Na iVakadinadina ni Lewe Tolu

Mo ni kila na veimatanitu, veimataqali, duivosavosa kei na tamata kecega, ka na yaco yani vei kemuni na cakacaka oqo: Ni keitou, sa raica na peleti ka tu kina na itukutuku, ena vuku ni loloma soli wale ni Kalou na Tamada, kei na neitou Turaga ko Jisu Karisito, ka sa ikoya na itukutuku me baleti ira na tamata i Nifai, kei ira talega na Leimanaiti, na wekadra, kei ira talega na tamata i Jereti, ka ra a lako mai na vale cecere sa tukuni oti. Ia, keitou sa kila talega ni ra sa vakadewataki oti ena isolisoli kei na kaukauwa ni Kalou, me vaka ni keitou a rogoca na domona ni a tukuna vei keitou; o koya keitou sa kila deivaki sara ni sa cakacaka dina oqo. Ia, keitou vakadinadinataka talega ni keitou sa raica na veika sa ceuti tu ena peleti; ka sa vakaraitaki vei keitou ena kaukauwa ni Kalou, ka sega ena kaukauwa vakatamata. Ka keitou sa tukuna ena yalodei, ni a lako sobu mai lomalagi e dua na agilosi ni Kalou, ka kauta mai ka biuta e matai keitou, ka keitou a raica na peleti kei na veika e ceuti tu kina, ia, keitou sa kila ni sa rawa ena loloma soli wale ni Kalou na Tamada, kei na neitou Turaga ko Jisu Karisito, keitou a raica ka vakadinadinataka kina ni sa dina na veika oqo. Ka sa totoka dina e matai keitou. Ia, sa vakaroti keitou na domo ni Turaga me keitou na qai vakadinadinataka; o koya gona, me keitou talairawarawa kina ki na ivakaro ni Kalou, keitou sa vakadinadinataka na ka kece oqo. Ka keitou sa kila ni kevaka keitou sa yalodina vei Karisito sa na vakasavasavataki na neitou isulu mai na nodra dra na tamata kecega, ka kunei ni sa sega ni tauvi keitou e dua na duka ena itikotiko-ni-veilewai i Karisito, ka keitou na bula vata kei koya mai lomalagi ka tawamudu. Ka me vakarokorokotaki ga na Tamada, kei na Luvena, kei na Yalo Tabu, na Kalou e duabau ga. Emeni.

Oliva Kaudari

Tevita Witima

Matini Erisi