1 Pudno kastoy ti kuna ti Apo kenka katulongak a Thomas: Nangngegko dagiti kararagmo; ket nakadanon dagiti pananglimosmo a ^apalagip kaniak, a para kadakuada, dagiti kabsatmo, a napili a mangpaneknek iti naganko ken ^bmangisaknap kadagiti amin a pagilian, kakabsat, pagsasao, ken tattao, ken naordenan babaen ti pannakaaramat dagiti katulongak.

2 Pudno kunak kenka, adda sumagmamano a banag iti pusom a siak, ti Apo, diak nakapagustuan.

3 Nupay kasta, no ^aipakumbabam ti bagim maitan-okkanto; ngarud, napakawanen amin dagiti basolmo.

4 ^aLiwliwaem ti pusom iti imatangko; ket paneknekam ti naganko, saan la a kadagiti ^bGentil, ngem kadagiti pay ^cHudio; ket irakurakmo ti balikasko iti intero a daga.

5 ^aMakiinnusayka, ngarud, iti tunggal bigat; ket isaknapmo koma nga inaldaw ti ^bpammallaag a timekmo; ket dimo itulok nga agdungsa dagiti agindeg no dumteng ti rabii gapu iti saom.

6 Ipakaammom koma ti pagyanam iti Zion, ket dimo ^aikkaten ti balaymo; ta siak, ti Apo, adda naindaklan nga aramid a paaramidko kenka, iti pannakairakurak ti naganko kadagiti annak ti tattao.

7 Ngarud, ^apatibkerem dagiti lomom para iti trabaho. Taparam met dagiti dapanmo, ta napilika, ket agturong ti danam iti kabambantayan, ken kadagiti adu a pagilian.

8 Ket babaen ti balikasmo adunto a nangato ti ^amaipababa, ken babaen ti balikasmo adunto a napakumbaba ti maitan-ok.

9 Tinto timekmo ti mangunget kadagiti managbasol; ket babaen ti panagungetmo mapukawto ti kinatarabitab ti dila ti managpardaya.

10 ^aAgpakumbabaka; ket kibinennakanto nga iturong ti Apo a Diosmo, ket itdennanto kenka ti sungbat dagiti kararagmo.

11 Ammok ti pusom, ken nangngegko dagiti kararagmo maipanggep kadagiti kabsatmo. Awan koma ti idaddadumam kadakuada iti ^apanagayat iti adu a sabsabali, ngem itdem ti panagayatmo kadakuada a kas iti bagim; ken itdem ti panagayatmo kadagiti amin a tao, ken kadagiti amin a mangipateg iti naganko.

12 Ken ikararagam dagiti kabsatmo a Sangapulo-ket-dua. Ballaagam ida a sibabatad para iti naganko, ket maballaaganda koma kadagiti amin a basolda, ken agbalinka a napudno iti imatangko para iti ^anaganko.

13 Ket kalpasan ti ^apannakasulisogda, ken adu a ^bpanagsagaba, adtoy, siak, ti Apo, riknaekto ida, ket no dida patangkenen ti puspusoda, ken dida agsukir a maibusor kaniak, ^cmabaliwandanto, ket agasakto ida.

14 Ita, kunak kenka, ket ania man a sawek kenka, sawek kadagiti amin a Sangapulo-ket-dua: Tumakderka ket patibkerem dagiti lomom, ibaklaymo ti ^akrusmo, surotennak, ket ^bpakanem ti karnerok.

15 Diyo itan-ok ti bagbagiyo; diyo ^asukiren ti katulongak a ni Joseph; ta pudno kunak kadakayo, addaak kenkuana, ket addanto ti imak iti ngatuenna; ket dagiti ^btulbek nga intedko kenkuana, ken kadakayo, saanto a maala kenkuana agingga nga umayak.

16 Pudno kunak kenka, katulongak a Thomas, sika ti lalaki a pinilik nga agiggem kadagiti tulbek ti pagariak, a maipanggep kadagiti Sangapulo-ket-dua nga agsaknap kadagiti amin a pagilian—

17 Ta sika koma ti katulongak a manglukat iti ridaw ti pagarian iti amin a lugar, a saan a pakaayan ti katulongak a ni Joseph, ken ti katulongak a ni ^aSidney, ken ti katulongak a ni ^bHyrum;

18 Ta isuda ti nangipabaklayak iti parikut dagiti amin a simbaan iti ababa a panawen.

19 Gapuna, sadino man ti pangibaonandanto kenka, mapanka, ket addaakto kenka; ket sadino man a lugar a pangipakdaaram iti naganko maluktanto kenka ti ^anasamay a ridaw, tapno awatenda ti balikasko.

20 Asino man a ^amangawat iti balikasko, awatennak, ket asino man a mangawat kaniak, awatenna ida, ti Umuna a Panguluen, nga imbaonko, nga inaramidko a mamalbalakad kenka para iti naganko.

21 Ket manen, kunak kenka, nga asinonto man a pangtedam iti naganko, babaen ti timek dagiti kabsatmo, dagiti ^aSangapulo-ket-dua, nga insingasing ken inikkam iti ^bpammalubos, maaddaanto iti bileg a manglukat iti ridaw ti pagariak iti sadino man a pagilian a pangibaonam kadakuada—

22 No la ketdi agpakumbabadanto kaniak, ken tungpalenda ti balikasko, ken ^adumngegda iti timek ti Espirituk.

23 Pudno, pudno, kunak kenka, sallukobanto ti ^asipnget ti daga, ket nabengbeng ti kinasipnget iti panunot dagiti tao, ket ^bmadadael amin a lasag iti imatangko.

24 Adtoy, napardasto nga umay ti ^apanagibales kadagiti agindeg iti daga, aldaw ti pungtot, aldaw a panagpuor, aldaw a naliday, a ^bpanagsangit, a panagleddaang, ken panagladingit; ket kas iti alipugpog agsaknapto iti intero a rabaw ti daga, kuna ti Apo.

25 Ket ^amangruginto iti balayko, ket manipud iti balayko, agwarasto, kinuna ti Apo;

26 Umuna manipud kadakayo, kinuna ti Apo, a ^anangibaga a mangammo iti naganko ken saan a ^bmakaammo kaniak, ken ^cnagtabbaaw kaniak iti uneg ti balayko, kinuna ti Apo.

27 Ngarud, kitaenyo a diyo pagparikuten ti bagbagiyo maipanggep kadagiti pakaseknan ti simbaanko iti daytoy a lugar, kinuna ti Apo.

28 Ngem ^apatarnawenyo ti puspusoyo iti imatangko; ket kalpasanna ^bmapankayo iti intero a lubong, ket ikasabayo ti naganko iti tunggal parsua a di pay nakaawat iti daytoy;

29 Ket isu a ^amamati ken ^bmabuniagan maisalakanto, ket isu a saan a mamati, ket saan a mabuniagan, ^cmailunodto.

30 Ta kadakayo, a ^aSangapulo-ket-dua, ken isuda, nga ^bUmuna a Panguluen, a naituding kadakayo nga agbalin a mamagbagayo ken panguloyo, ti nakaitedan ti bileg daytoy a kinasaserdote, para kadagiti maudi nga aldaw ken iti maudi a gundaway, nga isu ti ^cdispensasion ti pannakatungpal dagiti panawen.

31 Ania man a bileg nga iggemyo, a mainaig kadagiti amin nga immawat iti dispensasion iti ania man a kanito manipud iti rugi ti panagparsua;

32 Ta pudno kunak kadakayo, dagiti ^atulbek ti dispensasion, nga inawatyo, ^bnaggapu kadagiti amma, ken kamaudiananna, naited kadakayo manipud iti langit.

33 Pudno kunak kadakayo, adtoy anian a kinaindaklan ti naituding kadakayo. ^aDalusanyo ti puspusoyo ken dagiti pagan-anayyo, no saan ^bmadawat kadagiti imayo ti dara daytoy a kaputotan.

34 Agtalinaedkayo a napudno agingga nga umayak, ta umayak a di ^aagtantan; ket adda kaniak ti gunggonak a panggunggonak iti tunggal tao a maibatayto iti ^baramidna. Siak ti Alpha ken Omega. Amen.