O Le Tusi a Ominae

1 Faauta, sa oo ina poloaiina a’u, o Ominae, e lo’u tamā, o Iaroma, e tatau ona ou tusi lava i luga o nei papatusi, e faasaoina ai lo matou gafa—

2 O le mea lea, i o’u aso, ou te manao ia outou iloa sa tele ona ou tau ma le pelu e faasao ai lo’u nuu, o sa Nifaē, mai le pa’u’ū atu i lima o o latou fili, o sa Lamanā. Ae faauta, o a’u lava ia o se tagata amioleaga, ma sa ou lē tausia tulafono ma poloaiga a le Alii e pei ona sa tatau ai ia te a’u ona faia.

3 Ma sa oo ina mavae atu le lua selau fitu sefulu ma le ono o tausaga, ma sa tele vaitau o le filemu sa matou maua; ma sa tele foi vaitau o taua matautia ma le faamasaatoto sa oo mai ia te i matou. Ioe, ma i se aotelega, ua mavae atu le lua selau valu sefulu ma le lua o tausaga, ma sa ’ou tausia nei papatusi e tusa ma ^apoloaiga a o’u tamā; ma ua ou tuu atu i latou i lo’u atalii o Emarona. Ma ua ou faai’u a’u tusitusiga.

4 Ma o lenei, o a’u, o Emarona, ou te tusia mea ua ou tusia, ua itiiti lava, i le tusi a lo’u tamā.

5 Faauta, sa oo ina mavae atu le tolu selau ma le lua sefulu o tausaga, ma ua ^afaaumatia le vaega aupito sili ona amioleaga o sa Nifaē.

6 Ona e lē tuua e le Alii, ina ua uma ona ia ta’ita’i ese o i latou mai le laueleele o Ierusalema ma tausi ma faasaoina i latou mai le pa’u’ū atu i lima o o latou fili, ioe, na te lē tuua ia lē faamaonia upu na fetalai mai e ia i o matou tamā, e faapea: E tusa ai ma lo outou lē tausia o a’u poloaiga o le a outou lē manuia i le laueleele.

7 O le mea lea, na asiasi mai ai le Alii ia te i latou i se faamasinoga tele; ae ui i lea, sa faasaoina e ia e amiotonu ina ia lē fano i latou, ae sa laveai e ia i latou mai lima o o latou fili.

8 Ma sa oo ina ou tuu atu papatusi i lo’u uso o Kemiso.

9 O lenei, o a’u o Kemiso, ou te tusia mea itiiti ua ou tusia, i le tusi e tasi faatasi ma lo’u uso; aua faauta, sa ou vaai i mea mulimuli na tusia e ia, ma sa tusia e ia i lona lava lima; ma sa tusia e ia i le aso lava na tuu mai ai e ia papatusi ia te a’u. Ma o le ala lenei ua matou tausia ai talafaamaumau, ona ua tusa lea ala ma poloaiga a o matou tamā. Ma ua ou faaiu a’u tusitusiga.

10 Faauta, o a’u, o Apinatome, o le atalii o Kemiso. Faauta, sa oo ina ou vaai i taua ma finauga e tele i le va o lo’u nuu, o sa Nifaē, ma sa Lamanā; ma o a’u, sa ou fasiotia i la’u lava pelu, ola o le toatele o sa Lamanā i le puipuiga o o’u uso.

11 Ma faauta, o le talafaamaumau o lenei nuu ua togitogia i luga o papatusi ua tausia e tupu, e tusa ma nofoaiga o tupu; ma ou te lē iloa se faaaliga vaganā ai ua tusia, po o se valoaga; o le mea lea, o mea ua tusia ua lava ia. Ma ua ou faaiu a’u tusitusiga.

12 Faauta, o a’u o Amaleki, le atalii o Apinatome. Faauta, ou te tautala atu lava ia te outou e uiga ia Mosaea, o lē sa avea ma tupu i luga o le laueleele o Sara’emila; auā faauta, ina ua lapataia o ia e le Alii e tatau ona sola ese atu o ia mai le laueleele o ^aNifae, ma e tatau foi i le toatele o e e fia faalogo i le siufofoga o le Alii ona ^eo ese atu mai le laueleele faatasi ma ia, i le vao—

13 Ma sa oo ina faia e ia e pei ona poloaiina ai o ia e le Alii. Ma sa latou o ese atu mai le laueleele i le vao, le toatele lea o i latou o e sa fia faalogo i le siufofoga o le Alii; ma sa taitaiina i latou i talaiga ma valoaga e tele. Ma sa tima’ia i latou e lē aunoa i le afioga a le Atua; ma sa taitaiina i latou i le vao i le mana o lona aao, seia oo ina latou o ifo i le laueleele ua ta’ua o le laueleele o Sara’emila.

14 Ma sa latou mauaina ni tagata, o e sa ta’ua o le nuu o ^aSara’emila. O lenei, sa olioli tele le nuu o Sara’emila; ma sa olioli tele foi Sara’emila, ona ua auina mai e le Alii le nuu o Mosaea ma ^epapatusi apamemea sa i ai le talafaamaumau o tagata Iutaia.

15 Faauta, sa oo ina iloa e Mosaea o ^atagata o Sara’emila na o ese mai Ierusalema i le taimi na ave faatagataotaua ai ^eSetekaia, le tupu o Iuta, i Papelonia.

16 Ma sa latou malaga i le vao, ma aumai e le aao o le Alii i luga o vai e tele, i le laueleele na maua i ai i latou e Mosaea; ma o iina sa latou nonofo ai mai lena taimi ma agai atu i le lumanai.

17 Ma i le taimi na maua ai i latou e Mosaea, sa matuā toatele lava i latou. Ae ui i lea, e tele taua ma finauga matautia sa feagai ma i latou, ma sa latou pa’u’ū i le pelu mai lea taimi i lea taimi; ma sa lē toe manino la latou gagana; ma sa latou lē aumaia faatasi ma i latou ni ^atalafaamaumau; ma sa latou teena le i ai o lo latou Foafoa; ma sa lē mafai ona malamalama Mosaea, po o le nuu o Mosaea, ia te i latou.

18 Ae sa oo ina faatonu e Mosaea ia aoaoina i latou i lana gagana. Ma sa oo ina ua uma ona aoaoina o i latou i le gagana a Mosaea, sa faamatala mai e Sara’emila le gafa o ona tamā, e tusa ma lona manatua; ma sa tusia i latou, ae lē o i papatusi nei.

19 Ma sa oo ina ^anonofo faatasi le nuu o Sara’emila, ma le nuu o Mosaea; ma sa tofia ^eMosaea e avea ma o latou tupu.

20 Ma sa oo i aso o Mosaea, na aumai ai ia te ia se ma’a tele sa i ai ni togitogiga i ona luga; ma sa ^afaaliliu e ia togitogiga i le meaalofa ma le mana o le Atua.

21 Ma sa ta’u mai i togitogiga se tala o se tagata e igoa ia ^aKorianetuma, ma tagata o lona nuu ua fasiotia. Ma sa maua Korianetuma e le nuu o Sara’emila; ma sa mau o ia faatasi ma i latou mo le va o le iva masina.

22 Sa ta’u mai ai foi ni upu itiiti e uiga i ona tamā. Ma o ona ulua’i matua sa o ese mai le ^a’olo, i le taimi na ^efaaeseese ai e le Alii le gagana a tagata; ma sa oo ina pa’ū ifo i o latou luga le sauā mamafa o le Alii e tusa ma ana faamasinoga, ua tonu; ma o o latou ⁱivi ua fola ma salalau solo i le laueleele i mātū.

23 Faauta, o a’u, o Amaleki, na ou fanau i aso o Mosaea; ma sa ou ola e vaai i lona maliu; ma o ^aPeniamina, lona atalii, ua nofotupu e suitulaga ia te ia.

24 Ma faauta, sa ou vaaia, i aso o le tupu o Peniamina, se taua tele ma le faamasaatoto tele i le va o sa Nifaē ma sa Lamanā. Ae faauta, sa malolosi tele atu sa Nifaē ia te i latou; ioe, sa oo ina tutuli ese i latou e le tupu o Peniamina mai le laueleele o Sara’emila.

25 Ma sa oo ina faasolo ina ’ou toeaina; ma, ona sa leai sa’u fanau, ma ona ua ou iloa o le tupu o ^aPeniamina o se tagata amiotonu i luma o le Alii, o le mea lea, o le a ou ^eavatu ai nei papatusi i luga ia te ia, ma apoapoai atu i tagata uma ia o mai i le Atua, le Paia e Toatasi o Isaraelu, ma talitonu i valoaga, ma faaaliga, ma auaunaga a agelu, ma le meaalofa o le tautala i gagana, ma le meaalofa o le faaliliuina o gagana, ma mea uma lava ua ⁱlelei; ona ua leai se mea lelei vaganā ai ua sau mai le Alii: ma o le mea e leaga ua sau mai i le tiapolo.

26 Ma o lenei, o’u uso pele e, ou te manao ia outou ^ao mai ia Keriso, o lē o le Paia e Toatasi o Isaraelu, ma taumamafa i lana faaolataga, ma le mana o lana togiola. Ioe, o mai ia te ia, ma ^eofo atu o outou agaga atoa e fai ma ⁱtaulaga ia te ia, ma ^oanapopogi ma tatalo pea e lē aunoa, ma tutumau e oo i le gataaga; ma e pei ona soifua le Alii, o le a faaolaina outou.

27 Ma o lenei, ou te fia tautala atu lava e uiga i se vaega faapitoa o tagata o e na o a’e i le vao e foi atu i le laueleele o Nifae; ona sa i ai se vaega toatele o tagata o e sa mananao e fia maua le laueleele o lo latou tofi.

28 O le mea lea, sa latou o a’e ai i le vao. Ma ona o lo latou ta’ita’i o se tagata malosi ma mata’utia tele, ma o se tagata ua maaa, o le mea lea na faatupu ai e ia se finauga i totonu o i latou; ma sa ^afasiotia uma i latou i le vao, vaganā ai le to’alimagafulu, ma sa latou toe foi mai i le laueleele o Sara’emila.

29 Ma sa oo ina latou ave foi ni isi sa matuā toatele atu, ma toe alu la latou malaga i le vao.

30 Ma o a’u, o Amaleki, sa i ai so’u uso sa malaga atu foi faatasi ma i latou; ma talu mai lena taimi ua ou lē iloa se mea e uiga ia te i latou. Ma ua lata ona ou taoto ifo i lo’u tuugamau; ma ua faatumulia ^anei papatusi. Ma ua ou faaiu i a’u upu.