1 Ma o lenei sa oo ina amata ona soalaupule o Amona ma le tupu o Limae faatasi ma le nuu pe faapefea ona latou lavea’ia i latou lava mai le pologa; ma sa oo ina faia e i la’ua ia faapotopoto mai faatasi e tagata uma i latou lava; ma sa faia e i la’ua lenei mea ina ia mafai ona maua e i la’ua le leo o le nuu e uiga i lenei mataupu.

2 Ma sa oo ina latou lē maua se ala e laveai ai i latou lava mai le pologa, vagana ai ua latou ave o latou fafine ma a latou fanau, ma a latou lafu, ma a latou fagaga, ma o latou faleie, ma o ese atu i le vao; ona sa matuā toatele lava sa Lamanā, sa lē mafai ai e le nuu o Limae ona tau ma i latou, pe afai latou te manatu latou te lavea’ia i latou lava mai le pologa i le pelu.

3 O lenei sa oo ina alu atu Kitiona ma tu i luma o le tupu, ma fai atu ia te ia: O lenei le tupu e, e oo mai i le taimi nei o e faafofoga mai pea i a’u upu i le tele o taimi sa tatou tau ai ma o tatou uso, o sa Lamanā.

4 Ma o lenei le tupu e, afai e te le’i maua a’u o se auauna lē aoga, pe afai foi sa e faafofoga mai i a’u upu i soo se tulaga e oo mai i le taimi nei, ma afai sa aogā ia te oe, ua faapea lava ona ou manao ia e faafofoga mai i a’u upu i le taimi nei, ma o le a avea a’u ma au auauna ma lavea’i lenei nuu mai le pologa.

5 Ma sa tuu atu e le tupu ia te ia ia saunoa mai. Ma sa fai atu Kitiona ia te ia:

6 Faauta i le ala i tua, e ui atu i le pa i tua, o loo i le itu i tua o le aai. O sa Lamanā, po o leoleo o sa Lamanā, e onanā i le po; o lea ia tatou auina atu se folafolaga i totonu o lenei nuu atoa ia latou faapotopoto faatasi a latou lafu ma a latou fagaga, ina ia mafai ona latou tulituli atua i le vao i le po.

7 Ma o le a ou alu atu e tusa ma lau poloaiga ma totogi le lafoga mulimuli o uaina ia sa Lamanā, ma o le a latou onanā ai; ma o le a tatou ui atu i le ala faalilolilo e i le itu agavale o la latou togalauapi, pe a latou onanā ma momoe.

8 O le a faapea ona tatou o ese atu ai ma o tatou fafine, ma a tatou fanau, ma a tatou lafu, ma a tatou fagaga i le vao; ma o le a tatou malaga taamilo atu i le laueleele o Seloma.

9 Ma sa oo ina faafofoga atu le tupu i upu a Kitiona.

10 Ma sa faia e le tupu o Limae ia faapotopoto faatasi e lona nuu a latou lafu; ma sa auina atu e ia le lafoga o uaina ia sa Lamanā; ma sa auina atu foi e ia ni uaina faasili, e fai ma meaalofa ia te i latou; ma sa latou inu saoloto i le uaina na auina atu e le tupu o Limae ia te i latou.

11 Ma sa oo ina o ese atu le nuu o le tupu o Limae i le po i le vao faatasi ma a latou lafu ma a latou fagaga, ma sa latou o i le vao e taamilo atu i le laueleele o Seloma, ma liliu ane lo latou ala agai atu i le laueleele o Sara’emila, ua ta’ita’ia e Amona ma ona uso.

12 Ma sa latou ave uma a latou auro, ma ario, ma a latou mea taua, sa mafai ona latou ave, ma a latou tapenapenaga uma foi faatasi ma i latou, i le vao; ma sa latou faaauau la latou malaga.

13 Ma ina ua mavae aso e tele o i ai i le vao, sa latou taunuu i le laueleele o Sara’emila, ma auai faatasi ma le nuu o Mosaea, ma avea ma ona tagata.

14 Ma sa oo ina talia i latou ma le olioli e Mosaea; ma sa talia foi e ia a latou ^atalafaamaumau, ma ^etalafaamaumau foi na maua e le nuu o Limae.

15 Ma o lenei sa oo ina ua iloa e sa Lamanā ua o ese atu le nuu o Limae mai le laueleele i le po, sa latou auina atu se ’autau i le vao e tuliloa i latou.

16 Ma ina ua mavae aso e lua o latou tuliloa i latou, sa oo ina lē mafai ona latou toe iloa o latou tulagavae; o lea na latou sē ai i le vao.