Te Puka a Omoni

1. I na, kua akaueia au ko Omoni e toku metua ra ko Iaroma, kia tata au i tetai manga tuatua meangiti ki runga teianei au papa, kia tataia to matou akapapaanga.

2. E teianei, te inangaro nei au kia kite katoa kotou e, kua tamaki atu au i toku nei puke rā, ma te koke kia akaora i toku iti tangata ra i te ngati Niphai, kia kore ratou e topa i te rima o to ratou ra au enemi, i te ngati Lamana. I na, e tangata kino au, e kare oki au i akono i te au ture e te au akaueanga a te Atu ra tei tau iaku kia akono.

3. E ope akera e rua anere e itu ngauru ma ono mataiti, kua au matou no te au mataiti e manganui, kua tamaki maata oki matou e te akamaringi toto i te au mataiti e manganui. I na, e kua ope akera e rua anere e varu ngauru ma rua mataiti, e i akono rai au i teianei au papa mei tei tau i te akaueanga a toku ra metua; e kua oronga atu au i teianei au papa ki taku tamaiti kia Amarona.

4. E teianei, e tata katoa au ko Amarona i te au mea taku e tata ki roto i te puka a toku metua, kare oki e maata te reira.

5. I na, e ope akera e toru anere e rua ngauru mataiti, e kua akapouia te aronga kino roa atu i roto i te ngati Niphai ra.

6. Kua arataki mai te Atua ia ratou mei te enua maira mei Ierusalema, e kua tiaki, e kua akaora oki aia ia ratou i te rima o to ratou ra au enemi, kare aia i akatika kia kore e tupu tana au tuatua, tana i tuatua mai ki to ratou ra au metua, i te na ko anga mai e, kia kore kotou e akono i taku au akaueanga, kare rava kotou e manuia i runga i te enua nei.

7. No reira, kua atoro mai te Atu ia ratou i te utunga maata; kua akaora ra aia i te aronga tuatua tika kia kore ratou e mate, e kua akaora oki aia ia ratou i te rima o to ratou au enemi.

8. E kua oronga atu au i te papa ki toku ra taeake kia Kemiti.

9. E teianei, e tata iti au, ko Kemiti, i taku e tata, ki roto i taua puka rai a toku taeake; i na oki, kua kite au i te tuatua openga tana i tata, e kua tataia oki te reira e tona uaorai rima, e kua tata oki aia i te reira i te rā i oronga mai ei aia i teianei au papa kiaku ra. Kua pera matou i te akono i te akapapaanga, e kua tau oki te reira i te au akaueanga a to matou ra ai metua. Otira ua ïa.

10. I na, e tamaiti au, ko Abinadoma, na Kemiti ra. I na, kua kite au i te au tamaki e te māro e manganui i rotopu i toku ra iti tangata, koia oki te ngati Niphai, e te ngati Lamana; e kua ta oki au i te au tangata e manganui o te ngati Lamana i taku uaorai koke, i te akaoraanga i toku ra au taeake.

11. E i na, kua kotikotiia te akapapaanga o teianei iti tangata ki runga i te au papa tei akonoia e te ui ariki ra, i tera uki i tera uki; kare oki au i kite i tetai eeuanga e te totou mari ra, tei oti i te tataia; e tenana, kua rava tei tataia. Otira ua ïa.

12. I na, ko Amaleki au, te tamaiti na Abinadoma. I na, e tuatua katoa au kia kotou ia Mosaia, ko tei riro ei ariki i runga i te enua ra ko Zarahemela; i na oki, i ako mai te Atua kiaia kia akaruke atura aia, e te au tangata katoa e akarongo i te reo o te Atu ra, i te enua ra ia Niphai, e kia aere ki te metepara ra.

13. E kua akapera aia mei tei tau i ta te Atu i akaue mai kiaia. E kua aere atura ratou, ko te aronga i akarongo i te reo o te Atu, ki te metepara ra; kua aratakiia oki ratou ma te ako e te totou e manganui; e kua ako putuputuia ratou e te tuatua a te Atu; e kua aratakiia oki ratou e te mana o tona ra rima na roto i te metepara, e tae rava atu ki raro i te enua i tuatuaia ko te enua o Zarahemela.

14. Kua kite iora ratou i tetai iti tangata i reira i tuatuaia ko te iti tangata o Zarahemela. E teianei, kua mataora maata te au tangata o Zarahemela, e kua rekareka maata oki, i te mea i tono mai ei te Atu i te au tangata a Mosaia ma te au papa veo tei roto oki i te reira te akapapaanga o te ngati Iuda ra.

15. E i na, kite akera Mosaia e, no Ierusalema mai te au tangata o Zarahemela, e kua aere mai ratou i te tuatau i apai tuikaaia atu ei a Zedekia ariki no Iuda, ki Babulonia ra.

16. I aere mai ratou na roto i te metepara, e i aratakiia oki ratou e te rima o te Atu na runga i te moana maata e tae rava atu ki te enua i kiteaiaʼi ratou e Mosaia, e kua noo atu ratou ki reira mei reira e tae mai ki teia tuatau.

17. E i te tuatau i kite ei a Mosaia ia ratou ra kua maata ratou. Ina ra, kua maata ta ratou au tamaki e te taumaro kino ra, e kua mate oki ratou i te koke i tera tuatau i tera tuatau; kua akatukeia oki to ratou reo, e kare a ratou akapapaanga i apainaia mai; kua uuna ratou i Tei Anga ia ratou, e kare a Mosaia e te au tangata oki a Mosaia, i marama i to ratou reo.

18. Kua akaue atura Mosaia kia apiiia ratou i tona ra reo. E oti akera ratou i te apiiia ki te reo o Mosaia, kua akakite maira a Zarahemela i te akapapaanga o tona ra ai tupuna, mei tei tau i tona kite, e kua tataia oki te reira, eiaa ra ki runga i teianei au papa.

19. Taokotai iora te au tangata o Zarahemela e te au tangata o Mosaia, e kua ikiia a Mosaia ei ariki no ratou.

20. I te tuatau o Mosaia, i apainaia mai ei tetai toka maata kiaia, tei kotikotiia ki te tuatua; e na roto i te mana o te Atua i raukaʼi iaia te tatau i te tuatua i kotikotiia ra.

21. Kua akapapa mai te reira i te tuatua no tetai tangata ko Korianetuma, e te mate o tona iti tangata. I kiteiaʼi a Korianetuma e te au tangata o Zarahemela; e i noo mai oki aia kia ratou i nga marama e iva.

22. Kua akakite katoa mai te reira i tetai manga tuatua meangiti no tona ra ai metua. I te tuatau i akatuke ei te Atu i te au reo o te tangata ra, i aere mai ei tona nga metua mua mei te are teitei maira; e kua tae mai ki runga ia ratou te utunga o te Atu mei tei tau i tana ra tuatua tika; e te vai aere ua nei to ratou au ivi i runga i te enua i te pae i apatokerau ra.

23. I na, kua anau mai au i te tuatau o Mosaia, e kua kite oki au i tona mateanga, e kua tutara tana tamaiti ko Beniamina ei mono nona.

24. E i na, i te au rā o te ariki ra ko Beniamina, i kite ei au i tetai tamaki maata e te akamaringi toto i rotopu i te ngati Niphai e te ngati Lamana. Ina ra, kua ririnui ake te ngati Niphai, koia ïa, kua tuaru atura te ariki ra ko Beniamina i te ngati Lamana ki vao i te enua ra ko Zarahemela.

25. E kua pakari au, e kare oki aku tamariki, e no reira i oronga atu ei au i teianei au papa ki te ariki ra kia Beniamina, no te mea kua kite au e, e tangata tuatua tika aia i mua i te Atu ra, e te kimi atu nei au i te au tangata katoatoa kia aere mai ki te Atua, i Tei Tapu i Iseraela nei, kia akarongo i te totou, e te eeuanga, e te matuapuru anga o te au angela, e i te tuatuaanga i te au reo ke ke, e i te urianga i te au reo ke ke, e i te au mea memeitaki katoatoa ra; kare oki e mea meitaki, mari ra, no ko mai ïa i te Atu ra; e no ko mai i te tiaporo, te au mea kino ravarai.

26. E teianei, e aku au taeake akaperepere, te inangaro nei au kia aere mai kotou ki te Mesia, koia Tei Tapu i Iseraela nei, e ki tona ora e te mana o tona akaoraanga. I na, e aere mai kiaia, e akaatinga atu i to kotou ngakau katoa kiaia; e pure ma te akakore anga kai, e akono ua atu rai kia tae ki te openga; e te ora ra te Atu; ka ora ia kotou.

27. E teianei, e tuatua au i tetai manga i tetai aronga toko iti ua tei aere atu na te metepara i te okianga atu ki te enua ra ko Niphai; e manganui oki te tangata i inangaro kia rauka akaou mai to ratou enua ipukarea ra.

28. I aere atu ei ratou ki runga i te metepara ra. E to ratou arataki, e tangata maroiroi e te ririnui, e kua ketaketa oki tona ngakau, i akatupu ei aia i te marō i rotopu ia ratou, e kua taiaia ratou katoatoa, mari ra, e rima ngauru tangata, e kua oki akaou maira ratou ki te enua ko Zarahemela.

29. Kua arataki akaou atura ratou i tetai pupu tangata, e oki akaou ratou ki te metepara.

30. E tetai taeake noku, ko Amuleki, kua aere katoa aia, e kare atura au i kite akaou ia ratou. Kua vaitata au i te mate, e kua ki teianei au papa i te tuatua. Te akaoti atu nei au i taku tuatua.