1 Ahnsouo mie aramas tohto nan dih me kekeirada me sohte wehwehki sapwellimen nanmwarki Pensamin mahsen akan, pwehki ar wia kisin seri kei ni ahnsou me e ketin mahseniong sapwellime aramas akan; oh re sohte kamehlele en arail pahpa kahlap ako tiahk.

2 Irail sohte kamehlele padahk kan me pid duwen iasadahn me melahr akan, oh pil sohte kamehlele duwen ketidohn Krais.

3 Oh met pwehki arail sohte kamehlele, kahrehda arail sohte kak wehwehki mahsen en Koht; oh mohngiongarail kan kekeluwakalahr.

4 Oh irail sohte men papidaisla; de pil men iangala mwomwohdiso. Oh irailtohrohrala nan arail pelien lamalam oh re tohrohr sang ahnsouo kohla, iei nan arail mour en sampah oh mour dipan; pwehki irail sohte men kapakap ong Kauno arail Koht.

5 Oh met nan mwehin Mosaia irail inenen malaulausang aramas akan en Koht; ahpw pwehki akamaipene nanpwungen ekei tohn mwomwohdiso kan kahrehda irail wie tohtohla.

6 Pwe kedekedeo irail kin ketewehdi aramas tohto me wia tohn mwomwohdiso sang ni ar lokaian widing, oh kahrehiong irail en wiahda dihp tohto; eri e konehng me irail akan me wiahda dihp, me wia tohn mwomwohdiso, pahn ale kapwungpe sang mwomwohdiso.

7 Kedekedeo irail ahpw pakahrdo mwohn samworo kan, oh sounpadahk kan me kin kahreiraillahng samworo kan; oh samworo kan ahpw kahreiraillahng rehn Alma, me wia samworo lapalap.

8 Met nanmwarki Mosaia ketikihongehr Alma mweimwei en apwalih mwomwohdiso.

9 Kedekedeo Alma sohte ese duwen irail; ahpw mie soun kadehde tohto me uhwong irail; ei, aramas akan kesihnenda oh kadehdehda duwen arail wiewia suwed tohto.

10 Soangen irair wet saikinte wiawi nan mwomwohdiso; eri e kapwunodehda palingenen Alma, eri, e ahpw kahluwa irail en pakahrlahng mwohn nanmwarkio.

11 Oh e ahpw patohwanohng nanmwarkio: Kilang, iet irail akan me se patohwando rehmwi, me riarail akan kedipairaildahr; ei, oh irail wiahdahr soangsoangen dihp tohto. Oh irail sohte koluhkihla diparail kan; eri se patohwaniraildo mwohmwi, pwe komwi en kadeik irail nin duwen diparail akan.

12 Ahpw nanmwarki Mosaia mahsanihong Alma: Kilang, I sohte pahn kadeik irail; ahpw I patohwanohng irail pahn omw manaman pwe ke en kadeikirailda.

13 Oh met pwurehng kapwunodehda palingenen Alma; oh e patohla oh peki rehn Kauno dahme e pahn wiahiong kahpwal wet, pwe e perki e de wiahda me sapwung mwohn silangin Koht.

14 Kedekedeo mwurin eh kasalehiong Koht sang ni palingeni unsek, kepitien Kauno ahpw peidohng ih, mahsanih:

15 Meid pai kowe, Alma, oh meid pai irail akan me papidaislahr nan pihl en Mormon. Meid pai kowe pwehki omw pwoson mehlel mahsen akan en nei ladu Apinadai.

16 Oh meid pai irail pwehki arail pwoson mehlel mahsen akan me ke padahkihong irail.

17 Oh meid pai kowe pwehki omw koasoanehdi mwomwohdiso ehu rehn aramas pwukat; oh re pahn soandi, oh re pahn wiahla nei aramas.

18 Ei, meid pai aramas pwukat me pein nsenki alehda mwarei; pwe irail pahn kin adanikihla mwareiet; oh ieiirail nei aramas.

19 Oh pwehki omw peki rehi duwen me dipan akan, meid pai kowe.

20 Ke wia nei ladu men; oh I inoukihong uhk me ke pahn alehdi mour soutuk; oh ke pahn papah ie oh kohwei ni mwarei, oh pahn kihpene nei sihpw kan.

21 Oh mehmen me pahn rong ngileiet pahn wiahla nei sihpw; oh ih me ke pahn alehda nan ei mwomwohdiso, oh ih me I pahn pil alehda.

22 Pwe kilang, ei mwomwohdiso met; mehmen me pahn papidaisla en papidaisla pwehn kasalehda eh koluhla. Oh mehmen me ke pahn alehda pahn kamehlele mwarei; oh ih me I pahn mahkohng ni saledek.

23 Pwehki iei ngehi me pahn ale kalokepen dipen sampah; pwehki ngehi me kapikirailda; oh iei ngehi me pahn kamanahiong irail akan me kin kamehlele ie nan dewe ni pali mauni.

24 Pwe kilang, aramas pahn ekerkin irail mwarei; oh ma irail pahn ese ihs ngehi irail pahn kohdo, oh pahn ale dewerail ni palimauni kohkohlahte.

25 Kedekedeo ni ahnsou me ngihlen keriaun sowi pahn pepeuk, irail akan me sohte ese ie pahn kohdo oh kesihnenda mwohi.

26 Oh irail ahpw pahn ese me ngehi iei Kauno arail Koht, me ngehi iei arail Soundoar; ahpw irail sohte pahn poadoandoarla.

27 Oh ngehi ahpw pahn kasalehieng irail me I sohte ese irail; oh irail ahpw pahn kohkohla nan kisiniei soutuk me kaunopdahr ong tepilo oh nah tohnleng kan.

28 Eri I pahn ndaionguhk, me mehmen me sohte pahn rong ngilei, kumwail sohte pahn alehda nan ei mwomwohdiso, pwe I sohte pahn alehda ih ni imwin rahno.

29 Eri I pahn ndaionguhk, Kohwei; oh mehmen me pahn wiahda dihp ong ie, ih me ke pahn kadeingkihda dipe kan me e dipkidahr; oh ma e wehkada dipe kan mwohmw oh rehi, oh koluhla sang nan mohngiong mehlel, ih me ke pahn mahkohng, oh I pahn pil mahkohng ih.

30 Ei, oh ahnsou koaros me nei aramas akan pahn koluhla, I pahn mahkohng diparail kan me re wiahdahr ong ie.

31 Oh kumwail uhdahn pahn mahkpene nanpwungamwail; pwe kilang I pahn ndaiong kumwail, mehmen me sohte pahn mahkikihong mehn mpe sapwung kan me e wiahiong ahpw nda me e koluhla, e pahn pakadeingkihda dipe.

32 Met I ndaionguhk, Kohwei; oh mehmen me sohte pahn koluhkihla dipe kan e sohte pahn iang wadawadohng nei aramas akan; oh met pahn tepida wiawi sang met kohla.

33 Kedekedeo ni ahnsou me Alma rongehr mahsen pwukat e ahpw ntingihedi pwe en kak kolokol, oh pwe en kak kadeik aramas en mwomwohdiso nin duwen sapwellimen Koht kosonned akan.

34 Kedekedeo Alma ahpw kohla oh kadeik irail akan me wiadahr wiewia suwed, nin duwen mahsen en Kauno.

35 Oh mehmen me koluhkihla dipe kan oh kansenohkihla, irail me e kilelehdi en wadawadohng aramas en mwomwohdiso;

36 Oh irail akan me sohte wehkada diparail akan oh koluhkihla arail wiewia suwed kan, iei irail me sohte kileldi en wadawadohng aramas en mwomwohdiso, oh adarail akan irihrsang wadawad en towe kan.

37 Kedekedeo Alma ahpw koasoanehdi koasoandi kan koaros nan mwomwohdiso; oh irail pwurehng tepida ahneki popohl oh pweida kowahlap nan koasoandi kan en mwomwohdiso, oh re kanakanaiehng kohwei mwohn Koht, oh re kasamwo oh papidaisihala aramas tohto.

38 Oh met, mepwukat koaros, Alma oh ienge tohn doadoahk kan me mih nan mwomwohdiso kin wia, weweid ni loalopwoat, padapadahngki mahsen en Koht nimekoaros, lokolongki soangsoangen kalokolok kan koaros, sang ni kailok en irail akan me sohte wia tohn mwomwohdiso en Koht.

39 Oh re kin kaweid riarail kan; oh emenemen irail alehdi kaweid sang ni mahsen en Koht, nin duwen dipe kan, de pwehki dipe kan me e wiadahr, oh Koht ketin mahsanihong irail me re uhdahnpahn poaden kapakap, oh wia ar kapingkalahnganki mehkoaros.