Tufa’a 118
E heheura’a tei hōro’ahia mai nā roto ia Iosepha Semita te peropheta, i Far West, i Missouri, i te 8 nō Tiurai 1838, ’ei pāhonora’a i teie tītaura’a : « ’A fa’a’ite mai ia mātou i tō ’oe hina’aro, e te Fatu, nō ni’a i te Tino ’Ahuru Ma Piti ».
1–3, Nā te Fatu e ha’apa’o i te mau ’utuāfare o te Tino ’Ahuru Ma Piti ; 4–6, ’Ua monohia te mau pārahira’a vata i roto i te Tino ’Ahuru Ma Piti.
1 ’Oia mau, tē nā ’ō mai nei te Fatu : ’Ia fa’aterehia te hō’ē ’āmuira’a rahi i teie nei ; ’ia fa’anahonahohia te Tino ’Ahuru Ma Piti ; ’e ’ia mā’itihia te tahi mau ta’ata nō te mono i te ti’ara’a o te feiā i topa i roto i te hape.
2 ’A tu’u atu i tō’u tāvini ra ia Thomas ’ia fa’aea ri’i i te fenua nō Ziona, nō te nene’i i tā’u parau.
3 ’A tu’u atu i te toe’a ’ia poro haere mai taua hora atu, ’e mai te mea e rave rātou i te reira ma te ’ā’au ha’eha’a, te marū, te ha’eha’a ’e te fa’a’oroma’i ato’a, e hōro’a atu ïa vau, ’o te Fatu, i te hō’ē fafaura’a ia rātou ’e e ha’apa’o vau i tō rātou mau ’utuāfare i te mau mea e ti’a nō te orara’a ; ’e e ’īritihia mai te ’ōpani nō te manuiara’a ia rātou, mai teie taime atu ā.
4 ’E i te ha’amatara’a nō te tau māhanahana i muri nei, ’a tu’u atu ia rātou ’ia tere atu i terā pae mai nō te mau pape rahi, ’e i reira ’a poro haere ai i tā’u ’evanelia, i te ’īra’a ho’i nō te reira, ’e ’ia fa’a’ite pāpū atu i te parau nō tō’u nei i’oa.
5 ’A tu’u atu ia rātou ’ia fa’aru’e mai i tō’u feiā mo’a i te ’oire nō Far West, i te piti ’ahuru ma ono nō ’Ēperēra i muri nei, i ni’a i te vāhi patura’a nō tō’u nei fare, tē nā reira mai nei te Fatu.
6 ’Ia fa’ata’ahia tō’u tāvini ra ’o John Taylor, ’e ’o tō’u tāvini ra ’o John E. Page, ’e tō’u ato’a ra tāvini ’o Wilford Woodruff, ’e tō’u ato’a ra tāvini ’o Willard Richards, nō te mono i te ti’ara’a o te feiā i topa i roto i te hape, ’e ’ia fa’a’ite-mana-hia atu ho’i tō rātou fa’auera’a.