Tufa’a 11
E heheura’a tei hōro’ahia mai nā roto ia Iosepha Semita te peropheta, i tōna taea’e ra ia Hyrum Smith, i Harmony, i Pennsylvania, i te ’āva’e nō Mē 1829. ’Ua fāri’ihia teie nei heheura’a nā roto i te Urima ’e te Tumima ’ei pāhonora’a i tā Iosepha pure ’e tāna ho’i anira’a. Tē fa’a’ite ra te ’ā’amu nō Iosepha Semita ē ’ua fāri’ihia teie heheura’a i muri mai i te fa’aho’ira’ahia mai te Autahu’ara’a a Aarona.
1–6, E fāri’i te feiā rave ’ohipa i roto i te ’ō vine i te fa’aorara’a ; 7–14, ’Imi i te pa’ari, a’o i te parau nō te tātarahapa, ti’aturi i te Vārua ; 15–22, Ha’apa’o i te mau fa’auera’a, e ha’api’i mai i te parau a te Fatu ; 23–27, ’Eiaha e huna i te vārua nō te heheura’a ’e nō te tohu ; 28–30, E riro rātou ’o tei fāri’i i te Mesia ’ei mau tamari’i tamāroa nā te Atua.
1 Tē fātata mai nei te hō’ē ’ohipa rahi ’e te mea māere ho’i i te tupu mai i rotopū i te tamari’i a te ta’ata nei.
2 Inaha, ’o vau te Atua ; ’a ha’apa’o na i tā’u nei parau, e mea ora ’e te pūai ho’i, e mea ’oi a’e i te ’o’e mata piti, i te fa’ata’a-’ē-ra’a i te mau pona ivi ’e te puo ho’i ; nō reira, ’a ha’apa’o na i tā’u nei parau.
3 Inaha, ’ua teatea te ’āua ’e ’ua ineine roa nō te tau ’auhune ; nō reira, ’o tē hina’aro i te ’ō’oti ra, e māo’a ïa ’oia i tāna mauha’a ’ō’oti ma tōna pūai, ’e ’a ’ō’oti ai ’oi vai a’e te ao, ’ia ti’a iāna ’ia fāri’i mai i te fa’aorara’a mure ’ore nō tōna vārua i roto i te bāsileia o te Atua.
4 ’Oia ïa, ’o tē māo’a i tāna mauiha’a ’ō’oti ’e ’a ’ō’oti ai, ’ua mā’itihia mai ïa ’oia e te Atua.
5 Nō reira, mai te mea e ani mai ’oe iā’u nei, e fāri’i ïa ’oe ; mai te mea e pātōtō mai ’oe, e ’īritihia atu ïa ia ’oe.
6 I teienei, nō te mea ’ua ani mai ’oe, inaha, tē parau atu nei au ia ’oe, ’a ha’apa’o i tā’u mau fa’auera’a, ’e ’a ’imi i te mau rāve’a nō te fa’atupu ’e nō te ha’amau i te parau tumu nō Ziona.
7 ’Eiaha e tītau i te tao’a rahi, i te pa’ari rā ; ’E inaha, e fa’a’itehia mai te mau parau ’aro a te Atua ia ’oe, ’ei reira ’oe e faufa’ahia ai. Inaha, ’o tei noa’a iāna te ora mure ’ore ra, ’ua faufa’ahia ïa.
8 ’Oia mau, ’oia mau, tē parau atu nei au ia ’oe na, mai te au i tā ’oe e hina’aro iā’u nei, e nā-reira-hia ïa ia ’oe ; ’e mai te mea ē ’ua hina’aro ’oe, e riro mau ’oe ’ei mauha’a nō te rave i te mau ’ohipa maita’i roa i rotopū i teie nei u’i.
9 ’Eiaha tā ’oe e parau ’ē atu i tō teie nei u’i, maori rā te parau nō te tātarahapa. ’A ha’apa’o maita’i i tā’u mau fa’auera’a, ’e ’a tauturu i te fa’aho’ira’a mai i tā’u ’ohipa, mai te au i tā’u mau fa’auera’a, ’e e ha’amaita’ihia ïa ’oe.
10 Inaha, e hōro’a tā ’oe, ’e ’aore rā e hōro’a tē noa’a ia ’oe mai te mea e hina’aro ’oe i te reira iā’u nei ma te fa’aro’o, ma te ’ā’au parauti’a, ma te ti’aturi i te mana o Iesu Mesia, ’e ’aore rā i te mana nō’u, ’o tē parau atu nei ia ’oe na ;
11 Inaha ho’i, ’o vau ïa ’o tē parau atu nei ; inaha, ’o vau nei te māramarama ’o tē ’ana’ana mai nei i roto i te pōiri, ’e nā roto i tō’u nei mana, tē hōro’a atu nei au i teie nei mau parau ia ’oe na.
12 ’E i teienei, ’oia mau, ’oia mau, tē parau atu nei au ia ’oe na, ’a ti’aturi i terā Vārua ’o tē fa’auru mai ’ia rave i te ’ohipa maita’i—’oia ïa, ’ia rave i te parauti’a, ’ia haere noa ma te ha’eha’a, ’ia ha’avā ma te parauti’a, ’e ’o te reira ho’i tō’u Vārua.
13 ’Oia mau, ’oia mau, tē parau atu nei au ia ’oe na, e tu’u atu vau i tā tō’u nei Vārua ia ’oe na, ’o tē ha’amāramarama atu i tō ’oe ferurira’a, ’e ’o te fa’a’ī ho’i i tō ’oe vārua i te ’oa’oa ;
14 ’Ei reira ’oe e ’ite ai, ’e ’aore rā nā roto i te reira ’oe e ’ite ai i te mau mea ato’a tā ’oe e hina’aro iā’u nei, ’e tei riro ’ei tufa’a nō te mau mea parauti’a, nā roto i te fa’aro’o ’e te ti’aturi iā’u nei ē e fāri’i ’oe i te reira.
15 Inaha, tē fa’aue atu nei au ia ’oe ē ’eiaha ’oe e mana’o ē, ’ua parauhia ’oe ’ia a’o haere ē tae noa atu i te taime ’oe e pi’i-mau-hia ai.
16 ’A tīa’i ri’i fa’ahou ā, ē tae noa atu i te taime e noa’a mai ai ia ’oe tā’u parau, tā’u papa, tā’u ’ēkālesia, ’e tā’u ’evanelia ho’i, ’ia ’ite pāpū roa ’oe i tā’u mau ha’api’ira’a tumu.
17 ’Ei reira, inaha, mai te au i tō ’oe hina’aro, ’oia ïa, mai te au ho’i i tō ’oe na fa’aro’o, e nā-reira-hia atu ïa ia ’oe.
18 ’A ha’apa’o i tā’u mau fa’auera’a ; ’a māmū noa tō ’oe vaha ; ’a tītau ti’a mai na i tō’u Vārua.
19 ’Oia ïa, ’a ’ati mai iā’u nei ma tō ’ā’au ato’a, ’ia ti’a ia ’oe ’ia tauturu i te ’āfa’ira’a mai i te māramarama o taua mau mea tei parauhia ra—’oia ïa, te ’īritira’a i te parau nō tā’u ’ohipa ; ’a fa’a’oroma’i ē ’ia oti te reira ia ’oe na.
20 Inaha, ’o teie tā ’oe ’ohipa, ’ia ha’apa’o i tā’u mau fa’auera’a, ’oia ïa, ma tō itoito ato’a, ma tō mana’o ato’a, ’e ma tō pūai ato’a ho’i.
21 ’Eiaha e tītau ’ia a’o atu i tā’u nei parau, ’a tītau rā nā mua ’ia noa’a ia ’oe tā’u nei parau, ’ei reira tō ’oe arero e matara ai ; ’ei reira, mai te mea tē hina’aro ra ’oe, e noa’a ïa ia ’oe tō’u Vārua ’e tā’u nei parau, ’oia ïa, te mana o te Atua ē tae noa atu i te ha’apāpūra’a atu i te mana’o o te ta’ata nei.
22 ’E i teienei ’a māmū noa tō ’oe vaha ; ’a ha’api’i māite i tā’u parau ’o tei ha’apararehia na i rotopū i te tamari’i a te ta’ata nei, ’e ’a ha’api’i māite ato’a i tā’u parau ’o tē tae mai i rotopū i te tamari’i a te ta’ata nei, ’oia ho’i, ’o tē ’īritihia nei, ’oia ïa, ’e ’ia noa’a ia ’oe te mau mea ato’a tā’u e hōro’a atu i te tamari’i a te ta’ata nei i roto i teie nei u’i ; ’ei reira te mau mea ato’a e ’āmuihia ai i te reira.
23 Inaha, ’o Hyrum ’oe, tā’u tamaiti ; ’a mata na i te ’imi i te bāsileia o te Atua, ’ei reira e ’āmui-ato’a-hia mai ai te mau mea ti’a ato’a.
24 ’A patu na i ni’a i tā’u papa, ’oia ho’i tā’u ’evanelia ;
25 ’Eiaha e pāto’i i te vārua nō te heheura’a, ’eiaha ato’a i te vārua nō te parau tohu, e ’ati ho’i tōna ’o tē pāto’i i teie nei mau mea ;
26 Nō reira, ’a ha’aputu noa ’ei faufa’a i roto i tō ’oe ’ā’au ē tae noa atu i te tau i au i roto i tō’u nei pa’ari e haere atu ai ’oe.
27 Inaha, tē parau atu nei au i te feiā mana’o ti’a ato’a, ’e ’o tei māo’a i tā rātou mauha’a ’ō’oti ’ia ’ō’oti ra.
28 Inaha, ’o Iesu Mesia vau, te Tamaiti a te Atua. ’O vau nei te ora ’e te māramarama o te ao nei.
29 ’O vau ā teie ’o tei haere mai i tō’u ihora ’e ’aita tō’u iho i fāri’i mai iā’u ;
30 ’E ’oia mau, ’oia mau, tē parau atu nei au ia ’oe na ē, ’o rātou ato’a ’o tē fāri’i mai iā’u nei, ’o tā’u ïa e hōro’a atu i te mana ’ia riro ’ei mau tamari’i tamāroa nā te Atua, ’e ’ia rātou ato’a ho’i ’o tē ti’aturi i tō’u nei i’oa. ’Āmene.