Guruy Ni 5

Pi Gidiiʼen Got e ra manged e pagael nge ppin ni fak Kristus u dakean e mich—Ma arame kan kiiʼeg raed u dakean fithingan Kristus—Pilung ni Benjamin e ning chilen ngoraed ni ngar dugiliyed yaed mar pired ni dabra mithmith gaed u fithikʼ e pi muruwel nib mangil. Napʼan 124 M.K.

1 Ere chiney, yibi buch u napʼan fare pilung i Benjamin e kenon ni aray rogon ko gidiiʼ rokʼ, me malʼog nga fithikʼraed, ya baʼadag ni nge nang ni faʼanra ke michaenʼ e gidiiʼ rokʼ ko fapi thin ni ke weliy ngoraed.

2 Ma yaed gubin nra nonaed nib gaaʼ lamraed u taʼabang, ni yaed be gaʼar: Arragon, be mich u wunʼmaed fapi thin ni kam weliy ngomaed; nge ku arragon, ni gamaed manang ni rib mutrug mab riyulʼ, ni bachan fare Kan ni Thothup rokʼ Somoel ni Gubin ma ra yog rokʼ, niʼir e ke gagyeg nagmaed kug thil gaed, ara lan e pi gumʼirchaʼ romaed, ni ke chuweg romaed e athap ko ngongol ni kireb, ma ke adag laniyaenʼ maed ni nggu ululiyed i rinʼ e tin nib felʼ banʼen.

3 Ma gamaed, nri ka gamaed, e ku arragon ngomaed, nu dakean fare falʼngin Got, nge pi thogthog ko fare Kan ni Thothup rokʼ, e ke tamilang laniyaenʼ maed riy ko nʼen ni bay yib; ma faʼanra ba tʼuf ni ngan rinʼ, ma rayog ni nggu prophesy niged gubin banʼen.

4 Ma fare mich ni bay romaed u morngaʼagen fapinʼen ni ke yoeg fare pilung romaed ngomaed e ire ke yognag ngomaed e biney e llowaenʼ, ni ireray e gin ni be falaenʼmaed riy u fithikʼ e falfalaenʼ nib gel.

5 Ma rib mʼagaenʼ maed ngay ni nggu falʼeged e mʼag u thilmaed Got ni nggu rinʼed e tin baʼadag, ma gamaed fol ko pi motochiyel rokʼ u fithikʼ gubin banʼen nibe chiyliy ngomaed, u gubin e pi rran romaed ni kubay, ni nge siy gu feked nga dakeanmaed ba gechig ni dabi mʼay biʼid, ni boed ni ke yoeg fare angel, ni gomanga siy gu unumed ko fare kap ko damomuw rokʼ Got.

6 Ere chiney, ireray e fapi thin rokʼ fare pilung i Benjamin ni baʼadag ni ngar rinʼed: ere gaʼar ngoraed: Kam weliyed e thin ni gubaʼadag; nge re mʼag ni kam tayed e ba mʼag nib matʼaw.

7 Ere chiney, e bachan e fare mʼag ni kam tayed ma arame ngan piningmed ni bitir rokʼ Kristus, ni pagael ni fak, nge ppin ni fak; ya musap gaed, biney e rran e kam thap gaed ngakʼ kam chitamangyed; ya kamoeged ni pi gumʼirchaʼ romed e kethil u dakean e mich romed u fithingan; ere, kam sum gaed rokʼ ma kam manged pagael nge ppin ni fak.

8 Ma dakean e re ngachal ney e ke puf rogmed riy, ma dakuriy rebe ngachal ngab yang nra yog ni nge puf rogmed riy. Dakuriy reb e fithingan ngab yang ni gimed ra thap riy; ere, gu baʼadag ni thingar mu feked nga dakeanmed fithingan Kristus, ni gimed gubin e piʼin ni kam falʼeged e mʼag u thilmed Got ni thingar mu fol gaed nge madaʼ nga tomuren e yafos romed.

9 Ma bay yibi buch ni piʼin nra rinʼ e rennʼey e yira pirʼeg u baʼni matʼaw i paʼ Got, ya ra nang e re fithingan ni yira pining u dakean; ya yira pining u dakean fithingan Kristus.

10 Ere chiney e rra yibi buch, ni chaʼ ni dabi fek nga dakean fare fithingan Kristus e thingar ni pining ngo yug rebe fithingan; ere, ra pirʼeg ir u baʼni gilaeyʼ i paʼ Got.

11 Ma gu baʼadag ni thingar kum tayed u wunʼmed, ni ireray e re fithingan ni kugog ni gura piiʼ ngomed ni dariy bangiyalʼ ni ngan chuweg, ma kemus nu dakean e ngongol ni kireb; ere, mu kol chiyaʼ gaed ni nga dab mu rinʼed e ngongol nib kireb, me siy ni chuweg fare fithingan u gumʼirchaʼmed.

12 Gube yoeg ngomed, nug baʼadag ni thingar mu tayed u wunʼmed ni ngam chaʼariyed fare fithingan ni kan yoloey ni gubin e ngiyalʼ u lan gumʼirchaʼmed, ni nge yog ni nga dab ni pirʼegmed u baʼni gilaeyʼ i paʼ Got, machane gimed ra rungʼag mi gimed nang e re fithingan ni yira pining med u dakean, nge re fithingan nra pining ngomed.

13 Ya buʼuw rogon me nang beeʼ nib moʼon fare masta ni dawori pigpig ngakʼ, ma beeʼ ni denang, ma kub palog ko pi tafnaey nge pi lem u gumʼirchaʼen?

14 Nge ku bayay, ba matʼaw ni nge fek beeʼ ba donkey ni fak e chaʼ ni buguliyoror rokʼ, nge tay rokʼ ni dab ki sulweg? Gube gaʼar ngomed, Dangay; ku dabi pag ni nge un ko abich u fithikʼ e pi saaf rokʼ, machane nge tuluf nga palog, nge yaen nge chuw. Gube yoeg ngomed, ni ku aram rogon ni nge paer u fithikʼmed ni faʼanra dam nanged e re fithingan ni ngan piningmed u dakean.

15 Ere, gubaʼadag ni ngam miyuluy gaed ma dab mu worwar gaed, ma gubin e ngiyalʼ ni ngam rinʼed e pi muruwel nib mangil, ya Kristus, ni fare Somoel ni Got ni Gubin ma ra yog rokʼ, e gomanga gabliymed ngakʼ, ni gomanga yog ni fekmed nga tharmiy, ni gomanga yigi yog ni ngam thap gaed me yog ngomed e yafos ni gubinfen, u dakean fare gonop, nge gelingin, nge justice, nge murnguy rokʼ e chaʼ ni sunmiy gubin banʼen, u tharmiy ngu fayleng, niʼir e Got ko urngin banʼen. Amen.