Seksen 118
Revelesen we Lod i givim tru long Profet Josef Smit, long Fa Wes, Misuri, long 8 Julae 1838, olsem ansa long prea ia, “Soem tingting blong yu, O Lod, long saed blong Olgeta Twelef.”
1–3, Lod bae i givim ol samting we ol famli blong Olgeta Twelef oli nidim; 4–6, Ol emti spes insaed long Olgeta Twelef oli nomo emti.
1 I tru, olsem ia nao Lod i talem: Bae i mas gat wan konfrens we oli mas holem naoia; Olgeta Twelef oli mas oganaes; mo oli mas jusum ol man blong atekem ples blong olgeta we oli bin foldaon.
2 Wokman blong mi, aTomas, i mas stap blong smol taem long graon blong Saeon, blong hem i printim toktok blong mi.
3 Olgeta narafalawan we oli stap, oli mas gohed blong prij stat long aoa ia i go, mo sapos oli mekem hemia wetem wan hat we i stap daon, wetem fasin blong no stap flas mo afasin blong putum tingting i stap daon, mo bfasin blong gat longfala tingting tru long hadtaem, mi, Lod, mi givim olgeta wan promes se bae mi givim wanem we ol famli blong olgeta oli nidim; mo wan doa we i wok bae i open long olgeta, stat long naoia i go.
4 Mo long nekis Springtaem, olgeta oli mas aot blong go krosem ol bigfala wota, mo longwe, oli mas taltalemaot gospel blong mi, gospel blong mi we i fulwan, mo testifae abaot nem blong mi.
5 Letem olgeta oli mas aot long olgeta sent blong mi long siti blong Fa Wes, long nambatwantesikis dei blong Epril we i stap kam, long ples we bae oli stap bildim haos blong mi, Lod i talem.
6 Mo letem oli jusum wokman blong mi, Jon Teila, mo tu, wokman blong mi, Jon E. Pej, mo tu, wokman blong mi, Wilfod Wudrof, mo tu, wokman blong mi Wilad Rijads, blong oli mas fulumap ol ples blong olgeta we oli bin foldaon, mo blong oli mas letem olgeta ia oli save long niu koling blong olgeta.