Lix Hu laj Omni

1 K’ehomaq reetal, kik’ulman naq laa’in, aj Omni, rik’in naq taqlanb’ilin xb’aan lin yuwa’, aj Jarom, naq tintz’iib’aq ka’ch’inaq chiruheb’ li perel ch’iich’ a’in, re xk’uulankil li resilal li qaxe’toonil—

2 Jo’kan ut, chiru lin kutan, nawaj raj naq teenaw naq kinpleetik chi naab’al rik’in li yok’leb’ ch’iich’ re xkolb’al rix lin tenamit, eb’ laj Nefita, re naq ink’a’ te’t’ane’q sa’ ruq’eb’ li xik’ neke’ilok reheb’, a’eb’ laj Lamanita. A’ut k’ehomaq reetal, injunes laa’in jun winq aj maak, ut moko kinpaab’ ta lix k’uub’anb’il aatin ut lix taqlahom li Qaawa’ jo’ tento raj kinb’aanu.

3 Ut kik’ulman naq ak numenaq chaq wiib’ cient rik’in waqlaju xkaak’al chihab’, ut ke’wan qik’in k’iila q’ehil re tuqtuukilal, ut ke’wan qik’in k’iila q’ehil re rahil pleet ut hoyok kik’. Relik chi yaal ut, ak ke’nume’ wiib’ cient rik’in wiib’ ro’k’aal chihab’, ut kink’ameb’ li perel ch’iich’ a’in jo’ chanru lix ^ataqlahomeb’ lin yuwa’, ut kinq’axtesi re laj Amaron li walal. Ut nink’e xraqik.

4 Ut anajwan laa’in, aj Amaron, nintz’iib’a jo’ k’ihal li nintz’iib’a, li moko k’i ta, sa’ lix hu lin yuwa’.

5 K’ehomaq reetal, kik’ulman naq ak ke’nume’ oxib’ cient rik’in junmay chihab’, ut ^ake’sache’ li jun raqal q’axaleb’ aj maak reheb’ laj Nefita.

6 Xb’aan naq li Qaawa’ ink’a’ kixkanab’, chirix naq kixb’eresiheb’ chaq chi elk sa’ li ch’och’ Jerusalen, ut kixk’uulaheb’ ut kixkoleb’ rix re naq ink’a’ ke’t’ane’ sa’ ruq’eb’ li xik’ neke’ilok reheb’, relik chi yaal, ink’a’ kiraj xkanab’ankil naq ink’a’ tak’ute’q naq yaal li aatin li kixye reheb’ li qayuwa’, naq kixye naq: A’ yaal jo’ naq ink’a’ teepaab’ lin taqlahom, ink’a’ tex’usaaq sa’ li ch’och’.

7 Jo’kan ut, li Qaawa’ kirula’aniheb’ rik’in nimla raqb’a-aatin; a’b’anan kixkol xyu’ameb’ li tiikeb’ xch’ool re naq ink’a’ te’oso’q; kixkoleb’ b’an sa’ ruq’eb’ li xik’ neke’ilok reheb’.

8 Ut kik’ulman naq laa’in kinq’axtesiheb’ li perel ch’iich’ chiru li wiitz’in aj Kemix.

9 Anajwan laa’in, aj Kemix, nintz’iib’a xka’ch’inal li k’a re ru nintz’iib’a, sa’ rech huhil rik’in li was, xb’aan naq k’ehomaq reetal, kiwil roso’jik li kixtz’iib’a, ut kixtz’iib’a rik’in tz’aqal li ruq’, ut kixtz’iib’a sa’ li kutan naq kixq’axtesi chiwu. Ut jo’ka’in naq naqak’ameb’ li tz’iib’anb’il esil, xb’aan naq a’an jo’ chanru lix taqlahomeb’ li qayuwa’. Ut nink’e xraqik.

10 K’ehomaq reetal, laa’in, aj Abinadom, ralalin laj Kemix. K’ehomaq reetal, kik’ulman naq kiwil naab’al li pleet ut li wech’ok-ib’ ke’wan wi’ intenamit, a’eb’ laj Nefita, rik’ineb’ laj Lamanita; ut laa’in, rik’in tz’aqal inyok’leb’ ch’iich’, kiwisi xyu’ameb’ naab’al reheb’ laj Lamanita sa’ xkolb’aleb’ li was wiitz’in.

11 Ut k’ehomaq reetal, li tz’iib’anb’il esil chirix li tenamit a’in wan chi tz’iib’anb’il chiruheb’ li perel ch’iich’ li k’amb’ileb’ xb’aaneb’ li rey, jo’ chanru li jar tasal tenamit; ut maajun k’utb’esinb’il na’leb’ innawom, ka’ajwi’ li ak tz’iib’anb’il, chi moko profeetil aatin; jo’kan ut, ak tz’iib’anb’il li b’arwan tz’aqal. Ut nink’e xraqik.

12 K’ehomaq reetal, laa’in aj Amaleki, ralal laj Abinadom. K’ehomaq reetal, texwaatina ka’ch’inaq chirix laj Mosiah, li kixaqab’aak choq’ rey sa’ xb’een li ch’och’ Tzarahemla; xb’aan naq k’ehomaq reetal, rik’in naq tijb’il a’an xb’aan li Qaawa’ naq taa’eeleliq chaq sa’ li ch’och’ ^aNefi, ut jo’ k’ihaleb’ li te’ab’inq chiru lix yaab’ xkux li Qaawa’ ^bte’elq ajwi’ chaq sa’ li ch’och’ rochb’een, chiru li yamyookil ch’och’—

13 Ut kik’ulman naq kixb’aanu jo’ chanru taqlanb’il chaq xb’aan li Qaawa’. Ut ke’el chaq sa’ li ch’och’ chiru li yamyookil ch’och’, jo’ k’ihal li te’ab’inq chiru lix yaab’ xkux li Qaawa’; ut ke’k’ame’ xb’e rik’in k’iila jultikanb’il na’leb’ ut profeetil ch’olob’ank. Ut tijb’ileb’ rajlal xb’aan li raatin li Qaawa’; ut ke’k’ame’ xb’e xb’aan lix wankil lix tel, chiru li yamyookil ch’och’, toj reetal naq ke’kub’e sa’ jun li ch’och’, a’an li ch’och’ Tzarahemla nayeeman re.

14 Ut ke’xtaw jun li tenamit, a’aneb’ lix tenamit laj ^aTzarahemla yeeb’ileb’ re. Anajwan, kiwan nimla saho’k ch’oolej sa’ xyanq lix tenamit laj Tzarahemla, ut jo’kan ajwi’ laj Tzarahemla kisaho’ xch’ool chi numtajenaq, xb’aan naq li Qaawa’ kixtaqla chaq lix tenamit laj Mosiah rik’ineb’ li ^bperel ch’iich’ bronce wan wi’ li tz’iib’anb’il esil chirixeb’ laj Judio.

15 K’ehomaq reetal, kik’ulman naq laj Mosiah kixk’e reetal naq eb’ lix ^atenamit laj Tzarahemla ke’el chaq Jerusalen sa’ li kutan naq laj ^bSedekias, li rey sa’ xb’een Juda, kik’ame’ choq’ preex toj Babilonia.

16 Ut eb’ a’an ke’b’eek chaq chiru li yamyookil ch’och’, ut ke’k’ame’ xb’aan li ruq’ li Qaawa’ chi junpak’al li k’iila ha’, toj sa’ li ch’och’ li kixtaweb’ wi’ laj Mosiah; ut ke’wan chaq aran chirix li kutan a’an.

17 Ut sa’ li kutan naq laj Mosiah kixtaweb’, q’axal ke’k’ihan chaq. A’b’anan wanjenaq chaq k’iila pleet ut rahil wech’ok-ib’ ke’wan wi’ chaq, ut ke’t’ane’ chaq chi yalaq jo’q’e xb’aan li yok’leb’ ch’iich’; ut ak po’jenaq li raatinob’aaleb’; ut maajun ^atz’iib’anb’il esil ke’xk’am chaq rik’ineb’; ut neke’xtz’eqtaana naq wan aj Yo’ob’tesihom reheb’, ut chi moko laj Mosiah chi moko lix tenamit laj Mosiah ke’ru chixtawb’aleb’ ru.

18 A’b’an kik’ulman naq laj Mosiah kixtaqla naq te’tzole’q sa’ li raatinob’aal. Ut kik’ulman naq chirix naq ke’tzole’ sa’ li raatinob’aal laj Mosiah, laj Tzarahemla kixk’e jun resilal lix xe’toonil, jo’ chanru li jultik re; ut tz’iib’anb’ileb’ a’an, a’b’an moko chiruheb’ ta li perel ch’iich’ a’in.

19 Ut kik’ulman naq lix tenamiteb’ laj Tzarahemla ut laj Mosiah ^ake’xjunaji rib’eb’; ut laj ^bMosiah kixaqab’aak re taawanq choq’ xreyeb’.

20 Ut kik’ulman naq sa’ lix kutankil laj Mosiah, wan jun li nimla pek kik’ame’ rik’in, wan k’a’ru tz’iib’anb’il chiru; ut a’an ^akixk’ut xyaalalil li tz’iib’anb’il rik’in lix maatan ut lix wankilal li Dios.

21 Ut naxk’e resil jun aj ^aKoriantumr, ut eb’ li kamsinb’ileb’ re lix tenamit. Ut laj Koriantumr kitawe’ chaq xb’aan lix tenamit laj Tzarahemla, ut a’an kiwan chaq sa’ xyanqeb’ chiru xnumik b’eleeb’ po.

22 Yeeb’il ajwi’ junjunq aatin chirixeb’ lix yuwa’. Ut li xb’een xna’ xyuwa’ ke’el chaq sa’ li ^anajt xteramil kab’l, sa’ li kutan naq li Qaawa’ ^bkixpo’eb’ li raatinob’aal li tenamit; ut lix kawilal li Qaawa’ kit’ane’ sa’ xb’eeneb’ jo’ chanruheb’ lix raqb’a-aatin a’an, li tiikeb’ ru; ut lix ^cb’aqeleb’ wankeb’ chi jek’inb’il sa’ li ch’och’ sa’ xjayal lix nim li saq’e.

23 K’ehomaq reetal, laa’in, aj Amaleki, kinyo’la sa’ xkutankil laj Mosiah; ut toj yo’yookin chirilb’al lix kamik; ut laj ^aBenjamin li ralal na’awa’b’ejin sa’ xna’aj.

24 Ut k’ehomaq reetal, wilom, sa’ xkutankil li rey aj Benjamin, jun li rahil pleet ut naab’al li hoyok kik’ ke’wan wi’ laj Nefita rik’ineb’ laj Lamanita. A’ut k’ehomaq reetal, eb’ laj Nefita k’a’jo’ naq ke’usa sa’ xb’eeneb’; relik chi yaal, jo’kan naq li rey aj Benjamin kiralinasiheb’ chaq sa’ li ch’och’ Tzarahemla.

25 Ut kik’ulman naq kin’ok chi tixk; ut rik’in naq maak’a’ wiyajil, ut innawom naq li rey aj ^aBenjamin a’an jun winq tiik xna’leb’ chiru li Qaawa’, jo’kan naq ^btinq’axtesiheb’ li perel ch’iich’ a’in re a’an, ut nawelaji chiruheb’ chixjunil li winq naq te’chalq rik’in li Dios, lix Santil Dios laj Israel, ut te’xpaab’ li profeetil ch’olob’ank, ut li k’utb’esinb’il na’leb’, ut lix k’anjeleb’ li anjel, ut li maatan re aatinak rik’in jalanil aatinob’aal, ut li maatan re xk’utb’al xyaalalil li aatinob’aal, ut chixjunil li k’a’aq re ru ^cchaab’il; xb’aan naq maak’a’ k’a’ru chaab’il wan, ka’ajwi’ li rik’in li Qaawa’ nachal chaq: ut li k’a’ru ink’a’ us rik’in laj tza nachal chaq.

26 Ut anajwan, ex was wiitz’in raarookex inb’aan, nawaj raj naq ^atexchalq rik’in li Kristo, a’an lix Santil Dios laj Israel, ut textz’aqonq sa’ lix kolb’a-ib’, ut lix wankilal li tojb’al-ix xb’aan. Relik chi yaal, chalqex rik’in, ut ^bq’axtesihomaq anchal eeraam choq’ ^cmayej chiru, ut chexkanaaq sa’ li ^dkuyuk sa’, ut tijok, ut chexkuyuq toj sa’ roso’jik; ut jo’ naq yo’yo li Qaawa’ texkole’q.

27 Ut anajwan nawaj aatinak ka’ch’inaq chirix jun siireb’ li koxe’taqe’q chiru li yamyookil ch’och’ re te’sutq’iiq sa’ li ch’och’ Nefi; xb’aan naq nim rajlankileb’ li ke’ajok re reechaninkil lix ch’och’il li reechanihomeb’.

28 Jo’kan ut, koxe’taqe’q chiru li yamyookil ch’och’. Ut laj jolomihom reheb’ a’an jun li winq kaw rib’ ut nim xmetz’ew, ut jun winq jip xk’a’uxl, jo’kan naq kixtikib’ jun li wech’ok-ib’ sa’ xyanqeb’, ut ^ake’kamsiik chixjunileb’, ka’ajwi’ lajeeb’ roxk’aal ink’a’, sa’ li yamyookil ch’och’, ut ke’sutq’i wi’chik sa’ li ch’och’ Tzarahemla.

29 Ut kik’ulman naq wankeb’ chik li ke’xk’am chirixeb’, nim b’ayaq rajlankileb’, ut ke’xchap wi’chik xb’e chiru li yamyookil ch’och’.

30 Ut laa’in, aj Amaleki, wan jun li wiitz’in li xko’o ajwi’ rik’ineb’; ut moko innawom ta chik chirixeb’. Ut ok we chi yokob’aak sa’ lin muqleb’aal; ut nujenaqeb’ ^ali perel ch’iich’ a’in. Ut nink’e xraqik li waatin.