Tufa’a 110
Te mau ’ōrama i fa’a’itehia mai ia Iosepha Semita te peropheta ’e ia Oliver Cowdery i roto i te hiero i Kirtland, i Ohio, i te 3 nō ’Ēperēra 1836. Te taime teie nō te hō’ē putuputura’a i te mahana Sābati. Tē fa’ati’a ra te ’ā’amu nō Iosepha Semita ē : « I te avatea, ’ua tauturu vau i te tahi nā peresideni i te ’ōperera’a i te ’Amura’a mā’a a te Fatu i tō te ’Ēkālesia, ma te fāri’i i te reira nō ’ō mai i te Tino ’Ahuru Ma Piti, ’o tei ha’amaita’i i te reira i ni’a i te ’iri mo’a i teie mahana. I muri a’e i tō’u ravera’a i teie ’ohipa nō tō’u mau taea’e, ’ua haere atu ra vau i te fata, ’e ’ua fa’atopahia te mau pāruru i raro, ’e ’ua pi’o ihora vau i pīha’i iho ia Oliver Cowdery, nā roto i te pure mo’a ’e ma te reo ’ore. I muri a’e i tō māua ti’ara’a i ni’a ’ia oti te pure, ’ua fa’a’itehia mai te ’ōrama i muri nei ia māua e piti ato’a ».
1–10, ’Ua fā mai te Fatu ’o Iehova ma te hanahana ’e ’ua fāri’i i te hiero nō Kirtland ’ei fare nōna ; 11–12, ’Ua fā mai Mose ’e Elia nō te fa’aho’i mai i tā rāua mau tāviri ’e tā rāua mau tau tu’ura’a ’evanelia ; 13–16, ’Ua ho’i mai Eliaha te peropheta ’e ’ua fa’aho’i mai i te mau tāviri nō tāna tau tu’ura’a ’evanelia mai tei fafauhia mai e Malaki.
1 ’Ua rave-’ē-hia atu te pāruru i tō māua ferurira’a, ’e ’ua ’īritihia te mata nō tō māua ’ite.
2 ’Ua ’ite mata atu ra māua i te Fatu i te ti’ara’a mai i ni’a i te rā’au pāruru o te fata, i mua ia māua ; i raro a’e i tōna ’āvae tē vai ra te hō’ē patu ’auro mau, ’e e mea huru re’are’a pōiri ri’i te reira.
3 ’E tōna nā mata mai te auahi ura ; te rouru o tōna upo’o ra, e mea teatea roa ïa mai te hiona mā roa ra ; tōna hōho’a mata ’ua hau a’e i te ’ana’ana o te mahana ; ’e tōna reo ra, mai te haruru ïa o te mau pape rahi i te tahe-pūai-ra’a, ’oia te reo o Iehova, i te nā-’ō-ra’a mai ē :
4 ’O vau nei te mātāmeha’i ’e te fa’ahope’a ; ’o vau teie e ora nei, ’o vau ïa ’o tei taparahihia ; ’o vau nei ho’i tō ’outou ti’a i mua i te Metua.
5 Inaha, ’ua fa’a’orehia tā ’ōrua mau hara ; ’ua mā roa ’ōrua i mua iā’u nei ; nō reira, ’a fa’ateitei mai i tō ’ōrua upo’o, ’e ’a ’oa’oa.
6 ’Ia ’oa’oa ho’i te ’ā’au o tō ’ōrua mau taea’e, ’e ’ia ’oa’oa te ’ā’au o tō’u mau ta’ata ato’a, ’o tei patu mai i teie nei fare i tō’u nei i’oa, nā roto i tō rātou pūai ato’a.
7 Inaha ho’i, ’ua fāri’i au i teie nei fare, ’e e vai ho’i tō’u i’oa i’ō nei ; ’e e fa’a’ite atu vau iā’u iho i tō’u mau ta’ata ma te aroha i roto i teie nei fare.
8 ’Oia ïa, e fā atu vau i tō’u mau tāvini, ’e e parau atu ho’i ia rātou i tō’u iho nei reo, mai te mea e ha’apa’o tō’u mau ta’ata i tā’u mau fa’auera’a, ’e ’aita rātou e ha’avi’ivi’i i teie fare mo’a.
9 ’Oia ïa e ’oa’oa te ’ā’au nō te tauatinira’a ’e te ’ahuru tauatinira’a o te ta’ata nō te mau ha’amaita’ira’a ’o tē nīni’ihia atu, ’e nō te ’ōro’a hiero ’o tei hōro’ahia atu i tō’u mau tāvini i roto i tei nei fare.
10 ’E e parare atu te ro’o nō teie nei fare i te mau fenua ’e’ē ; ’e ’o te ha’amatara’a teie nō te ha’amaita’ira’a ’o tē nīni’ihia atu i ni’a i te upo’o o tō’u mau ta’ata. ’Oia ïa. ’Āmene.
11 I muri iho i te ’ōpanira’ahia atu teie nei ’ōrama, ’ua ’īriti-fa’ahou-hia mai te mau ra’i ia māua nei ; ’e ’ua fā mai ra Mose ia māua, ’e ’ua hōro’a mai ra ia māua i te mau tāviri nō te ha’aputuputura’a i tō ’Īserā’ela mai nā tufa’a e maha mai o te ao nei, ’e nō te arata’ira’a mai i te mau ’ōpū hō’ē ’ahuru mai te fenua i te apato’erau mai ra.
12 I muri iho i teie, ’ua fā mai ra ’o Elia, ’e ’ua hōro’a mai ra i te tau tu’ura’a nō te ’evanelia a Aberahama, i te nā-’ō-ra’a mai ē, nā roto ia māua ’e tō māua hua’ai e ha’amaita’ihia ai te mau u’i ato’a i muri iho ia māua.
13 I muri iho i te ’ōpanira’ahia atu teie nei ’ōrama, ’ua fa’a’itehia mai ia māua te tahi atu ā ’ōrama rahi ’e te hanahana ; ’e ’ua ti’a mai ra ’o Eliaha te peropheta, ’o tei fa’atāhitihia atu i ni’a i te ra’i ma te ’ite ’ore i te pohe, i mua ia māua nei, ’e ’ua nā ’ō mai ra :
14 Inaha, ’ua tae roa mai te tau, ’o tei parauhia mai e te vaha o Malaki—i te fa’a’ite-pāpū-ra’a mai ē, e tonohia mai ’oia [o Eliaha te peropheta], hou te mahana rahi ’e te ri’ari’a o te Fatu e tae mai ai—
15 Nō te fa’afāriu mai i te ’ā’au o te mau metua i te mau tamari’i, ’e tō te mau tamari’i ho’i i te mau metua, ’o te tā’irihia mai te ao nei i te ’anatema—
16 Nō reira, tē tu’uhia atu nei te mau tāviri nō teie tau tu’ura’a ’evanelia i roto i tō ’ōrua nā rima ; ’e nā roto i teie e ’ite ai ’ōrua ē, ’ua fātata mai te mahana rahi ’e te ri’ari’a o te Fatu ra, ’oia tei te pae ’ōpani ïa.