1 Oh met, mwurin ahnsou me nanmwarki Pensamin mahsaniher mehkan me tohnleng en Kauno kairehkiong, e ahpw ketin mahsenseli pohn pokono, oh mahsaniada arail pwupwudiong nanpwel, pwehki ar lemmwikidahr Kauno.

2 Re kasawiadahr pein irail nan arail mour dihp, me suwedsang pwelipar en sampah. Oh irail koaros ehupene oh ndinda ni ngihl laud: Maing komw kupwurkalahngan, oh doadoahngki tomw en ntahn Krais pwe sen kak alehdi mahkpen dipat akan, oh mohngiongat kan en kak mwakelekelda; pwe se kamehlele Sises Krais, Sapwellimen Kohto, me kapikada nanleng oh sampah, oh audapara koaros; me pahn ketidihdo rehn aramas akan.

3 Kedekedeo mwurin arail ndahla koasoi pwukat Ngehn en Kauno ahpw tiahda pohrail, oh irail ahpw direkihla peren, oh alehdi mahkpen diparail akan, oh alehdi popohl nan arail madamadau, pwehki arail pwoson Sises Krais me pahn ketido, nin duwen mahsen akan me nanmwarki Pensamin mahsanihong irailehr.

4 Oh nanmwarki Pensamin apw pwurehng mahsanihong irail, ketihtihki: Kempoakepahi ko oh riei ohl ako, ei peneinei kan oh nei aramas akan, I men pwurehng peki rehmwail en rong ie, pwe kumwail en rong oh wehwehki mwahu kaimwiseklahn ei tungoal sakarada me I pahn patohwanohng kumwail.

5 Pwe kilang, ahnsou wet ma amwail marainiki kupwurmwahu en Koht panginkin kumwail en ese duwen amwail sohte mehkot, oh amwail sohte katepe oh amwail mour en aramas pwupwudi kei—

6 I ndaiong kumwail, ma kumwail marainikidahr kupwurmwahu en Koht, oh sapwellime manaman me sohte pelie, oh sapwellime erpit, oh sapwellime kanengamah, oh duwen eh kin ketin dadaurete sapwellime kanangamah ong aramas akan; oh pil, tomwo me kaunopadahr sangete ni poahsondahn sampah, pwe aramas en kak komourla ma e pahn koapworopworiki Kauno, oh pahn nantihong kapwaiada sapwellime kosonned akan, oh loalopwoatohngete eh pwosono lao lel imwin eh mour, met wehwehki mour en paliwar—

7 I patohwan, me iei ih aramas menet me pahn alehdi komour, sang ni tomwo me kaunopdahr sangete nin tepin sampah eh wiawihda ong aramas koaros, sangete pwupwulahn Adamo, de aramas me momour ahnsou wet, de me pahn ipwidi mwuhr, lao lel ni imwilahn sampah.

8 Oh iei met wiepen elen komour. Oh sohte ehu soangen komour likin dahme koasoiadahr; oh sohte ehu koasoandi me aramas kak komourkihla likin koasoandi me I patohwan ong kumwail.

9 Kumwail kamehlele Koht; kumwail kamehlele me ih me Koht, oh me e ketin kapikada soahng koaros, nanleng oh nin sampah; kumwail kamehlele me e ketin sapwellimaniki eripit koaros, oh manaman koaros, nanleng oh nin sampah; kumwail kamehlele me aramas sohte kak wehwehki soahng kan koaros me Kauno ketin mwahngih.

10 Oh kumwail en pil kamehlele me kumwail anahne koluhkihla dipamwail kan oh pwilikihdi, oh karakarahkala mwohn Koht; oh peki ni mohngiong mehlel pwe en ketin mahkohng kumwail; oh met, ma kumwail kamehlele mepwukat koaros ah kumwail nsenohki kapwaiada.

11 Oh I pil pahn kapwurehieng dahme I patohwanohng kumwailehr mwoweo, pwe ni amwail pahn marainkihda lingan en Koht, de ma kumwail esehier sapwellime kupwuramwahu oh kehnehr sapwellime limpoak oh alehdier mahkpen dipamwail akan, me kin kahrehda peren laud mehlel nan amwail mour, I pil men kumwail en tamataman, oh ahnsou koaros katengehdi nan amwail mehn kataman akan, me Koht me lapalap, oh kumwail sohte mehkot, oh sapwellime kupwuramwahu oh kanangamah ong kumwail, aramas souwar akan, oh kumwail en aktikitikla mehlel, likilikweriong mwaren Kauno rahn kaoros, oh uh tengeteng ni amwail pwoson dahme pahn kohdo, me tohnlengo mahsaniher.

12 Oh kilang, I ndaiong kumwail me ma kumwail pahn wia met kumwail pahn pereperen ahnsou koaros, oh kin direkihla limpoak en Koht, oh ahnsou koaros kumwail pahn kin ale lapwepen dipamwail akan; oh amwail pahn marainkihla lingaling en ih me ketin wieikumwailda pahn lalaudla, de marainkihla dahme pwung oh mehlel.

13 Oh kumwail sohte pahn ahneki madamadau en kamedekehla emen, ahpw momour ni popohl, oh kihong emen emen aramas uhdahn pwaise.

14 Oh kumwail sohte pahn mweidehng noumwail seri kan re en duhpekla, de kilisouda; de kumwail sohte pahn mweidehng irail en kawehla kosonned akan en Koht, oh pei oh akamaipene nanpwungarail, oh papah tepilo, me iei soumas en dihp, de iei ngehn suwedo me atail pahpa kahlap ako koasoiahier, me wia imwintihtien soahng koaros me mwahu.

15 Ahpw kumwail pahn padahkihong irail en weweidki mour mehlel oh maledek; kumwail pahn padahkihong irail en limpoakpene, oh uhpahpene nanpwungarail.

16 Oh pil, pein kumwail me pahn sewese irail akan me kin anahne amwail sawas; kumwail pahn apwalihkihong amwail dipwisou kan ong me anahne sawas; oh kumwail dehr pohnsehse pekpek en me kin peksawas, oh dehr kadarala pwe en mwomwla.

17 Ele mwein kumwail pahn nda: Aramaso me kahpwalihala pein ih; eri I pahn nennenlahte, oh sohte pahn kisekisehkiong kenei mwonge, de pil kihong ei dipwisou pwe en deh lokolok, pwe eh kalokolok kan me pwung—

18 Ahpw I pahn ndaiong kumwail, oh ni mehlel, mehmen me pahn wia met e pahn anahne koluhla; oh ma e sohte pahn koluhkihla dahme e wiadahr e pahn lekdekla kohkohlahte, oh sohte dewe nan wehin Koht.

19 Pwe kilang, kaidehn kitail koaros sou wia soun lipekipek kei? Kaidehn kitail koaros sou kin koapworopworki Kohtohte, ong ni mehkoaros me kitail ahneki, kanatail mwenge oh atail likou, oh neitail kohl, oh silper, oh pai kan koaros me kitail ahneki?

20 Oh kilang, ahnsou wet, kumwail pil kin wie likilikwerih mwareo, oh pekipeki lapwepen dipamwail akan. Ah dah, e ketin mweidohng amwail pekipek kan en sohte pweida? Soh; ahpw e ketikihong sapwellime Ngehn pohmwail, oh kahrehda mohngiongimwail kan en direkihla peren, oh kahrehieng awemwail kan eh nennenla oh sohte kak koasoi pwehki amwail peren mwuledek.

21 Oh met, ma Koht, me ketin wieikumwailda, me kumwail kin kehlikihong amwail mour oh soahng koaros me kumwail ahneki oh wia, me ketikihong kumwail mehkoaros me kumwail kin peki me pwung, sang ni pwoson, ni amwail kamehlele me kumwail pahn alehdi, eri, ia uwen amwail anahne kisekisehki mehteikan amwail dipwisou kan.

22 Oh ma kumwail kadeik aramas men me peki amwail dipwisou kan pwe e de mehla, oh kumwail wiakauwe, ia uwen pwung en amwail pahn pakadeingkihda amwail kahng kisekisehki amwail dipwisou kan, me kaidehn amwail ahpw sapwellimen Koht, me pil ketin sapwellimaniki amwail mour kan; oh kumwail sohte wie amwail pekipek, de koluhkihla dahme kumwail wiadahr.

23 I ndaiong kumwail, meid suwediong aramaso, pwehki ih oh eh dipwisou kan pahn mwomwala; oh met, I koasoia mehpwukat ong irail akan me kepwehpwehkihla dipwisoun sampah kan.

24 Oh met, I ndaiong kumwail me semwehmwe kan, kumwail akan me sohte amwail dipwisou ahpw itarete dahme mie pwe kumwail en momour ehu ehu rahn; I koasoakoasoiaiong kumwail akan me kin soikala me wie pekipeko, pwehki sohte amwail dipwisou; I men kumwail en kin nda nan mohngiongimwail kan: I sohte kisekise pwehki sohte ei dipwisou, ah ma mie I uhdahn pahn kihla.

25 Oh met, ma kumwail pahn nda met nan mohngiongimwail kan kumwail pahn mwakelekelte, ma soh a kumwail pahn pakadeikda; oh amwail pakadeik pahn pwung pwehki amwail noahreke dahme sohte amwail.

26 Oh met, pwehki soahng pwukat me I koasoiaiong kumwail—me iei, kumwail en kin ale lapwepen dipamwail akan nan rahn koaros, pwe kumwail en kak mour mwakelekel mwohn Koht—I men kumwail en kin kisekisehki me semwehmwe kan amwail dipwisou kan, aramas koaros nin duwen dahme wia uhdahn arail, iei kamwenge irail akan me duhpeklahr, kalikawihada me sohte ar likou kan, pwarek me soumwahu oh apwalih arail anahn akan, ni pali ngehn oh paliwar, nin duwen dahme re mwahuki.

27 Oh kilang me soahng pwukat koaros wiawi ni eripit oh nin duwen koasoandi; pwe e sohte konehng aramas emen en tang marahrahsang uwen eh kak. Oh pil ehu, e konehng me e pahn pwersek, pwe en kak ale kisakis; eri, soahng koaros anahne wiawi nin duwen koasoandi.

28 Oh I men kumwail en tamataman, mehmen nanpwungamwail me pekihsang rehn mehn mpe mehkot e pahn anahne kapwurehla dahme e pekio, nin duwen dahme e koasoanehdi, ma soh e pahn dipikihda; oh ke pil kakete kahrehda mehn mpemomwo e pahn pil dipikihda.

29 Eri, I sohte kak ndaiong kumwail soahng koaros me kumwail kak dipikihda; pwe mie soangen wiepe oh mwohmw kei, iei me I sohte kak wadekedi pwehki ar nohn tohto.

30 Ahpw iei met me I kak ndaiong kumwail, ma kumwail sohte pahn kanaiehng pein kumwail, oh amwail madamadau kan, oh amwail koasoi kan, oh amwail wiewia kan, oh kapwaiada sapwellimen Koht kosonned akan, oh nantihong ni pwoson dahme kumwail rongehr duwen ketidohn Kauno, iei lao lel imwin amwail mour, kumwail uhdahn pahn mehla. Oh met, kumwail, tamataman, oh dehr mehla.