Na Vunau kei na Veiyalayalati

    iWase 

    Wase 1

    Na ivakatakila sa soli vei Josefa Simici na Parofita, ena 1 ni Noveba, 1831, ena dua na nodra koniferedi bibi na italatala qase ni Lotu, a vakayacori e Airame, Oaio. E vuqa sara na ivakatakila sa ciqomi mai vua na Turaga ni bera na gauna oqo, kei na vakasokumuni ni veika kece oqo me sa tabaki vakaivola, ko ya e dua na ulutaga levu ka vakadonui ena koniferedi. Na iwase oqo e tiko kina na nona ikau ni ivunau, veiyalayalati, kei na ivakaro ni Turaga, sa soli ena itabagauna oqo.

    1–7, Na domo ni ivakasala vei ira kecega na tamata; 8–16, Na vuki tani kei na caka ca ena yaco ni bera na iKarua ni Lako Mai; 17–23, Sa kacivi ko Josefa Simici me vakalesuya ki vuravura na dina kei na kaukauwa ni Turaga; 24–33, Na iVola i Momani e sa basika mai ka sa vakaduri na Lotu dina; 34–36, Na vakacegu ena kau tani mai vuravura; 37–39, Vakasaqara na veivakaro oqo.

    Wase 2

    Tauri mai na itukutuku makawa kei Josefa Simici ka tukuna tiko na vosa ni agilosi o Moronai vei Josefa Simici na Parofita, ni a tiko ena loma ni vale nei tamana mai Menijesita, Niu Ioka, ena yakavi bogi ni 21 ni Sepiteba, 1823. Ko Moronai e iotioti ni dua na iyatu balavu ni dau vola itukutuku makawa ka ra a cakava na itukutuku ka sa tu e vuravura edaidai me iVola i Momani. (Vakatauvatana kei na Malakai 4:5–6; vakatalega kina na wase e 27:9; 110:13–16; kei na 128:18.)

    1, Me na vakatakila mai ko Ilaija na matabete; 2–3, Na nodra yalayala na qase ena vakadeitaki ki na lomadra na gone.

    Wase 3

    Na ivakatakila sa soli vei Josefa Simici na Parofita, e Amoni, Penisilivenia, Julai 1828, me baleta na yali ni 116 na draunipepa ni ivola ka vakadewataki mai na itekivu ni iVola i Momani, ka a vakatokai na ivola i Liai. A solia vakavoraki na Parofita ena nona a maroroya tiko, ki vei Matini Erisi, o koya ka mai veiqaravi vakavunivola vakalekaleka ena vakadewataki ni iVola i Momani. A vakatakilai na veika oqo ena Urimi kei na Cumimi. (Raica na wase e 10.)

    1–4, Sa dua na iwavoki tawamudu na nona sala na Turaga; 5–15, Me veivutuni o Josefa Simici de na vakayalia na isolisoli ni vakavakadewa; 16–20, Sa yaco mai na iVola i Momani me ra na vakabulai kina na kawa i Liai.

    Wase 4

    Na veika sa vakatakilai vei Josefa Simici na Parofita me baleti Josefa Simici Levu na tamana, e Amoni, Penisilivenia, Feperueri 1829.

    1–4, Na veiqaravi ena yaloqaqa ena taqomaki ira na italai ni Turaga; 5–6, Na ivakarau Vakalou sa rawa kina me ra lesi ki na cakacaka; 7, Me vakasaqarai matua na veika ni Kalou.

    Wase 5

    Na ivakatakila sa soli vei Josefa Simici na Parofita, e Amoni, Penisilivenia, Maji 1829, ena kerekere nei Matini Erisi.

    1–10, Na itabatamata oqo era na ciqoma na vosa ni Turaga mai vei Josefa Simici; 11–18, E lewe tolu eratou na vakadinadinataka na iVola i Momani; 19–20, Na vosa ni Turaga ena vakadinadinataki me vaka ga ena gauna sa sivi; 21–35, Sa rawa vei Matini Erisi me veivutuni ka dua vei ira na ivakadinadina.

    Wase 6

    Na ivakatakila sa soli vei Josefa Simici na Parofita kei Oliva Kaudari, e Amoni, Penisilivenia, Epereli ni 1829. Sa tekivuna na nona cakacaka vakavunivola ko Oliva Kaudari ena vakadewataki ni iVola i Momani, 7 ni Epereli, 1829. A sa ciqoma oti ko koya e dua na veivakadeitaki vakalou ena dina ni ivakadinadina ni Parofita me baleta na peleti ka volai tu kina na ivolatukutuku ni iVola i Momani. Sa taroga na Turaga ko koya na Parofita ena Urimi kei na Cumimi ka saumi mai me vakaoqo.

    1–6, Ko ira sa cakacaka ena were ni Turaga era na vakabulai; 7–13, Sa sega na isolisoli me uasivi cake mai na isolisoli ni bula tawamudu; 14–27, Sa vakadinadinataki rawa na dina ena kaukauwa ni Yalo Tabu; 28–37, Mo rai vei Karisito, ka caka vinaka tiko ga.

    Wase 7

    Na ivakatakila a soli vei Josefa Simici na Parofita kei Oliva Kaudari, e Amoni, Penisilivenia, Epereli, 1829, ena nodrau a vakataroga ena Urimi kei na Cumimi se sa bula tikoga vakayago ko Joni, na tisaipeli daulomani, se sa mate. Na ivakatakila e ivakadewa ni ivolatukutuku ena kuli ni manumanu mai vei Joni ka vunitaka talega ko koya.

    1–3, Ena bula tiko ko Joni na Daulomani me yacova ni sa lako mai na Turaga; 4–8, Eratou taura tu ko Pita, Jemesa, kei Joni na idola ni kosipeli.

    Wase 8

    Na ivakatakila sa soli yani mai vei Josefa Simici na Parofita kivei Oliva Kaudari, e Amoni, Penisilivenia, Epereli, 1829. Ena gauna e vakadewataki tiko kina na iVola i Momani, o Oliva o koya ka sa tomana tikoga na veiqaravi vakavunivola, ni vola tiko na veika sa tukuna na Parofita, sa gadreva sara me vakaivotavota ena isolisoli ni vakavakadewa. Sa sauma na Turaga na nona vakatakekere ena nona vakadonuya na ivakatakila oqo.

    1–5, Na ivakatakila e yaco mai ena kaukauwa ni Yalo Tabu; 6–12, Na kilai ni veika vuni ni Kalou kei na kaukauwa me vakadewataki kina na itukutuku makawa e yaco mai ena vakabauta.

    Wase 9

    Na ivakatakila sa soli yani mai vei Josefa Simici na Parofita kivei Oliva Kaudari, e Amoni, Penisilivenia, Epereli, 1829. Sa vunauci o Oliva me dau yalovosota ka sa uqeti me vunivola tiko mada ga, ena gauna oqo, ena veika ena cavuta ko daunivakavakadewa, ka kakua ni tovolea me vakavakadewa.

    1–6, E so tale na ivolatukutuku makawa e se bera ni vakadewataki; 7–14, Sa vakadewataki na iVola i Momani ena vakasama kei na veivakadeitaki vakayalo.

    Wase 10

    A ivakatakila sa soli vei Josefa Simici na Parofita, e Amoni, Penisilivenia, ena dua na gauna ena Epereli 1829, e dina ni a rawa ni sa ciqomi oti eso na kena iwase ena vulaikatakata ni 1828. Eke sa tukuna kina na Turaga vei Josefa na veika era sa veisautaka na tamata caka ca ena 116 na draunipepa volai ena liga mai na ivakadewa ni ivola i Liai, ena iVola i Momani. Era a yali na draunipepa volai ena gauna a taura voli kina ko Matini Erisi, o koya ka nuitaki tiko vua na draunipepa. (Raica na ulutaga ni wase e 3.) Na nodra inaki ca me ra waraka ka namaka na vakadewataki tale ni veika ka tu ena veidraunipepa ka butakoci ka me qai vakasewasewani kina ko koya na daunivakadewa ena kena vakaraitaki na duidui levu ka vu mai na veisau. Oqori na inaki ca ka a bucini mai vua na tevoro ka sa kila tu na Turaga mai na gauna sara i Momani, na Nifai dauvolaitukutuku makawa, ena nona vakalekalekataka tiko na itukutuku ena peleti ka sa vakasoqoni tiko mai, e vakaraitaki ena iVola i Momani (raica na Vosa i Momani 1:3–7).

    1–26, Sa vakayavalati ira na tamata ca ko Setani me ra saqata na cakacaka ni Turaga; 27–33, Sa segata ko koya me vakarusa na yalo ni tamata; 34–52, Me na lako na kosipeli vei ira na Leimanaiti kei na veimatanitu kecega mai na iVola i Momani; 53–63, Ena yavutaka na Turaga na Nona Lotu kei na Nona kosipeli ena kedra maliwa na tamata; 64–70, Ena vakasoqoni ira era sa veivutuni ki na Nona Lotu ka na vakabulai ira na talairawarawa.

    Wase 11

    Na ivakatakila sa soli yani mai vei Josefa Simici na Parofita ki vua na tuakana ko Airame Simici, e Amoni, Penisilivenia, Me, 1829. Na ivakatakila oqo a ciqomi mai na Urimi kei na Cumimi me isau ni vakatataro kei na vakatakekere i Josefa. Na iTukutuku Makawa kei Josefa Simici e tukuna ni ivakatakila oqo a ciqomi ni oti na vakalesui mai ni Matabete i Eroni.

    1–6, Era na vakabulai na dautatamusuki ena were ni vaini; 7–14, Vakasaqara na yalomatua, vunautaka na veivutuni, vakabauta na Yalo; 15–22, Muria na ivakaro, ka vulica na vosa ni Turaga; 23–27, Kakua ni cakitaka na yalo ni vakatakila kei na parofisai; 28–30, Ko ira sa vakabauti Karisito era sa yaco me ra luve ni Kalou.

    Wase 12

    Na ivakatakila sa soli yani mai vei Josefa Simici na Parofita kivei Josefa Naiti Levu e Amoni, Penisilivenia, Me, 1829. Ko Josefa Naiti sa vakabauta na itukutuku nei Josefa Simici me baleta na kena tiko vua na peleti ni iVola i Momani kei na cakacaka ni vakavakadewa ka sa toso tiko ena gauna o ya ka so na gauna e dau solia na veivuke vakayago vei Josefa Simici kei na nona vunivola, ka rawa kina vei rau me rau tomana tiko na vakavakadewa. Ena kerekere nei Josefa Naiti, sa vakatataro kina na Parofita vua na Turaga ka ciqoma na ivakatakila.

    1–6, Era na vakabulai na dautatamusuki ena were ni vaini; 7–9, Ko ira kece sa gagadre ka rawata me ra veivuke ena cakacaka ni Turaga.

    Wase 13

    E dua na malanivosa mai na itukutuku makawa kei Josefa Simici ka tukuni kina na nodrau tabaki na Parofita kei Oliva Kaudari ki na Matabete i Eroni volekati Amoni, e Penisilivenia, 15 ni Me, 1829. Na veitabaki a vakayacori ena ligana e dua na agilosi ka tukuna ni o koya o Joni, o koya vata ga ka sa vakatokai ko Joni na Dauveipapitaisotaki ena Veiyalayalati Vou. A vakamacalataka na agilosi ni cakacaka tiko ena veidusimaki nei Pita, Jemesa kei Joni, ko iratou na iApositolo ni gauna e liu, ka ratou taura tu na idola ni matabete cecere, ka vakatokai na Matabete i Melikiseteki. Na yalayala a soli vei Josefa kei Oliva ni na qai yaco mai na gauna me vakatikori kina vei rau na matabete cecere oqo. (Raica na wase 27:7–8, 12.)

    Sa vakamacalataki na idola kei na kaukauwa ni Matabete i Eroni.

    Wase 14

    Na ivakatakila sa soli yani mai vei Josefa Simici na Parofita kivei Tevita Witima, e Feieti, Niu Ioka, June 1829. Eratou sa taleitaka sara vakalevu na kena vakadewataki na iVola i Momani na matavuvale na Witima. Sa laki yavutaka na nona itikotiko na Parofita ena vale nei Pita Witima Levu, a sa vakaitikotiko mai kea me yacova na vakacavari ni vakadewa, ka vakataudeitaki na kena taukeni na dodonu ni ivola ka sa voleka mai. E tolu na luvei Witima tagane, ka ratou sa dui ciqoma na ivakadinadina ena dina ni cakacaka oqo, e ratou sa lomaleqa ena vuku ni nodratou dui itavi yadua. Na ivakatakila oqo kei na rua ka tarava (wase 15 kei na 16) a soli me isau ni dua na vakatataro ena Urimi kei na Cumimi. Ko Tevita Witima a qai yaco me dua vei iratou na tolu na ivakadinadina ki na iVola i Momani.

    1–6, Era na vakabulai na dautatamusuki ena were ni vaini; 7–8, Na bula tawamudu sa isolisoli levu duadua ni Kalou; 9–11, E bulia ko Karisito na lomalagi kei na vuravura.

    Wase 15

    Na ivakatakila sa soli yani mai vei Josefa Simici na Parofita kivei Joni Witima, e Feieti, Niu Ioka, June 1829 (raica na ikau ni wase 14). Na itukutuku titobu ka dokai vakaitaukei, ni sa tukuna kina na Turaga na ka e rau kila tikoga ko Koya vata kei Joni Witima. Ko Joni Witima a qai yaco e muri me dua vei ira na lewe Walu na iVakadinadina ki na iVola i Momani.

    1–2, Sa koto na liga ni Turaga e vuravura kecega; 3–6, Na vunautaki ni kosipeli kei na vakabulai ni yalo sa ka bibi duadua.

    Wase 16

    Na ivakatakila sa soli yani mai vei Josefa Simici na Parofita kivei Pita Witima Lailai e Feieti, Niu Ioka, June, 1829 (raica na ikau ni wase 14). Ko Pita Witima Lailai a qai mai dua vei iratou na lewe Walu ka a Vakadinadina ki na iVola i Momani.

    1–2, Sa koto na liga ni Turaga e vuravura kecega; 3–6, Na vunautaki ni kosipeli kei na vakabulai ni yalo sa ka bibi duadua.

    Wase 17

    Na ivakatakila sa soli yani mai vei Josefa Simici na Parofita me baleti Oliva Kaudari, Tevita Witima kei Matini Erisi, e Feieti, Niu Ioka, June 1829, ni bera ni ratou raica na peleti ceuti ka tiko kina na ivolatukutuku ni iVola i Momani. Ko Josefa kei na nona vunivola, ko Oliva Kaudari erau sa vulica mai na ivakadewa ni peleti ni iVola i Momani ni na lewe tolu na ivakadinadina talei sa na lesi (raica Ica 5:2–4; 2 Nifai 11:3; 27:12). Eratou sa vakayavalati ko Oliva Kaudari, Tevita Witima kei Matini Erisi mai na gagadre veiuqeti me ratou na ivakadinadina talei e lewe tolu. Sa taro vua na Turaga na Parofita, ka sa vakatakilai mai kina na veika oqo ena Urimi kei na Cumimi me kena isau

    1–4, Ena vakabauta eratou na raica rawa kina na lewe Tolu na iVakadinadina na peleti kei na veika tabu e so; 5–9, Sa vakadinadinataka ko Karisito na vakalou ni iVola i Momani.

    Wase 18

    Na ivakatakila vei Josefa Simici na Parofita, Oliva Kaudari, kei Tevita Witima, soli e Feieti, Niu Ioka, June 1829. Me vaka e tukuna na Parofita, a kilai kina mai na ivakatakila oqo “na nodra kacivi na iapositolo le tinikarua ena veisiga e muri oqo, ka vakakina na idusidusi e veiwekani kei na kena tarai cake na Lotu.”

    1–5, E vakaraitaka na ivolanikalou na ivalavala ni kena tarai cake na Lotu; 6–8, Sa qai ca vakalevu ga ko vuravura; 9–16, Sa ka talei ena mata ni Kalou na yalo; 17–25, Me rawa na veivakabulai, sa dodonu me vakabauta na tamata na yacai Karisito; 26–36, Sa vakatakilai na veikacivi kei na itavi ni Le Tinikarua; 37–39, Me rau vakasaqarai iratou na Le Tinikarua ko Oliva Kaudari kei Tevita Witima; 40–47, Me rawa na veivakabulai sa dodonu me veivutuni, papitaiso ka muria na vunau na tamata.

    Wase 19

    Na ivakatakila sa soli yani mai vei Josefa Simici e Menijesita, Niu Ioka, kena irairai ena vulaikatakata ni 1829. Ena nona itukutuku makawa sa vakamacalataka kina na Parofita kivei Matini Erisi ni “dua na nona ivakaro na Kalou ka sega ni ka vakatamata, ka solia ko koya sa Tawamudu.”

    1–3, Sa tu vei Karisito na kaukauwa kecega; 4–5, Na tamata kecega me ra veivutuni de ra na cudruvi; 6–12, Na cudruvi tawamudu sa itotogi ni Kalou; 13–20, Sa vakararawataki ko Karisito ena vukuda kece meda kua kina ni vakararawataki kevaka eda sa veivutuni; 21–28, Vunautaka na kosipeli ni veivutuni; 29–41, Vunautaka yani na itukutuku rekitaki.

    Wase 20

    Na ivakatakila ni kena tauyavutaki na Lotu kei na qaravi ni kena cakacaka, ka soli vei Josefa Simici na Parofita, mai Feieti se voleka kina, e Niu Ioka. Eso na wase ni ivakatakila oqo a rawa ni se soli sara ena vulaikatakata ni 1829. Na ivakatakila taucoko, ka kilai tu ena gauna ko ya me Tikina kei na Veiyalayalati, e rairai ni a volai ni oti sara toka ga na 6 ni Epereli, 1830 (na siga a tauyavutaki kina na Lotu). A vola vakaoqo na Parofita: “Raica a vakatakila vei keitou o Koya [ko Jisu Karisito] na veika oqo, ena yalo ni parofisai kei na ivakatakila; raica keitou sa kila kina e vuqa na ka, keitou sa kila tale ga kina na tikinisiga sa lewa ka vakarota ko Koya, me keimami vakaduria tale kina e vuravura na Nona Lotu.”

    1–16, E vakadinadinataka na iVola i Momani, na vakalou ni cakacaka ena gauna edaidai; 17–28, Sa vakadeitaki tale na ivakavuvuli ni veibuli, na lutu, na veisorovaki kei na papitaiso; 29–37, Vakamatatataki na lawa ka vauca na veivutuni, veivakadonui, veivakatabui kei na papitaiso; 38–67, Tuvani vakamatata na itavi ni talatala qase, na bete, na ivakavuvuli kei na dikoni; 68–74, Vakatakilai na nodra itavi na lewenilotu, na nodra vakalougatataki na gone lalai kei na ivakarau ni papitaiso; 75–84, Sa vakatakilai na masu ni sakaramede kei na ivakaro e baleti ira na isoqosoqo lewe ni Lotu.

    Wase 21

    Na veika sa vakatakilai vei Josefa Simici na Parofita, mai Feieti e Niu Ioka, ena 6 ni Epereli, 1830. A soli na ivakatakila oqo ena tauyavu ni Lotu ena tiki ni siga sa cavuti e cake, ena vale nei Pita Witima Levu. Eratou a vakaitavi talega kina e ono na tamata ka ratou se qai papitaiso oti. Eratou a vakaraitaka ko iratou oqori ni ratou sa gadreva ka nakita sara me ratou tauyavutaka, me vaka na ivakaro ni Kalou (raica na wase 20). Eratou a lomavata ka tokona tale ga me rau sa vakailesilesi vakatulewa ni Lotu o Josefa Simici Lailai kei Oliva Kaudari. Ena veitabaki ni liga sa qai tabaka na ulu i Oliva ko Josefa ka lesi koya me dua na italatala qase ni Lotu, oti sa qai kitaka talega vakakina vei Josefa ko Oliva. Ni sa vakayacori oti na sakaramede, erau sa qai tabaki iratou yadua na vakaitavi tiko ko Josefa kei Oliva ena kena soli na Yalo Tabu, ka ra vakadeitaki yadua me ra sa lewe ni Lotu.

    1–3, Sa kacivi ko Josefa Simici me daurairai, dauvakavakadewa, parofita, iapositolo ka italatala qase; 4–8, Na nona vosa ena dusimaka na inaki kei Saioni; 9–12, Era na vakabauta na nona vosa na Yalododonu ni vosa ena kaukauwa ni Dauveivakacegui.

    Wase 22

    Na veika sa vakatakilai yani mai vei Josefa Simici na Parofita, mai Menijesita, e Niu Ioka ena 16 ni Epereli, 1830. A soli na ivakatakila oqo ki na Lotu ena vukudra eso era sa papitaiso oti tu mai ka ra sa via curu ki na Lotu, ka ra kaya me ra kakua ni papitaisotaki tale.

    1, Na papitaiso e dua na veiyalayalati vou ka tawavakaiyalayala; 2–4, Sa gadrevi na papitaiso e dodonu ka dina.

    Wase 23

    E lima na ivakatakila sa vakatakilai yani mai vei Josefa Simici na Parofita, mai Menijesita, Niu Ioka, ena Epereli, 1830, me baleti Oliva Kaudari, Airame Simici, Samuela H. Simici, Josefa Simici Levu, kei Josefa Naiti Levu. Me isau ni nodratou gagadre na lewe lima sa cavuti koto e cake na yacadratou, me ratou kila na nodratou dui itavi, a vakatataro na parofita vua na Turaga ka ciqoma kina e yadua na ivakatakila me baleti iratou yadua.

    1–7, Ko ira na tisaipeli ka ra a kacivi taumada me ra dauvunau, dauveivakauqeti ka vakaukauwataka na Lotu.

    Wase 24

    Na veika sa vakatakilai vei rau ko Josefa Simici na Parofita kei Oliva Kaudari mai Amoni, Penisilivenia, ena Julai, 1830. E dina ni sa bera ni oti vinaka e va na vula na tauyavu ni Lotu, ia sa kaukauwa sara na nodra vakacacani, era sa dro ka dau tiko vakavuni voli na iliuliu. A soli mai e tolu na ivakatakila oqo ena gauna oqo me vakaukauwataki ira, vakayaloqaqataki ira ka vakavulici ira.

    1–9, Sa lesi ko Josefa Simici me vakadewataka, vunautaka, ka vakamacalataka na ivolanikalou; 10–12, Sa lesi ko Oliva Kaudari me vunautaka na kosipeli; 13–19, Sa vakatakilai na lawa me baleta na cakamana, na cudruvi kei na kuretaki laivi ni soso mai na yava, ka me kakua ni kau na taga ilavo se na ivaqa.

    Wase 25

    Na veika sa vakatakilai vei Josefa Simici na Parofita, mai Amoni, Penisilivenia, ena Julai, 1830. (raica na ikau ni wase 24). Sa vakatakilai ena ivakatakila oqo na nona inaki na Turaga ena vukui Ema Simici, na watina na Parofita.

    1–6, Sa lesi ko Ema Simici, e dua na marama digitaki, me dauveivukei ka dauveiqaravi vua na watina; 7–11, Sa lesi tale ga ko koya me vunivola, me vakamacalataka na ivolanikalou, ka digitaka eso na sere; 12–14, A nodra sere na yalododonu sa nodra masu vua na Turaga; 15–16, Na ivakavuvuli ni talairawarawa ena ivakatakila oqo sa baleta na tamata kecega.

    Wase 26

    Na veika sa vakatakilai vei iratou ko Josefa Simici na Parofita, Oliva Kaudari kei Joni Witima, mai Amoni, Penisilivenia ena Julai, 1830 (raica na ikau ni wase 24).

    1, Era sa vakaroti me ra vulica ka vunautaka yani na ivolanikalou; 2, Vakadeitaki na lawa ni duavata ena loma ni lotu.

    Wase 27

    Na veika sa vakatakilai vei Josefa Simici na Parofita, mai Amoni Penisilivenia, ena Okosita, 1830. Ni vakarautaki tiko e dua na soqoni vakalotu me na vakayacori kina na sakaramede ni kana madrai kei na gunu waini, a lako ko Josefa me vakasaqaqara waini mai. A rairai vua e dua na italai mai lomalagi ka ciqoma kina na ivakatakila oqo, a volai e dua na kena iwase ena gauna vata oqori, na kena vo a qai volai ena Sepiteba ka tarava. Ena gauna oqo sa dau vakayagataki na wai ena soqoni ni sakaramede ni Lotu.

    1–4, Sa virikotori na ivakatakarakara me dau taurivaki ni vakayagataki na sakaramede; 5–14, Me ra na dau kania ka gunuva na sakaramede ena veitabagauna taucoko na Karisito kei ira na Nona italai; 15–18, Mo dou vakaiyaragi ena iyaragi kecega ni Kalou.

    Wase 28

    Na veika sa vakatakilai yani mai vei Josefa Simici na Parofita ki vei Oliva Kaudari, mai Feieti e Niu Ioka, ena Sepiteba, 1830. E tiko vei Airame Peji e dua na lewenilotu, e dua na vatu ka kaya ni sa veivuke tiko ena kena vakatakilai mai na veika me tara cake kina ko Saioni kei na ivakarau ni kena cicivaki na Lotu. E vica na lewenilotu era sa vakacalai ena itukutuku oqori, sa vakacalai sara tale mada ga kina ko Oliva Kaudari. Ni voleka me vakayacori e dua na koniferedi ka sa tuvai oti koto mai, a mani laki vakatataro vagumatua kina vua na Turaga na Parofita ena vuku ni ka oqo, ka qai basika kina na ivakatakila oqo.

    1–7, Sa taura tu ko Josefa Simici na idola ni veika vuni e so, ia ko koya duadua ga ena ciqoma na ivakatakila me baleta na Lotu; 8–10, Ko Oliva Kaudari me vunau vei ira na Leimanaiti; 11–16, Sa vakaisini Airame Peji ko Setani, ia sa solia vua na ivakatakila lasulasu.

    Wase 29

    Na veika sa vakatakilai yani mai vei Josefa Simici na Parofita, e matadratou e ono na italatala qase mai Feieti e Niu Ioka, ena Sepiteba, 1830. A vakatakilai na veika oqo ni vo tiko e vica na siga me vakayacori na koniferedi, ka tekivu ena 26 ni Sepiteba, 1830.

    1–8, Vakasoqoni ira na Nona digitaki na Karisito; 9–11, Sa itekivu ni Mileniumi na Nona lako mai; 12–13, Era na lewai ira kece na Isireli ko ira na Le Tinikarua; 14–21, Ena rairai mai na ivakatakilakila, yaco na mate dauveitauvi, kei na veivakarusai ni bera na iKarua ni Lako Mai; 22–28, Ena muria mai na Mileniumi na icavacava ni tucake tale kei na iotioti ni veilewai; 29–35, Sa ka vakayalo na ka kecega vua na Turaga; 36–39, Sa vakasevi mai lomalagi na tevoro kei ira na nona agilosi me ra mai temaki ira na tamata; 40–45, Na Lutu kei na Veisorovaki sa rawa kina na veivakabulai; 46–50, Era sa vueti na gone ena vuku ni Veisorovaki.

    Wase 30

    Na veika sa vakatakilai vei Josefa Simici na Parofita, mai Feieti e Niu Ioka, ena Sepiteba, 1830, me tukuni vei iratou ko Tevita Witima, Pita Witima Lailai, kei Joni Witima, ni sa oti na koniferedi siga tolu mai Feieti, ia era se bera ni veisukayaki na italatala qase ni lotu. A volai taumada me tolu na itukutuku; a qai vauca vata na Parofita me dua ga na iwase ena Vunau kei na Veiyalayalati ka tabaki ena 1835.

    1–4, Sa cudruvi ko Tevita Witima ni sega ni gumatuataka na nona itavi; 5–8, Me tomani Oliva Kaudari ko Pita Witima Lailai ena ilakolako ni kaulotu vei ira na Leimanaiti; 9–11, Sa lesi ko Joni Witima me vunautaka na kosipeli.

    Wase 31

    Na veika sa vakatakilai vei Josefa Simici na Parofita, me tukuni vei Tomasi B. Masi ena Sepiteba, 1830. Oqo ni se qai oti sara toka ga e dua na koniferedi ni Lotu (raica na ikau ni wase 30). A se qai papitaiso ga ena dua na gauna ena itekivu ni vula ko Tomasi B. Masi ka sa tabaki oti me dua na italatala qase ni Lotu ni bera ni vakatakilai mai na veika oqo.

    1–6, Sa kacivi ko Tomasi B. Masi me vunautaka na kosipeli ka sa vakadeitaki vua na nodratou tiko vinaka na nona matavuvale; 7–13, Sa vakasalataki me dau vosota, dau masu tiko ga, ka muria na Dauveivakacegui.

    Wase 32

    Na veika sa vakatakilai vei Josefa Simici na Parofita, me tukuni vei Pali P. Pereta kei Saiba Petesoni, e Menijesita mai Niu Ioka ena itekivu ni Okotova, 1830. Era sa marau ka gagadre vakalevu ko ira na italatala qase ena vukudra na Leimanaiti, io era sa nanuma na Lotu mai na veika sa tukuni ena iVola i Momani me baleta na nodra vakalougatataki. Oqori na vuna era sa vakatakekere kina vua na Turaga me vakatakila mai na Lomana ena vuku ni nodra talai na italatala qase ena gauna ko ya ki vei ira na yavusa Idia mai na yasayasa vaka-Ra. Sa tukuni e ra na veika sa vakatakilai.

    1–3, Erau sa lesi ko Pali P. Pereta kei Saiba Petesoni me rau laki vunau vei ira na Leimanaiti ka me rau tomani Oliva Kaudari kei Pita Witima Lailai; 4–5, Me ratou masulaka me ratou kila na ivolanikalou.

    Wase 33

    Na veika sa vakatakilai vei Josefa Simici na Parofita me tukuni vei rau ko Esera Tea kei Nocorope Suiti mai Feieti e Niu Ioka, ena Okotova 1830. Ena nona vakamacalataka na ivakatakila oqo, a vakadeitaka kina vakaoqo na tukutuku makawa kei Josefa Simici ni “sa vakarau tu na Turaga me veidusimaki vei ira era sa vakasaqaqara vagumatua ena vakabauta.”

    1–4, Era sa lesi na tamata cakacaka me ra vunautaka na kosipeli ena ikatinikadua ni auwa; 5–6, Sa tauyavutaki na Lotu, ka me ra na vakasoqoni vata na digitaki; 7–10, Veivutuni, ni sa voleka na matanitu vakalomalagi; 11–15, Sa tara cake na Lotu ena uluvatu ni kosipeli; 16–18, Me vakarautaki na nona yaco mai na Tagane sa qai Vakawati.

    Wase 34

    Na veika sa vakatakilai vei Josefa Simici na Parofita me tukuni vei Osoni Pereta mai Feieti e Niu Ioka, ena 4 ni Noveba 1830. E sa qai yabaki 19 tiko ena gauna ko ya ko Baraca Pereta. A saumaki ka papitaiso sara ena imatai ni nona rogoca na vunautaki ni kosipeli sa vakalesui mai, mai vei Pali P. Pereta na tuakana, ena ono na macawa yani ki liu. A ciqomi kina na ivakatakila oqo ena vale nei Pita Witima Levu.

    1–4, Era sa yaco me luve ni Kalou ko ira na tamata yalodina ena vuku ni Veisorovaki; 5–9, Na vunautaki ni kosipeli e caramaka na sala me baleta na iKarua ni Lako Mai; 10–12, Sa yaco na parofisai ena kaukauwa ni Yalo Tabu.

    Wase 35

    Na veika sa vakatakilai vei Josefa Simici na Parofita kei Sidini Rikitoni mai Feieti e Niu Ioka se dua na vanua volekata, ena 7 ni Tiseba, 1830. Oqori ena gauna a ogataka tiko kina e veisiga na Parofita na nona vakadewataka na iVolatabu. A sa tekivu sara na vakavakadewa oqori ena i ka 30 ni June, ka rau a sa vakaitavi ruarua kina vakavunivola ko Oliva Kaudari kei Joni Witima. Ia me vaka ni rau sa kacivi ki na so tale na ilesilesi, sa mani lesi kina vakalou ko Sidini Rikitoni ki na itavi cecere me nona vunivola na Parofita ena cakacaka oqori (raica na tikina e 20). E tukuni kina vaqo ena itukutuku makawa kei Josefa Simici: “A lako mai [Oaio] ko Sidini Rikitoni ena Tiseba me mai taroga na loma ni Turaga ka sala vata mai kei koya o Etuwate Patereji. … Ni rau se qai tadu ga mai vakalailai, sa qai kaya mai vakaoqo na Turaga.”

    1–2, Na sala ena yaco rawa kina na tamata me luve ni Kalou; 3–7, Sa lesi ko Sidini Rikitoni me veipapitaisotaki ka solia na Yalo Tabu; 8–12, Ena vakayacori na ivakatakilakila kei na caka mana ena vakabauta; 13–16, Era na wasewasea na veimatanitu ko ira na nona tamata na Turaga ena kaukauwa ni Yalo Tabu; 17–19, Sa soli vei Josefa Simici na idola ni veika vuni; 20–21, Era sa namaka na tamata digitaki na siga sa lako mai kina na Turaga; 22–27, Ena vakabulai ko Isireli.

    Wase 36

    Na veika sa vakatakilai vei Josefa Simici na Parofita, me tukuni vei Etuwate Patereji, volekati Feieti e Niu Ioka, ena 9 ni Tiseba, 1830 (raica na ikau ni wase e 35.) E tukuna na itukutuku makawa kei Josefa Simici ni ko Etuwate Patereji sa “ivakaraitaki ni tamata ivalavala dodonu, ka dua na nona tamata cecere na Turaga.”

    1–3, Sa tabaki Etuwate Patereji na Turaga mai na ligai Sidini Rikitoni; 4–8, Me ra kacivi na tagane kecega era sa ciqoma na kosipeli kei na matabete me ra lako yani ka veivunauci.

    Wase 37

    Na veika sa vakatakilai vei Josefa Simici na Parofita kei Sidini Rikitoni, volekati Feieti e Niu Ioka, ena Tiseba 1830. Sa soli eke na imatai ni vakaro me baleta e dua na vakasoqoni vata tale ena itabagauna oqo.

    1–4, Era sa kacivi na Yalododonu me ra soqoni vata yani ki na Oaio.

    Wase 38

    Na veika sa vakatakilai vei Josefa Simici na Parofita mai Feieti e Niu Ioka, ena 2 ni Janueri, 1831. A yaco oqo donuya e dua na gauna ni koniferedi ni Lotu.

    1–6, Sa bulia na ka kecega ko Karisito; 7–8, Sa tiko ko Koya ena kedra maliwa na Nona Yalododonu, ka ra na raici Koya; 9–12, Era sa ca kecega na tamata e matana; 13–22, Sa vakarautaka ko Koya e dua na vanua yalataki vei ira na Nona Yalododonu ena bula oqo kei na gauna tawamudu; 23–27, Era sa vakaroti na Yalododonu me ra duavata ka veilomani me vaka na veitacini; 28–29, Sa yalataki ni na yaco na ivalu; 30–33, Ena soli mai cake na kaukauwa vei ira na Yalododonu me ra na lako yani ki na veimatanitu; 34–42, Era sa vakaroti ena Lotu me ra vukei ira na dravudravua kei ira sa leqa tu, ka vakasaqara na iyau ni gauna tawamudu.

    Wase 39

    Na veika sa vakatakilai yani mai vei Josefa Simici na Parofita me tukuni vei Jemesa Koveli, mai Feieti e Niu Ioka, ena 5 ni Janueri, 1831. Sa veiyalayalati kei na Turaga o Jemesa Koveli e dua ka italatala tu ni Lotu Wesele me vasagavulu na yabaki, ni na talairawarawa ki na ivakaro kecega ena solia vua na Turaga mai vei Josefa na Parofita.

    1–4, Sa tu vei ira na Yalododonu na kaukauwa me ra yaco me luve ni Kalou; 5–6, Eda sa ciqomi Karisito kevaka eda sa ciqoma na kosipeli; 7–14, Sa vakaroti ko Jemesa Koveli me papitaiso ka cakacaka ena nona were ni vaini na Turaga; 15–21, Me ra vunautaka yani na kosipeli ko ira na tamata ni Turaga, ni bera na iKarua ni nona Lako Mai; 22–24, Era na soqoni vata ena bula oqo kei na gauna tawamudu ko ira sa vakabauta na kosipeli.

    Wase 40

    Na veika sa vakatakilai vei Josefa Simici na Parofita kei Sidini Rikitoni mai Feieti e Niu Ioka, ena 6 ni Janueri, 1831. Ni bera ni vola na veika a vakatakilai, a tukuni vakaoqo ena kena itukutuku makawa na Parofita, “Ni sa sega ni muria ko Jemesa Koveli na vosa ni Turaga ka lesu tale ki vei ira na nona itokani kei na nona ivakavuvuli makawa, a sa vakatakila kina na Turaga vei au kei Sidini Rikitoni na veika oqo” (raica na wase 39).

    1–3, Ena sega ni vakabauta na kosipeli ko koya sa rerevaka na nodra veivakacacani na tamata ka domona na iyau vakavuravura.

    Wase 41

    Na veika sa vakatakilai yani mai vei Josefa Simici na Parofita me tukuni ki na Lotu, mai Katiladi e Oaio, ena 4 ni Feperueri. Era vakaroti ena ivkatakila oqo na Parofita kei ira na italatala qase ni Lotu me ra masuta me ra ciqoma na “lawa” ni kalou (raica na wase 42). Se qai tadu mai ki Katiladi mai Niu Ioka ko Josefa Simici, ia ko Limeni Kopeli e dua na lewe ni Lotu mai na koro voleka o Tomuseni e Oaio, “a kerei rau o Baraca Josefa kei Sidini [Rikitoni]…me rau laki tiko vata kei koya ka na vakavaletaki rau ka solia na kedrau kakana.” Na ivakatakila eso oqo e vakamatatataki kina na vanua me rau vakaitikotiko kina o Josefa kei Sidini ka kacivi talega kina o Etuwate Patereji me imati ni bisopi ni Lotu

    1–3, Era na liutaka na Lotu na italatala qase ena yalo ni vakatakila; 4–6, Era sa tisaipeli dina ko ira sa vakabauta ka muria na lawa ni Turaga; 7–12, Sa lesi me bisopi ni Lotu ko Etuwate Patereji.

    Wase 42

    Na veika sa vakatakilai yani ena rua na iwasewase mai vei Josefa Simici na Parofita mai Katiladi e Oaio, ena 9 kei na 23 ni siga ni Feperueri, 1831. Na imatai ni wasewase mai na tikina e 1 ki na 72, a ciqoma e matadratou na italatala qase e le tinikarua, ka vakataucokotaki kina na veika sa yalataka oti tu na Turaga, ni na qai mai soli e Oaio na “lawa” (raica na wase 38:32). Na ikarua ni wasewase mai na tikina e 73 ki na 93. Sa vakamacalataka na Parofita ni ivakatakila oqo e “lewena na lawa ni Lotu.”

    1–10, Era sa lesi na italatala qase ni lotu me ra vunautaka na kosipeli, papitaisotaki ira sa saumaki mai ka tara cake na Lotu; 11–12, Sa kilikili me ra kacivi ka tabaki, ka ra vakavulica na ivakavuvuli ni kosipeli, me vaka e kunei ena ivolanikalou; 13–17, Me ra veivakatavulici ka parofisai ena kaukauwa ni Yalo Tabu; 18–29, Era sa vakaroti na Yalododonu me ra kakua ni laba, butako, lasu, gagano ca, veibutakoci se vosa veivakacacani; 30–39, Sa virikotori na lawa e baleta na iyau sa vakatabui ki na Lotu; 40–42, Era na cudruvi na qaciqacia kei na dau vakasavuliga; 43–52, Me ra na vakabulai na tauvimate ena veimasulaki ka cabo ena vakabauta; 53–60, Sa yavu ni vakavulewa ena Lotu na ivolanikalou ka me ra vunautaki yani ki vuravura taucoko; 61–69, Ena vakatakilai mai na vanua me tara kina ko Jerusalemi vou, kei na veika vuni ni matanitu vakalomalagi; 70–73, Me vakayagataki na iyau sa vakatabui ki na Lotu me ra vukei kina na vakailesilesi ni Lotu; 74–93, Sa virikotori na lawa e vauca na veidauci, na veibutakoci, na laba, na butako kei na vakatusai ni ivalavala ca.

    Wase 43

    Na veika sa vakatakilai yani mai vei Josefa Simici na Parofita mai Katiladi, Oaio, ena Feperueri ni 1831. Ena gauna oqo era sa veilecayaki voli kina eso na lewe ni Lotu ena vuku ni veika era kaya na dauvakatakila vakailasu. A vakatataro vua na Turaga ko koya na Parofita, ka mani veitaratara mai kina vua na Turaga ena itukutuku vei ira na italatala qase ni Lotu. Na imatai ni iwasewase sa baleta na lawa tu ni Lotu; ia na ikarua ni iwasewase sa ivakasala me ra tukuna na italatala qase ni lotu ki na veimatanitu e vuravura.

    1–7, Sa soli taudua ga na ivakatakila kei na ivakaro vei koya sa lesi vua; 8–14, Era sa vakatabui na Yalododonu ni ra sa caka dodonu vua na Turaga; 15–22, Era sa talai yani na italatala qase me ra vunautaka na veivutuni ka vakasalataki ira na tamata me ra vakavakarau ki na siga sa levu ni Turaga; 23–28, Sa dau veitaratara na Turaga vei ira na tamata ena rorogo ni Domona kei na cakacaka ni veika bula; 29–35, Ena yaco mai na Mileniumi vinaka ka na vesu tu kina ko Setani.

    Wase 44

    Na veika sa vakatakilai vei Josefa Simici na Parofita kei Sidini Rikitoni, mai Katiladi, Oaio, ena mua ni vula ko Feperueri, 1831. Me vakadonui kina na gagadre sa virikotori tu, sa lokuca kina na Lotu me vakayacori ena itekivu ni vula o June sa roro mai e dua na koniferedi.

    1–3, Sa vakaroti me ra soqoni vata na italatala qase ena koniferedi; 4–6, Me ra cakacaka me vaka na lawa ni matanitu ka vukei ira na dravudravua.

    Wase 45

    Na veika sa vakatakilai vei Josefa Simici na Parofita me tukuni ki na Lotu, mai Katiladi, e Oaio, ena 7 ni Maji, 1831. Ena itekivu ni nona itukutuku me baleta na ivakatakila oqo, e tukuna kina na itukutuku makawa kei Josefa Simici ni “ena itabayabaki oqo ni Lotu … sa tabaki tiko kina e vuqa na itukutuku lasu … kei na italanoa lialia … ka veisoliyaki, … me tarovi ira na tamata mai na nodra vakadikeva na cakacaka se na nodra taura na vakabauta. … Ia era sa reki vakalevu na Yalododonu, … Niu sa ciqoma na veika oqo.”

    1–5, Sa noda dautataro vei Tamada ko Karisito; 6–10, Na kosipeli sai koya e dua na dautukutuku me mai caramaka na sala ni Turaga; 11–15, Sa ciqomi Inoki kei ira na nona tamata na Kalou ki Vua; 16–23, Sa vakatakila ko Karisito na ivakatakilakila ni Nona lako mai, me vaka a vakamacalataka mai na Ulunivanua ni Veiolive; 24–38, Ena vakalesui tale mai na kosipeli, ka na yaco na nodra gauna na Matanitu Tani, ka na roboti vuravura taucoko na matetaka veivakatalai; 39–47, Na ivakatakilakila, na ka veivakurabuitaki, kei na Tucake Tale ena yaco ena iKarua ni nona Lako Mai; 48–53, Ena tucake na Karisito ena Ulunivanua ni Veiolive, ka ra na raica na Jiu na we ni mavoa e Ligana kei na Yavana; 54–59, Sa na mai vakatulewa na Turaga ena Mileniumi; 60–62, Sa vakaroti vua na Parofita me tekivu vakadewataka na Veiyalayalati Vou, ena qai vakatakilai mai kina e so na itukutuku bibi; 63–75, Era sa vakaroti na Yalododonu me ra soqoni vata ka tara na Jerusalemi Vou, na vanua era na soqoni vata yani kina na tamata mai na veimatanitu kecega.

    Wase 46

    Na veika sa vakatakilai yani mai vei Josefa Simici na Parofita, me tukuna ki na lotu, mai Katiladi, Oaio, ena 8 ni Maji, 1831. Ena veigauna taumada oqo ni Lotu, e se bera ni tauyavutaki rawa e dua na ivalavala tudei ni kena liutaki na veisoqoni ni Lotu. Ia sa vakabau raraba tu ga me ra tiko wale ga ena soqoni ni sakaramede kei na soqoni ni lotu ko ira na lewe ni lotu kei ira era sa vakadikeva tiko vagumatua na Lotu. E qai vakaraitaki mai ena ivakatakila oqo na nona inaki na Turaga me baleta na kena cicivaki ka liutaki na soqoni vakaoqori kei na Nona idusidusi ena vakasaqarai kei na kilai ni isolisoli ni Yalo.

    1–2, Me ra liutaka na veisoqoni na italatala qase ni lotu me vaka na veivakauqeti ni Yalo Tabu; 3–6, Me ra kakua ni vakuai ena lotu ni sakaramede ko ira sa vakasaqara tiko na dina; 7–12, Kerea vua na Kalou ka vakasaqara na isolisoli ni Yalo; 13–26, Sa tuvai e so na isolisoli oqori; 27–33, Sa soli na kaukauwa vei ira na iliuliu ni lotu me ra rawa ni kila na isolisoli ni Yalo.

    Wase 47

    Na veika sa vakatakilai yani mai vei Josefa Simici na Parofita, mai Katiladi, e Oaio, ena 8 ni Maji, 1831. A sega ni vinakata taumada ko Joni Witima, o koya a sa veiqaravi oti mada vakavunivola vua na Parofita me taura na itutu vaka daunitukutuku makawa ka daunivolaitukutuku, me sosomitaki Oliva Kaudari. A vola kina, “Au sega ni via cakava kevaka e vakatau vei au ia au vinakata me vakayacori ga na loma ni Turaga, ia kevaka e vinakata ko koya, au gadreva me vakatakila mai vei Josefa na Daurairai.” Ni oti nona ciqoma o Josefa Simici na ivakatakila oqo. A ciqoma o Joni Witima ka veiqaravi ena itutu sa lesi kina.

    1–4, Sa lesi ko Joni Witima me qarava na itukutuku ni Lotu ka me vunivola tale ga vua na Parofita.

    Wase 48

    Na veika sa vakatakilai yani mai vei Josefa Simici na Parofita mai Katiladi, Oaio, ena 10 ni Maji, 1831. Sa taroga na Parofita vua na Turaga na sala me rawata kina na qele me ra tawana na Yalododonu. Oqo e dua na tikina bibi, ni ra sa toki tiko mai na lewe ni Lotu mai na tokalau kei Amerika, ena nodra talairawarawa ki na ivakaro ni Turaga me ra soqoni vata yani ki Oaio (raica na wase 37:1–3; 45:64).

    1–3, Me ra wasea na Yalododonu mai Oaio na nodra qele vei ira na wekadra; 4–6, Me ra voli qele na Yalododonu, me ra tara e dua na koro levu, ka muria na nodra ivakasala na nodra vakailesilesi vakatulewa.

    Wase 49

    Na veika sa vakatakilai yani mai vei Josefa Simici na Parofita mai Katiladi, Oaio, ena 7 ni Me, 1831, me tukuni vei Sidini Rikitoni, Pali P. Pereta kei Limeni Kopeli. Sa ciqoma na kosipeli ko Limeni Kopeli, ia e sa muria tiko ga e so na ivakavuvuli ni lotu Seka (United Society of Believers in Christ’s Second Appearing [Na iSoqosoqo Cokovata ni Vakabauti ni iKarua ni Lesu mai i Karisito]) ka dau lewena tu e liu. Eso na nodra vakabauta na Lotu Seka oya ni sa Lako oti Mai vakarua ko Karisito, ia a yalewa ena iKarua ni Nona Lako Mai ka yacana ko Ana Li. Era sega ni nanuma ni yaga na papitaiso ena wai. Era sega ni duavata kei na vakamau ka vakabauta na bula e sega kina na vakawati kei na veiyacovi. Eso talega na Seka era vakatabuya na kana lewe ni manumanu. A volai kina vakaoqo ena itukutuku makawa kei Josefa Simici, “Au a taroga na Turaga, me rawa ni vakamatatataki vinaka na tikina oqori, ka sa mani vakatakilai mai na veika oqo.” E vakalasui ena ivakatakila oqo e so na yavu ni vakabauta ni Lotu Seka. Eratou a kauta e dua na kena ilavelave na veiwekani ka tukuni e cake na yacadratou, ki na dua na nodra itikotiko na lotu Seka (volekati Kiliviladi, e Oaio) ka wilika taucoko sara vei ira, ia era a sega ni ciqoma.

    1–7, Ena sega ni kilai na siga kei na auwa ena lesu mai kina na Karisito me yacova sara ni sa lako mai o Koya; 8–14, Sa kilikili me ra veivutuni na tamata, vakabauta na kosipeli, ka talairawarawa ki na veicakacaka vakalotu, me ra vakabulai kina; 15–16, Sa ilesilesi va-Kalou na vakamau; 17–21, Sa vakadonui na kana lewe ni manumanu; 22–28, Ena bulabula mai ko Saioni ka ra na seraka na Leimanaiti me vaka na rosi, ni bera na iKarua ni Lako Mai ni Turaga.

    Wase 50

    Na veika sa vakatakilai yani mai vei Josefa Simici na Parofita mai Katiladi, Oaio, ena 9 ni Me, 1831. E tukuni ena itukutuku makawa kei Josefa Simici ni so vei ira na italatala qase era sega ni kila na vakaraitaki ni veiyalo duidui eso sa tu voli e vuravura ka mani soli kina na ivakatakila oqo ena vuku ni nona vakatataro me baleta na tikina oqo. Sa curu tiko vakalevu e so na yalo oqori vei ira na lewe ni lotu, a ra sa kaya e so vei ira, ni ra sa raica na raivotu kei na ivakatakila.

    1–5, Era sa veilakoyaki voli e vuravura e vuqa na yalo e dauveivakacalai; 6–9, Era na ca ko ira na dauveivakaisini kei ira sa muduki tani mai na Lotu; 10–14, Me ra vunautaka na kosipeli, na italatala qase ena Yalo; 15–22, Me veivakararamataki na Yalo vei ira sa vunau kei ira sa vakarorogo; 23–25, Na ka sa sega ni veivakatataki cake, sa sega ni mai vua na Kalou; 26–28, Era na rawata na ka kecega ko ira era sa yalodina; 29–36, Ena rogoci na nodra masu ko ira era sa vakasavasavataki; 37–46, Sa iVakatawa Vinaka ka Uluvatu ni Isireli ko Karisito.

    Wase 51

    Na veika sa vakatakilai vei Josefa Simici na Parofita, mai Tomuseni, Oaio, ena 20 ni Me, 1831. Era sa tekivu yacoyaco tiko mai ki Oaio ena gauna oqo ko ira na lewe ni lotu mai na veiyasana ena tokalau ka sa kilikili kina me vakarautaki na nodra mai vakatikori. Me vaka ni itavi oqo e nona ilesilesi vakatabakidua na bisopi me qarava, sa mani taro ivakasala kina ena vuku ni tikina oqo ko Bisopi Etuwate Patereji, a mani vakatataro kina vua na Turaga ko koya na Parofita.

    1–8, Sa lesi ko Etuwate Patereji me vakataulewa ena wasei ni itavi veiqaravi kei na iyau; 9–12, Me ra caka dodonu na Yalododonu ka me ra votai vakatautauvata; 13–15, Me dua na nodra lololo ni bisopi, ka cakacakataki na veika sa votai vei ira me vaka na lawa ni Turaga; 16–20, Sa soli na vanua ko Oaio me ra toka vakawawa kina.

    Wase 52

    Na veika sa vakatakilai yani mai vei Josefa Simici na Parofita me tukuni vei ira na italatala qase ni lotu, mai Katiladi, Oaio, ena 6 ni June, 1831. A yaco mai Katiladi e dua na koniferedi, a dola ena ikatolu ni siga ka cava ena ikaono ni siga ni June. A vakayacori ena koniferedi oqo na imatai ni veilesi ki na itutu ni bete levu, a sa rairai mai e so na yalo dau lasu ka dau veivakacalai ka ra sa vunauci.

    1–2, Lokuci me vakayacori mai Misuri na koniferedi ka tarava; 3–8, Lesi eso na italatala qase ni lotu me ra veitokoni ena ilakolako; 9–11, Vakaroti vei ira na italatala qase me ra vunautaka ga na nodra vosa na parofita kei na iapositolo ka sa volai tu; 12–21, Era na vuataka na vakarokoroko kei na yalomatua ko ira sa vakararamataki ira na Yalo; 22–44, Era lesi na italatala qase me ra vunautaka yani na kosipeli ena nodra ilakolako ki na koniferedi mai Misuri.

    Wase 53

    Na veika sa vakatakilai vei Josefa Simici na Parofita me tukuni vei Alijanoni Sidini Kilipati, mai Katiladi, Oaio, ena 8 ni June, 1831. Ena nona kerekere o Sidini Kilipati, a vakatataro kina vua na Turaga na Parofita me baleta na cakacaka kei na ilesilesi nei Baraca Kilipati ena Lotu.

    1–3, Sa tabaki ko Sidini Kilipati ena nona veikacivi kei na nona digitaki ena Lotu me italatala qase; 4–7, Sa soli tale ga vua na ilesilesi vakaitini vua na bisopi.

    Wase 54

    Na veika sa vakatakilai yani mai vei Josefa Simici na Parofita me tukuni vei Niueli Naiti, mai Katiladi, Oaio, ena 10 ni June, 1831. Sa basika na duidui vei ira na lewe ni Lotu era tiko mai Tomuseni e Oaio, ena vuku ni kena vakatabui na iyau. Sa kune votu na nanumi koya ga kei na yalokocokoco. Ni oti nona kaulotu vei ira na Seka (raica na ulutaga ni wase 49), sa voroka na nona yalayala ko Limeni Kopeli me baleta na kena vakatabui na nona qele ni teitei levu me ra tawana na Yalododonu era sa qai toki tiko mai Kolosivili, e Niu Ioka. A ka oqo sa cabe kina ko Niueli Naiti (nodra iliuliu na lewenilotu era tiko mai Tomuseni) kei ira na italatala qase eso vua na Parofita ka taroga na ka me caka. A sa taroga na Turaga ko koya na Parofita ka ciqoma kina na ivakatakila oqo, era sa vakaroti kina na lewenilotu mai Tomuseni me ra biuta na qele ni teitei nei Limeni Kopeli ka lako ki Misuri.

    1–6, Sa dodonu me ra muria tiko na Yalododonu na veiyalayalati ni kosipeli me ra rawata kina na loloma cecere; 7–10, Me ra vosota ena gauna ni rarawa.

    Wase 55

    Na veika sa vakatakilai yani mai vei Josefa Simici na Parofita mai Katiladi, Oaio, ena 14 ni June, 1831 me tukuni vei Viliame W. Felepi. Eratou se qai tadu walega yani ki Katiladi ko Viliame W. Felepi, e dua na dautabaivola kei na nona matavuvale, a sa taroga na Parofita vua na Turaga na ka e baleti koya.

    1–3, Sa kacivi ka digitaki ko Viliame W. Felepi me papitaisotaki, tabaki me italatala qase, ka me vunautaka na kosipeli; 4, Me na dau vola talega na ivola e so me baleti ira na gonelalai ena koronivuli ni Lotu; 5–6, Me na lako ko koya ki Misuri, na vanua me na laki veiqaravi kina.

    Wase 56

    Na veika sa vakatakilai yani mai vei Josefa Simici na Parofita mai Katiladi, Oaio, ena 15 ni June, 1831. A vunauci ena ivakatakila oqo o Esera Tea ena nona a sega ni muria e dua na ivakatakila e liu (na “ivakaro” ka tukuni tiko ena tikina e 8), ka a ciqoma o Josefa Simici ena vukuna, ka vakaroti kina o Tea me baleta na nona itavi ena qele ni teitei nei Veretariki G. Viliame, ka vakaitikotiko kina. Na ivakatakila e muri oqo e sa bokoci talega kina na ilesilesi nei Tea me lako vata kei Tomasi B. Masi ki Misuri (raica na wase 52:22).

    1–2, Sa dodonu me ra colata na nodra kauveilatai na Yalododonu ka muria na Turaga me rawa ni ra vakabulai kina; 3–13, Na Turaga ga ena solia ka veisautaka tale na ivakaro, io ko koya sa talaidredre kina ena muduki tani; 14–17, Ena ca vei kemudou na vutuniyau ni dou sa sega ni vukei ira na dravudravua, ia ena ca vei kemudou na dravudravua sa sega ni raramusumusu na yalomudou; 18–20, Sa kalougata ko ira sa dravudravua ka savasava na lomadra, ni ra na taukena na vuravura.

    Wase 57

    Na veika sa vakatakilai yani mai vei Josefa Simici na Parofita, mai Saioni, ena yasayasa vaka-Jekesoni e Misuri, ena 20 ni Julai, 1831. Me muri na ivakasala ni Turaga me ra lako ki Misuri, na vanua ena laki vakatakila kina ko Koya “na vanua ka sa nomudou ivotavota vakawa” (wase 52), era sa lako yani kina na italatala qase ena ilakolako mai Oaio ki na iyalayala ena ra kei Misuri. E vakasamataka o Josefa Simici na kedra ituvaki na Leimanaiti ka vakataroga: “Ena qai se ni naica na lekutu me vaka na rosi? Ena tara ni naica ko Saioni ena kena lagilagi, ka na tara evei na Nomuni valetabu me ra na lako mai kina na veimatanitu ena veisiga mai muri?” Sa qai vakatakilai kina vua na veika oqo.

    1–3, Ena tara na Koro ko Saioni kei na valetabu ena vanua ko Inidipenideni mai Misuri; 4–7, Me ra voli qele na Yalododonu ka me nodra ivotavota vakawa na veivanua mai kea; 8–16, Me vakaduria e dua na sitoa ko Sidini Kilipati, me dautabaivola ko Viliame W. Felepi ia, ko Oliva Kaudari me vakarautaka na itukutuku me tabaki.

    Wase 58

    Na veika sa vakatakilai yani mai vei Josefa Simici na Parofita, mai Saioni, na yasayasa vaka-Jekesoni, Misuri, ena 1 ni Okosita 1831. Taumada ena imatai ni siga ni Vakacecegu ni sa tadu oti yani ki na yasayasa vaka-Jekesoni, e Misuri na Parofita kei na nona ilawalawa, sa vakayacori oti e dua na soqoni vakalotu ka rau sa ciqomi kina ena papitaiso e rua na lewe ni lotu vou. Era a tadu yani ena loma ni macawa ko ya eso na Yalododonu mai na tabana o Tomuseni mai Kolosivili kei na so tale (raica na wase 54). E lewe vuqa era sa gadreva me ra vulica na inaki ni Turaga ena vukudra ena vanua vou ko ya.

    1–5, O koya sa yalodina tiko ga ni sa sota kaya na veika rarawa ena vakaisalataki ena lagilagi; 6–12, Me ra vakarau na Yalododonu ki na vakawati ni Lami kei na ivakayakavi ni Turaga; 13–18, Ko ira na bisopi era turaganilewa kei Isireli; 19–23, Me ra talairawarawa ki na lawa ni matanitu ko ira na Yalododonu; 24–29, Me ra vakayagataka na nodra galala na tamata me ra caka vinaka kina; 30–33, Sa tauca na ivakaro na Turaga ka na veisautaka tale ga; 34–43, Me veivutuni, sa dodonu vua na tamata me vakatusa ka biuta tani sara vakadua na nona ivalavala ca; 44–58, Me ra volia na Yalododonu na nodra ivotavota vakawa ka soqoni vata yani ki Misuri; 59–65, Me vunautaki yani na kosipeli vei ira kecega na tamata.

    Wase 59

    Na veika sa vakatakilai yani mai vei Josefa Simici na Parofita, mai Saioni, na yasayasa vaka-Jekesoni, Misuri, ena 7 ni Okosita, 1831. Ni bera na ivakatakila oqo, a sa vakatabui na qele, me vaka na veidusimaki ni Turaga, ka vakatabui na vanua me na qai tara kina na valetabu. Ena siga a ciqomi kina na ivakatakila oqo, a mate kina o Poli Naiti na wati Josefa Naiti Levu, na imatai ni lewe ni Lotu me mate mai Saioni. O ira na lewenilotu era vakaibalebaletaka na raivotu oqo me “idusidusi vei ira na Yalododonu ena ivakarau me rokovi kina na siga ni vakacecegu kei na ivakarau ni lolo kei na masu.”

    1–4, Era na vakalougatataki na Yalododonu yalodina ni Saioni; 5–8, Me ra lomana ka qarava na Turaga ka muria na Nona ivunau; 9–19, Era sa vakalougatataki vakayago ka vakayalo na Yalododonu, ni ra sa rokova ka vakatabuya na Siga ni Turaga; 20–24, Sa yalataki vei ira na ivalavala dodonu ni ra na rawata na vakacegu ena vuravura oqo kei na bula tawamudu ena vuravura sa bera mai.

    Wase 60

    Na veika sa vakatakilai yani mai vei Josefa Simici na Parofita, mai Inidipenideni, ena yasayasa vaka-Jekesoni e Misuri ena 8 ni Okosita, 1831. Ena gauna oqo era gadreva tiko kina o ira na italatala qase era a lako ki na Yasayasa vaka-Jekesoni ka laki vakaitavi ena kena vakatabui na qele kei na vanua me tara kina na valetabu me ra kila na veika me caka.

    1–9, Me ra vunautaka na kosipeli ko ira na italatala qase ki na nodra ivavakoso na tamata caka ca; 10–14, Me ra kakua ni vakaoti gauna wale, se buluta na nodra taledi; 15–17, Me ra savata na yavadra me ivakadinadina vei ira era sa cata na kosipeli.

    Wase 61

    Na ivakatakila sa soli yani mai vei Josefa Simici na Parofita, ena bati ni uciwai ko Misuri, ena iTakelo ni wai na Makiliweini, ena 12 ni Okosita, 1831. Ena nodra ilakolako lesu ki Katiladi, eratou a sokota sobu kina na uciwai na Misuri ena bavelo na Parofita kei na le tini na italatala qase. Era a sota kaya e vuqa na ka rerevaki ena ikatolu ni siga ni nodra ilakolako. A raica na raivotu ena siga ko Elder Viliame W. Felepi ni sa lako mai ena kaukauwa na dauveivakarusai ena dela ni wai.

    1–12, Sa lewa na Turaga me yaco e vuqa na ka ni veivakarusai e wai; 13–22, Sa cudruva na wai ko Joni, a sa lako voli e matadratou na dauveivakarusai; 23–29, Eso e tu vei ira na kaukauwa me ra lewa na wai; 30–35, Me ra lakolako yarua yani na italatala qase, ka vunautaka na kosipeli; 36–39, Me ra vakavakarau me baleta na nona lako mai na Luve ni Tamata.

    Wase 62

    Na ivakatakila sa soli yani mai vei Josefa Simici na Parofita, ena bati ni uciwai na Misuri, mai Seritoni, Misuri ena 13 ni Okosita, 1831. Era a sota ena siga ko ya na Parofita kei rau na nona ivukevuke ka ra lako tiko mai Inidipenideni ki Katiladi, kei ira na italatala qase era lako tiko ki na vanua ko Saioni, era sa veimarautaki oti qai vakatakilai vua na veika oqo.

    1–3, Sa volai mai lomalagi na nomudou ivakadinadina; 4–9, Me ra lako ka vunau yani na italatala qase ena sala era sa digia, me vaka na vakatulewa kei na veivakauqeti ni Yalo.

    Wase 63

    Na veika sa vakatakilai yani mai vei Josefa Simici na Parofita, mai Katiladi, Oaio, ena 30 ni Okosita, 1831. Eratou sa tadu yani ki Katiladi ena nodratou lesu mai na veisiko mai Misuri, na Parofita, Sidini Rikitoni kei Oliva Kaudari, ena 27 ni Okosita. E vakamacalataki ena itukutuku makawa kei Josefa Simici na ivakatakila oqo: “Ena veisiga taumada oqo ni Lotu, sa dau basika vakalevu na nanamaki me kilai na vosa ni Turaga ena veiulutaga kece sara e baleta na noda vakabulai; ia me vaka ni ka vakayago bibi duadua ena gauna oqo na vanua ko Saioni, au a vakatataro kina vua na Turaga me baleta eso tale na ikuri ni itukutuku me baleta na nodra vakasoqoni vata na Yalododonu, kei na voli ni qele, kei na veika tale eso.”

    1–6, Ena yaco na siga ni veicudruvi vei ira na dau caka ca; 7–12, Sa soli na ivakatakilakila ni sa tu na vakabauta; 13–19, Era na cakitaka na vakabauta ko ira sa dauveibutakoci e lomadra ka ra na viritaki yani ki na drano bukawaqa; 20, Ia ko ira sa yalodina era na rawata e dua na ivotavota vakawa ena vuravura vakamataliataki oqo; 21, E se bera ni vakatakilai mai e dua na itukutuku taucoko ni veika a yaco ena Ulunivanua ni Veivakamataliataki; 22–23, Era na ciqoma o ira sa talairawarawa na veika vuni ni matanitu; 24–31, Me voli na qele me ivotavota vakawa mai Saioni; 32–35, Sa lewa na Turaga me yaco na veivaluvaluti, ia era na veivakamatei vakaira na tamata dau caka ca; 36–48, Me ra soqoni vata ki Saioni na Yalododonu ka soli ilavo me tara cake kina; 49–54, Sa vakadeitaki tu ni ra na vakalougatataki ko ira na yalodina, ena iKarua ni Lako Mai, ena Tucake Tale, ka vakakina ena Mileniumi; 55–58, Oqo na siga ni veivunauci; 59–66, Era sa cavuta walega na yaca ni Turaga ko ira era vakayagataka ni sega ni tu vei ira na kena dodonu.

    Wase 64

    Na veika sa vakatakilai yani mai vei Josefa Simici na Parofita me tukuni vei ira na italatala qase ni Lotu, mai Katiladi, e Oaio, ena 11 ni Sepiteba, 1831. Sa vakavakarau na Parofita me lako ki Airame, Oaio, me tosoya tale na nona vakadewataka na iVolatabu, ka sa mai tu vakawawa mada ni a tiko mai Misuri. Era sa maqusa tiko e dua na ilawalawa turaga era a vakaroti me ra lako ki Saioni (Misuri) me ra na cavutu ena Okotova. A ciqomi na ivakatakila ena gauna osooso oqori.

    1–11, Era sa vakaroti na Yalododonu me ra dauveivosoti vakai ira, kevaka e sega, ena tiko ga kei ira na ivalavala ca levu cake; 12–22, Me ra na kau mai ki na mataveilewai ni Lotu ko ira sa sega ni veivutuni; 23–25, Ko ira sa saumi ikatini, era na sega ni vakamai ena siga sa lako mai kina na Turaga; 26–32, Era sa vakasalataki na Yalododonu ena vuku ni dinau; 33–36, Era na muduki tani mai na vanua ko Saioni ko ira sa veisaqasaqa; 37–40, Ena lewai ira na veimatanitu na Lotu; 41–43, Ena seraka mai ko Saioni.

    Wase 65

    Na veika sa vakatakilai yani ena masu mai vei Josefa Simici na Parofita mai Airame, Oaio, ena 30 ni Okotova, 1831.

    1–2, Sa soli na idola ni matanitu ni Kalou vua na tamata e vuravura, ka na qaqa na inaki ni kosipeli; 3–6, Ena vakaduavatataki na matanitu milinieli vakalomalagi kei na matanitu ni Kalou e vuravura.

    Wase 66

    Na veika sa vakatakilai yani mai vei Josefa Simici na Parofita mai Airame, Oaio, ena 29 ni Okotova, 1831. A vakatakekere vuni vua na Turaga o Viliame E. Makilelini me vakatakila mai vua na Parofita na isau ni lima na taro, ka sega tiko ni kila o Josefa Simici. Ena kerekere nei Makilelini, a vakatataro kina na Parofita vua na Turaga ka ciqoma na ivakatakila oqo.

    1–4, Na veiyalayalati tawavakaiyalayala sai koya na taucoko ni kosipeli; 5–8, Me ra vunau, vakadinadina, ka vakamacala vei ira na tamata na italatala qase; 9–13, Na cakacaka vagumatua ena veiqaravi vakalotu ena vakadeitaki kina na noda ivotavota vakawa ena bula tawamudu.

    Wase 67

    Na veika sa vakatakilai yani mai vei Josefa Simici na Parofita mai Airame, Oaio, ena itekivu ni Noveba, 1831. A yaco oqo donuya e dua na gauna ni koniferedi bibi, sa vakasamataki ka veivosakitaki tiko na kena tabaki na ivakatakila eso sa ciqoma oti na Parofita (raica na ulutaga ni wase 1). Se qai tauyavutaka wale toka o Viliame W Felepi na vale ni tabaivola ni Lotu e Inidipenideni, Misuri. Sa mani lewai ena koniferedi me taba na ivakatakila ena Book of Commandments [iVola ni iVakaro] ka tabaki e 10,000 na ilavelave (ia a qai vakalailaitaki sobu ki na 3,000 ena vuku ni so na dredre a sega ni laurai taumada). Era a wasea kina na nodra ivakadinadina e vuqa na turaga ni ra sa ka dina sara na ivakatakila era sa vakasokumuni vata ena gauna oya me tabaki, me vaka sa vakadinadinataka na Yalo Tabu ka soli vei ira. A volai ena itukutuku makawa kei Josefa Simici ni oti na kena ciqomi na ivakatakila ka sa kilai tu me wase 1, a qai vakayacori eso na veivosaki me baleta na ivosavosa e vakayagataki ena ivakatakila. Sa qai muria mai na veika e vakatakilai oqo.

    1–3, Sa rogoca na Turaga na nodra masu ka dau wanonovi ira tiko na Nona italatala qase; 4–9, Sa bolea na Turaga o koya na tamata sa vuku duadua, me vola mada e dua na ivakatakila me tautauvata kei na Nona ivakatakila sa lailai duadua; 10–14, Ena vakabulabulataki ira na italatala qase ni lotu yalodina na Yalo, ka ra na raica na mata ni Kalou.

    Wase 68

    Na veika sa vakatakilai yani mai vei Josefa Simici na Parofita mai Airame, Oaio, ena 1 ni Noveba, 1831, me isau ni masumasu me vakatakilai na lomana na Turaga me baleti iratou o Osoni Aidi, Luke S. Jonesoni, Laimeni E. Jonesoni kei Viliame E. Makilelini E dina ni a vagolei e dua na iwase ni ivakatakila oqo ena vukudratou na lewe va na turaga oqo, e vuqa na lewena e baleta na Lotu raraba. A qai vakarabailevutaki na ivakatakila oqo ena veidusimaki nei Josefa Simici ena kena tabaki na itabataba ni Vunau kei na Veiyalayalati ni 1835.

    1–5, Sa vakatokai me ivolanikalou na vosa era tukuna na italatala qase ni lotu ena veivakauqeti ni Yalo Tabu; 6–12, Me ra vunau ka veipapitaisotaki na italatala qase, ena qai soli na ivakatakilakila vei ira sa vakabauta vakaidina; 13–24, Me ra taura na itutu vaka- Bisopi Vakatulewa ko ira na tagane ulumatua ena kawa i Eroni, (oya, me ra taura na idola vakaveiliutaki ni ra bisopi) ena nodratou veidusimaki na Mataveiliutaki Taumada; 25–28, Era sa vakaroti na itubutubu me ra vakavuvulitaka na kosipeli vei ira na luvedra; 29–35, Me ra vakarokorokotaka na Yalododonu na Siga ni Vakacecegu, dau cakacaka vagumatua ka daumasu.

    Wase 69

    Na veika sa vakatakilai vei Josefa Simici na Parofita mai Airame, Oaio, ena 11 ni Noveba, 1831. Na kena biu vata na ivakatakila ka nakiti me tabaki taumada, sa mai vakadonui ena koniferedi ni 1–2 ni Noveba. Ena 3 ni Noveba, sa mai vakuri ka vakatokai me Ai Kuri na ivakatakila sa koto eke ena wase 133. A sa lesi oti tu o Oliva Kaudari me kauta na veika sa volai rawa tu oqo ena kena sa biu vata na ivakatakila kei na ivakaro ki Inidipenideni e Misuri, me la’ki tabaki kina. Me kauta tale ga na ilavo sa kumuni tu me vukea na kena tarai cake na Lotu mai Misuri. Na ivakatakila oqo e vakaroti kina o Joni Witima me salavata kei Oliva Kaudari ka dusimaki talega kina o Witima me lako voli ka sokumuna tiko na veika eso ena nona ilesilesi vakadaunitukutuku makawa ni Lotu ka vunivola.

    1–2, Me tomani Oliva Kaudari yani ki Misuri ko Joni Witima; 3–8, Me na vunau talega ko koya ka kumuna vata na itukutuku, ka vola na itukutuku makawa eso.

    Wase 70

    Na veika sa vakatakilai vei Josefa Simici na Parofita mai Airame, Oaio, ena 12 ni Noveba, 1831. E tukuni ena nona itukutuku makawa na Parofita ni a yaco e va na koniferedi mai na imatai ki na 12 ni Noveba. Ena iotioti ni veisoqoni oqo a vakasamataki kina na bibi ni ivakatakila eso ka ra qai tabaki e muri me Book of Commandments [iVola ni iVakaro], qai vakatokai e muri me Vunau kei na Veiyalayalati. A qai soli na ivakatakila oqo ni sa vakadonui ena koniferedi ni ivakatakila eso oya sa “tautauvata ki na Lotu kei na iyau kecega ni Vuravura taucoko.” Na itukutuku makawa kei Josefa Simici e vakatoka na ivakatakila eso oqori “na yavu ni Lotu ena veisiga e muri oqo, ka sa yaga vakalevu sara ki vuravura, sa vakaraitaki kina ni sa soli tale ki na tamata na idola ni veika vuni ni nona matanitu na noda iVakabula.”

    1–5, Era sa lesi na dauveiqaravi me ra vola na veika sa vakatakilai; 6–13, Ena kilikili kaya na kena isau ko koya sa oga ena veika vakayalo; 14–18, Me ra vakatautauvatataki na Yalododonu ena veika vakayago.

    Wase 71

    Na veika sa vakatakilai vei Josefa Simici na Parofita kei Sidini Rikitoni mai Airame, Oaio, ena 1 ni Tiseba, 1831. Sa vakuria na Profita na nona vakadewataka na iVolatabu, ka nona vunivola ko Sidini Rikitoni me yacova ni sa ciqomi na ivakatakila oqo, sa mani tu mada kina vakawawa me rawa ni rau qarava mada na ivakaro sa koto. Me rau na lako na turaga oqo ka vunau me rau walia na maliwa ca sa basika ka saqati kina na Lotu, ka vu mai ena kena tabaki eso na ivola a vola ko Esera Buci, e dua ka sa vuki tani mai na Lotu.

    1–4, Erau sa talai ko Josefa Simici kei Sidini Rikitoni me rau vunautaka na kosipeli; 5–11, Era na vakamaduataki na meca ni Lotu.

    Wase 72

    Na veika sa vakatakilai yani mai vei Josefa Simici na Parofita mai Katiladi, Oaio, ena 4 ni Tiseba, 1831. Era sa soqoni vata mai e vuqa na italatala qase kei na lewenilotu me ra vulica na nodra itavi ka vakatataki cake ena ivakavuvuli ni Lotu. Na iwase oqo e biu vata kina e tolu na ivakatakila ka ratou ciqomi vata ena dua na siga. Na tikina e 1 ki na 8 e vakatakilai kina na nona kacivi ko Niueli K. Witini me bisopi. Oti oya sa qai kacivi ka tabaki, ka sa qai ciqomi na tikina e 9 ki na 23, ka soli kina na ikuri ni itukutuku me baleta na nona itavi e dua na bisopi. Sa qai soli na tikina e 24 ki na 26, me idusidusi ni kena vakasoqoni vata ki Saioni.

    1–8, Me ra tukunikataka na italatala qase na itukutuku ni nodra veiqaravi, ki vua na bisopi; 9–15, Me na vakatawana na bisopi na lololo ka dau raici ira na dravudravua kei ira era vakaleqai tu; 16–26, Me ra vakadinadinataka na bisopi na kilikili ni nodra bula na italatala qase.

    Wase 73

    Na veika sa vakatakilai vei Josefa Simici na Parofita kei Sidini Rikitoni mai Airame, Oaio, ena 10 ni Janueri, 1832. Me tekivu mai na itekivu ni Tiseba sa oti, erau sa vunau voli kina na Parofita kei Sidini, ia ena vuku ni ka oqo sa rawa kina me seyavu yani na yalo ca ka sa tubu cake tiko mai me baleta na Lotu (raica na ulutaga ni wase 71).

    1–2, Me ra na vunau tikoga na italatala qase; 3–6, Me rau vakuria tale tiko ga na vakadewataki ni iVolatabu me yacova ni sa oti ko Josefa Simici kei Sidini Rikitoni.

    Wase 74

    Na veika sa vakatakilai vei Josefa Simici na Parofita mai na Yasayasa vaka-Weini, Niu Ioka ena 1830. Ni se bera mada ga ni tauyavutaki na Lotu, sa tubu tiko na vakatataro me baleta na ivakarau dodonu ni papitaiso, ka vakavuna nona vakasaqara na Parofita na isaunitaro ena ulutaga oqo, e tukuni ena itukutuku makawa kei Josefa Simici ni ivakatakila oqo e ivakamacala ni 1 Korinica 7:14, e dua na ivolanikalou ka dau vakayagataki wasoma me vakadonui kina na nodra papitaiso na gonelalai.

    1–5, A veivakasalataki ko Paula ki na Lotu ena nona gauna me ra kakua ni muria na lawa i Mosese; 6–7, Era sa savasava ko ira na gone lalai ka ra sa vakatabui ena vuku ni Veisorovaki.

    Wase 75

    Na veika sa vakatakilai yani mai vei Josefa Simici na Parofita, mai Emeusi, Oaio, ena 25 ni Janueri, 1832. Na wase oqo e tiko kina e rua na ivakatakila duidui (na kena imatai mai na tikina e 1 ki na 22 kei na kena ikarua ena tikina e 23 ki na 36) ka rau soli ena dua ga na siga. A vakayacori tiko e dua na koniferedi me tokoni ka tabaki kina o Josefa Simici me Peresitedi ni Matabete Levu. E so na italatala qase era a gadreva me ra vulica eso tale na ka me baleta na nodra itavi taumada. A qai tarava mai na veiivakatakila oqo.

    1–5, Era na rawata na bula tawamudu na italatala qase yalodina era na vunautaka yani na kosipeli; 6–12, Masulaka me tiko vei iko na Dauveivakacegui, o koya sa vakavuvulitaka na veika kecega; 13–22, Era na lewai ira era sa sega ni vakabauta na nodra itukutuku ko ira na italatala qase; 23–36, Me ra vukei mai na Lotu na nodra matavuvale na daukaulotu.

    Wase 76

    Na raivotu a soli vei Josefa Simici na Parofita kei Sidini Rikitoni, e Airame, Oaio, ena 16 ni Feperueri, 1832. E tukuni ena itukutuku makawa kei Josefa Simici me ikau ni raivotu oqo: “Ena noqu lesu mai ena koniferedi mai Emeusi, au sa mai tomana tale na vakadewataki ni ivolanikalou. Mai na ivakatakila eso sa ciqomi oti, sa kilai kina ni vuqa na veika bibi e baleta na nodra vakabulai na tamata e sa kau tani mai na iVolatabu, se sa yali ena gauna e sa bera ni biu vata kina. Ia sa macala vakasigalevu mai na veika dina e sa vo toka, ni kevaka ena sauma na Kalou vua na tamata me vaka na nona ivalavala ena bula oqo, na vosa ‘Lomalagi,’ me vaka na kena inaki, me nodra vale tawamudu na Yalododonu, e dodonu me tiko kina e vuqa na matanitu ka sega ni dua ga. O koya, … ni keirau vakadewataka tiko na Kosipeli sa vola ko Joni, keirau qai raica kei Elder Rikitoni na raivotu oqo.” Ena gauna e soli mai kina na raivotu oqo, a vakadewataka tiko na Parofita na Joni 5:29.

    1–4, E Kalou ko koya na Turaga; 5–10, Ena vakatakilai na veika vuni ni matanitu vei ira kecega sa yalodina tiko; 11–17, Era na tucake tale mai na mate na tamata kecega, ko ira na yalododonu kei ira na sega ni yalo dodonu; 18–24, Sa yaco rawa me ra luve ni Kalou ko ira na kai vuravura ena vuku ni Veisorovaki nei Jisu Karisito; 25–29, A lutu tani e dua na agilosi ni Kalou ka sa yaco me tevoro; 30–49, Era na cudruvi me tawamudu na luve ni veivakarusai; ia ko ira na kena vo era na rawata na ivakatagedegede ni veivakabulai eso; 50–70, Sa vakamacalataki na kedra lagilagi kei na veika era na rawata ko ira era na vakacerecerei ena matanitu silesitieli; 71–80, Sa vakamacalataki ko ira era na rawata na matanitu vakateresitieli; 81–113, Sa vakamacalataki na kedra ituvaki ko ira sa tiko ena lagilagi vakatilesitieli, teresitieli kei na silesitieli, 114–119, Era na raica ka kila na veika vuni ni matanitu ni Kalou ena kaukauwa ni Yalo Tabu ko ira kecega sa yalodina.

    Wase 77

    Na veika sa vakatakilai vei Josefa Simici na Parofita mai Airame, Oaio, rauta na Maji 1832. E tukuni ena itukutuku makawa kei Josefa Simici, “Ni’u sa vakadewataka tiko na iVolanikalou, au qai ciqoma na ivakamacala oqo me baleta na iVakatakila nei Joni.”

    1–4, Era sa vakayalo na manumanu ni vanua ka ra na bula marau ka tawamudu tiko ga ena vuravura tawamate rawa; 5–7, Ena yabaki 7,000 na kena tu e vuravura na tamata vakayago; 8–10, Eso na agilosi era na vakalesuya mai na kosipeli ka mai veiqaravi e vuravura; 11, Na nodra vauci na lewe 144,000; 12–14, Ena lako mai na Karisito ena itekivu ni ikavitu ni udolu ni yabaki; 15, E rua na parofita e rau na vakarautaki me rau lako yani vei ira na matanitu vaka-Jiu

    Wase 78

    Na veika sa vakatakilai yani mai vei Josefa Simici na Parofita, e Katiladi, Oaio, ena 1 ni Maji, 1832. Ena siga oya era a soqoni vata kina na Parofita kei ira na iliuliu tale eso me ra veivosakitaka na bisinisi ni Lotu. Na ivakatakila oqo a vakaroti iratou taumada na Parofita, Sidini Rikitoni, kei Niueli K. Witini me ratou lako ki Misuri ka laki tauyavutaka na sitoa ni Lotu kei na sasaga ni tabaivola ena kena tauyavu e dua na “kabani” ka na raica na veisasaga oqo, vakavurei na ilavo me baleta na kena tauyavu ko Saioni kei na nodra vukei na dravudravua. Na kabani oqo ka vakatokai me Kabani Cokovata a tauyavutaki ena Epereli ni 1832 ka bokoci tale ena 1834 (raica na wase 82). Ena dua na gauna ni oti na kena sa bokoci, ena veidusimaki nei Josefa Simici, sa vakaisosomitaki na malanivosa “na isoqosoqo ni volivolitaki kei na tabaivola” ena malanivosa “na veika me baleta na lololo me yaga vei ira na noqu tamata era dravudravua” ena ivakatakila, ka sosomitaka na vosa “kabani” na vosa “isoqosoqo.”

    1–4, Sa dodonu me ra tauyavutaka na Yalododonu e dua na lololo; 5–12, Era na vakabulai kevaka era lewa vakavuku na nodra iyau; 13–14, Me na tu vakataki koya na Lotu mai na kaukauwa vakavuravura; 15–16, Sa cakacaka ko Maikeli (Atama), ena ruku ni nona vakatulewa na Yalo Savasava (Karisito); 17–22, Era sa kalougata ko ira sa yalodina, ni ra na taukena na ka kecega.

    Wase 79

    Na veika sa vakatakilai yani mai vei Josefa Simici na Parofita mai Airame, Oaio, ena 12 ni Maji, 1832.

    1–4, Sa lesi ko Jereti Kata me vunautaka na kosipeli, me vaka sa vakatakila vua na Dauveivakacegui.

    Wase 80

    Na veika sa vakatakilai yani mai vei Josefa Simici na Parofita vei Sitiveni Baneti mai Airame, Oaio, ena 7 ni Maji, 1832.

    1–5, Erau sa kacivi ko Sitiveni Baneti kei Iteni Simici me rau vunau yani ki na vanua ga erau vinakata.

    Wase 81

    Na veika sa vakatakilai yani mai vei Josefa Simici na Parofita mai Airame, Oaio, ena 15 ni Maji, 1832. Sa kacivi ko Veretariki G. Viliame me bete levu ka daunivakasala ena Mataveiliutaki ni Matabete Levu. E tukuni ena kena itukutuku ni gauna a vakatakilai kina na veika oqo ena vula ko Maji, 1832, a lesi kina ko Jese Kasi ki na itutu vakadaunivakasala vei Josefa Simici ena Mataveiliutaki. Ia ni sa sega tiko ni veisotari kei na itutu e kacivi kina na nona ivalavala, sa mani tokitaki mai vua ka soli vei Veretariki G. Viliame. E ganita me okati me itekivu ni Mataveiliutaki Taumada ni Lotu na ivakatakila oqo (ena Maji, 1832), ni a gadrevi kina vakabibi na ilesilesi oqo ena ilawalawa oya, ka vakamacalataki kina na dokai ni ilesilesi ko ya. A veiqaravi toka ena dua na gauna o Baraca Kasi, ia a mani qai muduki tani mai na Lotu ena Tiseba, ni 1832. Sa qai tabaki ki na itutu oqo ko Veretariki G. Viliame ena 18 ni Maji, 1833.

    1–2, Sa na dau tu ga na idola ni matanitu vei iratou na Mataveiliutaki Taumada; 3–7, Ena rawata na bula tawamudu ko Veretariki G. Viliame kevaka sa yalodina tiko ga.

    Wase 82

    Na ivakatakila sa soli vei Josefa Simici na Parofita, mai Inidipenideni ena Yasayasa vaka-Jekesoni e Misuri, ena 26 ni Epereli, 1832. A vakayacori tiko e dua na bose ni bete levu kei na italatala qase ni Lotu. Ena bose oqori a tokoni kina o Josefa Simici me Peresitedi ni Matabete Levu, oqo na itutu sa tabaki oti kina ena dua na nodra koniferedi na bete levu, kei na italatala qase, kei ira na lewenilotu, e Emeusi, Oaio, ena 25 ni Janueri, 1832 (raica na ulutaga ni wase 75). Na ivakatakila oqo e tokaruataki kina na idusidusi a soli ena dua na ivakatakila e liu (wase 78) me tauyavutaki e dua na isoqosoqo—me vakatokai na Kabani Cokovata (ena veidusimaki nei Josefa Simici, a qai vakaisosomitaki e muri na vosa “kabani” ena vosa “isoqosoqo”)—me cicivaki kina na sitoa ni Lotu kei na kena sasaga ni tabaivola.

    1–4, Ko koya sa soli vakalevu vua, ena gadrevi vakalevu vua; 5–7, Sa takavi vuravura vakalevu na butobuto; 8–13, Ena vakayacora na nona yalayala na Turaga kevaka eda sa muria na veika e tukuna; 14–18, Ena torocake tiko ga na totoka kei na lagilagi kei Saioni; 19–24, Me vukea na wekana na tamata yadua.

    Wase 83

    Na veika sa vakatakilai yani mai vei Josefa Simici na Parofita mai Inidipenideni, Misuri, ena 30 ni Epereli, 1832. A ciqomi na ivakatakila oqo ni a bose tiko kei ira na nona itokani na Parofita ena veiliutaki ni lotu.

    1–4, Sa tu na dodonu vei ira na yalewa kei na gone vei ira na watidra kei na tamadra ena ka me ra bula kina; 5–6, Sa tu na dodonu vei ira na dawai kei ira na luveniyali ki na Lotu me qaravi ira.

    Wase 84

    Na ivakatakila sa soli yani mai vei Josefa Simici na Parofita mai Katiladi, Oaio, ena 22 kei na 23 ni Sepiteba, 1832. Ena vula ko Sepiteba, era sa tekivu tadu lesu tale tiko yani na italatala qase ka ra kaulotu ki na veivanua mai na tokalau me ra laki solia na itukutuku ni nodra veiqaravi. A ciqomi na itukutuku oqo ena nodra tiko vata ena gauna ni marau oqo. Sa mani lewa kina na Parofita me sa ivakatakila me baleta na matabete.

    1–5, Me na tara ko Jerusalemi Vou kei na valetabu mai Misuri; 6–17, Sa tuvai na ilesilesi vakabete, me tekivu vei Mosese ka kauta lesu ki vei Atama; 18–25, Sa tiko ena matabete cecere na idola ni nona kilai na Kalou; 26–32, Sa tiko ena matabete lailai na idola ni nodra veiqaravi na agilosi kei na kosipeli ni vakavakarau; 33–44, Era na rawata na bula tawamudu ko ira na tamata ena bubului kei na veiyalayalati ni matabete; 45–53, Sa vakararamataki ira na tamata na Yalo i Karisito, a ra sa bula ivalavala ca na lewei vuravura; 54–61, Me ra vakadinadinataka na yalododonu na veika era sa ciqoma; 62–76, Me ra vunautaka yani na kosipeli, ka na qai muri mai na ivakatakilakila; 77–91, Me ra kakua ni kau ilavo se taga ivaqa ko ira na italatala qase ni ra sa lako yani, ia ena vakaceguya na nodra leqa na Turaga; 92–97, Sa waraki ira tu o ira era na sega ni ciqoma na kosipeli na mate veitauvi kei na veicudruvi; 98–102, Sa soli mai na sere vou ni kena vakabulai ko Saioni; 103–110, Na tamata yadua me vakayacora na nona itavi me vaka na ilesilesi sa kacivi kina; 111–120, Me ra vunautaka yani na italai ni Turaga na veika vakasisila kei na veivakarusai ena yaco ena veisiga mai muri.

    Wase 85

    Na ivakatakila sa soli yani mai vei Josefa Simici na Parofita mai Katiladi, Oaio, ena 27 ni Noveba, 1832. E tauri na wase oqo mai na nona ivola na Parofita vei Viliame W. Felepi ka sa vakaitikotiko mai Inidipenideni e Misuri. A sauma na vakatataro me baleti ira na Yalododonu era sa toki ki Saioni ia era a sega ni muria na ivakaro me ra vakatabuya na iyauqaqa era taukena ka ra se bera kina ni ciqoma na nodra ivotavota vakawa me vaka na kena ivakarau tudei ena Lotu.

    1–5, Me na ciqomi na ivotavota vakawa mai Saioni ni sa vakatabui mai; 6–12, Ena solia vei ira na Yalododonu mai Saioni na nodra ivotavota vakawa e dua sa kaukauwa ka qaqa.

    Wase 86

    Na ivakatakila sa soli yani mai vei Josefa Simici na Parofita mai Katiladi, Oaio, ena 6 ni Tiseba, 1832. A vakaraitaki vua na Parofita na veika oqo ena gauna e vakadodonutaki tiko kina na ivakadewa ni i Vola Tabu.

    1–7, Sa tukuna na Turaga na ibalebale ni vosa vakatautauvata ni sila vinaka kei na sila ca; 8–11, Sa vakamacalataka na veivakalougatataki ni matabete ki vei ira era na taura ni ra sa kena kawa dina, me vaka na veika vakayago.

    Wase 87

    Na ivakatakila kei na parofisai ni ivalu, sa soli yani mai vei Josefa Simici na Parofita, mai Katiladi se voleka kina, ena 25 ni Tiseba 1832. Ena gauna oqo sa labuebue voli kina na veiletitaki ni veivakabobulataki e Amerika kei na nona sega ni vinakata tiko na yasana o Ceva kei Karolaina me solia e dua na ivakacavacava ki na matanitu o Amerika. E tukuni ena itukutuku makawa kei Josefa Simici ni sa “laurai levu tiko mai na veilecalecavi ena veimatanitu” vua na Parofita, “ni vakatauvatani ki na gauna sa tekivuna kina na Lotu na kena ilakolako tani mai na lekutu.”

    1–4, Sa tukuni na nodrau na vala na Veiyasana ena Vualiku kei na Veiyasana ena Ceva; 5–8, Era na sota kaya na veika rarawa lelevu ko ira na kai vuravura.

    Wase 88

    Na ivakatakila sa soli yani mai vei Josefa Simici na Parofita mai Katiladi, Oaio, ena 27 kei na 28 ni Tiseba 1832, kei na 3 ni Janueri, 1833. Sa vakatoka na Parofita me “‘drau ni olive’ … sa beti mai na Kau ni Parataisi, na nona itukutuku ni veivakacegui na Turaga ki vei keda.” A soli na ivakatakila ni oti na nodra masumasu “yadua kei na masu ena domolevu vua na Turaga me vakatakila na lomana me baleta na kena tarai cake ko Saioni,” ena dua na koniferedi.

    1–5, Era na rawata na Yalododonu yalodina na Dauveivakacegui, sai koya na yalayala ni bula tawamudu; 6–13, Sa liutaki ka lewai na ka kecega ena rarama i Karisito; 14–16, Sa yaco rawa na Tucake Tale ena vuku ni Veivueti; 17–31, Na nodra talairawarawa ki na lawa vakasilesitieli, teresitieli se na tilesitieli, sa na vakarautaki ira na tamata ki na veimatanitu oqori; 32–35, Era na dukadukali tiko ga ko ira sa lomadra me ra ia tiko na ivalavala ca; 36–41, Sa tu na lawa me cicivaki kina na veimatanitu kecega; 42–45, Sa virikotora na Kalou na lawa ni veika kecega; 46–50, Sa na qai kila na Kalou na tamata; 51–61, Na vosa vakatautauvata ni dua na itaukei ni were sa talai ira na nona tamata ki na were, ka qai sikovi ira yani; 62–73, Toro voleka yani vua na Turaga, ko na qai raica na Matana; 74–80, Dou vakatabui kemudou ka veivakavulici vakai kemudou ena ivakavuvuli ni matanitu; 81–85, Na tamata yadua sa rogoca na vunau, me vunauci ira sara na wekana; 86–94, Sa vakaraitaki na nona lesu mai na Turaga ena yaco ni ivakatakilakila e so, na tavuki ni vanua kei na agilosi; 95–102, Era sa tucake veitaravi mai na sa mate ena domo ni nodra davui na agilosi; 103–116, Sa tukuni tale ga ena domo ni nodra davui na agilosi na vakalesui mai ni kosipeli, na lutu nei Papiloni, kei na nona ivalu na Kalou levu; 117–126, Dou segata sara mo dou vuli ka kila ka; dou tauyavutaka na vale ni Kalou (na valetabu) ka mo dou vakaisulutaki kemudou ena ivau ni loloma uasivi; 127–141, Sa virikotori na ivakarau ni nodra Koronivuli na Parofita, kei na cakacaka vakalotu ni veivui yava.

    Wase 89

    Na ivakatakila sa soli yani mai vei Josefa Simici na Parofita mai Katiladi, Oaio, ena 27 ni Feperueri, 1833. Me vaka ni ra dau vakatavako na turaga ena Lotu ena nodra gauna ni soqoni, sa mani vakasamataka sara vakabibi na tikina oqo na Parofita; a mani taroga kina na Turaga ena vuku ni tikina oqo. A qai soli mai kina na ivakatakila oqo, ka vakatokai me Vosa ni Vuku.

    1–9, Sa vakatabui na vakayagataki ni waini, na gunu kaukauwa, tavako, kei na gunu katakata; 10–17, Sa soli tu na drau ni kau, na vuana, na lewe ni manumanu kei na sila me yaga vei ira na tamata kei na manumanu; 18–21, Na talairawarawa ki na lawa ni kosipeli, ka okati kina na Vosa ni Vuku, e kauta mai na veivakalougatataki vakayago ka vakayalo talega.

    Wase 90

    Na ivakatakila vei Josefa Simici na Parofita, ka a soli mai Katiladi e Oaio, ena 8 ni Maji, 1833. Na ivakatakila oqo e tomani tiko ga kina na ikabakaba ni kena tauyavu na Mataveiliutaki Taumada (raica na ikau ni wase 81); ena vuku ni ivakatakila oqo erau a tabaki kina na daunivakasala ka a vakatakilai mai kina ena 18 ni Maji, 1833.

    1–5, Sa soli vei Josefa Simici na idola ni matanitu, ka na qai dewa yani mai vua ki na Lotu; 6–7, Me rau na veiqaravi ena Mataveiliutaki Taumada ko Sidini Rikitoni kei Veretariki G. Viliame; 8–11, Me vunautaki yani na kosipeli vei ira na kawa i Isireli, ko ira na Matanitu Tani kei ira na Jiu, ka me ra rogoca ena nodra dui vosa; 12–18, Sa itavi nei Josefa Simici kei rau na nona daunivakasala me ratou lewa vakavinaka na cakacaka ni Lotu; 19–37, Sa tau na ivakaro ni Turaga ki vei ira eso me ra lako vakadodonu ka veiqaravi ena Nona matanitu.

    Wase 91

    Na ivakatakila sa soli yani mai vei Josefa Simici na Parofita mai Katiladi e Oaio, ena 9 ni Maji 1833. A oga voli na Parofita ena gauna oqo ena nona vakadewataka tiko na Veiyalayalati Makawa. Ia ni sa yacova na ivola makawa eso ka vakatokai na Apokirifa, sa taroga vua na Turaga, ka ciqoma kina na ivakaro oqo.

    1–3, Sa dodonu vakavinaka na vakadewataki ni Apokirifa ia era lewena tu e levu na itukutuku sega ni dina ka vola ga na tamata; 4–6, Ena yaga vei ira era sa vakararamataki mai na Yalo.

    Wase 92

    Na veika sa vakatakilai vei Josefa Simici na Parofita mai Katiladi e Oaio, ena 15 ni Maji 1833. Na ivakatakila oqo e vakaroti kina o Veretariki G. Viliame ka sa qai lesi wale ga me daunivakasala vei Josefa Simici, ena nona itavi ena Kabani Cokovata (raica na ulutaga ni wase 78 kei na 82).

    1–2, Sa solia na Turaga e dua na ivakaro e baleta na curu ki na isoqosoqo cokovata.

    Wase 93

    Na ivakatakila sa soli yani mai vei Josefa Simici na Parofita mai Katiladi e Oaio, ena 6 ni Me 1833.

    1–5, Era na raica na Turaga ko ira kecega sa yalodina; 6–18, Sa vakadinadinataka ko Joni ni sa tubucake tikoga na Luve ni Kalou mai na iloloma soli wale ki na iloloma soli wale, me yacova ni sa rawata na taucoko ni lagilagi nei Tamana; 19–20, Era na rawata talega na taucoko ni Nona lagilagi ko ira na tamata yalodina ka ra tubu mai na iloloma soli wale ki na iloloma soli wale; 21–22, Era sa lewe ni nona Lotu na Ulumatua ko ira sa sucu vou ena vukui Karisito; 23–28, Sa rawata ko Karisito na taucoko ni ka dina, ka na vakakina na tamata ena talairawarawa; 29–32, Sa tiko vata na tamata kei na Kalou mai na ivakatekivu; 33–35, Sa tawamudu na veika e dau yaco, ia sa rawa ni vuabale na marau ni tamata ena Tucake Tale; 36–37, Na lagilagi ni Kalou na vuku; 38–40, Era sa savasava na gonelalai ena mata ni Kalou ena vuku ni nona veivueti na Karisito; 41–53, Era sa vakaroti na qase ni lotu me ra vakavulici ira vinaka na lewe ni nodra matavuvale.

    Wase 94

    Na ivakatakila sa soli yani mai vei Josefa Simici na Parofita mai Katiladi e Oaio, ena 2 ni Okosita, 1833. Eratou sa lesi ko Airame Simici, Rinoli Kauni kei Jereti Kata me ratou Komiti ni Taravale ena Lotu.

    1–9, Na ivakaro e solia na Turaga me baleta na tara ni vale ni nodratou cakacaka na Mataveiliutaki; 10–12, Me na tara e dua na vale ni tabaivola; 13–17, Sa soli na ivotavota vakawa e so.

    Wase 95

    Na ivakatakila sa soli yani mai vei Josefa Simici na Parofita mai Katiladi e Oaio, ena 1 ni June, 1833. Na ivakatakila oqo e tomani kina na veidusimaki vakalou me tara e dua na vale ni sokalou kei na veidusimaki, na vale ni Turaga (raica na wase 88:119–136).

    1–6, Era sa cudruvi na Yalododonu ni ra sa sega ni tara rawa na vale ni Turaga; 7–10, Sa gadreva na Turaga me taurivaki na Nona vale me ra vakalougatataki kina ena kaukauwa mai lomalagi ko ira na Nona tamata; 11–17, Me vakatabui na vale me vale ni sokalou ka nodra koronivuli na iapositolo.

    Wase 96

    Na ivakatakila sa soli vei Josefa Simici na Parofita, ka vakaraitaki kina na ivakarau ni koro levu se na iteki ko Saioni mai Katiladi e Oaio, ena 4 ni June, 1833, a soli me ivakaraitaki vei ira na Yalododonu e Katiladi. A yaco ena gauna ni nodra koniferedi na bete levu, ka a ulutaga bibi ni veivosaki na vakayagataki ni qele ka yacana na iteitei na French, ka taukena na lotu volekati Katiladi. Era a sega ni duavata rawa ena koniferedi se ko cei me taura, ka ra mani taroga vua na Turaga.

    1, Me vakabulabulataki na iteki kei Saioni mai Katiladi; 2–5, Me wasea na bisopi na nodra ivotavota vakawa na Yalododonu; 6–9, Me curu me lewe ni soqosoqo cokovata ko Joni Jonesoni.

    Wase 97

    Na ivakatakila sa soli yani mai vei Josefa Simici na Parofita mai Katiladi e Oaio, ena 2 ni Okosita 1833. Sa golevi vakabibi ena ivakatakila oqo na veika e baleti ira na Yalododonu e Saioni, ena yasayasa vaka-Jekesoni mai Misuri, me isau ni nona vakatataro na Parofita vua na Turaga me baleta na itukutuku. Era sa vosa vakacacataki sara na lewe ni Lotu mai Misuri ena gauna oqo, ia ena 23 ni Julai 1833, era sa vakasaurarataki kina me ra sainitaka na veiyalayalati me ra na vagalala tani mai na yasayasa vaka-Jekesoni.

    1–2, Era sa vakalougatataki e vuqa na Yalododonu e Saioni (na yasayasa vaka-Jekesoni, Misuri) ena vuku ni nodra yalodina; 3–5, Sa vakacaucautaki ko Pali P. Pereta ena vuku ni nona cakacaka ena koronivuli mai Saioni; 6–9, Sa vakadonui ira sa taqomaka na nodra veiyalayalati, na Turaga; 10–17, Me tara mai Saioni e dua na vale me ra raica kina na Kalou ko ira sa savasava na lomadra; 18–21, O Saioni sai ira ka sa savasava na lomadra; 22–28, Ena calati Saioni na veitotogitaki ni Turaga kevaka sa yalodina tiko.

    Wase 98

    Na ivakatakila sa soli yani mai vei Josefa Simici na Parofita mai Katiladi e Oaio, ena 6 ni Okosita 1833. A yaco mai na ivakatakila oqo ena vuku ni nodra sa vakacacani tiko na Yalododonu e Misuri. Na nodra sa tawana yani vakalevu na lewe ni Lotu na vanua o Misuri sa vakaleqai ira eso na tawavanua, sa vakavuna nodra nuiqawaqawa na kedra iwiliwili na Yalododonu, na veivakauqeti vakapolitiki kei na bula vakailavo, kei na duidui ni itovo kei na lotu. Ena Julai ni 1833 era a vakarusa kina e dua na ilawalawa dauvakacaca e dua na iyauqaqa taukeni ni Lotu, boro kuluta qai vakavutinimanumanutaki e rua na lewe ni Lotu, ka ra vakarota me ra biuta na Yasayasa vaka-Jekesoni na Yalododonu. E dina ni sa rairai rogo beka yani na itukutuku ni leqa mai Misuri vua na Parofita ki Katiladi (e ciwa na drau na maile na kena yawa), sa rawa wale ga ni la’ki kila na kena bibi dina ena gauna oqo, mai na veika e vakatakilai vua.

    1–3, Era na vinaka cake na Yalododonu ena vuku ni veika rarawa era sota kaya; 4–8, Me ra muria na Yalododonu na lawa ni vanua; 9–10, Me ra digitaki me ra vakailesilesi na tamata yalodina, vuku ka vinaka ena matanitu; 11–15, Era na rawata na bula tawamudu ko ira era sa solia na nodra bula ena cakacaka ni Turaga; 16–18, Mo dou cata sara na ivalu ka vunautaka na veisaututaki; 19–22, Era sa vunauci na Yalododonu mai Katiladi ka vakaroti me ra veivutuni; 23–32, Sa vakatakila na Turaga na Nona lawa ka lewai kina na veivakacacani kei na veivakararawataki ka vakayacori vei ira na Nona tamata; 33–38, Sa qai dodonu ga me yaco na ivalu kevaka sa vakarota na Turaga; 39–48, Me ra vosoti ira na nodra meca ko ira na Yalododonu, ia ko ira oqori, kevaka era sa veivutuni ena sega ni tau vei ira na cudru ni Turaga.

    Wase 99

    Na ivakatakila sa soli yani mai vei Josefa Simici na Parofita me baleti Joni Modoki, ena 29 ni Okosita 1832, e Airame, Oaio. Sa sivia na dua na yabaki na nona vunautaka voli o Joni Modoki na kosipeli ena gauna vata era tiko kina kei na veimatavuvale eso mai Oaio na luvena—sa mai sega tu na tinadra ena nona sa mate na watina, o Julia Kelepi, ena Epereli 1831.

    1–8, Sa lesi ko Joni Modoki me vunautaka na kosipeli, ia ko ira sa vakabauti koya era sa vakabauta na Turaga, era na rawata na loloma cecere.

    Wase 100

    Na veika sa vakatakilai vei Josefa Simici na Parofita kei Sidini Rikitoni, mai Perisibaqi, Niu Ioka, ena 12 ni Okotova 1833. Erau sa biuta tu vakadede na nodrau veivale na lewe rua oqo, ka rau sa nanumi ira vakalevu.

    1–4, Me rau vunautaka yani na kosipeli ko Josefa kei Sidini me ra vakabulai kina na yalo; 5–8, Ena vakatakilai vei rau na ka me rau tukuna ena kena auwa; 9–12, Sa na gusu ni vosa vei rau ko Sidini, ia ko Josefa me dauvakatakila ka na laulau sara na nona ivakadinadina; 13–17, Ena vakatubura cake na Turaga e dua na matatamata savasava, ka ra na vakabulai ko ira sa talairawarawa.

    Wase 101

    Na ivakatakila sa soli vei Josefa Simici na Parofita, mai Katiladi, Oaio, ena 16 kei na 17 ni Tiseba 1833. Ena gauna oqo era sa vakararawataki tiko kina vakalevu na Yalododonu era sa soqoni tiko yani ki Misuri. Era vakasavi tani mai na nodra veivale ena yasayasa vaka-Jekesoni; mai vei ira na ilawalawa dauvakacaca, a ra sa sasaga eso na Yalododonu me ra tauyavutaka na nodra itikotiko ena yasayasa vaka-Van Buren, Lafaeti, kei Rei ia a muri ira voli ga na veivakacacani. Ia na iwase levu ni Yalododonu era sa tiko ena gauna ko ya ena yasayasa vaka-Kilei mai Misuri. Era sa vakarerei vakavuqa me ra na vakamatei ko ira na lewe ni Lotu. Sa vakacacani na nodra iyaya ni lomanivale, na isulu, na manumanu, kei na nodra iyaya vakaitaukei tale eso; ka sa vakacacani e vuqa na vua ni nodra iteitei na Yalododonu mai na Yasayasa vaka-Jekesoni.

    1–8, Era sa cudruvi ka vakararawataki na Yalododonu ena vuku ni nodra talaidredre; 9–15, Ena lutuki ira na veivanua na cudru ni Turaga, ia era na vakasoqoni vata ka vakacegui na Nona tamata; 16–21, Ena tauyavutaki ko Saioni kei na kena vei iteki; 22–31, Sa tukuni na ivakarau ni bula ena Mileniumi; 32–42, Era na kune kalougata ka taura kina na kedra isau na Yalododonu; 43–62, Na vosa vakatakarakara ni turaga kei na vu ni olive, sa i vakaraitaki ni leqa kei na kena vueti ko Saioni; 63–75, Me ra vakasoqoni vata tiko ga yani na Yalododonu; 76–80, Sa virikotora na Turaga na Yavu ni Vakavulewa kei Amerika; 81–101, Me ra cikeva na Yalododonu me vakadodonutaki na ka era rarawataka me vaka na vosa vakatautauvata ni yada kei na turaganilewa sega ni dau lewa vakadodonu.

    Wase 102

    Ai tukutuku ni kena tauyavutaki na imatai ni Matabose e Cake ni Lotu, e Katiladi, Oaio, ena 17 ni Feperueri 1834. Erau a vola taumada na itukutuku ni bose ko ya ko irau na italatala qase Oliva Kaudari kei Osoni Aidi. A railesuva na itukutuku ena siga ka tarava na Parofita, ia ena siga ka tarava era a ciqoma taucoko na lewe ni matabose e cake na itukutuku sa vakadodonutaki me “dua na fomu ka yavu ni vakavulewa ni matabose e cake” ni Lotu. Na tikina e 30 ki na 32, sa baleta na Matabose ni iApositolo Le Tinikarua; a qai vakacurumi yani ena 1835 ena veidusimaki nei Josefa Simici ni vakarautaki tiko na kena tabaki ena Vunau kei na Veiyalayalati na wase oqo.

    1–8, Sa lesi e dua na matabose e cake me vakataulewa ena veileqa bibi eso ka tubu ena Lotu; 9–18, Sa virikotori na ivakarau ni kena rogoci na cala; 19–23, Sa na vakatauca na lewa na peresitedi ni matabose; 24–34, Na sala me muri kevaka e sega ni vakadonui na lewa ni matabose.

    Wase 103

    Na ivakatakila sa soli yani mai vei Josefa Simici na Parofita mai Katiladi, Oaio, ena 24 ni Feperueri 1834. A ciqomi na ivakatakila oqo ni rau sa tadu oti yani ki Katiladi, Oaio, ko Pali P. Pereta kei Laimeni Waiti, ena nodrau ilakolako mai Misuri me ratou mai veivosaki kei na Parofita, me baleta na nodra vukei ka vakalesui na Yalododonu ki na nodra qele mai na yasayasa vaka-Jekesoni.

    1–4, Na vuna ka vakatara kina na Turaga me ra vakararawataki na Yalododonu mai na yasayasa vaka-Jekesoni; 5–10, Era na qaqa tale na Yalododonu kevaka era sa muria na vunau; 11–20, Ena vueti ko Saioni ena kaukauwa, ka na liu na Turaga vei ira na Nona tamata; 21–28, Me ra soqoni vata yani ki Saioni ko ira na Yalododonu, ko ira sa vakayalia na nodra bula era na rawata tale; 29–40, Era sa lesi eso na turaga me ra vakarautaka na Keba mai Saioni ka lako ki Saioni; sa yalataki ni ra na qaqa kevaka era sa yalodina.

    Wase 104

    Na veika sa vakatakilai vei Josefa Simici na Parofita, ena 23 ni Epereli 1834, me baleta na Kabani Cokovata (raica na ulutaga ni wase 78 kei na 82). E rairai ni a yaco tiko e dua na nodra bose na lewe ni Kabani Cokovata, ka veivosakitaki tiko kina na gagadre vakayago ni Lotu. E dua na bose taumada ni kabani ena 10 ni Epereli sa lewai kina me sa na bokoci na kabani. Na ivakatakila oqo e tukuni kina me sa tauyavutaki tale na kabani; me wasei na kena iyauqaqa vei ira na lewe ni kabani me vaka na nodra veiqaravi. Ena veidusimaki nei Josefa Simici, a qai vakaisosomitaki kina na vosa “Kabani Cokovata” ena “iSoqosoqo Cokovata” ena ivakatakila.

    1–10, Era na cudruvi na Yalododonu era talaidredre ki na isoqosoqo cokovata; 11–16, Sa vukei ira na Nona Yalododonu na Turaga ena Nona sala ga; 17–18, Na lawa ni kosipeli e cicivaki kina na nodra vukei na dravudravua; 19–46, Sa lesi na nodra itavi ni veiqaravi kei na nodra veivakalougatataki na qase ni lotu eso; 47–53, Me rau dui cakacaka ga vakataki rau na isoqosoqo cokovata mai Katiladi kei na isoqosoqo mai Saioni; 54–66, Me taurivaki na iyau sa vakatabui vua na Turaga me tabaki kina na ivolanikalou; 67–77, Me taurivaki na iyau raraba ni isoqosoqo cokovata ena veika vakadonui raraba; 78–86, Me ra sauma kece na nodra dinau ko ira na lewe ni isoqosoqo cokovata, ka na qai sereki ira na Turaga mai na nodra leqa vakailavo.

    Wase 105

    Na ivakatakila sa soli yani mai vei Josefa Simici na Parofita, ena bati ni Uciwai ko Fisigi mai Misuri, ena 22 ni June 1834. Ena nona veiliutaki na Parofita, era tayabe kina na Yalododonu mai Oaio kei na veivanua tale eso ki Misuri ena dua na ilakolako a qai vakatokai e muri me Keba kei Saioni. Na nodra inaki me ra na yadravi ira lesu yani na Yalododonu mai Misuri era a vakasavi ki na nodra vanua mai na Yasayasa vaka-Jekesoni. Era sa rere na kai Misuri era a vakacacani ira mada e liu na Yalododonu de na yaco mai na veivorati mai na Keba kei Saioni era sa mani kabai ira e liu eso na Yalododonu era vakaitikotiko ena Yasayasa vaka-Kilei, Misuri. Ni sa vakasuka na kovana mai Misuri na nona yalayala me tokoni ira na Yalododonu, a ciqoma kina o Josefa Simici na ivakatakila oqo.

    1–5, Ena tara cake ko Saioni ena ivakarau ni lawa vakasilesitieli; 6–13, Yaraki vakalailai na vueti kei Saioni; 14–19, Ena vala na Turaga ena ivalu mai Saioni; 20–26, Me ra yalomatua ka kakua ni boletaka na nodra kaukauwa ko ira na Yalododonu ni ra sa soqoni vata tiko; 27–30, Me voli na qele mai Jekesoni kei na veiyasayasa volekata; 31–34, Me ra la’ki ciqoma na italatala qase e dua na nodra edaumeni ena vale ni Turaga e Katiladi; 35–37, Era na vakatabui ko ira na Yalododonu era sa kacivi ka digitaki; 38–41, Me ra vakarewataka na Yalododonu na tawake ni veisaututaki ki vuravura.

    Wase 106

    Na ivakatakila sa soli yani mai vei Josefa Simici na Parofita mai Katiladi, Oaio, ena 25 ni Noveba 1834. Na ivakatakila oqo e vagolei vei Warani A. Kaudari, na tuakai Oliva Kaudari.

    1–3, Sa lesi ko Warani A. Kaudari me vakailesilesi vakatulewa ena vanua e tiko kina; 4–5, Ena sega ni yaco vakidacala mai na iKarua ni Lako Mai, me vaka na daubutako, ki vei ira na gone ni rarama; 6–8, Era na kalougata vakalevu sara ko ira sa yalodina tiko ga ki na Lotu.

    Wase 107

    Na ivakatakila me baleta na Matabete, sa soli yani mai vei Josefa Simici na Parofita mai Katiladi e Oaio, rauta na Epereli ni 1835. E dina ni a volaitukutukutaki na iwase oqo ena 1835, e vakadeitaki ena itukutuku makawa ni levu na tikina mai na 60 ki na 100 e tukuni kina e dua na ivakatakila a soli yani mai vei Josefa Simici ena 11 ni Noveba, 1831. Na iwase oqo e semati ki na kena tauyavutaki na Kuoramu ni iApositolo Le Tinikarua ena Feperueri kei na Maji 1835. E rairai ni a solia na Parofita e matadra o ira era vakarau biubiu tiko ena 3 ni Me, 1835, ena imatai ni nodra ilakolako vakaulotu ni kuoramu.

    1–6, E rua tiko na matabete: na Matabete i Melikiseteki kei na Matabete i Eroni; 7–12, O ira e tu vei ira na Matabete i Melikiseteki e tu vei ira na kaukauwa me ra veiqaravi ena veitutu kece ena Lotu; 13–17, Ena liutaka na Matabete i Eroni na matabisopi, ka nona itavi me qarava na cakacaka vakalotu rawa ni laurai; 18–20, Sa tu ki na Matabete i Melikiseteki na idola ni veivakalougatataki kece sara vakayalo; na Matabete i Eroni e koto kina na idola ni nodra veiqaravi na agilosi; 21–38, Era sa lewe ni kuoramu ni vakatulewa na Mataveiliutaki Taumada, na Le Tinikarua kei na Vitusagavulu, na nodra lewa me na tau ena duavata kei na dodonu; 39–52, Sa vakadewataki mai na ivakarau vakapeteriaki mai vei Atama me yaco vei Noa; 53–57, Era a soqoni vata yani na Yalododonu ena gauna e liu e Atama-onitai-Amani, ka rairai kina vei ira na Turaga; 58–67, Sa nodra itavi na Le Tinikarua me ra lesi ira ka vakataudeitaki ira na vakailesilesi ena Lotu; 68–76, Era turaganilewa kei Isireli ko ira na bisopi; 77–84, Era sa lewe ni mataveilewai cecere duadua ena lotu ko iratou na Mataveiliutaki Taumada kei iratou na Le Tinikarua; 85–100, Era sa lewa na nodra dui kuoramu na peresitedi ena matabete.

    Wase 108

    Na ivakatakila sa soli yani mai vei Josefa Simici na Parofita, mai Katiladi e Oaio, ena 26 ni Tiseba 1835. A ciqomi na iwase oqo ena nona kerekere o Laimeni Simani, ka se qai tabaki walega me lewe ni vitusagavulu, a lako vua na Parofita ena nona kerea e dua na ivakatakila me vakatakilai vua na nona itavi.

    1–3, Sa vosoti na ivalavala ca nei Laimeni Simani; 4–5, Sa na okati vata kei ira na italatala qase liu ena Lotu; 6–8, Sa kacivi me vunautaka yani na kosipeli ka vaqaqacotaki ira na wekana.

    Wase 109

    Na masu ka cabori ena vakatabui ni valetabu e Katiladi, Oaio, ena 27 ni Maji 1836. Me vaka na nona itukutuku volai na Parofita, a soli vua ena ivakatakila na masu oqo.

    1–5, Sa tara na Valetabu mai Katiladi me na vakaraitaki koya kina na Luve ni Tamata; 6–21, Sa tara me vale ni masumasu, lolo, vakabauta, vuli ka, na vakarokoroko, ivakarau, ka vale ni Kalou; 22–33, Me ra vakamaduataki ko ira era sa sega ni veivutuni ka dau saqati ira na tamata ni Kalou; 34–42, Me ra lako yani na Yalododonu ena kaukauwa ka vakasoqoni ira na tamata dodonu ki Saioni; 43–53, Me ra sereki na Yalododonu mai na veika rerevaki ka na sovaraki yani vei ira na dau caka ca ena veisiga e muri; 54–58, Me ra vakarau na veimatanitu na tamata kei na veimatalotu me baleta na kosipeli; 59–67, Me ra na vueti na Jiu, ko ira na Leimanaiti kei ira kece na Isireli; 68–80, Me ra vakaisalataki na Yalododonu ena lagilagi kei na vakarokoroko, ka ra rawata na vakabulai tawamudu.

    Wase 110

    Na raivotu sa vakaraitaki vei rau ko Josefa Simici na Parofita kei Oliva Kaudari ena valetabu mai Katiladi, Oaio, ena 3 ni Epereli 1836. A yaco na ka oqo ena dua na soqoni ena Siga ni Vakacecegu. E tukuna na itukutuku makawa kei Josefa Simici: “Au a vukei ira tiko eso na peresitedi ena yakavi me keimami veisoliyaka na iVakayakavi ni Turaga vei ira na lewe ni Lotu, eratou a solia mai vei keimami ko iratou na Le Tinikarua, ni sa nodratou itavi me ratou lotutaka ena siga ko ya. Au sa vakayacora oti na itavi vei ira na wekaqu, au qai cabe cake ki na itutu ni vunau ni sa sogo tu na ilatilati, keirau a cuva kina kei Oliva Kaudari ena yalodina ka vakacabora lo na neirau masu. Ia ni keirau sa tacake mai na neirau masu, sa vakaraitaki vei keirau ruarua na veika oqo.”

    1–10, Sa rairai mai ena nona lagilagi na Turaga ko Jiova ka ciqoma me Nona na Valetabu mai Katiladi; 11–12, Erau sa rairai mai ko Mosese kei Iliesa ka mai solia na idola kei na itabagauna erau a dui qarava; 13–16, A vakalesuya mai ka solia ko Ilaija na idola ni nona itabagauna me vaka a yalataka tu ko Malakai.

    Wase 111

    Na ivakatakila sa soli yani mai vei Josefa Simici na Parofita mai Selemi, Masasuseti, ena 6 ni Okosita 1836. Era sa dinau vakalevu ena gauna oqo na iliuliu ni Lotu ena vuku ni cakacaka ni veiqaravi. Ni sa rogoci ni na levu na ilavo e rawa ni rawati mai Selemi, eratou a cavutu sara mai Katiladi, Oaio, ko koya na Parofita, kei iratou ko Sidini Rikitoni, Airame Simici kei Oliva Kaudari me ratou la’ki vakadinadinataka mai na itukutuku ko ya ka vunautaka tale ga yani na kosipeli. Eratou a la’ki vakayacora sara e vuqa na cakacaka ni Lotu ka vunau tale ga. Ia ni sa kilai ni na sega na ilavo e soli mai, eratou sa mani lesu tale ki Katiladi. E votu mai ena vosa ni ivakatakila oqo na veika e vuqa ka tiko ena daku ni veika e yaco tiko.

    1–5, Ena vukea na nodra leqa vakayago na Nona tamata na Turaga; 6–11, Ena yalololoma sara ki Saioni ka vakarautaka na veika kece me yaga vei ira na Nona tamata.

    Wase 112

    Na ivakatakila sa soli yani mai vei Josefa Simici na Parofita ki vei Tomasi B. Masi mai Katiladi, Oaio, ena 23 ni Julai 1837, me baleti iratou na iApositolo Le Tinikarua ni Lami. A ciqomi na ivakatakila oqo ena imatai ni siga erau vunautaka kina na kosipeli mai Igiladi o rau o Elder Iba C. Kimiboli kei Osoni Aidi. A peresitedi tiko ni Kuoramu ni iApositolo e Le Tinikarua ko Tomasi B. Masi ena gauna ko ya.

    1–10, Me ratou vunautaka yani na kosipeli ka laveta na domo ni veivakasalataki vei ira na tamata kecega ena veimatanitu ko iratou na Le Tinikarua; 11–15, Me ra colata na nodra kauveilatai ka muri Jisu, ka vakania na Nona sipi; 16–20, Ko koya sa ciqomi iratou na Mataveiliutaki Taumada sa ciqoma na Turaga; 21–29, Sa ubia tu na vuravura na butobuto, ia era na vakabulai wale ga ko ira sa vakabauta ka papitaisotaki; 30–34, Sa tu vei iratou na Mataveiliutaki Taumada kei na Tinikarua na idola ni itabagauna ni taucoko ni gauna.

    Wase 113

    Na isau ni taro eso ena volavola nei Aisea, a solia ko Josefa Simici na Parofita, mai Far West, Misuri se voleka kina, ena Maji ni 1838.

    1–6, Sa tukuni na vua ni toloi Jese, na coke e tubu mai kina, kei na kawa i Jese; 7–10, Sa tu na nodra dodonu ki na matabete o ira na ivovo kei Saioni era sa veiseyaki tu ka ra sa kacivi me ra lesu tale vua na Turaga.

    Wase 114

    Na ivakatakila sa soli yani mai vei Josefa Simici na Parofita, mai Fa Wesi, Misuri, ena 11 ni Epereli, 1838.

    1–2, Ena soli vei ira tale eso na veitutu vakalotu era taura tu o ira era sega tiko ni yalodina.

    Wase 115

    Na ivakatakila sa soli yani mai vei Josefa Simici na Parofita e Fa Wesi, Misuri, ena 26 ni Epereli 1838, sa vakatakilai kina na inaki ni Kalou me baleta na kena tara cake na koro ko ya kei na Vale ni Turaga. Sa vagolei na ivakatakila oqo vei ira era tu ena itutu ni vakatulewa kei ira na lewe ni Lotu.

    1–4, Sa vakatoka na Turaga me yaca ni Nona lotu na Lotu i Jisu Karisito ni Yalododonu Edaidai; 5–6, Era sa vanua ni veitaqomaki ka ivakaruru vei ira na Yalododonu ko Saioni kei na kena veiteki; 7–16, Era sa vakaroti na Yalododonu me ra tara e dua na vale ni Turaga e Fa Wesi; 17–19, Sa taura tu ko Josefa Simici na idola ni matanitu ni Kalou e vuravura.

    Wase 116

    Na ivakatakila sa soli vei Josefa Simici na Parofita, volekata na ilelele mai Waiti ena dua na vanua ka yacana ko Spring Hill, mai na yasayasa vaka-Deviesi, Misuri, ena 19 ni Me 1838.

    Wase 117

    Na ivakatakila sa soli yani mai vei Josefa Simici na Parofita e Fa Wesi, Misuri, ena 8 ni Julai 1838, me baleta na nodratou itavi taumada ko Viliame Makisi, Niueli K. Witini, kei Oliva Qareija.

    1–9, Me ra kakua ni kocova na iyau vakavuravura ko ira na italai ni Turaga, baleta “na cava na yaga ni iyau vua na Turaga?”; 10–16, Me ra biuta tani na veibeci ni yalo, ia na nodra isoro ena qai tabu sara vua na Turaga.

    Wase 118

    Na ivakatakila sa soli yani mai vei Josefa Simici na Parofita e Fa Wesi, Misuri, ena 8 ni Julai 1838, me isau ni vakatakekere oqo, “Oi Kemuni na Turaga, ni vakatakila mada vei keitou na lomamuni me baleti iratou na Le Tinikarua.”

    1–3, Sa na vakarautaka na Turaga na veika me baleti ira na nodratou dui matavuvale na Le Tinikarua; 4–6, Me vakatawani tale na itutu sa lala ena Tinikarua.

    Wase 119

    Na ivakatakila sa soli yani mai vei Josefa Simici na Parofita mai Fa Wesi e Misuri, ena 8 ni Julai 1838, me isau ni nona vakatakekere oqo, “Oi Kemuni na Turaga! Mo ni vakatakila mada vei ira na nomuni tamata na ivotavota ni nodra iyau ko ni vinakata me ra solia me nodra ikatini.” Na lawa ni ikatini, me vaka eda sa kila tu nikua, a sega ni soli ki na lotu ni se bera na ivakatakila oqo. Na vosa ikatini ena masu a cavuti ena ivakatakila eso ka a soli e liu (64:23; 85:3; 97:11) e sega ni kena ibalebale na dua ga na ikatini, ia na isolisoli kecega e soli ena yalo galala, se na cau, ki na umailavo ni Lotu. A sa solia oti ki na Lotu na Turaga na lawa ni kena vakatabui ni iyau kei na kena qaravi, ka ra a veiyalayalati kina na lewenilotu (vakabibi vei ira na italatala qase liu) me tawamudu. Ena vuku ni nodra sega ni rawata e lewevuqa me ra muria vakadodonu na veiyalayalati oqori, sa mani vakasuka kina, me dua na gauna na Turaga, ka solia mai na lawa ni ikatini me kena isosomi ena Lotu raraba. A taroga vua na Turaga na Parofita na iwasewase ni nodra iyau e vinakati ena inaki tabu oqori. A qai saumi mai ena ivakatakila oqo.

    1–5, Me ra solia na vo ni nodra iyau era sa sega ni vakayagataka, ka ra solia me nodra ikatini, na dua na ikatini ni ka era rawata e veiyabaki; 6–7, Oqori ena vakatabui kina ko Saioni.

    Wase 120

    Na ivakatakila sa soli yani mai vei Josefa Simici na Parofita mai Fa Wesi e Misuri, ena 8 ni Julai 1838; sa vakatakilai kina na veiwaseyaki ni iyau a soli me ikatini, me vaka ka tukuni ena ivakatakila ni bera na kena oqo, na wase e 119.

    Wase 121

    Na masu kei na parofisai a vola ko Josefa Simici na Parofita ena dua na ivola ki na Lotu ena 20 ni Maji 1839, oqo ena gauna a tiko vakavesu kina ena vale ni veivesu mai Lipati, Misuri. Sa vula vica tiko ena vale ni veivesu ko koya na Parofita kei na so na nona itokani. A sega ni rawa ni ra vakacegui ena vuku ni nodra ivola ni kerekere kei na vakamamasu, ka a vakauti vei ira na vakaitutu liu kei na tabacakacaka ni veilewai.

    1–6, Sa vakamasuta na Turaga ko koya na Parofita ena vukudra na Yalododonu era sa kune rarawa tu; 7–10, Sa tukuna vua na Turaga na vosa me vakacegu kina; 11–17, Era na cudruvi ko ira kece sa beitaka vakailasu ni ra sa talaidredre na tamata ni Turaga; 18–25, Era na cudruvi ka vakuwai mai na ilesilesi ni matabete; 26–32, Sa yalataki ni na vakatakilai na veika lagilagi vei ira sa gumatua sara ni vosota tiko; 33–40, Na vuna sa lewe levu kina e kacivi ka lewe lailai e digitaki; 41–46, Me taurivaki ga na matabete ena kena ivakarau dodonu.

    Wase 122

    Na vosa ni Turaga vei Josefa Simici na Parofita, ni tiko vakavesu voli mai Lipati, Misuri. Na iwase oqo e tauri mai na dua na ivola ki na Lotu ka volai ena 20 ni Maji 1839 (raica na ulutaga ni wase 121).

    1–4, Era na taroga na yacai Josefa Simici mai na iyalayala kei vuravura; 5–7, Sa ka ni vuli vua na nona kune leqa kei na rarawa, ka na kunea kina vakalevu na vinaka; 8–9, Sa vosota rawa na Luve ni Tamata na veika e toro sobu sara mai vei ira kecega.

    Wase 123

    Na nodra itavi na Yalododonu me baleti ira na dauveivakacacani me vaka e vola ko Josefa Simici na Parofita, ni tiko voli vakavesu ena valeniveivesu e Lipati, Misuri. Na wase oqo e tauri mai na dua na ivola ki na Lotu ka volai ena 20 ni Maji, 1839 (raica na ulutaga ni wase 121).

    1–6, Me ra kumuna vata na lewe ni lotu ka tabaka na itukutuku ni nodra vakararawataki ka vakacacani; 7–10, Na yalo ga a tauyavutaka na ivakavuvuli lasu, e sa vakavuna tale ga na nodra vakacacani na Yalododonu; 11–17, E vuqa vei ira ena veimatavakabauta kece sara era sa sega ni kila na ka dina.

    Wase 124

    Na veika sa vakatakilai vei Josefa Simici na Parofita mai Nauvu, Ilinoi, ena 19 ni Janueri 1841. Ena vuku ni veivakacacani ka sa levu cake tikoga kei na ivalavala cala vakalawa eso era sa vorati tiko kina mai vei ira na vakailesilesi vakamatanitu, era sa nanuma kina na Yalododonu me ra sa biuti Misuri. Na ivakaro ni veivakamatei se veivakasevi ka soli mai vei Liliponi W. Bokasi, na kovana kei Misuri ena 27 ni Okotova 1838, sa sega tale kina ni dua na ka e rawa ni ra cakava. Ena gauna a vakaraitaki kina na ivakatakila oqo ena yabaki 1841, era sa tara oti tu kina na Yalododonu na koro ko Nauvu ena vanua a dau tu kina e liu na koro ko Komesi e Ilinoi, sa tauyavutaki eke na itikotiko liu ni lotu.

    1–14, Sa vakaroti ko Josefa Simici me tukuna vakadoudou na kosipeli vua na peresitedi kei Amerika, vei ira na kovana, kei na iliuliu ni veimatanitu; 15–21, Era sa vakalougatataki ko Airame Simici, Tevita W. Peteni, Josefa Simici Levu, ka vakakina e lewe vuqa era sa bula tiko kei ira na sa mate, ena vuku ni nodra yalodina ka ivalavala savasava; 22–28, Era sa vakaroti na Yalododonu me ra tara e rua na vale, e dua me nodra ivakavakacegu na vulagi ka dua na valetabu e Nauvu; 29–36, Me vakayacori ena valetabu na papitaiso ena vukudra na sa mate; 37–44, Era sa dautara na valetabu na tamata ni Turaga me vakayacori kina na veicakacaka tabu vakalotu; 45–55, Era sa vagalalataki na Yalododonu ena icolacola ni kena tara na valetabu ena yasayasa vaka-Jekesoni, ni ra sa vakaleqa na nodra cakacaka ko ira na nodra meca; 56–83, Vakaroti na veika me caka ena tara ni Vale ni Nauvu; 84–96, Lesi me peteriaki ko Airame Simici, me ciqoma na idola eso ka sosomitaki Oliva Kaudari; 97–122, Sa vunauci ko Viliame Lo kei na so tale, ena vuku ni nodra cakacaka; 123–145, Cavuti na yacadra me ra vakailesilesi liu kei na ilesilesi tale e so, vakamacalataki na nodra itavi kei na kuoramu era lewena.

    Wase 125

    Na ivakatakila sa soli yani mai vei Josefa Simici na Parofita mai Nauvu, Ilinoi, ena Maji 1841, me baleti ira na Yalododonu ena yasayasa vaka-Aioa.

    1–4, Me ra tara koro ka soqoni vata ki na vei iteki kei Saioni ko ira na Yalododonu.

    Wase 126

    Na ivakatakila sa soli yani mai vei Josefa Simici na Parofita, ena vale nei Biriqemu Yaga, e Nauvu mai Ilinoi ena 9 ni Julai 1841. Ena gauna oqo a Peresitedi voli kina ni Kuoramu ni iApositolo Le Tinikarua ko Biriqemu Yaga.

    1–3, Vakacaucautaki na cakacaka nei Biriqemu Yaga, ka sa na mudu tale ga na nona dauveilakoyaki voli.

    Wase 127

    Ai vola i Josefa Simici na Parofita vei ira na Yalododonu Edaidai e Nauvu, Ilinoi; sa tukuni kina na ivakaro e baleta na veipapitaisotaki ena vukudra na mate; a volai mai Nauvu ena 1 ni Sepiteba 1842.

    1–4, Sa reki ko Josefa Simici ena nona vakacacani ka vakararawataki; 5–12, Me maroroi tu na itukutuku ni veipapitaisotaki e caka ena vukudra na sa mate.

    Wase 128

    E dua na ivola nei Josefa Simici na Parofita ki Na Lotu i Jisu Karisito ni Yalododonu Edaidai, ka lewena na ikuri ni idusidusi me baleta na veipapitaisotaki ena vukudra na sa mate, a volai mai Nauvu e Ilinoi, ena 6 ni Sepiteba 1842.

    1–5, Me ra raica ka vakadinadinataka sara na vunivola ni veitabana kei ira na vunivola ni lotu raraba na vakayacori ni nodra papitaisotaki na sa mate; 6–9, Na nodra itukutukuvolai sa kilai e vuravura ka kilai mai lomalagi; 10–14, Sa vakatautauvatataki na tobu ni papitaiso kei na ibulubulu; 15–17, Sa vakalesuya mai ko Ilaija na kaukauwa me baleta na nodra papitaisotaki na mate; 18–21, Sa vakalesui kece tale mai na idola, kaukauwa, kei na lewa ni veitabagauna sa oti yani; 22–25, Sa vunautaki yani na itukutuku rekitaki ka vakasakiti baleti ira era se bula tiko kei ira na sa mate.

    Wase 129

    Na ivakaro sa solia ko Josefa Simici na Parofita, mai Nauvu, Ilinoi, ena 9 ni Feperueri 1843, ka vakamacalataki kina e tolu na ka bibi era na kilai kina na agilosi kei na yalo dauveiqaravi.

    1–3, Era tu mai lomalagi na yago sa vakaturi cake mai na mate kei na yago vakayalo; 4–9, Sa soli na sala me kilai kina na italai mai na daku ni ilati.

    Wase 130

    Na tiki ni ivakaro eso sa solia ko Josefa Simici na Parofita mai Reimasi e Ilinoi, ena 2 ni Epereli.

    1–3, E rawa ni rau na rairai sara ga mai vakatamata vua na tamata na Tamada kei na Luvena; 4–7, Era vakaitikotiko na agilosi ena dua na vuravura vakasilesitieli; 8–9, Na vuravura vakasilesitieli ena vaka e dua na Urimi kei na Cumimi levu; 10–11, Sa soli e yadua na vatu vulavula vei ira kece sa curu ki na vuravura vakasilesitieli; 12–17, Sa sega ni tukuni vei ira na parofita na gauna ni iKarua ni Lako Mai; 18–19, Eda na Tucake Tale mai na mate kei na veika eda sa mai vakavukui kina ena bula oqo; 20–21, Na veivakalougatataki kece e yaco mai ena talairawarawa ki na lawa; 22–23, Erau sa vakalewe ka vakasui ko Tamada kei na Luvena.

    Wase 131

    Na ivakaro mai vei Josefa Simici na Parofita, a soli mai Reimasi, Ilinoi, ena 16 kei na 17 ni Me 1843.

    1–4, E gadrevi na vakamau vakasilesitieli me da bula vakacerecerei kina ena lomalagi cecere duadua; 5–6, Sa vakamacalataki na sala ena vauci kina na tamata ki na bula tawamudu; 7–8, Sa vakavatukana na yalo kecega.

    Wase 132

    Na ivakatakila sa soli yani mai vei Josefa Simici na Parofita, mai Nauvu, Ilinoi, a volai ena 12 ni Julai 1843, me baleta na veiyalayalati vou ka sega ni mudu, ka okati kina na tawamudu ni veiyalayalati ni vakamau kei na ivakavuvuli ni vakamau vakalevu. E dina ni a volai na ivakatakila oqo ena 1843, e vakaraitaka na ivakadinadina ni so na ivakavuvuli e okati ena ivakatakila oqo sa kila sara tu na Parofita e na 1831. Raica na iVakaro Raraba 1.

    1–6, Ena rawati na bula vakacerecerei ena veiyalayalati vou ka sega ni mudu; 7–14, Sa virikotori na ivakarau me baleta na veiyalayalati oqori; 15–20, Sa rawa ni yaco me Kalou na tamata ena vuku ni vakamau vakasilesitieli kei na tomani tiko ni bula vakamatavuvale; 21–25, Sa qiqo na matamata ka rabailailai na sala sa basika ki na bula tawamudu; 26–27, Sa soli na lawa me baleta na kena vosa vakacacataki na Yalo Tabu; 28–39, Sa yalataki vei ira na parofita kei ira na Yalododonu ena veitabayabaki kecega ni ra na vakaluveni tawamudu ka bula vakacerecerei; 40–47, Sa soli vei Josefa Simici na kaukauwa me vesuka vata ka vauca na veika e vuravura kei lomalagi; 48–50, Sa vakataudeitaka vua na Turaga na nona bula vakacerecerei; 51–57, Sa vakasalataki ko Ema Simici me tudei ka yalodina tiko ga; 58–66, Sa virikotori na lawa me baleta na vakawati vakalevu.

    Wase 133

    Na ivakatakilai sa soli yani mai vei Josefa Simici na Parofita mai Airame, Oaio, ena 3 ni Noveba 1831. Me ikau ni ivakatakila oqo, e tukuna vakaoqo na itukutuku makawa kei Josefa Simici, “Ena gauna oqo sa vuqa sara na ka era gadreva tiko me ra kila na iTalatala Qase me baleta na kena vunautaki na Kosipeli vei ira na lewei vuravura, ka vakakina na veika e baleta na vakasoqoni vata; ka vakakina na sala me rawa kina na lako voli ena rarama dina, ka dusimaki mai cake ena 3 ni Noveba, 1831, au a taroga na Turaga ka ciqoma na ivakatakila bibi oqo.” Na iwase oqo a vakuri taumada ki na ivola ni Vunau kei na Veiyalayalati ka qai lewai e muri me dua na iwase ni ivola.

    1–6, Era sa vakaroti na Yalododonu me ra vakavakarau ki na iKarua ni Lako Mai; 7–16, Era sa vakaroti na tamata kecega me ra dro tani mai Papiloni ka lako ki Saioni, ka vakavakarau ki na siga sa levu ni Turaga; 17–35, Ena tucake tu ena Ulunivanua ko Saioni, ena cokovata na veivanua me dua ga, ka ra na lesu mai na yavusa i Isireli era yali tu; 36–40, Sa vakalesui mai ena ligai Josefa Simici na kosipeli me vunautaki yani ki vuravura taucoko; 41–51, Ena lako sobu mai ena veisausaumi na Turaga vei ira na dau caka ca; 52–56, Na yabaki ni Nona veivueti; 57–74, Me vunautaki yani na kosipeli me ra vakabulai na Yalododonu ka ra vakarusai na caka ca.

    Wase 134

    Ai vakaro ni vakabauta me baleta na matanitu kei na lawa raraba, sa vakabau ena nodra digidigi na lewevuqa ena dua na soqoni raraba ni Lotu ka a vakayacori mai Katiladi, e Oaio, ena 17 ni Okosita 1835. Era a soqoni vata e vuqa na Yalododonu me ra vakasamataka na lewe ni imatai ni Vunau kei na Veiyalayalati me na tabaki. Ena gauna ko ya, a biu na veika oqo me ikau ni ivakaro oqo. “Me kakua ni nanumi vakaca se vakatanitaki na ibalebale ni noda vakabauta na matanitu vakavuravura kei na kena lawa raraba; keitou nanuma ni sa kilikili me vakacurumi ena itinitini ni vola oqo na neitou nanuma ena vuku ni tikina oqo.”

    1–4, Me taqomaka na matanitu na galala ni lewa e loma kei na qaravi Kalou; 5–8, Sa itavi ni tamata kecega me tokona na nodra matanitu, me ra doka ka muria na kena lawa; 9–10, Me kakua ni veivakayarayarataki ena lewa ni matanitu na veisoqosoqo vakalotu; 11–12, Sa dodonu me ra taqomaki ira na tamata kei na veika e nodra.

    Wase 135

    Kacivaki ni nodrau vakamatei o Josefa Simici na Parofita kei na tuakana ko Airame Simici na Peteriaki, mai Kaceji, Ilinoi, ena 27 ni June 1844. A volai na itukutuku oqo ena mua ni itabataba ni Vunau kei na Veiyalayalati, ka sa voleka sara tiko ga ni vakarau tabaki ena gauna erau labati kina o Josefa kei Airame Simici.

    1–2, Erau sa vakamatei ena Valeniveivesu mai Kaceji ko Josefa kei Airame; 3, Tusanaki na lagilagi kei na vuavuai vinaka ni nona bula na Parofita; 4–7, Sa vakadinadinataki ena nodrau dra tawacala na dina kei na vakalou ni cakacaka.

    Wase 136

    Na vosa kei na nona inaki na Turaga, sa soli yani mai vei Peresitedi Biriqemu Yaga, e Winita Kuota, ena Keba ni Isireli mai Omaha Nation, ena tai ni Uciwai na Misuri ki na ra, volekati Kaunisela Balavi mai Aioa.

    1–16, Sa vakamacalataki na sala me vakarautaki kina na keba ni Isireli me baleta na ilakolako ki na ra; 17–27, Era sa vakaroti na Yalododonu me ra bula ena ivakatagedegede e vuqa ni kosipeli; 28–33, Me ra dausere, meke, masumasu ka vuli me ra vuku ko ira na Yalododonu; 34–42, Era sa vakamatei na parofita me ra lagilagi kina ka ra cudruvi na tamata ca.

    Wase 137

    Na raivotu sa vakaraitaki vei Josefa Simici na Parofita, ena valetabu mai Katiladi, Oaio, ena 21 ni Janueri 1836. A vakayacori tiko na cakacaka vakalotu ena vakavakarau ki na vakatabui ni valetabu.

    1–6, Sa raici Alaveni na tuakana ko koya na Parofita ena matanitu silesitieli; 7–9, Sa vakatakilai mai na ivunau me baleta na nodra vakabulai na mate; 10, O ira kece na gonelalai era na vakabulai ena matanitu silesitieli.

    Wase 138

    Na raivotu sa vakaraitaki vei Peresitedi Josefa F. Simici mai Salt Lake City, Utah, ena 3 ni Okotova 1918. Ena nona vosa me dolava kina na ika 89 ni Koniferedi Raraba ni Lotu, ena 4 ni Okotova 1918, a tukuna kina ko Peresitedi Simici ni sa ciqoma e vica na veivakauqeti vakalou ena veivula sa oti. E dua vei ira oqori, e baleta na nona veisiko mai na iVakabula ki vei ira na yalodra na sa mate ena gauna e se tu kina ena ibulubulu na Yagona, a ciqoma ko Peresitedi Simici ena siga yani ki liu. A volai ni se qai vakacavari sara ga na koniferedi. Ena 31 ni Okotova 1918, a soli yani vei rau na daunivakasala ena Mataveiliutaki Taumada, na Matabose ni Le Tinikarua kei na Peteriaki, ka ra vakadonuya taucoko sara.

    1–10, Sa vakasamataka ko Peresitedi Josefa F. Simici na veika a vola ko Pita kei na nona veisiko na Turaga ki na vuravura ni yalo; 11–24, Sa raica ko Peresitedi Simici ni ra sa soqoni vata mai parataisi ko ira na buladodonu era sa mate kei na nona cakacaka na Karisito ena kedra maliwa; 25–37, Sa raica na sala sa tauyavutaki kina na vunautaki ni kosipeli ena kedra maliwa na yalo; 38–52, Sa raici Atama, kei Ivi kei ira na parofita yalosavasava e vuqa ena vuravura ni yalo ka ra a raica me ivesu na kedra ituvaki vakayalo ni se bera na nodra tucake tale; 53–60, Era na la’ki vakuria tiko ga na nodra cakacaka ena vuravura ni yalo ko ira na yalododonu era sa mate ena gauna oqo.