouia te botanaomata aio; ao I a tia ni kaawakinaki ma ni kateimatoaki ni mwaakana ae akea kabotauana, bwa N na beku ibukimi n au kona, au kaantaninga ma korakorau ni kabane ake e a tia n anganai te Uea.

12 I taekinna nakoimi bwa I a tia ni kariaiakaki bwa N na kabanei bongin maiu ni beku ibukimi, ni karokoa te tai aio, ao n aki tangira te ^akoora ke te tirewa ke aeka ni kaubwai riki tabeua mai iroumi;

13 I tuai naba n tua bwa kam na kainaki i nanon taabo ni kaikain, ke ni kariaia bwa kam na anaia tabemwaang bwa ami toro, ke kam na tiriaomata, ke n anaibwai, ke n iraa, ke ni wenenibure; ke n tia ni kariaia bwa kam na karaoi mwakuri nako aika a bubuaka, ma I a tia n reireiningkami bwa kam na kaawakina ana tua te Uea, ni bwaai ni kabane ake e a tia n tua bwa kam na karaoi—

14 Ao I a tia naba ngai ni ^akakorakoraai bwa N na beku ibukimi, bwa kam aonga n aki karawawataki n taian angabwai, bwa e aonga n akea te bwai teuana ae kam na aki kona ni kaitaraa—ao bwaai ni kabane ake I a tia n taekin, ngkami ni kabane bon taan kakoauai n te bong aio.

15 Ma tariu, I aki karaoi bwaai aikai bwa I aonga ni kamoamoa; ke n taekin bwaai aikai bwa I aonga n tabeki bukinami iai; ma I tuangkami bwaai aikai bwa kam aonga n ataia bwa I kona ni kaekai ma te ^anano ae itiaki imatan te Atua n te bong aio.

16 Taraia, bwa ngkai I taekinna nakoimi ae I a tia ni kabanea au bong ni maiu ni beku ibukimi, ao I aki kamoamoa ngkai I taekinna, bwa I a tia ni beku ti ibukin te Atua.

17 Ao taraia, I taekin bwaai aikai bwa e aonga n reke iroumi te ^awanawana; bwa kam aonga n ataia bwa ngkana kam ^bbeku ^cibukiia raomi ao kam bon beku naba iroun Atuami.

18 Taraia, kam a tia n aranai bwa ami uea; ao ngkana ngai, are kam aranna bwa ami uea, I kakorakoraai ni ^abeku ibukimi, ao e riai ke aki bwa kam na kakorakoraingkami ni beku imarenami?

19 Ao taraia riki, ngkana ngai, are kam aranna bwa ami uea, are I a tia ni kabanea au bong ni maiu ni beku ibukimi, are te beku ibukin te Atua, e tau bwa N na kaaitauaki iroumi, O ngkanne tiaki e riai bwa kam na ^akaaitaua ami Uea are i karawa!

20 I tuangkami, tariu, bwa ngkana kam anga kaaitau ma ^akamoamoa ni kabane ake a reke nakoimi ao kam angan te ^bAtua are e a tia ni karikingkami, ao n tia ni kaawakin ma ni kateimatoaingkami, ao n taraia bwa kam na kimwareirei, ao n tia ni kariaia bwa kam na kona ni maeka ma te rau i marenami—

21 I tuangkami bwa ngkana kam toro iroun are e a tia ni karikingkami mai moana, ao are kateimatoaingkami man te bong teuana nakon teuana, n anganingkami te ikeike, bwa kam aonga ni maiu ma ni kakamwakuri ao ni karaoi ^ananomi, ao e a tia naba ni buokingkami man te tai teuana nakon teuana—I kangai, ngkana kam toro irouna ma tamneimi ni kabane ao kam riki ngkami bwa tooro aika kam ^baki manena.

22 Ao taraia, ti teuana te bwai are e kaantaningaia bwa kam na karaoi ae ^akaawakinan ana ^btua; ao e a tia ni berita nakoimi bwa ngkana kam kaawakin ana tua ao kam na kabwaia iaon te aba; ao e aki manga ^crairaki man bwaai ake e a tia n taekin; mangaia ae ngkana kam ^dkaawakin ana tua ao e na kakabwaiaingkami ao e na karikirakeingkami.

23 Ao ngkai, te moan bwai, e a tia ni karikingkami, ao ni kataua bwa e na reke iroumi te maiu, are kam bae iai irouna.

24 Ao te kauoua, e kaantaningaia bwa kam na karaoa are e a tia n tua nakoimi; bwa ngkana kam karaoia, ao e na waekoa ni ^akakabwaiaingkami; ao e na tia iai ni kabooingkami. Ma kam teimatoa n tarau irouna, n aron are mai mwaaina, ma ae e na roko, ao n aki toki; mangaia ae teraa ae kam na kamoamoa iai?

25 Ao ngkai N na titirakiningkami, iai bwaai aika kam kona n taekin ibukimi? N na kaekaingkami, bon Akea. Kam aki kona naba n taekinna bwa e bootau kakawakimi ma bubun te aonaba; ma kam ^akarikaki man ^bbubun te aonaba; ma taraia, bon ana bwai teuare e karikingkami.

26 Ao ngai, eng ngai, are kam a tia n aranna bwa ami uea, bon akea rietatau nakoimi; bwa I karikaki naba man te bubu. Ao kam nooria bwa I a kara, ao e a kaan roko te tai are N na manga kaoka iai te rabwata aio nakon tinana ae te aonaba.

27 Mangaia are, n aron are I a tia n taekinna nakoimi are I a tia ni beku ibukimi, ni ^amaiu i nanon te kaantaninga ae itiaki imatan te Atua, ma e ngae n anne ao I a tia n tuangkami bwa kam na botaki, bwa I aonga n aki reke kaiu, bwa I aonga n aki rabunaki n ^braraami, ngkana e roko te tai are N na tei iai i matan te Atua bwa e na motikaki taekau ibukin bwaai ake e a tia ni mwiokoai iai ibukimi.

28 I tuangkami bwa I a tia n tuatua bwa kam na botaki bwa aonga ni ^akaitiakaki kunnikaiu man raraami, n te tai aio are e a kaan iai te tai are I a kaan ruo iai nakon ruanimateu, bwa I aonga n nako ma te rau, ao e na kona ^btamneiu are aki maamate n reitaki ma taian ^ckuaea ake i eta n anene n nebo ibukin te Atua ae motiraoi.

29 Ao i rarikin aei, I tuangkami bwa I a tia n tuatua bwa kam na botaki, bwa I aonga ni katanoata nakoimi ae N nang kerikaaki man te nakoa n tia reirei, ao n uea ibukimi.

30 Bwa n te tai aio ao e ruru rabwatau n au tai n taetae nakoimi; ma e buokai te Uea ae te Atua, ao e tangiria bwa N na taetae nakoimi, ao e tua nakoiu bwa N na katanoata nakoimi n te bong aio, bwa e na riki natiu ae Motiaea bwa te uea ao te tia tautaeka i aomi.

31 Ao ngkai, tariu, I tangiria bwa kam na waki ni kakaraoa are kam a tia ni kakaraoi ni karokoa ngkai. N aron are kam a tia ni kawakin tua ake I anganingkami, ma tua ake e anganingkami tamau, ae kam kakabwaiaki iai, ao ni kawakinaki bwa kam na aki bwaka nako nanon baia ami kairiribai, mangaia ae ngkana kam kawakin tua ake e taekin natiu, aika ana tua te Atua ake a na taekinaki nakoimi irouna, ao kam na kakabwaiaki i aon te aba, ao a na akea korakoraia ami kairiribai i aomi.

32 Ma, O au botanaomata, tarataraingkami bwa ngkana iai te ^aitabarara ae riki i marenami, ao kam motikia i nanomi bwa kam na ira te tamnei are buakaka, are e a tia n taekinaki iroun tamau are Motiaea.

33 Bwa taraia, iai te rekenikai are e a tia n anganaki ane motikia bwa e na ira te tamnei are buakaka; bwa ngkana e motikia bwa e na iria, ao e teimatoa ao ni mate i nanon ana bure, ao bon ti te arona ngke e nima ^akabuakakaan tamneina; bwa kanuangana ae na reke irouna bon te katuaeaki ae ^baki totoki, ngkai e a tia n aki ira ana tua te Atua n aron are e a tia n ataia.

34 I kangai nakoimi, bwa akea i buakomi, ma ti natimi aika a uarereke, ae a tuai n reireinaki kanoan bwaai aikai, ma antai i buakomi ae e aki ataia ae tarau n aki toki iroun Tamana are i karawa, ao kam na anganna ami bwai ni kabane ao korakorami ni kabane; ao kam tia naba n reireinaki kanoan taian rongorongo aika taekan taian taeka ni burabeti ake a tia n taekinaki irouia burabeti aika a tabu, ni karokoa te bong are e kitana iai Ierutarem tamara are Riaai;

35 Ao bwaai ni kabane naba ake a tia n taekinaki irouia ara bakatibu ni karokoa ngkai. Ao taraia, a taetaekin bwaai ake e a tia te Uea n tuatua bwa a na taekin; mangaia ae, a bon eti ao a koaua.

36 Ao ngkai, I kangai nakoimi tariu, bwa ngkana kam tia n atai man reireinaki bwaai aikai, ao ngkana kam karaoa te bure ma ni karaoa are kaaitara ma are e a tia n taekinaki, ao kam kararoaingkami mai iroun Tamnein te Uea, ao a na akea nnena i nanom are e na kona ni kairiko iai i nanon kawain te wanawana bwa ko aonga ni kakabwaiaki, n anganaki te kaubwai, ao ni kateimatoaki—

37 I kangai nakoimi, bwa te aomata are karaoa aio, bon te aomata ae kan teirake imatan te botanaomata ni ^akaitaraa te Atua; mangaia ae e a tia ni motikia bwa e na ira te tamnei are buakaka, ao e na riki bwa ana kairiribai te raoiroi; mangaia ae akea nnen te Uea i nanona, bwa e aki maamaeka i nanon tembora aika ^baki tabu.

38 Mangaia ae ngkana e aki ^arairananona te aomata anne, ao e tiku n arona ao ana kairiribai te Atua ni matena, ao e na kautaki tamneina ni korakoran te ^bmoti ae mimitong n namakinan ^cbure ake e a tia ni karaoi, are e na kauarerekeaki iai mai matan te Uea, ao e na onrake rabwatana n te raraoma, ma te maraki, ma te aki rau, ae aiaron te ai ae aki maamate, aika a waerake mwaakarona n aki toki.

39 Ao ngkai I kangai nakoimi, bon akea nnen te ^ananoanga nakon te aomata anne; mangaia ae motin taekana bon te rinanon te kammarakaki ae aki totoki.

40 O ngkami aika kam a unimwaane, ao ngkami naba aika kam a ataeinimwaane, ao ngkami aika ataei aika kam kona n oota n nanon au taeka, bwa I a tia ni kabeebetei au taeka bwa kam aonga n atai, I tataro bwa kam na uti n ^auringan buakakan aroia ake a tia ni bwaka n riaoan te tua.

41 Ai moaraa riki, I tangiria bwa kam na iangoa te kakabwaia ma te aro ni ^akukurei irouia ake a kaawakin ana tua te Atua. Bwa taraia, a ^bkakabwaiaki ni bwaai ni kabane, n te maiu n rabwata ao n tamnei; ao ngkana a teimatoa ni ^ckakaonimaki ni karokoa te toki ao a na butimwaeaki mai ^dkarawa, ao a na maeka ma te Atua n te aro ni kukurei ae aki totoki. O uringnga, uringnga bwa a koaua bwaai aikai; bwa e a tia n taekin te Uea ae te Atua.