iVolanikalou
Mosaia 7


Wase 7

E sa raica ko Amoni na vanua ko Liai-Nifai, ka sa tui tiko kina ko Limiai—Era sa vakabobulataki na tamata i Limiai mai vei ira na Leimanaiti—Sa tukuna ko Limiai na kedra itukutuku makawa—E a sa vakadinadinataka e dua na parofita (ko Apinatai) ni sa Kalou na Karisito ka Tama ni ka kecega—Ko ira sa kaburaka na veika dukadukali era na tamusuka na covulaca, ia ko ira era nuitaka na Turaga era na sereki. Rauta na 121 B.K.

1 Ia oqo, a sa yaco ni sa oti e tolu na yabaki ni sautu ni lewa i Mosaia na tui, sa gadreva ko koya me kila me baleti ira era a alako cake me ra la’ki tiko ena vanua ko Liai-Nifai, se ena koro ko Liai-Nifai; ni ra sa sega ni bau rogoca tale e dua na kedra itukutuku ka tekivu mai na gauna era a biuti bSaraemala kina; o koya, sa oca mai kina ko koya ena nodra cikevi koya tiko na nona tamata.

2 Ka sa yaco ni sa vakadonuya ko Mosaia na tui me ra lako cake ki na vanua ko Liai-Nifai e lewe tinikaono na nodra tamata kaukauwa, ka vakasaqarai ira kina na wekadra.

3 Ka sa yaco ni ra sa cavutu ena mataka ena nodra ilakolako, ka a tiko vata kei ira e dua ko Amoni, a sa tamata kaukauwa sara ka qaqa, ka kawa i Saraemala; ka sa nodra iliuliu talega.

4 Ia oqo, era sa sega ni kila na sala me ra muria cake ki na vanua ko Liai-Nifai; o koya era sa lako voli ga kina ena lekutu ka vuqa na siga, ia sa vasagavulu na siga na nodra lako voli.

5 Ia ni sa oti e vasagavulu na siga na nodra lako voli era sa yaco ki na dua na delana, ena vualiku kei aSailomi, ka ra sa birika e keri na nodra vale laca.

6 A sa kauta ko Amoni e tolu na nona itokani, na yacadratou ko Amelekai, ko Ilemi kei Eme, ka ratou a lako sobu ki na vanua ko aNifai.

7 Ia raica, eratou sa sota kei na nodra tui na tamata ena vanua ko Nifai, kei na vanua ko Sailomi; eratou sa vakavolivoliti mai vei ira na sotia ni tui, ka ratou sa tauri, ka vesu, ka biu ki na vale ni veivesu.

8 Ka sa yaco ni sa oti e rua na siga na nodratou tiko ena vale ni veivesu eratou sa kau tale vua na tui, ka qai sereki na kedratou ivesu; a ratou sa tu e matana na tui, ka vakatarai, se vakaroti, me ratou sauma na taro kece e tarogi iratou kina ko koya.

9 A sa kaya vei iratou: Raica, koi au ko aLimiai, na luvei Noa, ko koya na luvei Senifi, ka a lako mai na vanua ko Saraemala me taukena na vanua oqo, na nodra vanua na nodra qase, ka a sa buli me nodra tui ena nodra lewa na tamata.

10 Ia oqo, au via kila na vuna dou sa rui doudou kina mo dou lako volekata sara mai na bai ni koro, ni’u a tu, koi au, kei ira na noqu sotia ena taudaku ni matamata ni koro?

11 Ia oqo, sai koya oqo na vuna au vakarota kina mo dou maroroi tiko, mo dou mai tarogi, ke sega ke’u a sa vakaroti ira na noqu sotia me ra vakamatei kemudou. Dou sa vakatarai mo dou vosa.

12 Ia oqo, ni sa raica ko Amoni ni sa vakadonui me ratou vosa, sa lako yani ka cuva sobu e matana na tui; a sa tucake tale ka kaya: Oi kemuni na tui, au vakavinavinaka vakalevu sara vua na Kalou ena siga oqo ni’u se bula tiko ga, ka vakatarai me’u vosa; ia au na tovolea me’u vosa vakadoudou sara;

13 Au sa lomadei ni kevaka ko ni a kilai au ke ko ni a sega ni vakadonuya me’u vesu. Ni koi au ko Amoni, e dua na kawa i aSaraemala, ka’u sa lako cake mai na vanua ko Saraemala me vakasaqarai ira kina na wekai keimami, ka a kauti ira tani mai na vanua ko ya ko Senifi.

14 Ia oqo, a sa yaco ni sa rogoca ko Limiai na vosa i Amoni, sa marau vakalevu ka kaya: Au sa qai kila oqo ni ra se bula tiko na wekai keimami mai na vanua ko Saraemala. Ia oqo, au sa marau dina kina, ka ni mataka au na tukuna vei ira na noqu tamata me ra na marau talega.

15 Ia raica, keimami sa bobula tiko vei ira na Leimanaiti, ka sa lavaki vei keimami e dua na aivakacavacava sa dredre sara me keimami sauma. Ia oqo, raica, era na mai vakabulai keimami ko ira na wekai keimami oqo mai na neimami tiko vakabobula, se mai na ligadra na Leimanaiti, ka keimami na qai nodra bobula; ni sa vinaka cake me keimami nodra bobula na Nifaiti, ia me keimami kakua ga ni soli ivakacavacava tiko vua na nodra tui na Leimanaiti.

16 Ia oqo, a sa vakaroti ira na nona sotia ko Limiai na tui me sereki ko Amoni kei iratou na nona itokani, ia sa vakatalai ira ki na delana ena vualiku kei Sailomi, ka kauti ira mai na nodratou itokani ki na koro, me ra mai kana, ka gunu, ka vakacegu mai na veika dredre ni nodra ilakolako; ni ra a sa vosota mai e vuqa na ka; era vosota na viakana, na viagunu, kei na wawale ni yago.

17 Ia oqo, a sa qai yaco ni sa talatala yani ena mataka ko Limiai na tui kivei ira kece na nona tamata, me ra soqoni vata yani ki na avaletabu, me ra rogoca kina na veivosa ena tukuna vei ira.

18 Ka sa yaco ni ra sa soqoni vata kece mai, sa qai vosa vei ira vakaoqo, ka kaya: Oi kemuni na noqu tamata, mo ni laveta cake na ulumuni ka vakacegu; raica, sa yaco mai na gauna, ka sa sega tale ni yawa, me da sa na sega tale kina ni tiko vakabobula vei ira na noda meca, e dina ga ni a levu na noda sasaga e liu, e a tawayaga ga; ia au vakabauta ni se vo tiko e dua na sasaga ka na yaga me vakayacori.

19 O koya, mo ni laveta cake kina na ulumuni, ka ia na marau, ka vakararavi vua na aKalou, vua na Kalou ko ya ka a Kalou i Eparaama, kei Aisake, kei Jekope; ko koya talega na Kalou ka a bkauti ira tani na luvei Isireli mai na vanua ko Ijipita, ka vakavuna me ra kosova na Wasa Damudamu ena qele mamaca, ka vakani ira ena cmana me ra kakua kina ni rusa ena loma ni lekutu; a sa kitaka e vuqa tale na ka ena vukudra.

20 E dua tale; na Kalou vata ga oqo a akauti ira tani na noda qase mai na vanua ko Jerusalemi, ka taqomaki ira ka maroroi ira voli na nona tamata me yacova mai oqo; ia raica, sa kauti keda mai ko koya ki na veivakabobulataki ena vuku ni noda caka ca kei na itovo vakasisila.

21 Ia ko ni sa kena ivakadinadina edaidai, ni ko Senifi, ko koya ka buli me nodra tui na tamata oqo, ni sa agadreva vakalevu me taura tale na nodra vanua na nona qase, sa rawai kina ena ilawaki kei na ivadi qaseqase nei Leimani na tui, ka a curu ki na dua na veidinadinati kei Senifi na tui, me solia ki ligana me taukena e dua na iwase ni vanua, se na koro ko Liai-Nifai, kei na koro ko Sailomi; kei na vanua vakavolivolita—

22 Ia sa kitaka na ka kece oqo ko koya, me avakamalumalumutaki ira ka vakabobulataki ira kina na tamata oqo. Ia raica, eda sa soli ivakacavacava tiko oqo vua na nodra tui na Leimanaiti, na kena levu me veimama ni noda sila, kei na noda bali, kei na noda veimataqali sila kecega, kei na veimama ni kena tubu na noda qele ni manumanu lalai kei na qele ni manumanu lelevu; ia sa taura vei keda na tui ni Leimanaiti na veimama ni ka kece eda rawata se taukena, se na noda bula.

23 Ia oqo, e sega li ni rui dredre oqo me colati? E sega li ni rui sivia na noda vakararawataki? Ia raica, sai koya oqo na vu ni noda rarawa tiko.

24 Io, au sa kaya vei kemuni, sa levu dina na vuna eda sa rarawa kina; ni raica, era lewe vica li na wekada era sa vakamatei, ka sa tawayaga na dave ni nodra dra, ka vu kece oqo mai na caka cala.

25 Kevaka me ra a sega ni lutu ki na talaidredre ko ira na tamata oqo ke sa sega ni laiva na Turaga me yaco vei ira na ca levu oqo. Ia raica, era sa sega ni via vakarorogo ki na nona vosa; a sa tubu na veileti ena kedra maliwa, ka sa yaco kina na nodra vakadave dra vakaira.

26 Ia era sa vakamatea e dua na aparofita ni Turaga; io, na tamata digitaki ni Kalou, ka a tukuna vei ira na nodra caka ca kei na nodra itovo vakasisila, ka a parofisaitaka e vuqa na ka ena yaco mai, io, na nona lako mai na Karisito.

27 Ena vuku ni a kaya vei ira ni sai Karisito na aKalou, ka Tama ni ka kecega, ka kaya ni na vaka na tamata ka bucui koya na tamata ka a buli mai na ivakatekivu, se ena dua tale na kena vosa, e kaya o koya ni sa buli na tamata me ucuya na cKalou, ia ena lako sobu mai na Kalou vei ira na luve ni tamata, ka taurivaka na yago vaka lewe kei na dra, ka lako voli e delai vuravura—

28 Ia oqo, ni sa tukuna na veika oqori, era sa vakamatei koya; ka ra sa kitaka e vuqa tale na ka sa tau kina vei ira na cudru ni Kalou. O koya gona, o cei me kurabui ni ra tiko vakabobula, ka ra yaviti ena rarawa levu e vuqa?

29 Ia raica, a sa kaya na Turaga: Au na sega ni avukei ira na noqu tamata ena siga ni nodra talaidredre; ia au na latia na nodra sala me ra kakua kina ni sautu; ia na veika era sa kitaka ena itatarabe e matadra.

30 Sa kaya talega: Kevaka era sa kaburaka na adukadukali na noqu tamata, era na btamusuka na qana ena covulaca; ka na gaga sara vei ira.

31 A sa kaya talega: Kevaka era sa kaburaka na dukadukali na noqu tamata era na tamusuka ena acava ni tokalau, ka na kauta vata mai na veivakarusai totolo sara.

32 Ia oqo, raica, sa yaco dina na vosa ni yalayala ni Turaga, ka ko ni sa yaviti ka vakararawataki.

33 Ia kevaka ko ni na avuki vua na Turaga ena lomamuni taucoko, ka vakararavi Vua, ka qaravi Koya ena nomuni vakasama taucoko, kevaka ko ni sa kitaka oqo, ena sereki kemuni ko Koya mai na veivakabobulataki me vaka na nona lewa kei na nona gagadre.