1 Pudno kastoy ti kuna ti Apo kenka, katulongak a ^aJoseph Smith, Jun., ken kasta met iti katulongak a ni ^bSidney Rigdon, ken kasta met iti katulongak a ni ^cHyrum Smith, ken dagiti mamagbagayo a natudingan ken matudinganto kalpasanna;

2 Ken kasta met kenka, katulongak nga ^aEdward Partridge, ken dagiti mamagbaga;

3 Ken kasta met kadagiti napudno a katulongak nga adda iti nangato a konseho ti simbaanko iti Zion, ta kastoyto ti pannakaawagda, ken kadagiti amin nga elder ken tattao ti kuak a Simbaan ni Jesucristo dagiti Santo iti Ud-udina nga Aldaw, a nagsaknap iti sangalubongan;

4 Ta kastoyto ti pannakaawag ti ^asimbaanko kadagiti ud-udina nga aldaw, nga isu ^bTi Simbaan ni Jesucristo dagiti Santo iti Ud-udina nga Aldaw.

5 Pudno kunak kadakayo amin: ^aTumakderkayo ket agrimatkayo, tapno ti silawyo agbalin a ^bwagayway kadagiti pagilian;

6 Ken tapno ti ^apanaguummong a sangsangkamaysa iti daga ti ^bZion, ken kadagiti ^cistakana, agbalin a salakan, ken ^dpagkamangan no agbagyo, ken no ^emaibukbok ti pungtot nga awan lalaokna iti intero a daga.

7 Agbalin koma ti siudad, ti Far West, a nasantuan ken maikkan-pateg kaniak; ket maawaganto iti kasantuan, ta ^anasantuan ti daga a pagtaktakderanyo.

8 Ngarud, bilinenkayo a ^amangbangon iti balay a para kaniak, a paguummongan a sangsangkamaysa dagiti santok tapno ^bagdaydayawda kaniak.

9 Ket adda koma pangirugian iti daytoy nga aramid, ken pamuon, ken panangisagana a trabaho, iti sumuno a kalgaw;

10 Ket marugian koma iti maikapat nga aldaw ti sumuno a Hulio; ket manipud iti dayta nga aldaw a pagtrabahuen koma a sireregta dagiti taok a mangbangon iti balay a mainagan kaniak;

11 Ket baliwandanto koma manen ti mangikabil iti pamuon ti ^abalayko kalpasan ti ^bmakatawen manipud ita nga aldaw.

12 Isu nga agtrabahoda koma a sireregta manipud iti dayta nga aldaw agingga a malpas, manipud iti panulina agingga iti tuktokna, agingga nga awanen ti nabati a di pay nalpas.

13 Pudno kunak kadakayo, saan koman nga umutang ni katulongak a Joseph, wenno ni katulongak a Sidney, wenno ni katulongak a Hyrum, para iti pannakabangon ti balay a mainagan kaniak;

14 Ngem mabangon koma ti balay a mainagan kaniak a maibatay iti ^apagtuladan nga ipakitakto kadakuada.

15 Ket no bangonen dagiti taok a saan a maibatay iti pagtuladan nga ipakitakto iti panguluenda, diakto awaten manipud kadakuada.

16 Ngem no bangonen dagiti taok a maibatay iti pagtuladan nga ipakitakto iti panguluenda, a ni katulongak a Joseph ken dagiti mamalbalakadna, awatekto manipud kadagiti ima dagiti taok.

17 Ket manen, pudno kunak kadakayo, pagayatak a maidaras ti pannakabangon ti siudad ti Far West babaen ti panaguummong dagiti santok;

18 Ken kasta met a nasken nga adda maituding a luglugar para kadagiti ^aistaka iti luglugar iti aglawlaw, a maipakitanto iti katulongak a ni Joseph, manen ken manen.

19 Ta adtoy, addaakto kenkuana, ket pasantuekto iti imatang dagiti tao; ta isu ti nangyawatak kadagiti ^atulbek daytoy a pagarian ken panagserbi. Pudno a kasta. Amen.