1 ’E teie fa’ahou e tō’u mau taea’e, ’a fa’aro’o mai na ’outou, e ma’a parau iti ā tā’u e parau atu ia ’outou ; inaha ho’i, tē vai nei te tahi mau mea ’o tā’u i hina’aro ’ia fa’a’ite atu ia ’outou nō te mau mea e tupu a muri a’e.

2 ’E te mau mea ’o tā’u e fa’a’ite atu ia ’outou na, ’ua fa’a’itehia mai ïa iā’u e te hō’ē melahi a te Atua. ’E ’ua nā ’ō mai ’oia iā’u : ’A ara ; ’e ’ua ara ihora vau, ’e inaha tē ti’a ra ’oia i mua iā’u.

3 ’E ’ua parau mai ra ’oia iā’u : ’A ara, ’e ’a fa’aro’o i te mau parau tā’u e fa’a’ite atu ia ’oe ; inaha ho’i, ’ua tae mai au nō te fa’a’ite atu ia ’oe i te mau parau ’oa’oa nō te ’oa’oa rahi.

4 ’Ua fa’aro’o ho’i te Fatu i tā ’oe mau pure, ’e ’ua ha’avā ho’i i tō ’oe parauti’a, ’e ’ua tono mai iā’u nō te fa’a’ite atu ia ’oe ’ia ’oa’oa ’oe ; ’e ’ia fa’a’ite atu ho’i ’oe i tō ’oe mau ta’ata, ’ia fa’a’ī-ato’a-hia rātou i te ’oa’oa.

5 Inaha ho’i, tē fātata mai ra te tau ’e ’aita ho’i i ātea roa, ’e ma te mana, e tae mai ai te Fatu Manahope ’o tei fa’atere ari’i na, ’o tei vai na ho’i, ’e ’o tē vai noa nei ē a muri ē a muri noa atu, i raro nei mai te ra’i mai i rotopū i te mau tamari’i a te ta’ata nei, ’e e pārahi ho’i ’oia i roto i te hō’ē tino tāhuti, ’e e haere atu ’oia i rotopū i te ta’ata nei, ma te rave i te mau semeio fa’ahiahia, ’oia ho’i, te fa’aorara’a i te feiā ma’i, te fa’ati’a-fa’ahou-ra’a i te feiā pohe, te fa’aorara’a i te feiā piri’o’i ’ia haere, ’e te feiā matapō ia ’ite, ’e te feiā tari’a turi ’ia fa’aro’o, ’e te fa’aorara’a ho’i i te mau huru ma’i ato’a.

6 ’E e ti’avaru ’oia i te mau diabolo, ’oia ho’i i te mau vārua ’ino e pārahi ra i roto i te ’ā’au o te mau tamari’i a te ta’ata nei.

7 ’E inaha, e fāri’i ’oia i te mau fa’ahemara’a, i te māuiui o te tino, i te po’ia, i te po’ihā, ’e i te rohirohi, ’o tē ’ore e ti’a i te hō’ē ta’ata ’ia fa’a’oroma’i, maori rā e tae mai te pohe iāna ; inaha ho’i, e tahe tōna toto nā roto i te mau ’āpo’o ato’a o tōna ’iri nō tōna māuiui rahi nō te mau ’ohipa ’ī’ino ’e te mau ’ohipa vi’ivi’i a tōna ra mau ta’ata.

8 ’E e ma’irihia tōna i’oa, ’o Iesu Mesia, te Tamaiti a te Atua, te Metua o te ra’i e te fenua, Tei Hamani i te mau mea ato’a mai te mātāmua mai ā ; ’e tōna metua vahine e ma’irihia ïa tōna i’oa ’o Maria.

9 ’E inaha, e haere mai ’oia i tōna ihora, ’ia tae te fa’aorara’a i te mau tamari’i a te ta’ata nei nā roto i te fa’aro’o i tōna ra i’oa ; ’e i muri a’e i taua mau mea ato’a ra e fa’ariro rātou iāna ’ei ta’ata noa, ’e e parau rātou ē, e diabolo tōna, ’e e papa’i rātou iāna, ’e e fa’asātauro ho’i iāna.

10 ’E e tia mai ’oia i ni’a i te toru o te mahana mai te pohe mai ; ’E inaha, e ti’a ’oia nō te ha’avā i tō te ao nei ; ’e inaha, ’ua ravehia teie mau mea ato’a ’ia tae te ha’avāra’a parauti’a i ni’a i te mau tamari’i a te ta’ata nei.

11 Inaha ho’i, e riro ato’a tōna toto ’ei tāra’ehara nō te mau ta’ata i hi’a nō te ’ōfatira’a ture a Adamu, nō rātou tei pohe ma te ’ite ’ore i te hina’aro o te Atua nō ni’a ia rātou, ’e ’aore rā ’o tei hara ma te ’ite ’ore.

12 ’Auē ho’i ē, ’auē ho’i ’oia tei ’ite ē ’ua ’ōrure ’oia i te Atua ! ’E ’aita ho’i te fa’aorara’a e tae i taua ta’ata ra, maori rā nā roto i te tātarahapara’a ’e te fa’aro’o i te Fatu ra ia Iesu Mesia.

13 ’E i tono na te Fatu te Atua i tōna mau peropheta mo’a i rotopū i te mau tamari’i ato’a a te ta’ata nei, nō te fa’a’ite atu i teie nei mau mea i tō te mau ’ōpū ato’a, ’e tō te mau nūna’a ato’a, ’e tō te mau reo ato’a, ’e te ta’ata ato’a e ti’aturi e tae mai te Mesia, e fāri’i ïa rātou i te ha’amatarara’a nō tā rātou ra mau hara, ’e e ’oa’oa rātou ma te ’oa’oa rahi, mai te mea ra ē, ’ua tae mai na ’oia i rotopū ia rātou.

14 Terā rā ’ua ’ite te Fatu te Atua ē, e feiā ’ā’au ’eta’eta tōna ra mau ta’ata, ’e ’ua fa’ata’a ’oia i te hō’ē ture nā rātou, ’oia ho’i te ture a Mose.

15 ’E ’ua fa’a’ite ’oia ia rātou e rave rahi mau tāpa’o, ’e te mau ’ohipa ’ūmerehia, ’e te mau taipe, ’e te mau hōho’a nō tōna ra taera’a mai ; ’e ’ua parau ato’a atu te mau peropheta mo’a ia rātou nō ni’a i tōna taera’a mai ; terā rā ’ua fa’a’eta’eta rātou i tō rātou ’ā’au, ’e ’aita ho’i rātou i ’ite ē, e mea faufa’a ’ore te ture a Mose, maori rā nā roto i te tāra’ehara o tōna ra toto.

16 ’E ’āhiri ’ua ti’a i te mau tamari’i ri’i ’ia hara, ’aita ïa e ti’a ia rātou ’ia fa’aorahia ; ’āre’a rā tē parau atu nei au ia ’outou na, ’ua ha’amaita’ihia rātou ; inaha ho’i, nō te mea mai tā rātou i hi’a ia Adamu, ’e ’aore rā nā roto i tā te tino, e riro ato’a te toto o te Mesia ’ei tāra’ehara nā rātou.

17 ’E tē parau fa’ahou atu nei ā, tē parau atu nei au ia ’outou, ’aita atu e i’oa, ’aita ho’i e ’ē’a, ’aita ho’i e rāve’a e fa’a’itehia mai, e tae mai ai te fa’aorara’a i te mau tamari’i a te ta’ata nei, i roto ana’e rā, ’e nā roto ana’e ho’i i te i’oa o te Mesia, te Fatu Manahope.

18 Inaha ho’i, te ha’avā ra ’oia, ’e e mea ti’a tāna ha’avāra’a ; ’e ’aita ho’i te tamari’i ri’i tei pohe i tōna ’aiūra’a e mou ; ’āre’a rā tē inu ra te ta’ata i te pohe nō tō rātou iho vārua, maori rā ’ia fa’aha’eha’a rātou ia rātou iho ’e ’ia riro mai te tamari’i ri’i ra, ’e ’ia ti’aturi ho’i ē, i vai na te fa’aorara’a, ’e tē vai nei, ’e e tae mai ïa, i roto, ’e nā roto ho’i i te toto tāra’ehara o te Mesia, te Fatu Manahope ra.

19 ’E ’ua riro te ta’ata nātura nei ’ei ’enemi nō te Atua, ’e ’ua tupu te reira mai te hi’ara’a o Adamu mai ā, ’e e vai noa ho’i ē a muri ē a muri noa atu, maori rā ’ia auraro ’oia i te mau arata’ira’a a te Vārua Mo’a, ’e ’ia fa’aru’e i te ta’ata nātura ’e ’ia riro ’ei ta’ata mo’a nā roto i te tāra’ehara a te Mesia ra te Fatu, ’e ’ia riro ho’i mai te hō’ē tamari’i ra i te auraro, te marū, te ha’eha’a, te fa’a’oroma’i, te ’ī i te aroha, te hina’aro ’ia auraro i te mau mea ato’a tā te Fatu e hina’aro ’ia tu’u mai i ni’a iāna, mai te hō’ē tamari’i e auraro i tōna ra metua tāne.

20 ’E ’oia fa’ahou, tē parau atu nei au ia ’outou, tē fātata mai ra i te tau e parare ai te ’ite nō ni’a i te Fa’aora nā roto i te mau nūna’a ato’a, ’e te mau ’ōpū ato’a, ’e te mau reo ato’a, ’e te mau ta’ata ato’a.

21 ’E inaha, ’ia tae mai taua tau ra, ’aita roa te hō’ē ta’ata e ’itea i mua i te Atua ma te hapa ’ore, maori rā te mau tamari’i ri’i, ’e tei tātarahapa ’e tei ti’aturi i te i’oa o te Fatu te Atua Manahope.

22 ’E i taua tau nei ho’i, ’ia oti tā ’oe ha’api’ira’a atu i tō ’oe mau ta’ata i te mau mea tā te Fatu tā tō ’oe Atua i fa’aue atu ia ’oe na, ’ei reira ’aita atu ra rātou e ’itea ma te hapa ’ore i mua i te aro o te Atua, maori rā mai tei au i te parau tā’u i parau atu ia ’oe na.

23 ’E i teienei, ’ua oti tā’u paraura’a atu i te mau parau tā te Fatu te Atua i fa’aue mai iā’u.

24 ’E tē nā ’ō mai ra te Fatu : E riro taua mau parau ra ’ei ’itera’a pāpū māramarama i teie nei mau ta’ata ’ia tae i te mahana ha’avāra’a ; nō reira e ha’avāhia rātou, te ta’ata tāta’itahi, mai te au i tāna ra mau ’ohipa, mai te mea e mea maita’i te reira, ’e ’aore rā mai te mea e mea ’ino te reira.

25 E mai te mea e mea vi’ivi’i rātou, e vaiihohia rātou i te hi’o-ri’ari’a-ra’a i tā rātou ihora mau hara ’e te mau ’ohipa vi’ivi’i, ’o tē fa’a’ōtemutemu ia rātou mai mua atu i te aro o te Fatu i roto i te mamae ’e te māuiui hope ’ore, ’e e ’ore roa e ti’a ia rātou ’ia ho’i mai ; nō reira ’ua inu rātou i te pohe i tō rātou iho vārua.

26 Nō reira, ’ua inu rātou i tō roto i te ’āu’a o te riri ’ū’ana o te Atua, ’aore atu ra i ti’a i te parauti’a ’ia tāpe’a i te reira ’ia ’ore rātou ’ia inu, ’aore ato’a ho’i i ti’a ’ia huna ē, e mea ti’a ia hi’a Adamu nō tōna ’amura’a i te mā’a hotu i rāhuihia ra ; nō reira, ’aita ā te aroha e parau ia rātou ē a muri noa atu.

27 ’E tō rātou mamae rahi mai tō te roto auahi ïa ’e te gopheri ho’i, ’e e mea pohe ’ore tō reira mau ura auahi, ’e tē pe’e noa ra tōna au auahi i ni’a ē a muri ē a muri noa atu. Tē nā reira mai ra te Fatu i te fa’aue mai iā’u. ’Āmene.