1 Mo nao, i bin hapen se taem we king Benjamin i bin stop blong talemaot ol toktok we enjel ia blong Lod i bin givim long hem, hem i bin lukluk olbaot long grup blong pipol ia, mo luk oli bin foldaon long graon from ^abigfala respek long Lod i bin kam long olgeta.

2 Mo oli bin luk olgeta bakegen long ^afasin nogud we oli bin stap long hem, mo oli luk we das blong graon ^bi moa gud bitim olgeta. Mo olgeta evriwan i bin singaot laod tugeta, mo talem se: “O gat sore, mo yusum blad ^dwe i pem praes, we i blong Kraes blong mifala i save kasem fogivnes from sin blong mifala, mo blong mekem se hat blong mifala i save kam klin. From we mifala i biliv long Jisas Kraes, Pikinini blong God we i bin ^emekem heven mo wol mo evri samting; we bae i kamdaon long medel blong ol pikinini blong ol man.”

3 Mo i bin hapen se afta we oli bin talemaot ol toktok ia, Spirit blong Lod i bin kam long olgeta, mo oli bin fulap long glad, from oli bin ^akam klin aot long ol sin blong olgeta, mo oli bin kasem pis long ^btingting, from bigfala ^dfet we oli bin gat long Jisas Kraes ia we bae i kam, folem ol toktok we king Benjamin i bin talemaot long olgeta.

4 Mo king Benjamin i bin openem maot blong hem bakegen, mo i bin stat blong toktok long olgeta, hem i talem se: “Ol fren blong mi mo ol brata blong mi, ol famli blong mi mo ol pipol blong mi, bae mi singaotem yufala bakegen blong yufala i save harem mo andastanem ol toktok blong mi we oli stap yet we bae mi talemaot long yufala.

5 From luk, sapos save ia abaot gudfala fasin blong ^aGod, long tetaem ia i bin wekemap yufala blong mekem se yufala i luksave se yufala i nating nomo, mo se yufala i no stret mo i stap long ples blong foldaon—

6 Mi talem long yufala se, sapos yufala i bin kam blong ^asave gudfala fasin blong God, mo paoa blong hem ia we i bitim eni narafala paoa, mo waes tingting blong hem, mo fasin blong hem blong save wet longtaem, mo fasin blong hem blong gat longfala tingting tru long hadtaem, i go long ol pikinini blong ol man; mo tu, ^batonmen we i bin rere stat long ^dtaem we wol i stat, se tru long hemia, fasin blong sevem man i save kam long hem we bae i putum ^etras blong hem long Lod, mo bae i wok strong wetem strong tingting blong obei ol komanmen blong Lod, mo i gohed long fet i go kasem en blong laef blong hem. Mi minim laef blong bodi blong wol—

7 Mi talem se, hemia man we i kasem fasin blong sevem man, tru long atonmen we God i bin mekem i rere stat long taem we wol i bin stat blong evri pipol, we oli bin stap long taem we Adam i bin ^afoldaon, o oli stap, o bae oli stap, go kasem en blong wol.

8 Mo hemia i wei, we tru long hem fasin blong sevem man i kam. Mo i ^anomo gat wan narafala fasin blong sevem man be hemia nomo we oli bin tokbaot; mo tu, i no gat eni narafala fasin we Lod i save sevem man long hem, be tru long ol fasin nomo we mi bin talemaot long yufala.

9 Biliv long God, biliv se hem i stap, mo we hem i bin mekem evri samting, tugeta long heven mo long wol. Biliv se hem i gat evri ^awaes tingting, mo evri paoa, tugeta long heven mo long wol; biliv se man i no save ^bandastanem evri samting we Lod i save.

10 Mo bakegen, biliv se yufala i mas ^asakem sin blong yufala mo no mekem ol sin ia bakegen, mo putum tingting blong yufala i stap daon long fes blong God; mo askem hem wetem wan tru hat, se bae hem i ^bfogivim yufala, mo nao, sapos yufala i ^dbilivim evri samting ia, meksua se yufala i ^emekem olgeta.

11 Mo bakegen, mi talem long yufala olsem we mi bin talem bifo, se from we yufala i bin kam blong save glori blong God, o sapos yufala i bin save gudfala fasin blong hem, mo yufala i bin ^atestem lav blong hem, mo bin ^bkam klin aot long ol sin blong yufala we i mekem se yufala i harem i gud plante long sol blong yufala, mo tu, mi wantem se yufala i tingbaot, mo holemtaet long tingting oltaem, se God i gat bigfala paoa, mo se yufala i ^dnating nomo, mo se God i ^egudwan tumas, mo se hem i gat longfala tingting long yufala, ol wael man we oli nogud olgeta, mo putum tingting blong yufala i ^fstap daon evriwan go kasem daon olgeta, ^gprea long nem blong Lod evri dei, mo stanap strong long fet from ol samting we bae oli kam, we maot blong enjel i bin talemaot.

12 Mo luk, mi talem long yufala se sapos yufala i mekem samting ia, bae yufala i glad oltaem, mo ^alav blong God bae i fulumap yufala, mo bae yufala i ^bholemtaet fasin blong kam klin aot long ol sin blong yufala; mo bae yufala i gro long saed blong save blong hem we i bin mekem yufala, o long saed blong save long ol samting we oli stret mo tru.

13 Mo bae yufala i no gat wan tingting blong givim kil long wanwan long yufala, be blong stap long ^apis, mo givim long evri man folem wanem we i nid blong givim.

14 Mo bae yufala i no letem ol ^apikinini blong yufala blong oli go hanggri, o neked; mo tu, bae yufala i no letem se oli brekem ol loa blong God mo ^bfaet mo rao wan wetem narawan, mo wok blong devel, we i masta blong sin, o we i ivel spirit we ol papa blong yumi oli bin tokbaot, hem i wan enemi blong evri stret mo gud fasin.

15 Be bae yufala i ^atijim olgeta blong ^bwokbaot long ol wei blong trutok mo blong stap tru; bae yufala i tijim olgeta blong ^dlavem wanwan long olgeta, mo blong wok blong wanwan long olgeta.

16 Mo tu, yufala bakegen bae yufala i ^ahelpem olgeta we oli nidim help blong yufala; bae yufala i serem sam long ol samting blong yufala long eni man we i gat nid; mo bae yufala i no letem se ^bwan we i blong askem samting, i askem samting blong nating, mo sendem aot hem i go ded.

17 Maet bae yufala i ^atalem se: ‘Man ia i putum rabis samting ia long hemwan bakegen; from hemia, bae mi no help, mo bae mi no givim hem eni kaekae blong mi, o bae mi no serem wetem hem wanem we mi gat, blong mekem se bae hem i no safa, from ol panis blong hem oli stret’—

18 Be mi talem long yufala, O man, eni man we i mekem samting ia, semfala man ia i gat bigfala stamba tingting blong sakem sin; mo sapos hem i no sakem sin from ol samting we hem i bin mekem, hem i ded blong oltaem, mo hem i no gat ples insaed long kingdom blong God.

19 From luk, ?yumi evriwan, yumi no man blong askem samting? ?Yumi evriwan, yumi no dipen long sem Man, we i God, from evri samting we yumi gat, from tugeta ia, kaekae mo klos, mo from gol, mo from silva, mo from evri rij samting we yumi gat we i blong evri kaen?

20 Mo luk, long taem ia tu, yufala i bin prea long nem blong hem, mo askem hem blong mekem yufala i kam klin aot long ol sin blong yufala. ?Mo hem i bin letem se yufala i bin askem samting blong nating? No; hem i bin kapsaetem Spirit blong hem long yufala, mo i bin mekem se hat blong yufala bae i fulap wetem ^aglad, mo i bin mekem se maot blong yufala i sat blong mekem se yufala i no faenem ol toktok blong talemaot, glad blong yufala i bin bigwan tumas.

21 Mo nao, sapos God, we i bin mekem yufala, long hem we yufala i dipen long hem from ol laef blong yufala mo from evri samting we yufala i gat mo from huia yufala, sapos man ia i givim long yufala eni samting we yufala i askem we i stret, wetem fet, mo bilivim se bae yufala i kasem, O afta, hamas moa yufala i mas ^aserem wanem we yufala i gat long wanwan long yufala.

22 Mo sapos yufala i ^ajajem man ia we i askem ol samting blong yufala long yufala, blong mekem se hem i no save ded, mo talemaot strong se hem i mekem wan rong samting, hamas moa bae yu kasem wan panis we i stret from we yufala i ^bno bin serem ol samting blong yufala, we i no blong yufala be i blong God, we laef blong yufala tu i blong hem; mo stil yufala i no askem, o sakem sin long samting ia we yufala i bin mekem.

23 Mi talem long yufala, sore tumas long man ia, from ol samting blong hem bae oli lus wetem hem; mo nao, mi talem ol samting ia long olgeta we oli ^arij long saed blong ol samting blong wol ia.

24 Mo bakegen, mi talem long ol puaman, yufala we i no gat be stil yufala i gat inaf blong yufala i stap laef long wan dei i go long narafala dei; mi minim yufala evriwan we i tanem baksaed long olgeta we oli stap askem samting, from se yufala i no gat; mi wantem se yufala i talem long hat blong yufala se: ‘mi no givim from mi mi no gat, be sapos mi mi gat bae mi ^agivim.’

25 Mo nao, sapos yufala i talem samting ia long hat blong yufala, yufala i stap olsem se yufala i no gat rong, sapos no bae mi talem strong se yufala i ^arong; mo panis blong yufala i stret from yufala i wantem samting blong narafala man we yufala i no bin kasem.

26 Mo nao, from ol samting ia we mi bin talemaot long yufala—hem i, from long saed blong holemtaet fasin blong kam klin aot long ol sin blong yufala long wan dei i go long narafala dei, blong mekem se yufala i ^awokbaot we yufala i no gat rong long fes blong God—mi wantem se bae yufala i ^bserem ol samting blong yufala long olgeta ^dpuaman, evri man folem samting we hem i gat, olsem ^egivim kaekae long olgeta we oli hanggri, putum klos long olgeta we oli neked, go luk ol sikman mo givhan long olgeta blong mekem se oli harem gud, tugeta, long saed blong spirit, mo long saed blong laef ia, folem ol samting we oli wantem.

27 Mo yufala i luk se oli mekem ol samting ia long waes tingting mo long oda; from i no gat nid blong wan man i ron ^amoa kwik bitim paoa we hem i gat. Mo bakegen, i nid blong hem i wok strong wetem strong tingting oltaem, blong mekem se hem i save winim praes; from hemia, evri samting i mas hapen long oda.

28 Mo mi wantem se yufala i tingbaot, se eniwan long yufala we i tekem mo yusum wan samting blong neba blong yufala, i mas tekem samting ia i gobak folem wanem we yufala i bin agri blong mekem, sapos no, bae yufala i mekem sin; mo maet bae yufala i mekem neba blong yufala tu i mekem sin.

29 Mo blong endem, mi no save talem long yufala evri samting we yufala i save mekem sin long hem; from i gat plante defren wei mo plante fasin, hem i plante tumas mekem se mi no save kaontem olgeta.

30 Be hemia nomo mi save talem long yufala, se sapos yufala i no ^alukaot gud long yufalawan, mo long ol ^btingting blong yufala, mo long ol ^dtoktok blong yufala, mo long ol wok blong yufala, mo yufala i no obei ol komanmen blong God, mo no gohed long fet blong wanem we yufala i bin harem long saed blong taem we Lod bae i kam, go kasem en blong laef blong yufala, yufala i mas ded. Mo nao, O man, tingbaot, mo no ded.”