Tufa’a 100
E heheura’a tei hōro’ahia mai ia Iosepha Semita te peropheta ’e ia Sidney Rigdon, i Perrysburg, i New York, i te 12 nō ’Ātopa 1833. ’Ua maoro roa teie nā taea’e i te ta’a-’ē-ra’a atu i tō rāua ’utuāfare, ’e ’ua pe’ape’a ri’i tō rāua mana’o nō ni’a ia rātou.
1–4, ’Ua tītauhia Iosepha ’e Sidney ’ia poro haere i te ’evanelia nō te fa’aorara’a i te mau vārua ta’ata ; 5–8, E hōro’ahia mai ia rāua i te hora ti’a mau i te mea tā rāua e parau ; 9–12, E riro ’o Sidney ’ei auvaha parau ’e e riro ’o Iosepha ’ei heheu parau ’e ’ei ta’ata ’itera’a pāpū pūai ; 13–17, E fa’atupu mai te Fatu i te feiā parauti’a, ’e e fa’aorahia te feiā ha’apa’o maita’i.
1 ’Oia mau, tē nā ’ō mai ra te Fatu ia ’ōrua, e tō’u nā hoa e Sidney ’e e Iosepha, tē ora maita’i nei tō ’ōrua nā ’utuāfare ; tei roto rātou i tō’u nei pu’e rima, ’e nā’u e ha’apa’o ia rātou mai te au i te vāhi maita’i i roto i tō’u nei mana’o ; nō te mea tei roto iā’u nei te tā’āto’ara’a o te mana.
2 Nō reira, ’a pe’e mai iā’u nei, ’e ’a fa’aro’o mai i te a’ora’a tā’u e hōro’a atu ia ’ōrua na.
3 Inaha, ’e ’a hi’o na, e rave rahi tō’u mau ta’ata i teie nei vāhi, ’e i roto ho’i i te mau retioni ē ’ati noa a’e ; ’e e ’īritihia mai te ’ōpani manuia i roto i te mau retioni ē ’ati noa a’e i roto i teie fenua i te hiti’a o te rā nei.
4 Nō reira, vau, ’o te Fatu, i fa’ati’a ai ia ’ōrua ’ia haere mai i teie nei vāhi ; nō te mea ’ua ti’a ïa iā’u nei ’ia nā reira ’ōrua nō te fa’aorara’a i te mau vārua ta’ata.
5 Nō reira, ’oia mau tē parau atu nei au ia ’ōrua na, ’a fa’ateitei atu ’ōrua i tō ’ōrua reo i teie nei feiā ; ’a parau atu i te mau mana’o tā’u e tu’u atu i roto i tō ’ōrua ’ā’au, ’e e ’ore ’ōrua e fa’aha’amāhia i mua i te ta’ata nei ;
6 E hōro’ahia ho’i ia ’ōrua i te hora ti’a mau, ’oia ïa i te taime ti’a mau, i te mea tā ’ōrua e parau atu.
7 Terā rā tē hōro’a atu nei au i te hō’ē fa’auera’a ia ’ōrua, ’ia poro atu ’ōrua i te mau mea ato’a tā ’ōrua e poro ra nā roto i tō’u nei i’oa, nā roto i te ’ā’au ferurira’a hōhonu, nā roto ho’i i te vārua ha’eha’a, i roto i te mau mea ato’a ra.
8 ’E tē hōro’a atu nei au i teie nei fafaura’a ia ’ōrua, mai te mea e rave ’ōrua i te reira e tonohia mai te Vārua Maita’i nō te fa’a’ite pāpū mai i te mau mea ato’a tā ’ōrua e parau atu.
9 ’E e mea ti’a ïa iā’u nei ’ia riro ’oe, e tō’u tāvini e Sidney, ’ei auvaha i teie nei feiā ; ’oia ïa, ’oia mau, e fa’atōro’a vau ia ’oe i teie nei tōro’a, ’oia ’ia riro ’ei auvaha nō tō’u tāvini ’o Iosepha.
10 ’E e hōro’a atu vau i te mana iāna ’ia riro ’oia ’ei mea pūai i roto i te ’itera’a pāpū.
11 ’E e hōro’a atu vau i te mana ia ’oe ’ia riro ’oe ’ei mea pūai i te tātarara’a i te mau pāpa’ira’a mo’a ato’a ; ’ia riro ’oe ’ei auvaha nōna, ’e e riro ’oia ’ei heheu parau nō ’oe, ’ia ’ite pāpū roa ’oe i te mau mea ato’a nō ni’a i tō’u bāsileia i ni’a i te fenua nei.
12 Nō reira, ’a haere tāmau noa i tō ’ōrua tere ’e ’ia ’oa’oa ho’i tō ’ōrua ’ā’au ; ’e inaha, ’e ’a hi’o na, tei pīha’i iho vau ia ’ōrua ē tae noa atu i te hope’a.
13 ’E i teienei tē hōro’a atu nei au i te hō’ē parau ia ’ōrua nō ni’a ia Ziona. E fa’aorahia Ziona, noa atu e tā’irihia ’oia nō te hō’ē tau poto.
14 Tei roto tō ’ōrua nā taea’e, ’oia tō’u nā tāvini ra ’o Orson Hyde ’e John Gould, i tō’u nei rima ; ’e mai te mea e ha’apa’o rāua i tā’u mau fa’auera’a, e fa’aorahia rāua.
15 Nō reira, ’ia tāmāhanahanahia tō ’ōrua ’ā’au ; nō te mea e tāhō’ēhia te mau mea ato’a nō te maita’i o te feiā ’o tē haere parauti’a noa, ’e nō te ha’amo’ara’a i te ’ēkālesia.
16 E fa’atupu mai ho’i au i te feiā parauti’a iā’u iho nei, ’o tē tāvini mai iā’u nei ma te parauti’a ;
17 ’E ’o rātou ato’a ’o tē ti’aoro atu i te i’oa o te Fatu, ’e ’o tē ha’apa’o i tāna mau fa’auera’a, e fa’aorahia ïa. ’Oia ïa. ’Āmene.