Tusitusiga Paia
Mosaea 24


Mataupu 24

Ua sauāina e Amulona ia Alema ma lona nuu—O le a fasiotia i latou pe a latou tatalo—Ua faia e le Alii a latou avega e pei ua māmā—Ua lavea’i e ia i latou mai le pologa, ma ua latou foi atu i Sara’emila. E tusa o le 145–120 T.L.M.

1 Ma sa oo ina alofagia Amulona e le tupu o sa Lamanā; o lea na tuu atu ai e le tupu o sa Lamanā ia te ia ma ona uso ia tofia i latou e avea ma aoao i lona nuu, ioe, e oo lava i tagata sa i le laueleele o Semulona, ma i le laueleele o Seloma, ma i le laueleele o Amulona.

2 Ona ua ave uma e sa Lamanā nei laueleele mo i latou; o lea na tofi ai e le tupu o sa Lamanā ni tupu e pule i ia laueleele uma.

3 Ma o lenei o le igoa o le tupu o sa Lamanā o Lamana, ua faaigoa o ia i le igoa o lona tamā; o lea na ta’ua ai o ia o Lamana le tupu. Ma sa tupu o ia i luga o se nuu toatele lava.

4 Ma sa tofi e ia ni a’oa’o mai uso o Amulona i laueleele uma sa nonofo ai ona tagata; ma sa faapea ona amata ona a’oa’o atu ai o le gagana a Nifae i totonu o tagata uma o sa Lamanā.

5 Ma o i latou o ni tagata sa fiafia le tasi i le isi; ae ui i lea sa latou lē iloa le Atua; sa le’i a’oa’o atu foi e uso o Amulona ia te i latou se mea e uiga i le Alii lo latou Atua, po o le tulafono a Mose; pe sa latou a’oa’o atu foi ia te i latou upu a Apinati;

6 Ae sa latou a’oa’o atu ia te i latou ia latou tausia la latou talafaamaumau, ma ia mafai ona latou fetusia’i o le tasi i le isi.

7 Ma sa faapea ona amata ona faateleina o ’oa a sa Lamanā, ma amata ona fefaataua’i o le tasi ma le isi ma faasolo ina maoa’e ai, ma amata ona avea ai ma ni tagata popoto ma atamamai, e tusa ma le poto o le lalolagi, ioe, o ni tagata popoto tele, e fiafia i ituaiga o amioleaga eseese uma ma le faomea, vaganā ai i totonu o o latou lava uso.

8 Ma o lenei sa oo ina amata ona faatino e Amulona le apule i luga o Alema ma ona uso, ma amata ona sauāina o ia, ma faia ia sauāina e lana fanau a latou fanau.

9 Auā sa iloa e Amulona o Alema, o ia o se atasi o faitaulaga a le tupu, ma o ia lea sa talitonu i upu a Apinati ma sa tuli ese mai luma o le tupu, ma o lea na ita ai o ia ia te ia; ona sa pule le tupu o Lamana ia te ia, peita’i sa ia faatino le pule i luga o i latou, ma tuu egaluega mamafa i o latou luga, ma tuu tagata pule o galuega i o latou luga.

10 Ma sa oo ina matuā tele lava o latou puapuaga sa amata ona latou tagi faatauanau atu i le Atua.

11 Ma sa poloa’iina i latou e Amulona ia tuu a latou tagi; ma sa tuu e ia leoleo i luga o i latou e vaaia i latou, ma o soo se tasi e maua o valaau atu i le Atua, o le a fasiotia.

12 Ma sa lē sii a’e e Alema ma ona tagata o latou leo i le Alii lo latou Atua, ae sa latou atuu atu atoa o latou loto ia te ia; ma sa silafia e ia mafaufauga o o latou loto.

13 Ma sa oo ina oo mai le siufofoga o le Alii ia te i latou i o latou puapuaga, ua fetalai mai: Inā ea ia o outou ulu ma ia faamafanafanaina outou; ona ua Ou iloa le feagaiga na outou faia mai ia te a’u; ma o le a Ou osifeagaiga ma o’u tagata ma lavea’i i latou mai le pologa.

14 Ma o le a Ou faamāmāina foi avega ua tuu i o outou tau’au, e oo ia te outou tou te lē lagonaina i latou i luga o o outou tua, a’o outou i ai lava i le pologa; ma o le a Ou faia lenei mea ina ia mafai ona outou tutū atu e avea o ni amolimau mo a’u i le lumanai, ma ina ia mafai ona outou iloa ma le mautinoa o A’u, o le Alii le Atua, e asiasi atu i o’u tagata i o latou epuapuaga.

15 Ma o lenei sa oo ina faamāmāina avega sa tuu i luga o Alema ma ona uso; ioe, sa afaamalolosia i latou e le Alii ina ia mafai ona latou tauave ma le faigofie a latou eavega, ma sa latou gaua’i atu ma le fiafia ma le ionosa’i i le finagalo atoa o le Alii.

16 Ma sa oo ina matuā tele lava lo latou faatuatua ma lo latou onosa’i sa oo ina toe oo mai le siufofoga o le Alii ia te i latou, ua fetalai mai: Ia faamafanafanaina outou, ona o le aso a taeao o le a Ou lavea’i ai outou mai le pologa.

17 Ma sa fetalai mai o ia ia Alema: Ia e muamua atu i luma o lenei nuu, ma o le a Ou alu atu faatasi ma oe ma lavea’i lenei nuu mai le apologa.

18 O lenei sa oo ina faapotopoto faatasi e Alema ma ona tagata a latou lafu i le po, ma a latou saito foi; ioe, sa latou faapotopoto faatasi a latou lafu i le po atoa.

19 Ma i le taeao sa faia e le Alii ia oo mai se amoe gase i luga o sa Lamanā, ioe, ma o o latou tagata pule uma o galuega, sa matuā momoe gase lava.

20 Ma sa o ese atu Alema ma ona tagata i le vao; ma ina ua mavae ona latou malaga i le aso atoa sa latou faatutū o latou faleie i se vanu, ma sa latou faaigoaina le vanu o Alema, ona sa ta’ita’i e ia lo latou ala i le vao.

21 Ioe, ma i le vanu o Alema sa latou ofoina atu ai a latou afaafetai i le Atua ona sa alofa mutimutivale mai o ia ia te i latou, ma faamāmā e ia a latou avega, ma ua lavea’i e ia i latou mai le pologa; ona sa latou i ai i le pologa, ma sa leai se tasi sa mafai ona lavea’ia i latou vaganā ai le Alii lo latou Atua.

22 Ma sa latou avatu le faafetai i le Atua, ioe, o o latou tane uma ma o latou fafine uma ma a latou fanau uma o e sa mafai ona tautatala, sa si’i a’e o latou leo i viiga o lo latou Atua.

23 Ma o lenei sa fetalai mai le Alii ia Alema: Ia e faavave ma aveese atu oe ma nei tagata mai lenei laueleele, ona ua fagua sa Lamanā ma ua latou tuliloa mai oe; o lea ia e alu ese atu mai lenei laueleele, ma o le a Ou taofi sa Lamanā i le vanu lenei, ina ia latou lē oo mai lava e tuliloa lenei nuu.

24 Ma sa oo ina latou o ese mai le vanu, ma alu atu la latou malaga i le vao.

25 Ma ina ua mavae aso e sefulu lua o latou i ai i le vao, sa latou taunuu i le laueleele o Sara’emila; ma sa talia foi i latou ma le olioli e le tupu o Mosaea.