Tufa’a 105
E heheura’a tei hōro’ahia mai nā roto ia Iosepha Semita te peropheta, i te ’ānāvai Fishing River, i Missouri, i te 22 nō Tiunu, 1834. I raro a’e i te arata’ira’a a te peropheta, ’ua ta’ahi ti’a atu te tahi feiā mo’a nō Ohio ’e nō te tahi ato’a mau vāhi i Missouri ’ei haerera’a tama’i, ’o tei topahia te i’oa i muri iho, te Pūhapara’a nō Ziona. Tā rātou fā, ’o te ’āpe’era’a ïa i te feiā mo’a tei tīahihia i rāpae ia Missouri nō te fa’aho’i ia rātou i ni’a i tō rātou fenua i te mata’eina’a nō Jackson. I mata’u ai te feiā nō Missouri tei hāmani ’ino i te feiā mo’a e tāho’o mai te Pūhapara’a nō Ziona ia rātou, ’e nō reira, ’ua ’ōmua rātou i te hāmani ’ino i te feiā mo’a i te mata’eina’a nō Clay, i Missouri. I muri mai tō te tāvana rahi nō Missouri ’ōtohera’a i tāna parau fafau e turu i te feiā mo’a, ’ua fāri’i mai Iosepha Semita i teie heheura’a.
1–5, E fa’ati’ahia Ziona mai te au i te ture tiretiera ; 6–13, E fa’ataimehia te fa’aorara’a o Ziona nō te hō’ē taime poto ; 14–19, E ’aro te Fatu i te mau ’arora’a nō Ziona ; 20–26, ’Ia riro te feiā mo’a ’ei mea ’aravihi ’e ’eiaha e fa’aahaaha nō te mau ’ohipa rarahi ’a ha’aputuputu ai rātou ; 27–30, E mea ti’a roa ’ia ho’ohia mai te mau fenua i Jackson ’e i te tahi atu mau mata’eina’a ē ’ati noa a’e ; 31–34, ’Ua ti’a roa i te mau peresibutero ’ia fāri’i i tō rātou ’ōro’a hiero i roto i te Fare o te Fatu i Kirtland ; 35–37, E ha’amo’ahia te feiā mo’a ’o tei pi’ihia ’e ’o tei mā’itihia ; 38–41, ’Ua tītauhia te feiā mo’a ’ia fa’ati’a i te hō’ē reva nō te hau i tō te ao nei.
1 ’Oia mau tē parau atu nei au ia ’outou ’o tei ha’aputuputu ’āmui mai ia ’outou iho, ’ia ti’a ia ’outou ’ia ’ite i tō’u hina’aro nō ni’a i te fa’aorara’a i tō’u mau ta’ata i hāmani-’ino-hia ra—
2 Inaha, tē parau atu nei au ia ’outou na, ’āhiri ’aita tō’u feiā i ’ōfati i te mau ture, ’e tē parau nei au nō ni’a i te ’ēkālesia ē ’eiaha nō te mau ta’ata tāta’ihō’ē ra, ’ua fa’aorahia ïa rātou i teienei.
3 ’E inaha, ’aita rātou i ’ite i te ha’apa’o i te mau mea tā’u i tītau i tō rātou ra rima, ’ua ’ī roa rā i te mau huru ’ino ato’a ra, ’e ’aita rātou i hōro’a atu i te tahi tufa’a o tā rātou faufa’a, ’ia au i te feiā mo’a mau ra, i te feiā veve ’e tei hāmani-’ino-hia i rotopū ia rātou ra ;
4 ’E ’aita ho’i rātou i tāhō’ēhia mai te au i te tāhō’ēra’a i tītauhia e te ture nō te bāsileia tiretiera ;
5 ’E ’aita roa e ti’a ia Ziona ’ia fa’ati’ahia maori rā nā roto i te mau parau tumu nō te ture nō te bāsileia tiretiera ; ’ia ’ore rā, e ’ore ïa e ti’a iā’u ’ia fāri’i mai iāna iā’u iho nei.
6 ’E ’ia tā’irihia tō’u mau ta’ata e ti’a ai ē tae noa atu i te taime rātou e ha’api’i mai ai i te ha’apa’o, mai te mea e tītauhia te reira, nā roto i te mau mea tā rātou e fa’a’oroma’i.
7 ’Aita vau e parau nei nō ni’a ia rātou ’o tei fa’ata’ahia nō te arata’i i tō’u mau ta’ata, e mau peresibutero mātāmua ho’i rātou nō tā’u ’ēkālesia, nō te mea ’aore rātou pā’āto’a i raro a’e i teie nei fa’ahapara’a ;
8 Tē parau nei rā vau nō ni’a i tā’u mau ’ēkālesia i te mau vāhi ātea ’ē ra—e rave rahi ’o tē parau mai ē : Tei hea tō rātou Atua ? Inaha, e fa’aora ’oia ia rātou i te taime nō te ’ati, ’ia ’ore rā, e ’ore tātou e haere atu i Ziona, ’e e tāpe’a noa tātou i tā tātou mau moni.
9 Nō reira, nō te mea ’ua ’ōfati tō’u mau ta’ata i te mau ture, e mea ti’a ïa iā’u nei ’ia tīa’i ri’i tā’u mau peresibutero nō te hō’ē tau poto noa nō te fa’aorara’a ia Ziona—
10 ’Ia fa’aineinehia rātou iho, ’e ’ia ha’api’i-maita’i-roa-hia tō’u mau ta’ata, ’e ’ia rave ho’i i te ’ohipa, ’e ’ia ’ite maita’i a’e i te ’ohipa e ti’a ia rātou ’ia rave, ’e te mau mea ho’i tā’u e tītau i tō rātou ra rima.
11 ’E ’aita roa teie nei mau mea e tupu ē tae noa atu i te taime e noa’a ai i tā’u mau peresibutero te mana nō ni’a mai ra.
12 Inaha ho’i, ’ua fa’anahonaho vau i te ’ōro’a hiero rahi ’e te ha’amaita’ira’a rahi ho’i ia nīni’ihia atu i ni’a iho ia rātou, mai te mea e ha’apa’o maita’i noa ’e e haere ha’eha’a noa rātou i mua iā’u nei.
13 Nō reira, e mea ti’a ïa iā’u nei ’ia tīa’i ri’i tā’u mau peresibutero nō te hō’ē tau poto noa, nō te fa’aorara’a ia Ziona.
14 Inaha ho’i, ’aita vau e tītau nei i tō rātou rima ’ia ’aro rātou i te mau ’arora’a nō Ziona ; nō te mea, mai tā’u i parau na i roto i te hō’ē fa’auera’a i muta’a ihora, ’o tā’u iho ā ïa e fa’atupu—Nā’u e ’aro atu i tā ’outou mau ’arora’a.
15 Inaha, ’ua tono atu vau i te ta’ata ha’amou nō te ha’amou atu ’e nō te fa’aano atu i tō’u mau ’enemi ; ’e ’aita ho’i e rahi te mau matahiti e ’ore ai rātou e vaiihohia ’ia ha’avi’ivi’i i tō’u ’āi’a, ’e ’ia fa’a’ino mai i tō’u i’oa i ni’a i te mau fenua tā’u i ha’amo’a nō te ha’aputuputura’a i tō’u feiā mo’a.
16 Inaha, ’ua fa’aue atu vau i tō’u tāvini ia Iosepha Semita, tamaiti, ’ia parau atu i te pūai o tō’u ’utuāfare, ’oia i tō’u mau ’aito, tō’u feiā ’āpī tāne, ’e te feiā huru pa’ari ho’i, ’ia ha’aputuputu ’āmui mai nō te fa’aorara’a i tō’u mau ta’ata, ’e ’ia huri i te mau pare o tō’u mau ’enemi i raro, ’e ’ia ha’apurara ’ē atu i tō rātou mau ta’ata tīa’i ;
17 ’Aita rā ho’i te pūai nō tō’u ’utuāfare i ha’apa’o i tā’u mau parau.
18 Terā rā, nō te mea tē vai nei te tahi pae ’o tei ha’apa’o i tā’u mau parau, ’ua fa’aineine au i te ha’amaita’ira’a ’e te ’ōro’a hiero nō rātou, mai te mea e tāmau noa rātou i te ha’apa’o maita’i.
19 ’Ua fa’aro’o vau i tā rātou ra mau pure, ’e e fāri’i ho’i au i tā rātou ra ō ; ’e e mea ti’a ïa iā’u nei ’ia ’āfa’ihia mai rātou ē tae noa mai i teie nei vāhi ’ei tāmatara’a i tō rātou fa’aro’o.
20 ’E i teienei, ’oia mau tē parau atu nei au ia ’outou na, e fa’auera’a tā’u e hōro’a atu ia ’outou, ’e ’o rātou ato’a ’o tei tae mai i’ō nei, ’o tē ti’a ia rātou ’ia fa’aea mai i roto i te retioni ē ’ati noa a’era, ’a tu’u atu ia rātou ’ia fa’aea ;
21 ’E ’o rātou ’o tē ’ore e ti’a ’ia fa’aea mai, e ’utuāfare ho’i tō rātou i te hiti’a o te rā, ’ia fa’aea ri’i mai rātou nō te hō’ē tau poto noa mai te au i te fa’ata’ahia ia rātou e tō’u tāvini ra e Iosepha ;
22 E a’o atu ho’i au iāna nō ni’a i teie nei ’ohipa, ’e te mau mea ato’a tāna e fa’ata’a nā rātou ra, e fa’atupuhia ïa.
23 ’E ’ia ha’apa’o maita’i tō’u mau ta’ata ato’a ’o tē pārahi i roto i te retioni ē ’ati noa a’era, ’e ’ia tāmau noa i te pure, ’e ’ia haere ha’eha’a noa i mua iā’u nei, ’e ’ia ’ore ho’i ’ia fa’a’ite atu i te mau mea tā’u i heheu atu ia rātou ra, ē tae noa atu i te taime ’ua ti’a iā’u nei ’ia fa’a’itehia atu te reira.
24 ’Eiaha e paraparau nō te mau ha’avāra’a, ’eiaha ato’a e fa’aahaaha nō te fa’aro’o ’e te mau ’ohipa rarahi, ’a ha’aputuputu ’āmui māite rā, i roto i te hō’ē retioni, ’o rātou ato’a ’o tē tia, mai te au i te mau hina’aro o te mau ta’ata ;
25 ’E inaha, e fa’atupu vau i te mana’o maita’i ’e te aroha i roto i tō rātou ra mau mata, ’ia ti’a ia ’outou ’ia fa’aea ma te hau ’e te pe’ape’a ’ore, ’a parau atu ai ’outou i te mau ta’ata ē : ’A fa’atupu mai i te pa’ari ’e te parauti’a nō mātou mai te au i te ture, ’e ’a fa’aho’i mai i te faufa’a e au i te ’ino tei tu’uhia i ni’a ia mātou nei.
26 I teienei, inaha, tē parau atu nei au ia ’outou na, e tō’u mau hoa, nā roto i teie mea e hina’arohia ’outou e te mau ta’ata, ē tae noa atu i te taime e rahi roa ai te nu’u o ’Īserā’ela.
27 ’E e ha’amarū vau i te ’ā’au o te mau ta’ata, mai tā’u i nā reira i te ’ā’au o Phara’o, i terā taime ’e i terā taime, ē tae noa atu i te taime e noa’a ai i tō’u tāvini ra ia Iosepha Semita, tamaiti, ’e i te mau peresibutero tā’u i fa’ata’a ra, te taime nō te ha’aputuputu mai i te pūai nō tō’u ’utuāfare,
28 ’E nō te tono atu i te mau ta’ata ’aravihi ’ia fa’atupu i te mea tā’u i fa’aue nō ni’a i te ho’ora’a mai i te mau fenua i te mata’eina’a nō Jackson, ’o tē ti’a ’ia ho’ohia mai, ’e i roto ho’i i te mau mata’eina’a tāpiri mai ē ’ati noa a’era.
29 ’O tō’u ho’i hina’aro ’ia ho’ohia mai teie mau fenua nei ; ’e ’ia oti i te ho’ohia mai ra, ’ia fāri’i tō’u feiā mo’a i taua mau fenua ra mai te au i te mau ture nō te ha’amo’ara’a tā’u i hōro’a atu.
30 ’E ’ia oti teie mau fenua nei i te ho’ohia mai, e fa’ariro vau i te mau nu’u nō ’Īserā’ela ’ei mea hara ’ore i te ravera’a mai i tō rātou iho mau fenua, ’o tā rātou i ho’o ’ē mai na i tā rātou iho mau moni, ’e i te hurira’a atu i raro te mau pare nō tō’u mau ’enemi, ’o tei patuhia i ni’a iho i te reira, ’e i te ha’apurarara’a atu i tō rātou mau ta’ata tīa’i, ’e i te tāho’ora’a atu i tō’u mau ’enemi ē tae noa atu i te toru ’e te maha o te u’i nō rātou ’o tei au ’ore roa mai iā’u nei.
31 Nā mua a’era, ’ia rahi roa tō’u nu’u, ’e ’ia ha’amo’ahia ho’i i mua iā’u nei, ’ia riro te reira mai te mahana te ’ana’ana ’e mai te marama te teatea, ’e ’ia riro tōna mau reva ’ei mea mata’uhia e te mau nūna’a ato’a ;
32 ’Ia fa’ahepohia te mau bāsileia o teie nei ao ’ia fā’i mai ē, ’o te bāsileia nō Ziona ra ’o te bāsileia iho ā ïa nō tō tātou Atua ’e tōna Mesia ho’i, nō reira ’ia auraro tātou i tāna mau ture.
33 ’Oia mau tē parau atu nei au ia ’outou na, e mea ti’a ïa iā’u ’ia fāri’i te mau peresibutero mātāmua nō tā’u ’ēkālesia nei i tō rātou ’ōro’a hiero nō ni’a mai i roto i tō’u fare, ’o tā’u i fa’aue atu ’ia patuhia i tō’u nei i’oa i te fenua nō Kirtland.
34 ’E ’ia ha’apa’ohia ’e ’ia fa’atupuhia taua mau fa’auera’a ra tā’u i hōro’a atu nō ni’a ia Ziona ’e tāna ra ture, i muri a’e i tōna fa’aorara’ahia ra.
35 I vai na ho’i te mahana nō te pi’ira’a, terā rā ’ua tae mai te tau i teienei nō te mahana nō te mā’itira’a ; ’e ’a tu’u atu ia rātou ’o tei ti’amā maita’i ’ia mā’itihia.
36 ’E e fa’a’itehia atu ïa i tō’u tāvini, nā roto i te reo o te Vārua, ’o rātou ’o tei mā’itihia ; ’e e ha’amo’ahia rātou ;
37 ’E mai te mea e pe’e rātou i te a’ora’a tā rātou i fāri’i, e noa’a ïa ia rātou te mana ’ia hope te mau mahana e rave rahi nō te fa’aoti i te mau mea ato’a nō Ziona.
38 ’E tē parau fa’ahou atu nei au ia ’outou na, ’a tītau māite atu i te parau hau, ’eiaha i te mau ta’ata ana’e ’o tei tā’iri mai ia ’outou, i te mau ta’ata ato’a rā ;
39 ’A fa’ati’a na i te reva tāpa’o nō te hau i ni’a, ’e ’a poro māite atu i te parau hau i te mau hope’a o te fenua nei ;
40 ’E ’a tu’u atu i te mau parau fa’ahau ia rātou ’o tei tā’iri mai ia ’outou na, mai te au i te reo o te Vārua ’o tē vai nei i roto ia ’outou, ’e e tupu te mau mea ato’a ’ei maita’i nō ’outou.
41 Nō reira, ’a ha’apa’o maita’i ; e inaha ; ’e ’a hi’o na, tei pīha’i iho ïa vau ia ’outou ē tae noa atu i te hope’a ra. ’Oia ïa. ’Āmene.